Markus 10
10
Yesus larang orang par jang bacere
10:1-12
(Matius 19:1-9)
1Abis dari kota Kapernaum, Yesus pi ka propinsi Yudea deng daera-daera di aer Yordan pung sabala. Di situ jua ada banya orang datang par Antua la sama biasa Antua kasi balajar dong. 2Tarus, ada orang Farisi satu dua orang datang par coba Antua. Dong tanya Antua kata, “Tuang Guru e, kalo iko atorang dalang Kitab Torat, laki bisa cere dia pung bini ka seng?”
3Mar Antua jawab dong, “Musa parenta kamong biking apa soal itu?”
4La dong jawab Antua, “Musa kasi ijin laki-laki cere dia pung bini asal dia kasi surat cere.”#Carita Ulang 24:1-4; Matius 5:31
5La Antua bilang par dong kata, “Justru tagal kamong pung hati karas sampe Musa tulis atorang tu par kamong. 6Mar seng bole bagitu! Barang waktu Allah biking dunya ni, Antua biking laki-laki deng parampuang.#Carita Mula-Mula 1:27, 5:2 7Tagal itu laki-laki nanti kasi tinggal dia pung mama-papa la jadi satu deng dia pung bini 8biar dong dua jadi satu.#10:7-8 Jadi satu: Teks bahasa Yunani bilang jadi “satu daging”. Satu daging pung arti bukang cuma hubungan laki-bini sa, mar jua satu dalang dong pung pikirang deng apa yang dong biking. Dalang Efesus 5:3-32, laki-bini pung hubungan tu macang deng Kristus deng jamaat. Lia Carita Mula-Mula 2:24. Jadi dong bukang dua lai, mar satu. 9Tagal itu, kalo Allah su biking dong dua jadi satu, jang paskali ada orang yang kasi pisa dong.”
10Waktu Antua deng Antua pung murid-murid su ada di ruma, dong tanya Antua soal apa yang Antua bilang tadi tu. 11La Antua bilang par dong kata, “Sapa sa yang cere dia pung bini la kaweng deng parampuang laeng, itu dia su maeng serong dari dia pung bini. 12Deng kalo parampuang sapa sa cere dia pung laki la kaweng deng laki-laki laeng, itu dia su maeng serong.”#Matius 5:32; Lukas 16:18; 1 Korintus 7:10-11
Yesus kasi berkat par anana kacil
10:13-16
(Matius 19:13-15; Lukas 18:15-17)
13Satu kali bagini, orang-orang bawa anana kacil par Yesus biar Antua taru tangang par kasi berkat par dong. Mar, Antua pung murid-murid tagor orang-orang tu. 14Waktu Antua lia bagitu, Antua mara la bilang par Antua pung murid-murid tu kata, “Kasi biar anana kacil tu datang par Beta! Jang pele-pele dong, tagal orang-orang yang macang dong tu yang jadi Allah pung orang-orang waktu Antua pegang parenta jadi Raja. 15Dengar bae-bae tagal apa yang Beta bilang ni batul! Sapa yang seng mau biking diri macang deng ana kacil par tarima Allah parenta dia, dia seng bisa jadi Allah pung orang waktu Antua pegang parenta jadi Raja.”#Matius 18:3
16Abis bilang bagitu, Antua polo anana tu la taru tangang la kasi berkat par dong.
Orang kaya susa jadi Allah pung orang-orang
10:17-31
(Matius 19:16-30; Lukas 18:18-30)
17Tarus, waktu Yesus dong bajalang kombali, ada laki-laki satu lari-lari datang par Antua la tikang lutu di muka Antua. Dia tanya Antua kata, “Tuang Guru yang bae! Beta musti biking apa biar beta bisa hidop tarus-tarus deng Allah?”
