Luka 20
20
1Ina hiwio ata Iesuro oubi Tana‐motowa naibaha iatomuaiwa wia pai‐mea nouro totomu naibaha iaowa, auwo‐kohena oubira, titi‐oubira wia mamusi mamusi nouido o’umo naiba iaowaumo: 2Ro nananu touna pupuoito rimododiaiwa wia pupuonu roido botiro remaatidioro, taro imoido. 3Wia nou neido naibaha imowameaiwa naiba iaowa: Moro na’u na’uha niatorodai nou aibori, ina rio moido tanomowameaumo. 4Ioane babatiso kidia’i tou batiudo o’uro? Toboroudora e oubi aueudora? 5Wia nei himiao naibaha iaotutiumo: Noupa imoo ainarodaidumo toboroudo o’uro ina nouro aiwai‐iatodoi, Tounai rio nouido orovidioumo biahai. 6Ina imoo naibaha ainarodaidumo, Oubi aueudori; oubi auwoha imoido akabuito iatorutimoi, mabu nouri nei imini koko ramu irovidiotutiumo Ioane nou peroveta duburi. 7Wia neiio naibaha omowameaumo, Tou batiudori imo umo biahai. 8Wia Iesu neido naiba iaowa, Nouri rioido mo iao raihe taiba pupuoito nouri nana mainidodiai.
9Wia nouri oro‐aibo wade ata nouro oubido owahoroi naibaha iai, Na’u dubu vine mate batimabuwa naibaha ibo, wia vine bati kiauri oubi nouro naibaha imapoiwa, wia bati auwoito nou naibaha o’uro. 10Ina naiha ta’uwa, na’u hiwaa mere vine bati kiauri oubido nouro naibaha otiodoi, vine iopu amida nouido iwoi: wia vine bati kiauri oubio nou naibaha epiawaumo wia tutuha naibaha otiodoumo. 11Wia ata hiwaa‐mere nouro naibaha otiodoi, ina neiio nou naibaha epiawaumo wia gooa naibaha owaiwaumo wia tutuha naibaha otiodoumo. 12Ina ata hiwaa‐mere nouro naibaha otiodoi wia neiio nou naibaha atetutiwaumo naiba aiveiumo. 13Nou ta’uwa vine bati pai‐dubu naibaha iaowa, Touna niaiidai mo? Mo auwo niro mere moro ainotiodoidai, noupa neiio nouido aiwaimo‐orovidioi. 14Ina nou ta’uwa vine keauri oubio nou naibaha eauriumo, nei himia himia naibaha oromowadomowaumo, naiba iaowaumo, Nouri opuito mereri; ta’umo ainepiadaidumo, ina nou himia batii imoo ainaimoarahooi. 15Nouri neiio nou vine batiudo naibaha amehuawaumo naiba epiawaumo. Ina vine bati pai‐duburo neido taiba waidodiai? 16Nou aiwauro’ui, wia nouri vine bati kiauri oubi nouro aiwaiiwotoi, wia nouri vine bati nouro oubi ataido aiwaimaai. Ina neiio naibaha orovidioumo nei naiba iaowaumo: Iehova tadohiomai. 17Wia nou neido naibaha iauriro, naiba iaowa: Ina touna wade nouri nou titi tau iati,
Nouri akabu moto kididi oubio naibaha aiveumo doihabuo nou opuito akaburi motonu nouowa?
18Dubu nouri ina nouri akabu nou ohuwa aiwamoai nou aiwarehebiai; wia dubu ata nouri akabunu nou ohuwa omoawa, nouro nou aiwauhuti, tuo aibo.
