Lukas 4
4
Iblis nen Yesus akla nggagaligiluk oba wago lagike wene
(Matius 4:1-11; Markus 1:12-13)
1At Yesus i Yordan ima wusasinem, Allah Agurengge akla nggerlekogo unggisikemo duki wagikesik lagonem, at Allah Agurengge nen ebe wolok, o limo akoni dekma etoma lagike. 2Lagikesik etoma werekma inggi 40 hari Iblis nen akla nggagaligiluk oba wago lagike. Wago werek nggorlek, inggi 40 hari eta kimbiri mondok ninggidek welagikesikmo nogo nen, kimbiri mondok abu agike. 3Abu agikemo, at Iblis oba wagikesik, men yogokike,
“Kat Allah aʼbut eberogonat kalok, nggit etoma kimbiri roti mende kagat lasuwak nen yogosin o,” yiluk yogokikemo, 4at Yesus nen, men yogokike,
“Allah nen,
Akoni kimbiri dombok nonggo dogolik, iniluk mondok dogoligogi dek o, (Ul. 8:3)
yiluk yisikemo kolal mbalogo ʼbisukama werek o,” yiluk yogokike. 5Esigit diluk yogokikemo, yabunggane Iblis nen Yesus wolok, ndom ombo paga ʼbi dagisikesik etoma nen o agat oba yi ai ndi ai nggokndek inendaganggok dogoligogomangge taʼbokogonat winamet diluk omanggi pasik ilenggen lakawagaluk yanggul ikike. 6Yanggul oko dogolik, men yogokike,
“Nggokndek inendaganggok dogoligogoma inane kolek dogolik pogorinabigogi eti taʼbokogonat an inde dogowagaluk woknikukama an nakla nen ebet diluk paga,
Ap eti wogosigin, yiluk wogisiligogoma, 7kat kindibagal yunggulogo napma unggi witluk pogot nabigin kalok, taʼbokogonat kat inde dogonok nen yiluk wokisigin o,” yiluk yogokikemo, 8at Yesus nen, men yogokike,
“Allah nen yisi dogolik,
Kit nen, kinombae Allah Nendaganggok anat kinindibagal yunggulogo napma unggi witluk pogot nako dogolik, an nake arlek kagako dogono o, (Ul. 6:13)
yiluk yisikemo kolal mbalogo ʼbisukama werek o,” yiluk, esigit diluk yogokikemo, 9-11yabunggane Iblis nen Yesus wolok, o Yerusalem lagikesik nen, Yesus ebe o Allah ago palekma uwanat ombo warlengge salek isinggen obaat wolok dagisikesik nen, men yogokike,
“At Allah nen,
An nagoromi malaikat yomenogo nen kanggorlem dogowagaluk inayonggo ʼbigin o,
yiluk yisikemo werek. Nen, omanggi men yisikemo werek,
Kat kiyok nggit oba waraunogo yiluk, it malaikat eti ininggi ndalek werekma wokabugun o, (Mzm. 91:11-12)
yiluk kolal mbalek weregat kigi. Eti paga, kat eberogonat Allah aʼbut kalok, ya nen mbok wema etoma wusan o,” yiluk yogokikemo, 12at Yesus nen men yogokike,
“Allah nen yisi dogolik,
Kit nen, an nake,
Ninombae Allah Endaganggok anini werek a? Dek a, yiluk, naren mbalusak mondok dek o, (Ul. 6:16)
yiluk yisikemo kolal mbalogo ʼbisukama werek,” yiluk yogokike. 13Esigit diluk yogokikemo, at Iblis nen Yesus aren mbaligiluk yi walkigik, ndi walkigik, walkalok erlok dek agikemo nen, yabunggane walkasinem erlok asigin a, yiluk, elalma togot diluk lagike.
Yesus iyogoba o Galilea dagi wagike wene
(Matius 4:12-17; Markus 1:14-15)
14At Iblis etnogo arat lagikemo nen, at Yesus Allah Agurengge obatnerogo akla werek nggorlek, suguluk o Galilea agum dagi wagike. Dagi wagikemo, at abok eragalilungge o etoma mondok wikak yisike. 15Esigit diluk wikak yisi nggorlek, at ebe etoma dogolik, it akoni Yahudi mende o sembayan yiligogoma unggiluk wene yanggul isasinem akoni etoma mende taʼbokogonat nen pogorako laguka.
