Matius 27
27
Yesus dapa bawa ka Pilatus
27:1-2
1Pagi-pagi paskali, orang Yahudi pung imam-imam kapala deng pamimping-pamimping bakumpul la putus hukumang mati par Yesus. 2Dong ika Antua la bawa Antua par Gubernur Pilatus.#Markus 15:1; Lukas 23:1; Yohanis 18:28
Yudas mati
27:3-10
3Waktu Yudas yang jual Yesus tu lia Antua dapa putus par dapa hukum mati, dia manyasal paskali. Tarus, dia kasi pulang kepeng perak tiga pulu bua tu par orang Yahudi pung imam-imam kapala deng pamimping-pamimping 4la bilang kata, “Beta su bardosa tagal beta su jual orang yang seng pung sala la sakarang Antua mau dapa bunu.”
Mar dong jawab dia kata, “Katong seng pusing deng akang! Itu ale pung urusang sandiri!”
5Jadi, Yudas lempar kepeng perak tu dalang Tampa Sombayang Pusat. Tarus dia kaluar dari situ la pi gantong diri.
6Imam-imam kapala ambe kepeng perak tu la bilang kata, “Kepeng ni kepeng dara, jadi kalo iko katong pung atorang agama, katong seng bole kasi maso akang dalang kas Tampa Sombayang Pusat.” 7Abis baku tukar pikirang, dong putus par bali tana sapanggal deng akang kepeng tu dari orang yang biasa biking barang-barang ruma tangga dari tana liat. Dong bali tana tu par jadi kuburang par orang-orang bukang Yahudi. 8Itu kong mangapa sampe oras ni orang kasi nama tana tu Tana Dara.#Yeremia 19:4b; Utusang pung Carita 1:18-19
9Deng bagitu apa yang dolo Allah pung Juru Bicara Yeremia bilang tu jadi. Dia bilang kata, “Dong tarima kepeng perak tiga pulu bua, harga yang orang-orang Israel su akor par bali Dia. 10La dong pake kepeng tu par bali tana dari tukang biking barang-barang ruma tangga dari tana liat, macang deng Tuhan pung parenta par beta.”#Sakaria 11:12-13; Yeremia 32:6-9
Yesus di muka Pilatus
27:11-26
(Markus 15:1-15; Lukas 23:1-5, 13-25; Yohanis 18:33—19:16)
11Tarus, Yesus dapa bawa ka Gubernur Pilatus par dapa sidang. La Pilatus tanya Antua kata, “Ale ni orang Yahudi pung Raja ka?”
La Antua jawab kata, “Bapa sandiri su bilang akang.”
12Mar waktu imam-imam kapala deng pamimping-pamimping tudu Antua, Antua seng jawab apapa. 13Jadi Pilatus bilang par Antua kata, “Ale seng dengar dong tudu ale banya macang itu?” 14Mar Antua seng jawab apapa lai sampe Pilatus herang paskali.
15Sabang kali orang Yahudi pung hari basar Paska, gubernur biasa kasi bebas satu orang dari bui iko orang banya pung mau. 16Waktu itu di dalang bui ada satu orang jahat yang nama Yesus Barabas. Samua orang kanal dia. 17Jadi waktu orang banya su bakumpul di gubernur pung istana, Pilatus tanya dong kata, “Kamong mau beta kasi bebas sapa par kamong? Yesus Barabas ka Yesus yang dapa panggel par Orang yang Allah su Angka par Kasi Salamat Manusia?” 18Pilatus bilang bagitu tagal dia su tau kalo dong bawa Yesus par dia tagal dong mangiri Antua.
19Waktu Pilatus ada dudu di kadera yang dia pake waktu jadi hakim par orang-orang pung parkara, dia pung bini kiring pasáng kata, “Jang ale campor deng orang batul tu pung parkara. Barang, tagal Dia, tadi malang beta mimpi sampe beta paleng taku.”
20Mar tagal imam-imam kapala deng pamimping-pamimping tusu-tusu mulu par orang banya tu, dong minta kasi bebas Barabas la Yesus dapa hukum mati. 21La Pilatus tanya dong kombali kata, “Dari dong dua ni, kamong mau beta kasi bebas sapa par kamong?”
La dong jawab dia kata, “Barabas!”
22Tarus Pilatus bilang par dong, “Kalo bagitu, beta musti biking apa Yesus yang dapa panggel par Orang yang Allah su Angka par Kasi Salamat Manusia ni?”
