लुका 23
23
येशु पीलातुगी दोङदु
(मेथा २७:१-२,११-१४; मारकु १५:१-५; योहान्ना १८:२८-३८)
1होदे स्याम्ने छोक्मी घीरी लारी, येशुला पीलातुगी दोङदु ठीक्पालाक। 2खुङक्याई खोङबाला देरे क्यो़न चुक्ती ॱनेवालाक, “मी दी होरी मीक्याला खोक्पा ग्याङगीन धाङ रोमापा ग्यावु केसारला ठा ज्याङयेला, मीक्याला काक्कीन धाङ खोराङला ग्यावु मास्यीका हीन ॱनागीनगो, हीकी थोजुङ।”
3होझ्येरी पीलातुगी खोङबाला ढीवालाक, “ख्यो़ याहुदापाक्याई ग्यावुगो हीने?”
धेनी येशुगी सुवालाक, “खेराङ राङगी देरे सुङालाक।”
4धेनी पीलातुगी क्षो़पो़न क्षेक्या धाङ मीछोकक्याला ॱनेवालाक, “ङी मी देला क्यो़न चुक घोये दो़न घीया ॱमेथोङा।”
5हीना खुङक्याई उजुक झ्येरी ॱनेवालाक, “दे मी दी गालील ग्यारापने गो चुक्ती, दे थुक्पे युदेया घीरीला राङगी क्षो़ ॱलाप्ती मीक्याला टुक्ई।”
6धेनी पीलातुगी दे घोरती, “मी दे गालीलपा ले?” ॱनेरी ढीवालाक।
येशु हेरोदेगी दोङदु
7धेनी येशु हेरोदे ग्यावुगी साजागी मी लाक ॱनेरी ॱहाघोरती, होदे घाङला हेरोदे येरुसालेमदुराङ झ्येरी, पीलातुगी खोङबाला हेरोदेचारु झावालाक। 8धेनी हेरोदेगी येशुगी कोरला घोर हो़तालाक धेनी खोङबाने ताकक्या थोङये रेवा झ्येरी, खोङबाला युन रीङाने ॱहाला थोङी दो़ हो़तालाक। धा येशुला ज्याली घाङला खो ॱमीच्यीकी ङ्यामो घेवालाक। 9होझ्येरी खी़ येशुला ढीवा माङा कुवालाक हीना खोङबागी लेन च्यीया ॱमानावालाक। 10धेनी क्षो़पो़न क्षेक्या धाङ क्षो़ठीमगी ॱलोपो़नक्या लारी, ङारती खोङबाला क्यो़न चुक्पालाक। 11धेनी हेरोदे धाङ ॱमाक्मीक्याई, खोङबाला ॱमेटा पाप्ती क्षाले ग्याप्पालाक। धेनी खोङबाला घो़ खाक्क्षे च्यीक को़न्दी, पीलातुचारु ॱलोक्ती झावालाक। 12होदे ङीमागोराङ पीलातु धाङ हेरोदे रोवा झ्युवालाक घीझ्येरी ॱनाना होदे एन्ला खोङ ङीउ ॱमेछामालाक।
पीलातुगी येशुला क्षेपा कावा
(मेथा २७:१५-२६; मारकु १५:६-१५; योहान्ना १८:३९;१९:१६)
13धेनी पीलातुगी क्षो़पो़न क्षेक्या धाङ पो़न्पोक्या धाङ मीमाङक्याला भो़री, 14खुङक्याला ॱनेवालाक, “मीक्याला खोक्पा ग्याङी ॱनेरी, खेक्याई दे मीला ङीचारु ठीक्ती होजुङ। धेनी खीकी दोङदुराङ ङी खोला ताक्चा झ्येरी, खीकी खी़ खाला काका क्यो़न्जुकक्याई क्यो़न घीया दे मीला थोङगी मीदुक। 15धेनी हेरोदेगीयाः घीया क्यो़न ॱमाथोवा, खोला होरी चारुराङ ॱलोक्ती झाजुङ। धा तो़, खोला से घोगीन लेगा खी़ घीया माझ्येदुक। 16होझ्येरी ङा खोला ताजाक श्युरये क्षेपा कारी ताङयेहीन।”
17[याहुदापाक्याई थारपा थोप्था पेसाकगी धी़छेनगोला पीलातुगी चो़न्पा च्यीकला ॱलो़ ताङ घोगीलाक।]#२३:१७ माङक्षे गीरीक सुङरापगी धेबक्याला १७ ढीक मेतालाक। 18धेनी होदे मीछोक घीरीगी फेरा ग्याप्पालाक, “मी देला सो़ धेनी हीकी क्षीला बारब्बाला ॱलो़ ताङरो झ्यी।” 19बाराब्बा ॱनागीन मीगी़ होदे ग्याजादु ठुक ॱलावालाक धेनी मी सेदी चो़न्खाङदु श्याक हो़तालाक।
20धेनी पीलातुगी येशुला ॱलो़ ताङयेगी दो़पा झ्येरी, धाब्ले खुङक्याला घोवा ग्याप्पालाक। 21हीना खुङक्याई केक ग्याप्ती, “ग्याङस्यीङ खाला क्योङ। खोला ग्याङस्यीङ खाला क्योङ!” ॱनेरी ॱनेवालाक।
