Neto'te 13
13
Abram bo Lot fagte
1Abram ko' mà Egipto bo nzwi i, njoṅ tshu fa ts'a ghù là, nèn nze bag Négéb. Lot nèn bo yi. 2Abram lo b'a ngafu' num nyàm, nkàb bo gol. 3Mb'a ke nte ntsho' là, a lo Négéb nèn tà nkum Bétél, dù' z'a bwôgmbwe nte ntàb i bwe, netèt Bétél bo Aï là. 4Kua' dù' ze tômbwôg le'te Tshùaben se Abram bwôgmbwe mbome, mbèn ntsiaṅ lén Tshùaben bwe be là.
5Lot ze bo Abram ke nzinte là lo ghù njùmbwe bo na', boa ba ntàb. 6Ngô fét bo nete bwe ntu tshob bàa, nummbe tshu lo yàm bo neshu mb'a be bo tam dù' kà ntswe là. 7Ntanta lo ke ntum netèt ghabéb mbwe Abram boa tse Lot. Ba Kanaan boa ba Férésia na' mbèn nke ntswe mum ngô yen ngelaṅ nà. 8Ndùlala Abram tshob Lot ndù: Me le't'o, a ke' bwô ndù ntanta be netèt be, ke netèt tshàm ghabéb mbwe boa tsho lo; nummbe be b'a fèle. 9Njoṅ ngô fa ke là mbw'o ké? Ndùlala be fagte: A be z'o nèn bu kwéb là, mba m'a' nèn bu zwim, nèn bu zwim mba m'a' nèn bu kwéb. 10Lot #Net. 2.10bù' miag mi, njen njoṅ tômbo' Yordan mb'a tshwèt mfite njoṅ dù' fa là! Tshùaben lo be sate Sodom bo Gomora, a nke ntswe à mba nka' Tshùaben nà, mba ngô Egipto ngelaṅ mèn ke mfe à nze Tsoar là. 11Ndùlala Lot tsho' tômbo' Yordan ndo' ngù ze dù' yi. Lot nèn bag ntumnyam, ndùlala bo fagte. 12Abram tù' ntùm ngô Kanaan; Lot tswe ntùm ngô ts'a be tômbo' là, ntete tse ntàb tà nèn nkum mà Sodom. 13Là, ba Sodom na' mb'a tshùagkèt ben kebwô num miag Tshùaben.
14Ngelaṅ ze Lot fagte bo Abram nà, Tshùaben tshob Abram ndù: Bù' miag mu ndôte fe nsen ni nèn nkum nze bag tu mba mà ntèn, bag ntumnyam mba bag mbinyam, 15nummbe #Mfa' Gha. 7.5me nsi fà njoṅ yen ngô là z'o tshwèt njen nà wù mba nzwil o matmat; 16me nsi ghù nzwil o yàm mba mbab mi a nsitsha' là; be mèn ku'ni nesiaṅ nzwil o à ngelaṅ z'a ku'ni nesiaṅ mbab mi a nsitsha' là. 17Lo nsi nzinte ntùm yen ngô li, num bag i ze nesà mba ze nevôge, nummbe me nsi fà i wù. 18Abram tsho' ntàb i bwe nèn ntswe mbaṅ ntù mbwe' mi a be Mamré nze bag Hébron nà. A bom tômbwôg le'te Tshùaben yi bwe.
Поточний вибір:
Neto'te 13: BMa
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
La Sainte Bible en Bamiléké-Medùmba © Alliance Biblique du Cameroun, 1993. All rights reserved.