Akoni o Nazaret mende nen, “Yesus eti ninaʼit,” yiluk inakla kai disuka wene
(Matius 13:53-58; Markus 6:1-6)
16Esigit diluk pogorako nggorlek, at Yesus o Nazaret ebe arluwe agikemo lagike. Lagikesik, at kagako lagike kagat, ininggi 7 paga Hari Sabat Allah ake werlegat dogolik, sembayan yuwogoluk o akoni Yahudi mende sembayan yiligogoma unggisikesik, Allah wene kolal mbalek mende endaga wenako dogolik yanggul isagaluk melagike. 17Melagikemo, ap omanggi nen Allah wene Yesaya nen yanggul isasi dogolik kolal mbalkike mende dinggilik mende etnogo Yesus wogokikemo ʼbunggalogo ilenggen ʼbikasike mende, wene men yisike mende kolal mbalek werekma endaga wenago yanggul isasike,
18“It akoni inamende mondok dek ininggi dek mende eti pano wene yi yanggul isasi dogowagaluk mendanggikemo nogo nen, nombae Endaganggok Agurengge wusa ʼbi wagama an noba duksek werek o. Nen, nayonggo ʼbisi dogolik men yoknikike,
It akoni ininggi kerle warek werek mende kerle piyal inabigin wene inom, inilenggen mbuk mende inilenggen ʼbenggelasuwagaluk panorinabigin wene inom, yogisigik, it akoni inapma negen sebelogo ʼbiyiligogi mende ndilogo inasokneat ʼbiyigik,
19ninombae Endaganggok nen panot ninabigin mende arat korok asi waga o, yiluk yogisigik, kagako dogono, yiluk laʼbani wagama wagi yi o,” (Yes. 61:1-2)
yiluk yisikemo, kolal mbalek mende etnogo endaga wenako dogolik yanggul isasike.
20Arat yanggul isalok nen, buku kolal mbalek mende etnogo dinggilogo ap indewerek mende etnogo wogokikesik nen, ebe korek lagike. Korek lagikemo, it akoni taʼbokogonat sembayan yuwogoluk inom unggisuka mende yomenogo inilenggen at oba ʼbirogo mondok welaguka. 21Esigit diluk inilenggen ʼbirogo werekma, at Yesus nen,
“Allah wene kolal mbalek mende yi paga,
Esigit diluk kagasugun, yiluk yisuka mende etnogo yogondak yanggul kisasinem kinasuk kolko nggorlek yaat imbisak ndak-ndak aga o,” yiluk yisikemo 22it akoni yomenogo nen men yisuka,
“At yi ap Yusuf aʼbut etnogo dek a? Arat o. Mende, at nen wene pano mondok yanggul niseke eti ninayuk o,” yiluk pogorakuka. 23Esigit diluk pogorakukama, at Yesus nen, men yogisasike,
“Akoni nen kibitngge-yogonggeat yisi dogolik,
Kat kebe ap dokter negen atma, koba u eti kenggaerek nen kagaran o, yiluk yiligogi mende, kit nen dagakogo an yoknisugun kigi. Esigit diluk yoknitluk,
O Kapernaum kagako lagan mende kolko lago eti kak, yogondak kenggaerek kaguma yoma esigit dilugat omanggi kagasin o, yiluk, yoknisuwogoluk yiligogi kigi,” yiluk esigit diluk yogisasikesik nen, omanggi men yogisasike,
24“It ap Allah wene yogisiligogi mende eti inenggaerek inaguma etoma ineugi, inagoromi nen inalon palogo woginabigogi dek o, yiluk, eberogonat yokisigi. 25Nen, ap Elia welagike eta mot-mot, miyo wusa wagidek 3 tahun welagikesik, yabunggane dagakogo sut 6 bulan ndagalkikemo o etoma yi ai ndi ai kimbiri mondok no agike. Eta mot-mot, akoni Israel mende werekma kumi soge dogalegat welaguka mende, 26kumi soge mende etoma omanggi ʼbiriya lowagaluk Allah nen Elia laʼbisike ʼbuk. Dek o. At te, kwe soge mende omanggiat o werlekma Sidon unggul endaga Sarfat etoma werekma oba laʼbisike. 27Nen, ap Elisa nen Allah wene yogisasi lagike eta mot-mot, o akoni Israel mende werekma etoma u konanggo negen etnogo mende dogalegat welaguka mendeat, omanggi kagarinako lagike mondok dek o. Ap Naaman ago Siria mende eti arligat kagakike o, yiluk, eberogonat yokisigi,” yiluk esigit diluk yogisasikemo, 28it Yahudi mende sembayan yiligogoma welaguka mende inasuk kolkukasik nen, inakla agaga ambik dagasuka. 29Esigit diluk inakla agaga ambik dagiluk, inebe melagukasik at ebe inggi nggorlo pagogo sikmangge wula ʼbiluk, o Nazaret eragalilu etoma ndom oba palekma yomenogo wolok lagukasik ponggokogo wusa ʼbi luwogoluk kagakuka. 30Kagakuka mendeat, at Yesus it yomenogo togot diyalok inanggerleka nen lelokogo dukisike.
