MATAYO 9
9
Kubanja eholoje
(Mrk. 2:1-12; Luk. 5:17-26)
1Akaingia he ngilawa, akakelanya, akafika he muzi wavo. 2Niho vakamwetie muwaji eholoje, eshinjie he kitanda. Yesu ekivona mwitikijo wavo, akamti ula muwaji eholoje, “Tundana ngoro mwanangu, washighiwa mabanu ako.” 3Niho vaandiki kumwe vakadunganya he ngoro javo kuti, “Uu emfalaja Mrungu.” 4Yesu naye ekimanya madunganyo avo, akavati: “Hanini mwedunganya mburi mbivi he ngoro jenyu? 5Hama kijangu ni kihi, ni kuti, ‘Washighiwa mabanu ako,’ kana ni kuti, ‘Vuka utonge?’ 6Mira nesa mumanye iti Mwana wa Mntu ena nzinya kunu he si ii ya kushighia mabanu,” akamti ula eholoje, “Vuka, tika kitanda chako, ughotoke na kaa hako.” 7Akavuka, akaghotoka na kaa hakwe. 8Mavungano vekivona huvo vakafoleka, vakamkaza Mrungu eye evainka vantu nzinya yeringane huvo.
Mwitango wakwe Matayo
(Mrk. 2:13-17; Luk. 5:27-32)
9Yesu ekivecha kufuma aho, akavona mntu eikae he nyumba ya kughuhia kodi, eitangwa Matayo, akamti, “Niratera!” Akavuka akamratera.
10Aho eikae si he nyumba iti ale kijo, vareghuha kodi vajinki na vabanu vakaza, vakaikaa si hamwe ne Yesu na varateri vakwe. 11Vafarisayo vekivona, vakavati varateri vakwe, “Hanini Mcheji wenyu ela hamwe na vareghuha kodi na vabanu?” 12Naye ekinasikie, akavati, “Vala vesiwaa teveenda mghanga, esire vala vewaa. 13Mira tongani mukucheje iti kitize kila kiteto cheti, ‘Cho neenda ni mbonea, neri si itasi.’ Ambu sizie kuitanga venye kitea, esire vabanu.”
Kukuima
(Mrk. 2:18-22; Luk. 5:33-39)
14N’ndeho varateri vakwe Yohane vakamswia, vakamti, “Hanini uswi na Vafarisayo twekuima, mira varateri vako vesikuima?” 15Yesu akavati, “Vala verarikwe he mlondolo, veidimaze kuhomborera verena na mwenye mlondolo? Mira heneza misi mwenye mlondolo enevushwa, niho venekuima. 16Tehena mntu egera ndame shaa he suke yesakae, ambu ila ndame yegerirwe inechwa ila suke izike danduka. 17Neri tevegera luhwa he masagha esakae, kakicha vekiketa huvo, masagha ebajika, na mawa aitike, masagha akondike. Mira vegera luhwa he masagha mashaa, niho vyose vyekia.”
Mwana wa kiche wakwe Yairo na mche mwaji wa kugavukana
(Mrk. 5:21-43; Luk. 8:40-56)
18Echerivavwira ivyo, hakaza Mchili mmwe, akamdunkutia, ekiti, “Mwanangu wa kibora arachika moo iki huvu, mira nzo umvikie mkono wako, enekia.” 19Yesu akavuka akamratera hamwe na varateri vakwe.
20Hekina mche ewaie vuwaji vwa kugavukana miaka ikumi na miri, akamzia uko nyuma, akakunta mlingo wa suke yakwe, 21ambu edunganye he ngoro yakwe kuti, “Nekikunta du suke yakwe, ninebanda.” 22Yesu akagharuka akamvona, akamti, “Tundana ngoro, we mwana wa kiche, mwitikijo wako wakukija.” Kuvokia saa ila ula mche akabanda.
23Yesu ekifika he nyumba ya ula Mchili, akavona varebigha mitoriro na luvungano vekichwa ntiro. 24Akavati, “Vukani aha, ambu uu m’bora tefwieye, eteshinjia;” vakamseka mno. 25Mira luvungano lukinafunywe, akaingia, akamgura ula m’bora mkono, akaimuka. 26Ii mburi ikagisha he lila isanga lose.
Matuntu veri
27Yesu ekivecha kufuma aho, akaraterwa ni matuntu veri vekiitangisha na wanga, vekiti, “E, Mwana Davidi, tuvoneie.” 28Ekiingia he nyumba, vala matuntu vakamswia; Yesu akavati, “Mweitikije iti niidima kuketa icho?” Vakamti, “Yee Mfumwa.” 29Niho akakunta meso avo, akati, “Muketiwe sa vuntu mweitikije.” 30Meso avo, akatambaruka. Yesu akavakokontia ekiti, “Rerehishani, hasikete mntu neri mmwe ekimanya.” 31Mira vakafuma, vakamanyisha mburi jakwe ha lila isanga lose.
Muntu ena mpepo esiidima teta
32Aho avo vekifuma, vakamwetie mntu esiidimateta, ena mpepo. 33Ila mpepo ikinafunywe, niho ula esiidimateta akateta; mavungano vakakugha, vekiti, “Narini icho tekinavoneka he Israeli.” 34Mira Vafarisayo vakati, “Efunya mpepo kwa nzinya ya m’baha wa mpepo.”
Kristo eondia vantu
35Yesu ekijunguluka he mizi yose na vumuzi, ekicheja he sinagogi javo na kubirikira Mburi Yedi ya vufumwa, na kubanja kila vuwaji na vusoka vwa kila mbare. 36Ekivona mavungano, akavasikiwa vwasi, kila vefikiwe na kuzarika sa magonji esina mrisha. 37Niho akavati varateri vakwe, “Mafindiko ni majinki, mira vandima ni vaghere. 38Heicho, mwombeni Mfumwa wa mafindiko, atume vandima he mafindiko akwe.”
Поточний вибір:
MATAYO 9: CHSUNT67
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chasu New Testament © Bible Society of Tanzania, 1967.
