योहान्ना 18
18
येशुला शीम्पा
(मेथा २६:४७-५६; मारकु १४:४३-५०; लुका २२:४७-५३)
1येशुगी दे काक्या सुङसारती, खोङबा ङेनेक्यामुला कीदोरोन ढोक्पोगी ॱहाकीनला, हो़गीन दुम्राला फेप्पालाक। खोङबा ङेनेक्यामुला होदे नाङदु जुवालाक। 2धा खोङबाला डागी लाक्पाला ची ग्याप्कीन युदालाः दे साजा दे स्येये हो़तालाक घीझ्येरी ॱनाना येशु ङेनेक्यामुला माङक्षे होदुरु थुक्वा जेदालाक। 3धा युदा ॱमाक्पुङ च्यीक धाङ क्षो़पो़न क्षेक्या धाङ फारुसीपाक्याई झाजा, क्षो़खाङगी ॱरुङमाक रीङगा ठीक्ती लाक्पादु डो़न्मे धाङ ॱलोकस्यु धाङ लाक्चाक्या, खेरती होदुरु होवालाक।
4धेनी येशुगी राङला घी झ्युङये हीन्गीन घीरी खेन्दा जेदी, दोङला फेप्ती खुङक्याला सुवालाक, “खेक्या सुला चाला हीनो?”
5खुङक्याई खोङबाला ॱनेवालाक, “नाजारेपा येशुला चालाहीन।”
धेनी येशुगी खुङक्याला सुवालाक, “ङा खोराङ हीन।” धेनी खोङबाला डागी लाकला ची ग्याप्कीन युदागोवा, खुङक्यामुला होदुरु लारी धे हो़तालाक। 6धेनी येशुगी खुङक्याला “ङा खोराङ हीन” सुरी सुङी घाङला, खुङक्या घोम्बा ग्यापला पो़री साला घेवालाक।
7याङ खोङबागी खुङक्याला धाब्ले ढीवा जेपालाक, “खेक्या सुला चाला हीनो?”
खुङक्याई ॱनेवालाक, “नाजारेपा येशुला चालाहीन।”
8येशुगी लेन ॱनावालाक, “ङी खेक्याला ङा खोराङ हीन ॱनेवी। होझ्येरी धा खेक्याई ङाला चाला हीन्ना, दे मीक्याला डोरु च्युक।”
9“खेराङगी ङाला ॱनाङनाक्याने सु च्यीकलाः ङी ॱमातोरहो़क।” सुरी खोङबागी सुङगीन दे डुप्तु च्युक्येला दे झ्युवालाक।
10धेनी सीमोन पेटोगी राङमुला हो़गीन राल्डीगो तो़न्दी, चो क्षो़पो़नगी ॱयोक्पो च्यीकगी आमच्योक ॱयेगो च्येपालाक। (होदे ॱयोक्पोगी़ मीङ माल्खु लाक।)
11येशुगी पेटोला सुवालाक, “राङगी राल्डी दे स्युब नाङला च्युक। यापगी ङाला ॱनाङना फोराने ङा ॱमीथुङये?”
येशु चो क्षो़पो़नचारु
12होदे स्याम्ने ॱमाक्पुङ धाङ खुङक्याई ॱमाक्पो़न धाङ याहुदापा ॱरुङमाकक्याई, येशुला शीम्दी दाम्बालाक। 13एन्ला खुङक्याई खोङबाला हान्नासचारु ठीक्पालाक, खो होदे लोगी चो क्षो़पो़न कायाफागी केमीगी आकी लाक। 14कायाफागो, “मीमाङक्याई दो़न्दु मी च्यीक स्यीना घागुलाक” ॱनेरी, याहुदापाक्याला ॱलापच्या तेरकीनगो लाक।
पेटोगी ङोलोक धाङपो
(मेथा २६:६९-७०; मारकु १४:६६-६८; लुका २२:५५-५७)
15सीमोन पेटो धाङ ङेने श्येम्मा च्यीक येशुगी स्याबाला डावालाक। होदे श्येम्मा ङेनेगी़ चो क्षो़पो़नला ङोस्येगीन झ्येरी, येशुमुला चो क्षो़पो़नगी ॱयाक्कुरु जुवालाक। 16हीना पेटो फीदी घोच्चारु लारी धेपालाक। होझ्येरी चो क्षो़पो़नला ङोस्येगीन ङेने श्येम्मागो फीला सोरी, घो ॱरुङगीन ॱयोक्मोला लाब तारी, पेटोला नाङदु ठीक्ती होवालाक।
17धेनी घो ॱरुङगीन ॱयोक्मोगी़ पेटोला ॱनेवालाक, “ख्यो़याः मी दी ङेनेक्याने च्यीक मालाक से?”