22पीलातुगी थेङमा सुम्बाला खुङक्याला ॱनेवालाक, “घीझ्येरी? मी दी ङेन्पा घी झ्येदो? ङी खोला सेयेगी क्षेपा का घोगीन क्यो़न घीया ॱमेथोङा। होझ्येरी खोला ङा ताजाक श्युरती ताङयेहीन।”
23धेनी मीक्याई उजुक झ्येरी खोला ग्याङस्यीङला क्याङ घोगुलाक ॱनेरी, ॱयोल्ले के क्षे ग्याप्पालाक। धेनी खुङक्याई केक ग्याप्ती ग्यावालाक। 24होझ्येरी पीलातुगी खुङक्याई ॱनागीन च्योक्रे झ्यीयेला का ॱनावालाक। 25धेनी खुङक्याई श्युगीन ठुक ॱलारी धाङ मी सेदी, चो़न्खाङदु छी़छा मीगोला पीलातुगी तो़न्बालाक हीना येशुला खुङक्याई थेगीनगो झ्यीयेला खुङक्याला ची ग्याप्पालाक।
येशु ग्याङस्यीङ खाला
(मेथा २७:३२-४४; मारकु १५:२१-३२; योहान्ना १९:१७-२७)
26धेनी ॱमाक्मीक्याई येशुला होदेने ठीक्ती डी़ घाङला, कुरेनेपा सीमोन ॱनागीन मी च्यीक राङगी युने होदे स्योकला हुङी हो़तालाक। धेनी खुङक्याई खोला शीम्दी, येशुगी ग्याङस्यीङगो खेरतु च्युक्पालाक। 27धेनी मीछोक क्षे च्यीक खोङबागी स्याबाला डावालाक। धेनी होदुरु खोङबागी क्षीला ङुगीन धाङ ङुता ग्याप्कीन केमीक्या हो़तालाक। 28खुङक्या स्योकला शीक्ती येशुगी सुवालाक, “येरुसालेमगी भोमोक्याओ, ङी क्षीला माङु हीना खेक्या खेराङ धाङ खेरी टुवाक्या क्षीला ङी़। 29घीझ्येरी ॱनाना, ‘राप्चेक्या धाङ टु के माङ्युङगीन धाङ होमा तेर माङ्युङगीन भोमोक्या घीन्गी सोदे क्षे।’ ॱनेरी, ॱनागीन ङीमाक्या हुङी हो़तालाक। 30होदे घाङला मीक्याई घाङरीक्याला, ‘हीकी खाला ल्हीम’ धेनी रीक्याला ‘हेक्याला कोप।’#होशे १०:८ ॱनेरी ॱनागीलाक। 31घीझ्येरी ॱनाना खुङक्याई स्यीङदोङ ॱङोम्पो हो़ती घाङला, देरे झ्यीना स्यीङदोङ काम्ना घी झ्यीदी हेटी़?”
32धेनी खुङक्याई श्येम्मा झ्याक्पा ॱङीला, खोङबामुला सेयेला ठीक्ती सोवालाक। 33खुङक्या गोरी़ ॱनागीन साजागोला ॱलेप्पालाक। धेनी होदुरु खोङबाला ग्याङस्यीङ खाला क्याङबालाक धेनी झ्याक्पा ॱङीउने च्यीकला, खोङबागी ॱये स्योक धाङ श्येम्माला ॱयो़न स्योकला क्याङबालाक।
34धेनी येशुगी सुवालाक, “ङी याप, देक्याला घोङपा ॱनाङरो ॱनाङ घीझ्येरी ॱनाना देक्याई घी झ्यीगीनगो देक्या ॱमेस्येलालाक।” धेनी ॱमाक्मीक्याई येशुगी घोलाकगो गेन ग्याप्ती, खोराङक्या नाङदु घो़वालाक। 35मीक्या लाङदी तेरी धे हो़तालाक हीना पो़न्पोक्याई खोङबाला ॱमेज्यु तारी ॱनेवालाक, “दे मी देगी श्येम्माक्याला क्योप्जुङ। धा दे को़न्क्षोकगी दाम्दा मास्यीकागो हीन्ना खोराङलाः क्योप्पास्योक।”
36धेनी ॱमाक्मीक्यागीयाः होरी खोङबाला घुन्क्षाङ क्युरमुगो तेरती, ॱमेज्यु तारी ॱनेवालाक, 37“ख्यो़ याहुदापाक्याई ग्यावु हीन्ना, राङला क्योप।”
38धेनी खोङबागी उ खाला “दे याहुदापाक्याई ग्यावु लाक” ॱनेरी ढीक्ती ताक हो़तालाक।
39धेनी ग्याङस्यीङला ताक्ता झ्याक्पा ॱङीउने, झ्याक्पा च्यीकगी खोङबाला ॱमेटा पाप्ती ॱनेवालाक, “ख्यो़ मास्यीकागो माले? ख्यो़राङ धाङ हेक्याला क्योप!”