18La Yesus bilang par dia kata, “Mangapa kong ale bilang Beta bae? Seng ada satu orang lai yang bae, cuma Allah sa! 19Ale pasti tau Allah pung parenta yang bilang kata, ‘Jang bunu orang, jang maeng serong, jang pancuri, jang jadi saksi yang bicara seng batul-batul, jang potong orang pung hak, deng musti taru hormat par mama-papa.’ ”#Kaluar dari Mesir 20:12-16; Carita Ulang 5:16-20
20La dia bilang par Antua kata, “Tuang Guru e, beta su biking samua tu dari beta masi kacil lai.”
21Antua nganga dia deng sayang dia paskali la bilang kata, “Cuma masi ada satu lai yang ale balong biking. Pi jual ale pung harta samua la bage akang pung kepeng par orang-orang kasiang. Kalo ale biking bagitu, ale nanti dapa harta di sorga. Abis itu, datang kamari la iko Beta.”
22Waktu dia dengar Antua bilang bagitu, dia pung hati ancor la pi deng hati susa tagal dia pung harta banya.
23La Yesus bale muka nganga Antua pung murid-murid yang ada koliling Antua tu la bilang kata, “Orang kaya paleng susa jadi Allah pung orang-orang biar Antua pegang parenta jadi Raja par dong.”
24Antua pung murid-murid taherang-herang dengar itu. La Antua bale bilang par dong kata, “Anana e, manusia tu paleng susa jadi Allah pung orang-orang biar Antua pegang parenta jadi Raja par dong. 25Masi labe gampang onta saekor maso lobang jarong dari orang kaya jadi Allah pung orang biar Antua bisa pegang parenta jadi Raja par dia.”
26Antua pung murid-murid tamba herang dengar Antua bilang bagitu. La dong laeng bilang par laeng kata, “Kalo bagitu sapa bisa salamat?”
27Tarus, Antua nganga dong la bilang, “Memang manusia seng bisa kasi salamat dia pung diri sandiri, mar Allah bisa, tagal Antua bisa biking apa sa.”
28La Petrus bilang par Antua kata, “Tuang Guru e, katong ni su kasi tinggal samua-samua par iko Tuang Guru.”
29La Antua bilang kata, “Dengar bae-bae tagal apa yang Beta bilang ni batul! Sapa sa yang kasi tinggal dia pung ruma, ka dia pung sudara laki-laki ka sudara parampuang, ka dia pung mama-papa, ka dia pung anana, ka dia pung kabong, tagal iko Beta deng tagal kasi tau Kabar Bae, 30dia nanti dapa saratus kali labe banya dari apa yang dia kasi tinggal tu dalang dia hidop sakarang ni. Dia pasti dapa ruma, sudara laki-laki deng parampuang, mama, anana, deng kabong. Dia jua dapa macang-macang susa deng sangsara lai. La di dunya baru, dia nanti hidop tarus-tarus deng Allah. 31Mar banya dari orang basar nanti jadi orang kacil, la banya dari orang kacil nanti jadi orang basar.”#Matius 20:16
Yesus kasi tau par kali katiga kalo Antua nanti dapa bunu
10:32-34
(Matius 20:17-19; Lukas 18:31-34)
32Yesus deng Antua pung murid-murid bajalang ka kota Yerusalem. Antua bajalang di muka. Waktu itu Antua pung murid-murid taherang-herang la orang-orang yang iko Antua jua rasa taku. Tarus, Antua panggel Antua pung murid sapulu dua orang tu sakali lai la bicara deng dong sandiri soal apa yang nanti jadi par Antua. 33Antua bilang kata, “Sakarang ni katong ada bajalang ka kota Yerusalem. Di sana, Beta Ana Manusia ni nanti dapa kasi par imam-imam kapala deng guru-guru Torat. Dong nanti kasi jatu hukumang mati par Beta. La dong nanti kasi Beta par orang-orang bukang Yahudi 34par dapa hina, dapa luda, dapa cambok, deng dapa bunu. Mar akang pung tiga hari, Beta nanti hidop kombali.”