Dong samua jawab kata, “Salib Dia!”
23Mar Pilatus bilang par dong kata, “Mar Dia su biking kajahatang apa?”
Mar dong bataria labe tamba basar lai kata, “Salib Dia!”
24Waktu Pilatus lia kalo dia pung usaha seng ada hasil, baru orang banya tu jua su mulai kaco, dia ambe aer la basu tangang di muka orang banya tu la bilang kata, “Beta seng tanggong jawab deng dia pung kamatiang. Itu kamong pung urusang sandiri!”#Carita Ulang 21:6-9 25La orang banya tu bataria kata, “Biar katong deng katong pung anana cucu yang nanti tanggong hukumang par Dia pung kamatiang tu!”
26Tarus, Pilatus kasi bebas Barabas par dong mar suru tantara-tantara cambok Yesus la kasi Antua par dapa salib.
Tantara-tantara hina-hina Yesus
27:27-31
(Markus 15:16-20; Yohanis 19:2-3)
27Abis itu, gubernur Pilatus pung tantara-tantara bawa maso Yesus ka Pilatus pung kintal istana. Tarus, dong panggel tantara-tantara samua bakumpul ron Yesus. 28Dong kasi lapas Antua pung pakiang la kasi pake Antua deng baju panjang luar warna biji gandaria, macang deng apa yang raja biasa pake. 29Tarus, dong jua biking makota satu dari jaga pohong baduri, baru taru akang di Antua pung kapala. Dong kasi tongka buluh par Antua pegang di Antua pung tangang kanang. Abis itu, dong tikang lutu di muka Antua la hina-hina Antua kata, “Hormat, orang Yahudi pung raja!” 30Dong luda Antua la ambe buluh tu dari Antua la pukul Antua pung kapala ulang-ulang deng akang. 31Abis hina-hina Antua, dong kasi lapas baju panjang luar tu dari Antua la kasi pake Antua deng Antua pung pakiang kombali. Abis itu, dong bawa Antua kaluar dari situ par pi salib Antua.
Yesus dapa salib
27:32-44
(Markus 15:21-32; Lukas 23:26-43; Yohanis 19:17-24)
32Waktu tantara-tantara bawa Yesus ka luar kota par dapa salib, dong dapa laki-laki satu yang asal dari kota Kirene. Dia nama Simon. Dong paksa dia par pikol Yesus pung salib.
33Tarus dong sampe di tampa satu yang nama Golgota, yang pung arti ‘Tampa Tangkorak’. 34Di situ, dong kasi anggor yang su tacampor deng obat pait par Antua. Waktu Antua rasa akang, Antua seng mau minong akang. 35Abis dong salib Antua, dong buang undi par bage-bage Antua pung pakiang.#Lagu-Lagu 22:19 36La dong dudu di situ par jaga Antua. 37Di atas Antua pung kapala ada tulisang di papang sapanggal yang jadi alasang mangapa kong Antua dapa salib. Tulisang tu bilang: Ini ni Yesus, orang Yahudi pung Raja.
38Ada dua orang jahat yang dapa salib sama-sama deng Antua lai, satu di Antua pung sabala kanang la satu lai di Antua pung sabala kiri. 39Orang-orang yang langgar di situ hojat Antua la goyang kapala#Lagu-Lagu 22:8, 109:25 40la bilang kata, “Hui! Se ni yang bilang kata Se mau kasi rubu Tampa Sombayang Pusat la mau biking akang kombali dalang tiga hari sa to? Kalo Se tu Allah pung Ana, coba turung dari salib tu la kasi salamat Se pung diri!”#Matius 26:61; Yohanis 2:19
41Orang Yahudi pung imam-imam kapala, guru-guru Torat, deng pamimping-pamimping jua hina-hina Antua kata, 42“Dia bisa kasi salamat orang laeng, mar Dia seng bisa kasi salamat Dia pung diri sandiri. Kalo memang Dia tu orang Israel pung Raja, kasi tinggal Dia turung dari salib tu la katong parcaya Dia. 43Dia parcaya Allah deng bilang kata Dia tu Allah pung Ana. Jadi mari katong lia kata Allah mau datang tolong Dia ka seng.”#Lagu-Lagu 22:9 44Dua orang jahat yang dapa salib sama-sama deng Antua jua hina-hina Antua macang bagitu lai.
