Luk 24

Tanna ge Zeso Krist ne

Mat 28.1-10; Mrk 16.1-11; Yoh 20.1-10

1Dwam Dumas, aaram vḛḛ, nda zaab mbe ge kàre Zeso pe ge Galile ya ma kan ta mbo ge sḭḭ pagal-la. Àa gene nùm ge huu tii ge maa nuusi num mbe ma maa tok-ga. 2Sok ge àa yin̰a sḭḭ pagal-la, àa seɗ go njal ge àa dibi tugul swày wa ge ne viŋri ya gezi. 3Àa waɗ tugul zì yà, ɗaŋɗe, àa seɗ Bagezok Zeso duul to. 4Àa daa kuwa kaŋ ge maa keeya to. Sok mbe go nda soɗob a̰me ma zi kale ngay ta num ndwa go gaw, àa kaɗ ge ba̰a̰ ge seeya cicim ma maa ta. 5Ajo̰o̰ voo waɗ-ɗa ge nda zaab mbe ma zì cɔcwab, ndwa cɔgeya suwa pagal se, nda soɗob mbe ma jan num go: Ge dape ḛ wa ka ɓyare ndu ge no ge na ndwa, ge nda ge swày ma buwal zì de? 6Daa ge tugul zi go to, ɗaŋɗe, tanna yà. Ḛ duwa ge fare ge ne sḛ ka jan ḛ num ma pagal, sok ge gale wa ya ge Galile yà. 7Ka janna go: Ne ɓyare go, àa ɓin̰a Van ge Ndu ne, ge nda ge kee sone ma tok go, àa pee ne ɔwara kaŋre ta digi, ne ta̰a̰ digi, ge dwam ge taa ma pul zì.

8Sok mbe go, num pagal kale dwaɗ fare janna ge Zeso ne mbe ma. 9Àa ɗege ge sḭḭ pagal-la, gwan mbo diŋ mbo wan nda ge ame hateya ge wol pɔgwa ɗu mage maa ka̰a̰m gegene ma peɗ fare mbe ma pe. 10Nda zaab mbe ma kaa Mari ge suwal Magdala ne, Johana, Mari ge Jak na̰ me. Nda zaab ge ɗogle ge kaa dagre ge num ma wan nda ge temeya ma fare pe mbe go tetem. 11Ɗaŋɗe, àa ndil fare mbe ma ge fare ge bàŋ yag ma go, àa be hoɗ fareba ge fare mbe pagal go fyalag to. 12Go no puy, Piyer ɗege, chiya mbo sḭḭ pagal yà, hugi se, kuwa ba̰a̰ wa ma ɗeŋew suwa zì. Guwa̰, gwan mbo na yà, ka kee ajab ge kaŋ ge kê mbe no pe.

