Luk 23

Zeso ge Pilaɗ ndwa se

Mat 27.2, 11-14; Mrk 15.2-5; Yoh 18.28-37

1Guwa̰, ɓase mbe ma ɗege ge sok seɗ ta go ndalaŋ, àa gene Zeso ge Pilaɗ ndwa se yà. 2Sok mbe go, àa ɗege ee fare ge ne pagal ceceɗ, àa ka janna go: Ndu mbe no, i see ne, waaya ka tun i pe rusu Yahuɗ ma digi kee ho̰o̰l, ka tele num go num ho̰ Sezar siyal to me. Ka jan num go na sḛ Krist, ndu ge Dok taa ne, ndwa go na i gan ga̰a̰l ne. 3Pilaɗ ele ne go: Mo gan ga̰a̰l ge Yahuɗ ma way ne ɗaŋ de? Zeso gwan ge ne janna go: Mo jin̰a ne no. 4Pilaɗ jan ga̰a̰l ge nda ge kee tuwaleya ma way mage ɓase ma go: Mbi be seɗ fare ge mbiya mbi ee dṵṵl ne pagal to. 5Ɗaŋɗe, num mbe ge ee fare Zeso pagal ma wan maa wa bàba, àa ka janna go: Hate go fare ge tun ɓase ma digi. Ee pe ge Galile ya, nan suwa ge Jude ne ya na ko zì mɔɗwag, ge sego a deɗ ja go go no. 6Sok ge Pilaɗ za̰a̰ fare mbe ma go gaw, ele sok go ndu mbe van Galile ne de. 7Sok ge see go ne mbo ge gan ga̰a̰l Heroɗ lew ma suwal a̰me ya, teme ne ge ne ta yà, ndwa go Heroɗ sḛ wa ya ge Jerusalem diŋ dwam mbe ma zì waɗme.

Zeso ge Heroɗ ndwa se

8Sok ge Heroɗ kuwa Zeso, laa saal waɗe ne pool. Ago, kee ja kaal nde, ge no go ge ene go na kuwa ne, ge fare ge ne ne ge na za̰a̰ num faaya ma pe. Ka ee na jobreya go na mà kuwa ne kee kaŋ ajab a̰me ma. 9Ele ne fare kaal nde, ɗaŋɗe, gwan ge ne fare a̰me go ɗu pagal to. 10Ga̰a̰l ge nda ge kee tuwaleya ma way mage nda ge hate eeya ge Moyiz ne ma go sok mbe go, àa ka ndil fare na̰ ge ɓaŋlaŋ ma eeya ne pagal. 11Heroɗ mage na asagar ge koy na ma ndil Zeso kaŋ senna. Guwa̰ ge àa lasage ne go, àa kan ne ba̰a̰ ge seeya cicim ge ne ta, àa gwan ge ne Pilaɗ ta yà. 12Ge dwam mbe go, Pilaɗ mage Heroɗ seŋe kondore, num ge dee ka za̰a̰ ta to ma.