At Yesus nen ap omanggi kugi obabut weyak mende akla unggisikesikmo wula ʼbisike wene
(Markus 1:21-28)
31Inanggerlekangge nen lelokogo dukisikesik o Galilea agum endaga Kapernaum lagike. Lagikesik, Allah ake ininggi 7 paga Hari Sabat werlegat dogolik, o sembayan yiligogoma unggiluk wene yanggul isasi lagike. 32Yanggul isasi dogolik wene ebe indewerek mende nen yiligogi kak yisinem, it yomenogo nen,
“Ninayuk o!” yiluk pogorako laguka. 33O sembayan yiligogoma yomenogo werekma, ap omanggi kugi obabut weyak mende akla unggisikemo dogolik, ane nggokogo men yogokike,
34“Weyak Nazaret mende yi! Kat nen ninggit diluk kagat ninabigiluk wagan! Nit weyagat ninabigiluk wagan a? Kat kebe, Allah enggaerek ake mendagekesik laʼbagi wagama wagan eti an nen didagagi o,” yiluk ane nggokogo yogokikemo, 35at Yesus nen mbereko dogolik,
“Kane. Ap yi akla nen duki lan o,” yiluk yogokikemo kugi obabut weyak mende etnogo nen ap etnogo ebe nduntogo akoni dogalek etnogo inanggerleka laʼbiluk nen, ap ebe weyagat digidek dukisike. 36Esigit diluk dukisinem akoni dogalegat yomenogo inayuk agukasik, it-it yisi dogolik, men yisuka,
“At ane yeke eti ninggit diluk. At nen kugi inobabut weyak mende,
Duki lani, yiluk yisagat eti indewerek dogolik, ane obatnerogo mberisasinem dukiligogi eti ninayuk o,” yiluk pogorakuka. 37Esigit diluk pogorakukasik, at Yesus abok o ya nda etoma mondok wikakogo kagat lagike.
Yesus nen Simon akowan inom, akoni amberek inom, u pano kagarinakike wene
(Matius 8:14-17; Markus 1:29-34)
38Abok esigit diluk wolok dukisukama, at Yesus o sembayan yiligogoma etoma togot diluk nen, ap Simon aguma lagike. Lagikemo, ap Simon eti akowan oba u aganggen weyak werekma, Yesus nen pano kagasuwagaluk ayonggo ʼbisukama, 39at nen, kwe etnogo eragalilu lagikesik mendek dogolik,
“U yi dek asin o,” yiluk, yogoko nggorlek eranogoat, u etnogo dek agike. Dek agikemo, kwe etnogo melagikesik nen, it yamagiyasi lagike.
40Yamagiyasi werekma, o arat keyamnggengge mo nggobokogo lagikesikmo akoni nen it amberek inoba yi u ndi u werek mende taʼbokogonat wogisek Yesus oba wagukama, at nen inebe dombok inggi paʼbiyalok pano kagarinakike. 41Esigit diluk pano kagarinakikemo, it amberek inebe dogalegat, kugi inobabut weyak mende inakla unggiluk welaguka mende nen men yogokuka,
“Allah aʼbut karat o,” yiluk inane naik yilik yilik dukisuka mendeat, it inakla nen,
“Kristus Allah nen, ndil ninabuwagaluk mendiluk laʼbi wisigin yisike etnogo ebe yiat o,” yiluk, inilu werekma, Yesus nen inane degat dogowagaluk mberisasike.
Yesus nen o unggul dombok wene yanggul isalik lagike wene
(Markus 1:35-39)
42Esigit diluk mberisalok, noge yiluk kuben o arat wi disikemo, at Yesus o akoni mondok dekma etoma lagike. Lagikemo, akoni mondok dogalegat, at kweyarik lagukasik nen, ebe arat kweyakukasik, werlekmangge launogo yiluk, ininggi pakasuka. 43Pakasukama, at Yesus nen,
“Pano wene Allah apma ʼbiyaligogo wene etnogo o unggul amberek etoma inomat yanggul isalik noko dogowagaluk laʼbani wagikemo wagagisikmo, an o etomaat yanggul isalik noko dogogin o,” yiluk yogisasike. 44Esigit diluk yogisalok nen, o Yudea agum akoni Yahudi mende sembayan yiligogoma unggiluk, wene eti yanggul isalik noko lagike.
Поточний вибір:
Lukas 4: DNA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
