Luka 21
21
1Wia nou naibaha iarovia naiba iauriwa nana horohoro oubii, nei himia kemaati nana’i Tana‐moni motowa ibiwaumo. 2Wia same o’bo nana tatori nouro naibaha eauri, moni keke neewa nouro naibaha ibiamama. 3Wia nou naiba iaowa: Naiheha mo rioido ainaro, Nouri same nana tatori, nou nana godogodo tau ribia, auwoha oubi ata nei kekeha ribidumo. 4Nouri nei auwoha nei moni godogodo noudo amida tau ribiwadumo, same o’bo nana tatori, nouro auwoha tau ribia, nou himia nana auwoha nouri.
5Ina oubi amida Tana‐moto neiio naibaha imowahuodiowaumo, nouri nou sovioihai ididi, akabu meamea’i noito wia kemaati nana’i nou ramu. Ina nou ta’uwa nou naiba iaowa: 6Nouri nana rioo nou riauridumo, hiwio amida aiwaumo’ui wia na’u akabu ata akabu ohuwa ia raihe, auwoha aiwaimo‐oromoouti. 7Wia nei nouido naiba atodoumo naiba iaowaumo: Auwo dubu e, na’i nouri tou hiwiowa wauro’ui. Touna modoboro wauro’ui nou ta’uwa nana nouri airidodiaiwadaidumo? 8Ina nou naiba iaowa: Taiaurimo meaha, oubio rio imatuhuti tore, mabu nouri oubi godogodo mo painawa aiwaumo’ui naibaha iaomoi, Mo Kerisori, ina ta’ui nouri ko’u tariwai; rio nei dooudo orohomo au’e. 9Ina nou ta’uwa kihi pai wia heauwo pai rioo aiwaimo‐irovidioi, rio tore iatimo aue, mabu nouri nana opuito ko’uiha wauro’ui wia koropoiio ta’u nou dooudori.
10Ina nou neido naiba iaowa: Amida oubi ata oubimu aiwaimo‐orowotoi, amida bububati ata bububati oubimu aiwaimo‐orowotoi. 11Wia bati ata hopu niimoito waroiiti wia du’e ta’uwa, temeteme ta’uwa aiwaumo’ui wia toretoreha kiauri na’i wia auwo modoboi toboroudo aiwaumo’ui. 12Ina nouri nana opuitori, neiio rio aiwaimo iohi naiba rio gooa aiwaimo iwai, wia sunagoito wia durii daimoito rio neiio naibaha aiwaimo‐iworohoi, wia pai‐oubidora, gavanaidora, rio neiio aiwaimo‐iwaboiiatuti mo himia painawa. 13Nei kidia nouri nou nave aibori, rio neido gamoo wade iaomoi. 14Rio naibaha tairaromomo, neido kimowameai wade’i rioo iraromodioumo aue. 15Mabu nouri, maatara iminira moro rioido ainaimaati, ina rio ori‐kiauri oubi auwoha, neiio rio imowameaimo raihe wia iaomo raihe. 16Rio abeamiora, mamiora, niamamiora, wia rio oubio wia rio himia mabu oubio, neiio rio aiwaimo‐iapoiwai, ina nave neiio aiwaimo‐oweai rio amida iwotomoi. 17Wia oubi auwoha, neiio rio oriha waimo‐imeauri mo himia painawa. 18Ina na’u hoobo rio himia opuudo oropoiio raihe. 19Ina rio meamea emidiomoi rio himia urio rioo aiwaimo iviai.
20Ina nou ta’uwa rioo aiwaimo‐iauri korowoto oubi Ierusalema owaheediomowa, hiwio nouri rio umo noua taitimo nou gooa kowai hiwio tariwai. 21Ina nou ta’uwa, Iudaiawa kemidio oubi akabuito nouwa moroviomo, wia Ierusalemawa kemidio oubi noudo mihuodutimo, wia buiwa kemidio oubii noito idoutimo aue. 22Mabu nouri hiwio nouri heauwo hiwiori wia auwoha nana nou titi tau iati neiio aiwaimo‐idodiaiwai. 23Niainiai upi niro gorowa kiworoho merei wia bamu kiworoho merei hiwio’i nouowa, mabu nouri uba ubaiha waai batii nouowa, wia heauwo na nouri oubido aiwawai. 24Ina neiio nei korowoto garaaito aiwaimo‐iwotoi wia kitohiti oubi aibo neiio aiwaimo‐iwaboiiatuti batibatito auwoha. Wia douboi oubio Ierusalema konoito aiwaimo‐atuuti, ta’ui nouowa douboi oubi hiwio’i aiwaropoiioi. 25Wia modobo amida, hiwio turiwa wia bara turiwa wia huri turiwa, aiwaimo emidioi; wia oubio batibatiwa imini godogodoha aiwaimo‐iraromodioi. Wia neiio tiaha tore waimo‐imahebidioi goiio diamo’i wia kawaragi diamo’i. 26Oubi nei aiwaimo‐imokukuti, nouri nei tiaha toreri wia neiio imini godogodoha waimo‐iraromodioi noupa uba nana batibatiwa aiwaumo’ui, mabu nouri toboro pupuo nana’i aiwaimo‐erederioi. 27Nou ta’uwa Oubiha‐mere neiio aiwaimo‐eauri, bubu ramu waro’ui, pupuo ramu wia auwo moari ramu. 28Ina nou ta’uwa nouri nana nei aiwaimo‐owahoroi, ta’iaroviamo, rio opu ta’iaotaimo, mabu nouri rio kiitouti ta’uu ko’u tariwai.
29Wia na’u wade oro‐aibo neido nou naiba iaowa: Taiaurimo suke nua wia nua auwoha. 30Ina nei paha kimobodiaiwawa rioo aiwaimo‐iauri, rio himia umori koko hiwio’i nou tariwai. 31Nou aibo, ina nouri nana nei o’umowa rioo aiwaimo‐iauri, rio umo noua taitimo, Iehova bububati nou tariwai. 32Naiheha mo rioido ainaro; Nouri oubii nei oropoiioumo raihe ina opuito nouri nana auwoha neiio aiwaimo idodiai. 33Toboro wia hopu aiwaimo oropoiioi, mo himia wade oropoiio raihe.
34Tareaurimo meaha rio himiaido, noupa hogoi nao wia karakara obo koiioi na’i wia kiiro pauwo kiraromodio na’i, neiio rio imini aiwaimo‐iapeuti, ina nouri hiwio rioido aiwauro’ui ina rio umo biahai. 35Mabu nouri nou di aibo wauro’ui, batibatiwa kemidio oubi auwohaido. 36Nouri rio meaha tareaurimo wia hiwio auwoha kirodumeaito wade ta’iaomo, ina nouri ubauba nana rioo iatowoutimoi, wia Oubiha‐mere hohowa rio otoimoi.
37Ina hiwio auwoha Tana‐motowa nouro imatomudiotuti, wia duo auwoha akabu, paina Oliveta, nou noito orohodiotuti wia nou nouowa emidiodiotuti. 38Wia hiwio kiheheaiwa, oubi auwoha nouido Tana‐motoito naibaha orohotutiumo, nouido orovidiomoi.
Поточний вибір:
Luka 21: KXW1941
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the British and Foreign Bible Society in 1941.