Sariya swày kunna ge Zeso pagal

Mat 27.15-30; Mrk 15.6-19; Yoh 18.38–19.16

13 Pilaɗ tol ga̰a̰l ge nda ge kee tuwaleya ma way ma, ga̰a̰l ge in suwal mage ɓase ma ya se, 14jan num go: Ḛ gene mbi ndu mbe no ya go, ne ba ge tun ɓase ma digi ne kee ho̰o̰l. Ḛ ge kuwaya go, mbi ele ne fare ma ge ḛ ndwa go, ge fare ge ḛ ee num no ge ne pagal ma pe, mbi be seɗ fare a̰me ge ne ta to. 15Koo Heroɗ sḛ, be seɗ fare a̰me ge mbiya ee dṵṵl ne pagal to, a ge pe teme ne ya i ta no. Ḛ kuwa go, ndu mbe be kee a̰me ge mbiya gene ne mbo swày to. 16Gaa go mbi nja ne, mbi ya gaa dol ne digi. 17[A ngaɗ go Pilaɗ doo num ndu ɗu ge daŋay zì ya zum, ge dwam vḛḛso ge Paska ne ma go nga-nga.]#23.17 Ago, varseya ge 17 mbe go ge maktub a̰me ge àa zwagre num ma zì me no, kaɗ ge a̰me ma zì to me, ge dape ndu seɗ ne ge maktub wa grek zì to. 18Ɗaŋɗe, àa ɗege pyanna digi wa dagre ɗu go: Hṵṵ ndu mbe gezi, doo i ya zum Barabas. 19Àa doo Barnabas mbe daŋay ge tunna ge ne tṵṵ nda digi kee ho̰o̰l, ge suwal ga̰a̰l diŋ mage swày ge ne hṵṵ pe me. 20Ajo̰o̰ Pilaɗ go ge dwaɗɗa ge dol Zeso, gwan jan num fare ndwa ee num eya fare. 21Ɗaŋɗe, àa ka aa maa pe janna go: Pee ne ɔwara kaŋre ta digi! Pee ne ɔwara kaŋre ta digi! 22Ge ndwa taa, Pilaɗ gwan jan num go: Kee ma̰ sone de? Mbi be seɗ fare a̰me ge ne ta ge mbiya gene ne mbo swày to. Gaa go mbi nja ne, mbi ya gaa dol ne digi. 23Ɗaŋɗe, num sḛ ma wan maa wa bàba, àa ka oyya digi ndaal, gwarge ta go: Pee ne ɔwara kaŋre ta digi. Num ka̰a̰l gwan ka hee digi ɗogle-ɗogle. 24Ge ano mbe no pe, Pilaɗ kun sariya mbe ge ɓyareya ge num way pagal tem. 25Dol ndu mbe ge ɓase ma ɓyare ne ya digi, ne mbe ge àa doo ne daŋay zì, ge ne tṵṵ nda digi mage swày hunna pe. Kaɗɗa ge Zeso ɗe, ɓyan ne ge asagar ma tok go go num hṵṵ ne, ge ɓase ma ɓyare mbe go.

Pella ge Zeso ne kaŋre digi

Mat 27.31-56; Mrk 15.20-41; Yoh 19.16-37

26Sok ge asagar ma ka gene Zeso go, àa seɗ ndu a̰me ge suwal Siren ne, ge àa tol ne Simo̰ jaɗ-ɗa ge gaaso go, àa wan ne, àa ee ɔwara kaŋre ge ne ka̰a̰l go, ne ka in ne ge ne pe go. 27Nda ɓase nɔnɔg ka kàre ne pe, nda zaab kaɗ num buwal zì waɗme. Àa ka kan tok ge maa pagal digi kiimi ta ge ne pe. 28Zeso seŋe na ndwa ya num ta se, jan num go: «Ḛ nda zaab ge suwal Jerusalem diŋ-ge ma, ḛ fiya ge mbi pe to ɗe! Ḛ fiya vare zoo ta ɓanna ge ḛ van ma! 29Ḛ kuwa go, sok ma mbo ya ge go, nda mbo ɗege janna go: Nda zaab ge ba̰a̰ gisil ma, laa ge van wuwa ge num zì to ma, koo ge num ge ho̰ van pam to ma, laa saal ge num pe ɗaŋ! 30Ge sok mbe go, nda mbo ɗege jan njal ma go: “Ḛ vo ya ge i pagal se!” Àa jan kafeɗem ma go: “Ḛ mbuu i se yà ɗe!”#Oze 10.8. 31Kaɗɗa àa kee go mbi mbe ge dḭḭ ge ɔwara tɔgwal go ɗe, àa mbo kee ge ḛ ge dḭḭ ta ge ɔwara fin̰al go ma dee pe gyana de?»

32Ge sok mbe go me ɗe, àa gene nda ge fiiri vin̰a ma yà zi iya ndwa mbo hun num ɓanna ge Zeso. 33Àa deɗ-ɗa ge sok ge àa tol ne Pagal kal go, àa pel ne kaŋre digi. Àa pel nda ge fiiri vin̰a mbe ge zi ma waɗme, ndu ge diige ge na kaŋre ta digi, ɗu ne lee matoson go, gegene ne lee magul go me. 34[Sok mbe go, Zeso jan go: Baa, pore num num sone ge àa kee mbe no, ago àa wan kaŋ ge maa kee no pe to.] Sok ɓyare vaa ta ne ba̰a̰ ma go, àa ee daŋ.

35Ɓase ma kaɗ mḛḛya ge sok mbe go ndil sok. Kaɗɗa ge ga̰a̰l ge in suwal ma ɗe, àa ka coɗ Zeso, àa ka janna go: Mon nda ge ɗogle ma ɗag, ne mo̰o̰ tene sḛ gale ɗaŋ, kaɗɗa fareba go na Krist, ndu ge Dok taa nee ne! 36Asagar ma ka coɗ ne waɗme. Àa ndaa ta ya ge ne ta zì ndwa hon ne on̰or jìn̰al ge haɗ-ɗa ka̰a̰mal. 37Àa ka jan ne go: Kaɗɗa mo gan ga̰a̰l ge Yahuɗ ma way ne, mo̰o̰ tene sḛ gale ɗaŋ! 38Ge kaŋre mbe pagal ge dwab digi, àa njaŋe kaŋ byalga ta pella go: Ndu mbe no a gan ga̰a̰l ge Yahuɗ ma way ne.

