Neto'te 14
14
Abram boa fenfen mba Mélkisédék
1A lo be num ngelaṅ Amrafèl, mfen Shinear, Arjok, mfen Elasar, Kedorlaomer, mfen Elam, bo ngelaṅ Tidal, mfen Gojim, 2tshen ben ni ma' Bera, mfen Sodom ntsho, ma' Birsha, mfen Gomora ntsho, ma' Shinab, mfen Adma ntsho, ma' Shemeber, mfen Tseboim ntsho, bo mfen Béla ke Tsoar lo.
3Tshen ben ni tse'te mà tômbo' Sidim, z'a be mà dibantse ngwa là. 4Bo lo ke mfa' Kedorlaomer num ngu'njù ntshob bàa gham; a lo be kum ngu'njù ntshob tat gham bo ta tu yi. 5A lo be kum ngu'njù ntshob tàn gham Kedorlaomer boa fenfen tse bo à bo be là ma' ba Refaït ntsho Ashterot-Karnaim, ma' ba Zuzit ntsho Ham, ma' ba Emim ntsho Shavé-Kirjataim, 6boa ba Horia num mbat Seir tà nèn nkum tu kônga Paran z'a be mbaṅ kônkwa là. 7Bo be bèn njam nkum En-Mishpat z'a be Kadèsh là, ma' ba Amalék ntsho mum njoṅ yub ngô fa, boa ba Amor tse bo tete Hatsatson-Tamar là.
8Ndùlala fenfen Sodom, Gomora, Adma, Tseboim bo Béla ke Tsoar lo, tumte, nabte ntshu ntsho ntam njam bo tômbo' Sidim. 9Bo tam njam Kedorlaomer, mfen Elam, Tidal, mfen Gojim, Amrafèl, mfen Shinear bo Arjok, mfen Elasar, ma' yub ntsho. Fenfen kuà le' tse tàn ntsho. 10Ntô zin lo be njoṅ dù' fa mà tômbo' Sidim; mfen Sodom bo mfen Gomora kù, ngwù ntùm bwe, tshé' tse kù nèn num mbale. 11Ghatshùa ntsho lo' njoṅ tshunkàb fa Sodom bo Gomora, boa njoṅ yub jujù fa ze bo lé' là nèn yi. 12Bo lo' Lot mén mfèt Abram z'a ke ntswe Sodom nà boa njoṅ tshu tse fa nèn yi.
13Mo' mèn z'a kù là nèn nsoṅ Abram ze Héber; a ke ntswe à mbaṅ ntù mbwe' mi a be Mamré là. Amor mfèt Eshkol bo Aner lo wat kàn boa Abram. 14Ndùse Abram yoṅ nju' ndù bo ghom mfèl i ngù ntsha' yi là, a lo' tshuntshùag boa ghafa' tse tse bo bwe yub ntùm ze tunndà là, benntùn ntshob fom mén bùm nkù tat, ngwù njam bo, njoṅ yub tà nèn nkum Dan. 15A le' yub tèttswe', yi boa ben tse, ntshùa yube. A yoṅ yub tà nèn nkum Hoba z'a be mfe tu Damas là. 16A lo' njoṅ tshu fa, ndo' mfèl i Lot mfe yi boa njoṅ tshu tse fa, boa bènnzwi mba bwoṅ benntùn.
17Ngelaṅ Abram ke mfe ndù a tshùa mfen Kedorlaomer boa tsemo' fenfen bo à bo be tshwèt ntsho là, mfen Sodom tum nse' mbumte bo yi mum tômbo' Shavé ze bo be mbèn ntsiaṅ tômbo' mfen nà. 18Mélkisédék, #Héb. 7.1-10mfen Salém, mbèn mbe ngale'te Nsi z'a tà mfe tù là, a ghù bo lo' bàn bo ndu' nse' mfà Abram. 19A yab kàn Abram ntshob ndù: Nsi z'a be tà mfe tù, z'a nabte kamànyam bo tsha' là yab kàn Abram. 20Ghamte be Nsi z'a tà mfe tù, z'a fà ghakeban tsho ntùm mbu mu là. Abram ghabte njoṅ ntsha' fa nze gham, mfà nze ntshù' Mélkisédék.
21Mfen Sodom tshob Abram ndù: Fà ben tshàm me, ndo' njoṅ tshàm tshu fa. 22Abram tshob mfen Sodom ndù: Me nu ngu mbwe Tshùaben, Nsi z'a tà mfe tù là, Nganabte kamànyam bo tsha'a, 23ndù me ke nsi lo' sàm ju num tsho tshu, mba nda' ntàn ndeb, mba nda' nkù nketo'o, nedù k'o zi ntshob ndù o bèn ngù kà me ntù' ngafu'. 24Me ke tshwèt ndo' sàm ju! Mb'a nda' ju ze ghafa' tshàm jù, bo ze ben tse bag à bo be, Aner, Eshkol bo Mamré lo' yub tu là.
Поточний вибір:
Neto'te 14: BMa
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
La Sainte Bible en Bamiléké-Medùmba © Alliance Biblique du Cameroun, 1993. All rights reserved.