खी़ लेन ग्याप्पालाक, “ङा मेन।”
18धा ॱनाम ढाङमो झ्येरी ॱयोक्पोक्या धाङ ॱरुङमाकक्याई सोलागी मे तारी, होदुरु लारी मे ॱरो़री धे हो़तालाक। धेनी पेटो खुङक्यामुला लारी मे ॱरोई हो़तालाक।
येशुला चो क्षो़पो़नगी ढीवा
(मेथा २६:५९-६६; मारकु १४:५५-६४; लुका २२:६६-७१)
19धा चो क्षो़पो़नगी येशुला खोङबागी ङेनेक्या धाङ खोङबागी क्षो़ सुङगीनगी कोरला ढीवा कुवालाक।
20धेनी येशुगी खोङबाला लेन ॱनावालाक, “ङी ॱङो़न्सुमदु जीक्तेनला स्येहो़क। याहुदापाक्या घीरी जोम्जा छोक्खाङक्या धाङ क्षो़खाङदु, ङी च्योई क्षो़ तो़न्हो़क। ङी साङवागी थोक्ने घीया ॱमास्येहो़क। 21खेराङगी ङाला घीझ्येरी ढीवा कुला जेदा? ङी स्येगीन लाबक्या ङेन्गीन मीक्याला ढीया जे। ङी घी स्येगीनगो खुङक्याला स्येये हो़तालाक।”
22येशुगी दे सुरी, डामदु लारी धेता ॱरुङमाकक्याने च्यीकगी, खोङला डाम्चाक श्युरती ॱनेवालाक, “चो क्षो़पो़नला ख्यी़ लेन ग्याप्ताङगो देरे ले?”
23येशुगी खोला सुवालाक, “ङी स्येगीन लाब दे नोर हो़ना, होदेगी पाङपो तेर हीना ङी ॱनागीनगो, धेन्पा हीन्ना ख्यी़ ङाला घीझ्येरी श्युरा?” 24धा हान्नासगी खोङबाला होरे धाम्दालाराङ, चो क्षो़पो़न कायाफाचारु झावालाक।
पेटोगी ङोलोक ॱङीवा धाङ सुम्बा
(मेथा २६:७१-७५; मारकु १४:६९-७२; लुका २२:५८-६२)
25धा सीमोन पेटो लारी मे ॱरो़री धे हो़तालाक। धेनी खुङक्याई खोला ॱनेवालाक, “ख्यो़याः खी़ ङेनेक्याने च्यीक मालाक से?”
खी़ खेमेलेन्दा ॱनेवालाक, “ङा मेन।”
26पेटोगी आमच्योक चेचा मीगी़ पी़न्दा, चो क्षो़पो़नगी ॱयोक्पोक्याने च्यीकगी पेटोला ढीवालाक, “ङी ख्यो़ला खी़मुला दुम्रादु थोवा माले?” 27धेनी याङ पेटोगी खेमालेन्बालाक। धेनी लाम्साङ झ्याफोगी केक ग्याप्पालाक।
येशु पीलातुगी डुङदु
(मेथा २७:१-२,११-१४; मारकु १५:१-५; लुका २३:१-५)
28ॱङारोक ॱङात्ती खुङक्याई येशुला कायाफागी नाङने, चीख्यापगी फोडाङदु ठीक्पालाक। राङला ॱमेचाङा मेसोवा, पेसाकगी धी़छेन शायेगी क्षीला खुङक्या चीख्यापगी फोडाङ नाङदु माजुवालाक। 29होझ्येरी पीलातु खोराङ खुङक्याचारु फीला सोरी ॱनेवालाक, “खेक्या मी देला क्यो़न घी चुक्ये हो़तो?”