39Ɗu ge nda ge fiiri vin̰a mbe ge zi ge àa pee num kaŋre digi ma buwal zì ɗege sal ne, jan ne go: «Mo daa vaa jan go go mo Krist, ndu ge Dok taa nee ne ɔwal-taa? Mo sḛ mon tene, mo mon i me to ɔwale ya!» 40Ɗaŋɗe, ne kon gegene pee ne, jan ne go: «Mo chiya Dok voo to gyana de? Àa wa̰a̰ ḛ ge sariya ge ɗu to de! 41Kaɗɗa ge nè sḛ ɗe, ago nè see poɗɗa ge nè ne tem, ge kaŋ ge nè kee ma pe. O̰o̰ ne sḛ be kee a̰me ge sone to me ɗe!» 42Guwa̰ jan Zeso go: «Zeso, duwa ge mbi, sok ge mo mbo gwan ja kee muluk nda duwana ma pagal go.» 43Zeso gwan ne janna go: Fareba, mbi jan mo ne no, màno, mo mà kaɗ dagre ge mbi ge paradis zì.

44Sok ge sok yin̰a guwa ge gyala pɔgwa, sok mbo ya saa se tṵṵ ɗeɗeg suwa pagal peɗ, ɗiŋ mbo gyala swa saa. 45Gyala ban sok, ba̰a̰ ge vâ zok ge Dok ne pul taabe se, tuwal go cḛḛ. 46Zeso oy digi ge ka̰a̰l ndaal, jan go: «Baa, mbi n̰a mbi on̰om mo tok go.»#Mkm 35.1. Sok jan fare mbe ma no go, ne on̰om ndage.

47Ga̰a̰l ge asagar ge kis ma way, sok kuwa kaŋ ge kee mbe ma go, sale Dok, jan go: «Fareba, ndu mbe no, a ndu ge temel ne.» 48Ɓase ge dee ya sok mbe go ndil sok ma, ajo̰o̰ àa kuwa kaŋ mbe ma ge maa ndwa, àa ka kiimi ta gḛḛ, sok gwan diŋ go. 49Zeso nda ge kuwaya ma mɔɗwag, nda zaab ge kàre ne pe ge Galile ya day ma, kwaɗ maa pe gezi yà kaal day, ndil kaŋ ge ka keeya ma.

Eeya ge Zeso duul ne tàal zì

Mat 27.57-61; Mrk 15.42-47; Yoh 19.38-42

50-51Ndu a̰me ɗu ka sok mbe go waɗme, àa ka tol ne Jozef. Ne sḛ ndu ge suwal Arimate diŋ-ge ne. Kaa ndu ge kwaɗa, kaɗ ndu ge temel me. A ɗu ge Yahuɗ ma ga̰a̰l ge kun sariya ma buwal zige ne, ɗaŋɗe, be vin na ka̰a̰m za̰a̰ya ge za̰a̰ ta mage kaŋ ge àa mbo keeya mbe ma no to. Ee na jobreya no ge mboya ge Dok mbo gwan ja kee muluk pagal. 52Mbo ge Pilaɗ ta yà, kaɗe ne, ne mà kaɗ ge hon na Zeso duul swày nde de. 53Guwa̰ go, ndage ne ge kaŋre digi ya se, warge ne ge pakta ge lɔgwa lalan̰ zì, ee ne ge tugul swày ge àa ca ne njal zì, ge àa gale ee ndu a̰me ne zì ɗu to. 54Dwam mbe, a dwam ge nda nuusi kaŋ ge mbiya ge sabaɗ pe ma ne, nda wa gaa waɗ ne zì. 55Nda zaab mbe ge kàre Zeso pe ge Galile ya ma ɓan dagre ge Jozef, àa kuwa tugul swày, eeya ge àa ee Zeso duul ge ne tugul mbe zì waɗme. 56Guwa̰, àa gwan mbo suwal diŋ, àa gaa nuusi kaŋ ge huu tii ma, ge idiir ma ge Zeso duul pe. Guwa̰, àa gaa ɗigli ta, dwam sabaɗ mbe go, ge wa yuwaleya ge Moyiz ne pagal.

Поточний вибір:

Luk 23: kiaGRB

Позначайте

Поділитись

Копіювати