Lucas 9

9
Willakamunankupaq discipulonkunata Jesús kachasqanmanta
(Mt 10.5-15; Mr 6.7-13)
1Chunka iskayniyuq discipulonkunata huñuykuspanmi, demoniokunata qarqomunankupaq hinaspa onqoqkunata sanoyachimunankupaq atiyta qorqa. 2Paykunatam Diospa munaychakuyninmanta willakamunankupaq hinaspa onqoqkunata sanoyachimunankupaq kacharqa. 3#Lc 10.4-11.Hinaspanmi nirqa:
Rispaykichikqa amam apankichikchu tawnatapas, wayqatapas, qoqawtapas, qollqetapas nitaq mudanaykichiktapas. 4May wasimanpas yaykuspaqa, chay llaqtamanta lloqsinaykichikkamam chayllapi samapakunkichik. 5#Hch 13.51.Sichum may llaqtapipas mana chaskisuptikichikqa chay llaqtanmantam lloqsinkichik, hinaspam usutaykichikpi polvotapas taspinkichik, chaynapim chay runakuna mana kasukuq kasqankuta yachanqaku, nispa.
6Chaymi rispanku llapallan llaqtakunapi evangeliota willakuspanku onqoqkunata sanoyachirqaku.
Bautizaq Juanta Herodes wañurachisqanmanta
(Mt 14.1-12; Mr 6.14-29)
7 # Mt 16.14; Mr 8.28; Lc 9.19. Rey Herodes Antipasmi Jesuspa tukuy ima ruwasqanmanta yacharuspan hukmanyarurqa, wakin runakunapa “Bautizaq Juanmi kawsariramun”, nisqankuwan.
8Wakinñataqmi nirqaku:
Eliasmi rikuriramun, otaqmi ñawpaq profetakunamanta hukkaqnin kawsariramun, nispanku.
9Herodesmi ichaqa nirqa:
Juantaqa ñoqam kunkanta qorurachirqani, chaynaqa, ¿pitaq kaykuna ruwaqqa kanman? nispa.
Chaymi Jesusta rikuykuyta munarqa.
Pichqa waranqa runakunaman mikuchisqanmanta
(Mt 14.13-21; Mr 6.30-44; Jn 6.1-14)
10Apostolkunam kutiramuspanku tukuy imam ruwamusqankuta willakurqaku. Chaymi Jesusqa paykunallata pusarikuspan Betsaida llaqtaman pasakurqa. 11Runakunañataqmi risqanta yacharuspanku qatirqaku. Chaymi Jesusqa paykunata chaskiykuspan Diospa munaychakuyninmanta yachachirqa, hinaspam onqoqkunatapas sanoyachirqa.
12Tardeykuruptinmi chunka iskayniyuq discipulonkuna Jesusman asuykuspanku nirqaku:
Runakunata aviayña, llaqtakunaman rispanku samapakamunankupaq hinaspa mikuyta maskanankupaq, kayqa chunniqmi, manam imapas kanchu, nispanku.
13Hinaptinmi Jesusñataq nirqa:
Qamkunayá mikuykachiychik, nispa.
Paykunañataqmi nirqaku:
Pichqa tantawan iskay challwallaykum kachkan. ¿Icha rispachu kay runakunapaq mikuyta rantimusaqku? nispanku.
14Chaypiqa yaqa pichqa waranqa qarikunam kachkarqaku. Chaymi discipulonkunata kamachirqa llapa runakunata pichqa chunkatakama tiyachinankupaq.
15Kamachisqanman hinam llapallankuta tiyarachirqaku. 16Jesusñataqmi pichqa tantakunatawan iskaynin challwakunata hapiykuspan, hanaq pachata qawarispan Diosman graciasta qorqa, hinaspam tantakunata pakiykuspan discipulonkunaman qoykurqa runakunaman aypunankupaq. 17Llapallankum saksanankukama mikurqaku. Puchuqtapas chunka iskayniyuq canasta huntataraqmi huñururqaku.
Jesusqa Cristo kasqanmanta
(Mt 16.13-19; Mr 8.27-29)
18Huk kutipim, Jesusqa Diosta sapallan mañakuchkarqa, discipulonkunapas paywanmi kachkarqaku. Chaymi paykunata Jesús tapurqa:
¿Pim kasqaytataq llapa runakuna ñoqamanta rimanku? nispa.