30खुङक्याई खोला ॱनेवालाक, “मी दे लेङेन झ्यीगीन मेन्ना, हीकी खोला खेराङ दोङदु ची ग्याप्येमेक।”
31पीलातुगी खुङक्याला ॱनेवालाक, “खेक्याराङ खोला ठीक्ती, खेराङक्याई ठीमला थी़न्गीन ठीम्चो़ झ्यी।”
धेनी याहुदापाक्याई खोला ॱनेवालाक, “मी सुलाः सेदु च्युक्येगी आङजा हेक्याला मेक।”
32दे नी येशुराङ घाङगी झ्येरी, ढोङये हीन्गीनगो तो़न्येला, खोराङगी सुङगीन कागो डुप्येगी क्षीला झ्युवालाक।
33धा पीलातु खोराङगी फोडाङ नाङदु सोरी, येशुला भो़री ॱनेवालाक, “ख्यो़ याहुदापाक्याई ग्यावुगो हीने?”
34येशुगी सुवालाक, “दे खेराङ राङगी थोक्ने सुङाले, याङना मी श्येम्मागी ङी कोरला खेराङला स्येजो?”
35पीलातुगी लेन ग्याप्पालाक, “ङा याहुदापा लाक से? ख्यो़री मीरीक धाङ क्षो़पो़न क्षेक्याई ख्यो़ला, ङी लाकदु ची ग्याप्जुङ। ख्यी़ घी झ्येवो?”
36येशुगी लेन जेपालाक, “ङी ग्यासी दे जीक्तेनगी मेन। ङी ग्यासी जीक्तेनगी हीन्ना, ङा याहुदापाक्याई लाकदु ॱमीछी़येला, ङी ॱयोक्पोक्याई टाप्यी हो़टु। हीना ङी ग्यासी दे जीक्तेनगी मालाक।”
37पीलातुगी खोङबाला श्यी़वालाक, “धा हाना, ख्यो़ ग्यावु च्यीक ले?”
येशुगी सुवालाक, “खेराङ राङगी ङा ग्यावु च्यीक लाक ॱनेरी सुजुङ। ङा धेन्पागी़ पाङपो झ्यीयेगी क्षीला केवालाक धेनी देगी क्षीलाराङ, ङा जीक्तेनदु होवाहीन। धेन्पागी हीन्गीनक्याई ङी काला ङेन्दालाक।”
38धेनी पीलातुगी खोङबाला श्यी़वालाक, “धेन्पा घी ले?” दे ॱनेसारती खो याहुदापाक्या हो़जारु फीला सोरी खुङक्याला ॱनेवालाक, “ङी मी दे नाङ क्यो़न घीया ॱमेङेदा। 39हीना पेसाकगी धी़छेनला खीकी क्षीला, ङी मी च्यीकला ॱलो़ ताङयेगी खीकी लुक्सो़ च्यीक हो़तालाक। होझ्येरी खीकी क्षीला ‘याहुदापाक्याई ग्यावु’ ॱनागीन देला ॱलो़ ताङयेगो, खेक्या दो़दी हो़ते?”
40हीना खुङक्याई धाब्ले फेरा ग्याप्ती ॱनेवालाक, “मी देला मालाक हीना बाराब्बाला ॱलो़ ताङरो ॱनाङ।” धा बाराब्बा नी झ्याक्पा च्यीक लाक।
Поточний вибір:
योहान्ना 18: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