40हीना होदेला आङजी तारी श्येम्मागी़ ॱनेवालाक, “ख्यो़लाः क्षेपा देराङ फोक हो़तालाक, धोराङा को़न्क्षोकला जीक्टा मीझ्यीदा ले? 41होराङ ॱङीउला होरी लेगागी क्षेपा फोक घोगीनगो फोक्पालाक हीना दे मीगी लेगा ङेन्पा घीया माझ्ये हो़तालाक।”
42धेनी खी़ येशुला ॱनेवालाक, “येशु ला, खेराङ राङगी ग्यासीला फेई घाङला, ङाला ढेन्रो जे।”
43खोङबागी खोला सुवालाक, “ङा ॱङोन्ने ॱनाहीन, धीरीङराङ ख्यो़ ङीमुला नाम्खे श्यीङखामदु हुङगीलाक।”
येशु ढोङवा
(मेथा २७:४५-५६; मारकु १५:३३-४१; योहान्ना १९:२८-३०)
44धा ङीङमोगी क्षुजी च्युङङी झ्युवालाक धेनी क्षुजी सुम्बा थुक्पे, साज्या घीरीला नाक्थोई झ्युवालाक। 45धेनी ङीमागी हो़क डीप्पालाक धेनी क्षो़खाङगी योल्वागो खाक ॱङीला रावालाक। 46धेनी येशुगी सुङकेक क्षेला सुवालाक, “ङी याप, ङी सेम ङा खेराङगी क्षाकला पुयेहीन।” धेनी दे सुरी खोङबा ढोवालाक।
47धा ग्यापो़नगी दे थोरी, को़न्क्षोकला तो़टा तारी ॱनेवालाक, “ॱङोन्नेराङ दे मी दे क्यो़न मेगीन हीन्दाराक।” 48धेनी दे तायेला जोम्जा मीक्या घीरी दे थोरी, राङगी ढाङगोला दुङी-दुङी लोक्पालाक। 49धेनी खोङबागी ङोस्येगीन धाङ गालीलने खोङबागी स्याम्ला हुङगीन भोमोक्या ग्याङने, होदुरु झ्युजा घीरी लारी तेरी धेबालाक।
येशुगी कुफुङ कुङबा
(मेथा २७:५७-६१; मारकु १५:४२-४७; योहान्ना १९:३८-४२)
50-51धा होदुरु युदेयागी आरीमाथीया ॱनागीन ग्याजागी, योसेफ ॱनागीन मी शाङा ढाङपो च्यीक हो़तालाक। धेनी खो छोक्दी़गी छोक्मी च्यीक लाक धेनी खो खुङक्याई डो़ धाङ लेगाला ॱमाछाम्बालाक। खो को़न्क्षोकगी ग्यासीला रेवा झ्येरी धेहेतालाक। 52धा खो पीलातुचारु सोरी येशुगी कुफुङगो श्यी़वालाक। 53धेनी खोङबागी कुफुङगो ग्याङस्यीङने माला पाप्ती, रे च्यीकगी टीवालाक। धेनी नामाः फुङबु श्याक माङ्युङगीन ढाक्फुदु शो़सा धी़ठोदु श्याक्पालाक। 54धा ङासुगीन ङीमागो गो चुक्कु झ्येरी, होदे ङीमागो डाढीकगी ङीमोगो लाक। 55धेनी गालीलने खोङबागी स्याबाला हुङगीन केमीक्या योसेफगीमुला सोवालाक धेनी धी़ठोगो थोरी, खोङबागी फुङबु घाङगी झ्येरी श्याक्कीनगोवा थोवालाक। 56धेनी खुङक्या लोक्ती फुङबुला ढीशाङ धाङ पो़क्षु डाढीक झ्येवालाक। हीना ङासुगीन ङीमागोला क्षो़ठीमगी काला चीरी, खुङक्या ङा सी़वालाक।
Поточний вибір:
लुका 23: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