19Ina nou ta’uwa auwo‐kohena oubira, titi‐oubira, neiio nou ohiaimoi niroi wia nei oubido tore iatiwaumo, mabu nouri nei umori nouri oro‐aibo wadeito nouro neido naibaha imapoiwawa. 20Wia neiio nou meaha emeauriwaumo wia piroha keauri oubi naibaha itiodoi; neiio nei himia mea oubi aibori koromohuito idodiaumo, mabu nouri nou himia wadei neiio ohidiomo niroi wia gavana pupuo’i wia pai batii nouido emaaimoi. 21Wia neiio nouido naibaha atodoumo, naiba iaowaumo: Auwo‐dubu e, imo umori ro kiao wadei wia kiatomuai wadei nou naihehari ina ro oubi amida tore imaati biahai, Iehova kidia navei roro riatomuai. 22Ubara e meara imo moni Kaisaido emaatimoira? 23Wia nei himia kiromohuwodio imini nouro naibaha iauriwa wia neido naiba iaowa: Mo teiri nematu‐hutidumo rioo? 24Moni na’u tawaeviaumo moido. Boti hohori, boti titiri nouowa? Wia neiio naibaha omowameaumo naiba iaowaumo, Kaisari. 25Wia nou neido naiba iaowa: Kaisa na’i Kaisaido tamaatimo, Iehova na’i Iehovaido tamaatimo. 26Wia nou himia wade oubi hohowa taiba ohidio nei umo biahai wia nou himiaro kimowameai wadeito nei auwoha emaeawaumo wia nei mubaha naibaha oitiumo.
27Ina Sadukea oubi amida nouido o’umo neiio naiba iaowaumo, Koroihi oubi koroihiudo oroitoutimo biahai, wia neiio nouido naibaha atodoumo, 28Nei naiba iaowaumo: Auwo‐dubu e, Mose imoido titi naibaha iati, Ina dubui namu naibaha oihiai nou o’boa ramuri, ina nou mere tato ebeede nou namu samei niamaro kemidaiha emidai wia mere nou namuido naibaha ahomai. 29Nouri 7 niamamioo ememetutiumo; wia opuito dubui o’boa naibaha emidai wia mere tato naibaha oihiai. 30Wia dubu ataro naibaha emidai ina mere tato naibaha oihiai. 31Wia dubu ataro naibaha emidai wia ataro idau ememidio, ina auwoihiai, ina mere tato auebeedei. 32Dooudo o’bo’i naibaha oihiai. 33Ina koroihiudo koroiitouti hiwiowa, botiri warahooi o’bonu? nouri 7 niamamioo nouri o’boa ememidiotutiumo. 34Wia Iesu neido naibaha imowameaiwa naiba iaowa: Batii nouowa, mereha idabuaiwa wia kidabuai kemaairi; 35wia nouri oubi nei kidia meaha nouri batito idoutimoi wia koroihiudo oroitoutimoi, nei upira dubura oitutimo raihe wia kidabuai imaati raihe. 36Ina ata ta’u neiio oroihimo raihe, mabu nouri nei gururu‐oubi aibori wia Iehova mereri wia koroihiudo koroiitouti mereri. 37Ina nouri koroihi oubi nei kitorairi, Mose nou himia naibaha owaevia budi batiwa, nou ta’uwa Iehova nouro naibaha idodo, Aberahamo Urio‐abea wia Isako Urio‐abea wia Iakobo Urio‐abea. 38Nouri nou koihiai oubido Urio‐abea biahai, nou kiiro oubi Urio‐abeari wia oubi auwoha nouido kiirori. 39Ina na’u titi‐duburo naibaha omowameai naiba iaowa: Auwo‐dubu ro naiheha wade iaotuti. 40Ina dooudo ata katoro atodoimoi nei tore iatiwaumo.
41Wia nou neido naiba iaowa: Nei teiri riaodumo, Iesu Davida mereri? 42Nouri Davida nou himiaro, Psalmo bukawa naibaha iaowa,
Pai‐dubu mo himia pai‐dubuido naibaha iaowa,
Ro mo tuiha hapuoudo tami,
43Doo ta’ui nouowa, ro himia bauurowaro oubi ro himia kono idia bati moro ainamododiai.
44Wia Davidaro nou paina naibaha idodo, Pai‐dubu; teiri nou nou himia mereri?
45Ina nouido kirovidio oubi nei mabuwa, nouro nou himia mereido naibaha iaowa, 46Rioo titi‐oubi taimeaurimo mea. Nei auwo niro rimahebidiodumo tutututu uduuduo ramu orohomoi. Paki batiwa nei niro oubio meamea wade neido iaomoi, naiba orimo orimo batii sunagowa, wia opuito kemi batii horiomoowa. 47Wia same nana’i nei goo‐aiboi kimeri wia nei kirodumeaito wade tutu tutu kiaomori, oubio irovidiomoi. Nouri oubio ubauba wiha gema aiwaimo iviai.
Поточний вибір:
Luka 20: KXW1941
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the British and Foreign Bible Society in 1941.