Ge vin̰a mbo Emayus go

Mrk 16.12-13

13Dwam mbe go baba, zi ge num mbe ge ame hateya ma buwal zige ma, ka mbo suwal van ge àa tol ne Emayus yà, ge no guwa ge kilometr wol pɔgwa zi ge suwal ga̰a̰l Jerusalem. 14Àa ka siɗigi fare ta buwal zì ge vin̰a zì, ge kaŋ ge ɗege keeya ɗiŋ deɗ-ɗa mà ma pagal peɗ. 15Sok siɗigi fare go, àa ka pee ta ta buwal zì, Zeso deɗ-ɗa num ta zì, àa ge num ɓan mboya dagre. 16Àa kuwa ne maa ndwa go ɓame, ɗaŋɗe, num pagal tyan gezi go ne nee ne to. 17Ele num go: Ḛ daa pee ta go ma̰ fare pagal sok mboya go go de? Àa mḛḛ se, num ndwa ma kale haɗ suwam. 18Ɗu ge num mbe ge zi ma buwal zì, ge àa ka tol ne Kleyopas, gwan ne janna go: Mo zane gaa ne ɗu, ge dee ya Jerusalem diŋ, be kuwa kaŋ ge kê dwam mbe ma zì ma de? 19Ele num go: A ma̰ kaŋ kee ne de? Àa gwan ne janna go: Kaŋ ge àa kê ge Zeso, ge suwal Nazareɗ mbe ɓaa! Ne mbe ge ne kaŋ keeya mage ne fare hateya ma ngay ge Dok ndwa se, ge ɓase ma ta peɗ me go, ne ndu ge zwagre Dok wa ge pool ne ɓade. 20I ga̰a̰l ge nda ge kee tuwaleya ma way mage i ga̰a̰l ge ɗeme i ma ɓin̰a ne gezi no go àa wa̰a̰ ne ge sariya ge gene mbo swày no, àa pee ne ɔwara kaŋre ta digi no me. 21I ka ee i jobreya go Dok teme ne ya mon Izrayel van ma de ɗaa, ɗaŋɗe, kee ya se dwam taa ge kaŋ mbe ma dee ya day. 22Ano mbe no peɗ puy, nda zaab a̰me ge i buwal zì ma kwaɗa lag kee i ajab. Àa ɗege aaram vḛḛ, àa mbo sḭḭ pagal yà no. 23Guwa̰ ge àa see ne duul to go ɗe, àa guwa̰ ya jan i no go, malayka ma ngay ta ge maa ta, num jin̰a maa no go, ne ge na ndwa. 24Nda a̰me ge i buwal zige ma, guwa̰ mbo ge sḭḭ pagal yà no waɗme, àa see kaŋ mbe ma tem ge nda zaab jin̰a maa num go. Ɗaŋɗe, àa be kuwa to ne sḛ. 25Sok mbe go, Zeso jan num go: Nda ge dàle kamlas ma, ge num dul wa no deŋel ge be hoɗ fareba ge fare janna ge nda ge zwagre Dok wa ma jin̰a num ma ta ma! 26Ɓyare go, Krist, ndu ge Dok taa ne see yal njoɗɗa mbe mbḛḛ, Dok wa ee ne seɗ pateya gale go! 27Ee pe tyan num pagal gezi, ge kaŋ njaŋeya ge Moyiz ne ma ta ya day, deɗ-ɗa ge nda ge zwagre Dok wa gegene ma way ma go peɗ.

28Sok ge àa dee ya guwa ge suwal van ge maa ɓyare mbo ne diŋ, Zeso kee ge mojo̰o̰ na sok ge na ɓyare mbo ge ne yà, gaa zḛḛ yà kaal go. 29Ɗaŋɗe, àa gwarge ta ne ta, àa jan ne go: «Ɓa̰a̰ mbo diŋ ge i dagre ɗaŋ! Gyala mbo dinna no, ɗaal waɗ se ne ɗe.» Sok mbe go, ɓan mbo diŋ ge num. 30Ɗeɗ-ɗa go Zeso ge kaŋ zam wa go ge num, hee dupḛ, kee wa tare ge ne pagal, guwa̰, siɗi ne se, hon num ne me. 31Sok mbe go gaw, num pagal tyan gezi, àa kuwa go ne nee ne, ɗaŋɗe, fwaɗ sok ge num ndwa zì. 32Àa ɗege jan ta ta buwal zì go: Sok ge a ka wan nè fare ge vin̰a zì ya, ge fare ge Njaŋeya ge Dok ne ma pagal go, nè ko zane ka hee ne pe digi fogol no ɓa ta!

33Àa ɗege ge sok mbe go gaw gwan mbo Jerusalem. Àa deɗ-ɗa, àa seɗ nda ge ame hateya ge wol pɔgwa ɗu ma kwateya ge maa ka̰a̰m gegene ma peɗ. 34Àa ka jan maa ka̰a̰m ge zi mbe ma go: A fare ge fareba ne, Bagezok tanna go, ngay tene ge Simo̰ ta. 35Num sḛ ma waɗme, àa wan fare ge see maa ge vin̰a zì ya pe, pe gyana maa see no go ne Zeso ne, sok siɗi dupḛ go de.