Yesus mati
27:45-56
(Markus 15:33-41; Lukas 23:44-49; Yohanis 19:28-30)
45Mulai dari jam sapulu dua siang, daera tu samua jadi galap sampe jam tiga sore. 46La kira-kira jam tiga sore bagitu, Yesus bataria kuat-kuat kata, “Eli, Eli, lama sabaktani?” Akang pung arti, ‘Sio Beta pung Allah, Beta pung Allah e! Mangapa kong kasi tinggal Beta?’#Lagu-Lagu 22:2 47Waktu satu dua orang dari samua yang badiri di situ dengar apa yang Antua bilang tu, dong bilang kata, “He, Dia panggel Allah pung Juru Bicara Elia!”
48Langsung, satu dari dong lari colo spons dalang anggor asang la cucu akang di buluh sapanggal, la kasi akang di Antua pung bibir biar Antua bisa isap akang.#Lagu-Lagu 69:22 49Mar orang-orang laeng bilang kata, “Kasi tinggal Dia bagitu! Mari katong lia kata Elia datang kasi salamat Dia ka seng.”
50Tarus, Antua bataria kuat-kuat lai la Antua putus napas.
51Skrek bagini, kaeng pampele basar#27:51 Kaeng pampele basar ni kasi pisa Ruang Paleng Kudus deng Ruang Kudus di Tenda Sombayang deng di Tampa Sombayang Pusat (Kaluar dari Mesir 26:31-33). dalang orang Yahudi pung Tampa Sombayang Pusat tarobe jadi dua dari atas sampe bawa. Ada tana goyang deng gunung-gunung batu tabala.#Kaluar dari Mesir 26:31-33 52Kubur-kubur tabuka la banya orang yang parcaya Allah yang su mati dapa kasi hidop kombali. 53La waktu Yesus su hidop kombali, dong kaluar dari kubur la pi ka Yerusalem, kota kudus tu, la banya orang lia dong.
54Waktu komandan kompi deng dia pung anana bua yang jaga Yesus lia tana goyang deng samua yang jadi tu, dong taku paskali la bilang kata, “Memang batul, Dia ni Allah pung Ana!”
55Di situ jua ada parampuang-parampuang banya yang lia Yesus dari jau sa. Dong su iko Antua dari propinsi Galilea par jaga kasi siap apa yang Antua parlu. 56Dari dong tu ada Maria Makdalena,#27:56 Maria Makdalena tu pung arti, ‘Maria dari kota Makdala’. Yakobis deng Yusuf pung mama Maria, deng Sebedeus pung bini.#Markus 15:40-41; Lukas 8:2-3, 23:49
Yesus dapa kubur
27:57-61
(Markus 15:42-47; Lukas 23:50-56; Yohanis 19:38-42)
57Akang pung amper malang, ada orang kaya satu nama Yusuf yang jua su jadi Yesus pung murid pi par Pilatus. Dia ni asal dari kota Arimatea. 58Dia pi par Pilatus par minta Yesus pung mayat. La Pilatus parenta par kasi Yesus pung mayat par dia. 59Tarus, Yusuf ambe Yesus pung mayat la bungkus Antua deng kaeng lenan puti barsi. 60Abis itu, dia pi bakubur Antua dalang dia pung kubur yang baru, yang dia su pahat di badang batu. Tarus, dia guling batu basar par tutu mulu kubur tu la pi. 61Mar Maria Makdalena deng Maria yang laeng tu tinggal dudu di muka kubur tu.
Yesus pung kubur dapa jaga
27:62-66
62Akang pung eso, pas orang Yahudi pung hari Barenti Karja, imam-imam kapala deng orang-orang Farisi pi sama-sama par Pilatus 63la bilang kata, “Bapa, katong inga, dolo waktu tukang parlente tu masi hidop, Dia bilang kata, ‘Beta mati, mar akang pung tiga hari Beta nanti hidop kombali.’#Matius 16:21, 20:19; Markus 9:31, 10:33-34; Lukas 9:22, 18:31-33 64Tagal itu, tolong parenta orang jaga kubur tu sampe hari katiga jua. Kalo seng, Dia pung murid-murid pi pancuri Dia pung mayat la bilang par orang-orang kata Dia su hidop kombali. Deng bagitu, Dia pung parlente kali ini labe hebat dari yang kamuka tu lai.”
65La Pilatus bilang par dong kata, “Bawa tantara-tantara ni la pi jaga kubur tu bae-bae!”
66Jadi dong pi ka kubur tu, la segel akang, la tantara-tantara jaga akang.
Поточний вибір:
Matius 27: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
