Neto'te 12
12
ABRAM
Nsi tsiaṅ Abram mb'a tum ntùm ngô i
1Tshùaben #Mfa' Gha. 7.2-3; Héb. 11.8tshob Abram ndù: Tum ntùm ngô o, ntùm tunndà o mba ntùm ndà tàan, nèn ntùm ngô ze me nsi la'te wù là. 2Me nsi lo' o ghù tàa nzwit ndùb yi. Me nsi yab kàn wù, ghù lén so ju'ni. Kàn nsi ke fe à wù. 3Me #Gal. 3.8nsi yab kàn ben tse bo nsi yab kàn wù là, so ndon tu ben tse bo nsi so ndon tu o là. Njoṅ nzwit benntùn fa nsitsha' nsi tshùa à njam o kà kwé kàn.
4Ndùlala Abram nèn mba Tshùaben tshob yi là. Lot nèn bo yi. 5Abram lo be tum Karan ndù a ghù ngu'njù ntshob tàn ṅam sammbàa. Abram lo' nzwi i Saraï, Lot mén mfèl i, njoṅ tshu fa ts'a ghù là, boa njoṅ tse ben fa ts'a ghù Karan nà, ntam manze nenèn Kanaan. Bo zin nkum bwe. 6Abram ya' ntùm ngô, tà nèn nkum dù' ze lén se be Sikém nà, mbaṅ tù mbwe' s'a be Moré là. Ba Kanaan lo be ntùm ngô. 7Tshùaben #Mfa' Gha. 7.5; Gal. 3.16se' ntèt Abram ntshob ndù: Me nsi fà yen ngô li nzwil o. A bom tômbwôg le'te Tshùaben bwe, Tshùaben z'a se' ntèl i là. 8A lo nsen nà nèn num mbat z'a be Bétél, nze bag ntumnyam nà nte ntàb i bwe. Bétél be mbinyam, Aï be bag ntumnyam. A bom tômbwôg le'te Tshùaben bwe, ntsiaṅ lén Tshùaben. 9Abram bèn nèn nze bag Négéb.
10Mo' nziku' tsho ntùm ngô, Abram swe' nèn mà Egipto, ntswe bwe; nummbe nziku' lo ta mum ngô neshu. 11Ngelaṅ z'a ke ngebte netsho mà Egipto là, a tshob nzwi i Saraï ndù: Tshù, me lèn ndù o b'a mènnzwi ndù ntshù mu bwô. 12Ndùlala ndùse ba Egipto nsi yen o là, bo nsi tshob ndù o b'a nzwi àm. Bo nsi zwi àm, faṅ o ntùn. 13Tshob #Net. 20.2; 26.7à ndù o b'a mfèl àm, ndù numebwô tshùa njam o nse' me, mba ndù tu àm tshùa njam o njôge. 14Ngelaṅ ze Abram tsho mà Egipto là, ba Egipto yoṅ mbe yen nzwi Abram ntshob ndù ntshù mi bwô neshu. 15Ba tàndà ntsho mfen Faraon yen Saraï nèn nsoṅ bwô i Faraon; ndùlala bo lo' i nèn yi mà ntshwèt Faraon. 16Mfen Faraon tshùa njam i ndo' Abram mebwô, mfà njùmbwe, mfô, nkekwène, ghafa' tse bandum boa tse bènnzwi, zwi nkekwène boa kamél Abram. 17Là Tshùaben tshùa njam Saraï nzwi Abram, ma' nge' yàm num Faraon bo tunndà i fa. 18Ndùlala Faraon tsiaṅ Abram, ntshob yi ndù: Ke z'o ghù me ndù à? Numk'o na' mbe ke tshob me ndù a b'a nzwi o à? 19O na' ntshob ndù a b'a mfèl o, me lo' i ngù nzwi àm yi à numke? Ndonni, tshù nzwi o là, lo' i là, ntum bin yi nène. 20Faraon tshob ben tse ndù bo lo' i nèn ntshag ndùnsi, yi, nzwi i boa njoṅ tshu fa ts'a ghù là.
Поточний вибір:
Neto'te 12: BMa
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
La Sainte Bible en Bamiléké-Medùmba © Alliance Biblique du Cameroun, 1993. All rights reserved.