Ngay tene ge Zeso ne ge na nda ge ame hateya ma ndwa go

Mrk 16.14-18; Yoh 20.19-29

36Àa gale sok wan ta fare mbe ma pe go, Zeso sḛ ngay tene ge num buwal zì, jan num go: Dok ne ho̰ ḛ halas. 37Voo kale waɗ num zì cɔcwab, àa ka dwaɗ go ne ndu a̰me kḭḭ ne. 38Ɗaŋɗe, jan num go: Ḛ iigi digi go ge dape de? Pe gyana ḛ wa kaɗ ge dwaɗɗa ge sone ma go de? 39Ḛ ndi jwaŋ ge mbi tok mage mbi ko go ma gale, a mbi sḛ ne ge mbi ndwa susu. Ḛ ndi mbi kwaɗa, ḛ dabe mbi me ɗaŋ! Ndu kḭḭ be sḛ duul#24.39 Zeso jan num go mbe ndwa go num kuwa jwaŋ pyalaŋ ge ponde ne ma, num wa hoɗ fareba go ne na sḛ ne., dinna ge ḛ kuwa mbi mḛḛya no go ɓa! 40Sok jan num fare mbe ma no go, ngay num na tok mage na ko ma. 41Laa saal waɗe num pool, ano puy àa kee ajab ge go àa day hoɗ fareba ge fare ge Zeso jan maa mbe pagal gaw to, ɗiŋ ge go ne mbo ele num go: Ḛ go ge a̰me zam kode? 42Àa hon ne sini suwaya duul dig. 43Ame ne, zam ne ge num ndwa go.

44Guwa̰, jan num go: Ano a fare ge mbi ka jan ḛ num, sok ge mbi gale wa ya dagre ge ḛ go: Ne mbiya go, fare ge njaŋe ge eeya ge Moyiz ne ma zì, ge maktub ge nda ge zwagre Dok wa ma way mage Maktub ge kaŋ mballa ma way ma zì, mbi pagal ma wa ma huy. 45Sok mbe go, tyan num pagal gezi, ndwa go num dee ya wan kaŋ ge no Njaŋeya ge Dok ne zì ma pe. 46Ge ano mbe ma no ta, wan num fare pe go: Àa njaŋe ya wal day go, Krist, Ndu ge Dok taa ne mbo njoɗ yal, ne mbo tan ge nda ge swày ma buwal zì ge dwam ge taa ma pul zì. 47Ḛ mbiya oy fare ge ne dḭḭl, ge rusu ge ɗogle ma ta, ee pe ge Jerusalem diŋ, ge pool ge mbo hon ḛ ya ta, sok jan num go: Dok pore ḛ sone ma pore, kaɗɗa ḛ seŋe ta ja se. 48Ḛ mbo kaɗ nda ge sayda ma ge kaŋ ge ḛ kuwa num mbe ma no ma, ge nda ta. 49Ḛ kuwa go, mbi sḛ mbo teme ḛ kaŋ ge mbi Ba Dok kee wa tii ne pagal ya. Kaɗɗa ge ḛ sḛ ma ɗe, ḛ kaa suwal ga̰a̰l diŋ, ɗiŋ ge go ḛ see pool mbe ge mbo no ge pḭḭ digi ya.

Gwan mbo digi ge Zeso ne

Mrk 16.19-20; Tkt 1.4-12

50Guwa̰, Zeso gene num ɗiŋ guwa ge Betani#24.50 Betani suwal van ne, kilometr taa ge Jerusalem, ge njal ge ɔwara oliv ma do̰o̰ no ne pagal digi kin̰a lee ge mbii-ge go., sok mbe go, hee na tok ma digi, kee num wa tare. 51Sok kee num wa tare mbe go, n̰a num, Dok gene ne mbo pḭḭ zì. 52Kaɗɗa ge num sḛ ma ɗe, àa ka uware ne, àa gwan mbo Jerusalem diŋ ge laa saal gḛḛ. 53Ge sok mbe go, àa daa gwan n̰a zok ge Dok ne to, àa ka mbal kaŋ sale Dok.

Поточний вибір:

Luk 24: kiaGRB

Позначайте

Поділитись

Копіювати