MATAYO 10
10
Varateri ikumi na veri veinkwa nzinya, na mazina avo
(Mrk. 3:13-19; Luk. 6:12-16)
1Akaitanga varateri vakwe ikumi na veri, akavainka nzinya ya kufunya mpepo mbivi, na kubanja kila vuwaji na vusoka vwa kila mbare.
2Na mazina a ntume ikumi na veri ni aa: Wa kuvoka ni Simoni eitangwa Petro ne Andrea mjinawe; Yakobo mwana Zebedayo ne Yohane mjinawe; 3Filipo ne Bartolomayo; Toma ne Matayo mreghuha kodi; Yakobo mwana Alfayo ne Tadayo; 4Simoni Mkanani ne Yuda Iskarioti, naye niye emliie irenge.
Ndima yavo
(Mrk. 6:7-13; Luk. 9:1-6)
5Ava ikumi na veri Yesu evatumie, akavakokontia, ekiti, “He nzia ya Vakiisanga musiretonge, neri he muzi wa Vasamaria musiingie neri mmwe. 6Keba tongani he magonji a nyumba ya Israeli etekie. 7Na he kutonga kwenyu birikirani mwekiti, ‘Vufumwa vwa uko wanga vwazengelela!’ 8Bandijani vawaji, vushani vefwie, zerijani veumbuka, funyani mpepo, mweinkiwe sutwa, inkijani sutwa. 9Musitike dhahabu neri fedha neri senti he mifuko yenyu; 10neri ibene la kuzokia, neri nkanzu mbiri, neri viratu neri nzata, ambu mndima kuntara ainkwe kijo chakwe. 11Na muzi wowose kana kamuzi kokose mweneingia, endani iti ni mntu ani aho eve kumughuhia; muikae hakwe mhaka mwekinefuma ho. 12Mwekiingia he nyumba ikezyeni. 13Kakicha iyo nyumba cheifwenye, mporere yenyu iikae; kakicha tekiifwenye, mporere yenyu imuhundukie. 14Mntu ekisamughuhia neri kusikia viteto vyenyu, mwekifuma he iyo nyumba kana he uo muzi, kukuntani teri yeho he maghu enyu. 15Kididi nimutio, ‘Kineoka kijangu, isanga la Sodoma na Gomora kugumirija mabigho a ula msi wa mlaho kukela uo muzi.”
Kurishwa vwasi
16“Rereha, nimutuma sa magonji ghati he maghinga; heicho ketani icha sa nyoka, na kuoka vahoo sa nziva. 17Kucheini he vantu, ambu venemutonja he vitala, hata kumubighia he sinagogi javo; 18kangi, munetikwa mozya he valao na he vafumwa vuntu vwangu, nesa kioke vuonwa hevo na he vaisanga. 19Mira aho vekinemutonja kisiremurishe vwasi kudunganya sa vuntu mweneteta, ambu saa iyo muneinkwa cho mweneteta. 20Ambu si unywi mweteta, esire Mpeho wa Vava wenyu eteta he unywi. 21Na mndughu enemrengeha mjinawe iti akomwe, na vava enemrengeha mwanawe, na vana veneomanya vamoghi vavo iti vavakome. 22Na unywi munevihiwa ni vantu vose vuntu vwa izina langu. Mira ula enegurumija mhaka msio niye enekia. 23Mira vekinemukinya he muzi uu, ahani na he ungi. Kididi nimutio, ‘Temukakenje mizi yose ya Israeli, Mwana wa Mntu esinaza.’”
24“Mrechejwa temkela mcheji wakwe, neri mzoro temkela mzuri wakwe. 25Kikoloka mrechejwa ekioka sa mcheji wakwe, na mzoro ekioka sa mzuri wakwe. Ukinakiche vamwitanga mwenye nyumba Belzebuli, va kaa hakwe tevekaitangwe huvo na kukela?”
Etara kufolekwa
(Luk. 12:2-9)
26“Heicho musivafoleke; ambu tehena chevisike chesikarefunukurwa, neri chevisiwe chesikaremanyika. 27Kila nemuvwirira he kija, kitetieni he kianga, na kila mwesikia kwa kuwewesiwa, kibirikireni wanga he nyumba. 28Musivafoleke vala vekoma mwiri, vesiidima kukoma na ngoro; keba mfolekeni ula eidima kutesha mwiri hantu hamwe na ngoro he gehena.”
29“Vuntoronto vwiri tevutaghwa kwa senti mwe? Mira neri kamwezu tekegwa si Vava wenyu esimanyije. 30Mira unywi, hata nywii ja mitwi yenyu jeretarwa jose. 31Heicho ra, musifoleke; ambu unywi mwekelile vuntoronto vujinki. 32Ana, kila mntu enizumira he vantu, nami ninemzumira he Vava wangu wa uko wanga. 33Mira kila mntu enikana he vantu, nami ninemkana he Vava wangu eho uko wanga.”
Kusaghura chena vwasi na mhako wacho
(Luk. 12:51-53; 14:26-27)
34“Musiti nezie kuete mporere he si ii, neri! si zie kuete mporere esire mhandwi. 35Ambu nezie kulinganya mntu na vavee, na mwana wa kibora na mlala wavo, na mntu na mkwewe. 36Na vanzo va mntu ni vala va kaa hakwe. 37Ula emkunda vavee kana mlala wavo kukela mi, tenifwenye; na ula emkunda mwanawe wa kibwange kana wa kibora kukela mi, tenifwenye. 38Na mntu esitika msalaba wakwe akaniratera, tenifwenye. 39Ula evona moo wakwe eneutesha, na ula etesha moo wakwe vuntu vwangu eneuvona.”
40Ula emughuhia unywi, enighuhia mi; na ula enighuhia mi, emghuhia ula enitumie. 41Ula emghuhia mroti kwa kuti ni mroti, enevona kitumulilo cha mroti; na ula emghuhia mwenye kitea kwa kuti ni mwenye kitea, enevona kitumulilo cha mwenye kitea. 42Na mntu wowose emunka mmwe wa ava vadori na ere kikombe cha mpombe yehoie kwa kuti ni mrateri, kididi nimutio, tekasove kitumulilo chakwe.”
Поточний вибір:
MATAYO 10: CHSUNT67
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chasu New Testament © Bible Society of Tanzania, 1967.