Sapa yang paleng basar dari Yesus pung murid-murid
10:35-45
(Matius 20:20-28)
35La Sebedeus pung ana Yakobis deng Yohanis datang dekat-dekat Yesus la bilang par Antua kata, “Tuang Guru e, katong mau minta apapa satu dari Tuang Guru. Katong minta biar Tuang Guru biking akang jua.”
36La Antua bilang par dong dua kata, “Kamong mau Beta biking apa par kamong?”
37La dong jawab Antua kata, “Tuang Guru e, kalo nanti Tuang Guru jadi Raja deng kuasa yang paleng hebat tu, katong minta biar katong bisa dudu parenta sama-sama deng Tuang Guru jua, satu di sabala kanang la satu lai di sabala kiri.”
38Mar Yesus bilang par dong dua kata, “Kamong seng mangarti apa yang kamong minta tu. Kamong bisa pikol sangsara deng dapa siksa macang Beta#10:38 Pikol sangsara deng dapa siksa macang Beta: Teks bahasa Yunani bilang, “Minong dari cawan yang Beta nanti minong deng dapa baptis macang yang Beta nanti dapa.” Dua-dua tu pung arti sama. nanti?”#Lukas 12:50
39La dong jawab Antua kata, “Katong bisa!”
Tarus, Antua bilang par dong kata, “Memang kamong nanti sangsara deng dapa siksa macang Beta. 40Mar, soal dudu di Beta pung sabala kanang deng sabala kiri, itu bukang Beta pung hak par ator akang. Tampa tu, Allah su kasi siap akang par orang-orang yang Antua su pili.”
41Waktu Antua pung murid sapulu yang laeng dengar apa yang Yakobis deng Yohanis minta tu, dong mara dong dua. 42Mar, Antua panggel dong samua la bilang kata, “Kamong su tau to kalo pamimping-pamimping deng orang-orang basar dari bangsa-bangsa, dong tindis dong pung rayat.#Lukas 22:25 43Mar kamong ni seng bole bagitu! Sapa yang mau jadi yang paleng basar dari kamong, dia musti tolong orang laeng, macang deng orang suru-suru. 44La sapa yang mau jadi orang yang panting, dia musti jadi jongos par samua orang.#Matius 23:11; Markus 9:35; Lukas 22:26 45Barang, Beta Ana Manusia ni jua datang bukang biar orang karja par Beta, mar par karja par orang laeng deng kasi diri par mati par tabus banya orang dari dong pung dosa.”
Yesus kasi bae Bartimeus
10:46-52
(Matius 20:29-34; Lukas 18:35-43)
46Tarus, Yesus deng Antua pung murid-murid sampe di kota Yeriho. Waktu dong kaluar dari kota tu, orang banya kawang-kawang iko Antua. Waktu itu jua ada orang buta satu yang dudu minta-minta kepeng di pinggir jalang. Dia nama Bartimeus, Timeus pung ana. 47Waktu dia dengar kata Yesus orang Nasaret ada langgar di situ, dia bataria kata, “Yesus, Raja Daud pung Turunang e! Tolong kasi unju hati bae par beta jua!” 48Orang banya tagor dia, suru dia tado. Mar dia bataria labe basar lai, “Raja Daud pung Turunang e! Tolong kasi unju hati bae par beta jua!”
49Tarus, Yesus barenti la bilang kata, “Panggel dia kamari!”
La orang-orang bilang par dia kata, “Kasi kuat ale pung hati tu. Badiri kamari, Antua ada panggel ale!” 50Jadi, dia langsung lapas dia pung baju panjang luar, la paparipi badiri, la pi par Antua.
51La Antua tanya dia kata, “Ale mau Beta biking apa par ale?”
La dia bilang par Antua kata, “Tuang Guru e, beta mau dapa lia!”
52La Antua bilang par dia kata, “Pi jua! Tagal ale parcaya Beta, ale su bae!” Oras itu jua dia bisa dapa lia la iko Yesus deng bajalang sama-sama deng Antua.
Поточний вибір:
Markus 10: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