19 # Mt 14.1-2; Mr 6.14-15; Lc 9.7-8. Chaymi paykunañataq nirqaku:
Wakinmi ninku, Bautizaq Juan kasqaykita; wakinñataqmi ninku, Elías kasqaykita; otaqmi ñawpaq profetakunamantam hukkaqnin kawsariramun, nispanku.
20 # Jn 6.68-69. Chaymi Jesusñataq nirqa:
Qamkunaqa, ¿pim kasqaytataq ninkichik? nispa.
Hinaptinmi Pedroñataq nirqa:
Qamqa Diosmanta hamuq Cristom kanki, nispa.
21Jesusmi ichaqa chay rimasqanmanta ama pimanpas willakunankupaq kamachirqa.
Wañunanmanta Jesuspa willakusqanmanta
(Mt 16.20-28; Mr 8.30—9.1)
22Chaymantam discipulonkunata nirqa:
Runapa Churinqa llumpaytam ñakarinqa, llapa ancianokunawan sacerdotekunapa kamachiqninkunam hinaspa Diospa leynin yachachiqkunam qepanchaspanku wañuchinqaku, ichaqa kimsa punchawmanmi kawsarimunqa, nispa.
23 # Mt 10.38; Lc 14.27. Chaymantam llapallankutaña nirqa:
Pipas qatiwayta munaspaqa, kikinpa munasqanman hina amaña kawsaspayá cruzninta qepikuykuspa qatiwachun. 24#Mt 10.39; Lc 17.33; Jn 12.25.Pipas vidanta salvay munaqqa wañunqam, pipas ñoqarayku wañuqmi ichaqa salvakunqa. 25¿Imatataq runa hurqokunman kay pachapi kaqkunata ganaruspan vidantañataq pierderuspan?
26Pipas ñoqamanta chaynataq palabraykunamanta penqakuqtaqa, runapa Churinpas paymantam penqakunqa, chaynataqa ruwanqa angelninkunawan kuska Taytanpa atiyninpi kutimuspanmi. 27Cheqaptapunim nikichik, kaypi kaqkunamantaqa achkaqmi mana wañunqakuchu Diospa munaychakuyninta rikunankukama, nispa.
Jesuspa rikchaynin tikrakurusqanmanta
(Mt 17.1-8; Mr 9.2-8)
28 # 2~Pe 1.17-18. Pusaq punchaw pasaruptinmi Jesusqa, Pedrota, Juanta hinaspa Jacobota pusarikuspan, Diosta mañakunanpaq orqoman qespirqa. 29Mañakuchkaptinmi rikchaynin tikrakururqa, pachankunapas yuraq-yuraq hinaspa kancharichkaqmi rikurirurqa. 30Hinaptinmi iskay runakuna rikuriykuspan paywan rimarqaku. Paykunaqa karqa Moiseswan Eliasmi. 31Paykunam achkiypa chawpinpi rikuriykamuspanku rimarqaku imaynam Jesuspa Jerusalén llaqtapi wañukunanmanta. 32Pedrowan riqmasinkunañataqmi puñuymanta kachkaspankupas rikcharqaku, hinaspam Jesuspa achkiriynintawan chay iskay runakunata rikurqaku.
33Chay iskay runakuna Jesusmanta rakikuykunankupaq kachkaptinkum, Pedroñataq Jesusta nirqa:
Yachachikuq, ¡allinmi kaypi kayninchikqa! Kimsa ramadatayá ruwarusaqku, hukta qampaq, hukta Moisespaq, huktañataq Eliaspaq, nispa.
34Chaynata nichkaptinmi puyu rikuriykamuspan paykunata pampaykurqa, chaymi puyu pampaykuptin llumpayta mancharikurqaku. 35#Is 42.1; Mt 3.17; 12.18; Mr 1.11; Lc 3.22.Hinaptinmi puyu ukumanta huk rimay uyarikamurqa:
Paymi akllasqay Churiy, payta uya-riychik, nispa.
36Chay rimay upallaruptillanmi Jesusqa sapallanña qeparurqa. Chay rikusqankutam llapa discipulonkuna sonqollankupi hatallirqaku, hinaspam chay punchawkunapiqa mana pimanpas willakurqakuchu.
Wañuy mañayuq warmata Jesús sanoyachisqanmanta
(Mt 17.14-21; Mr 9.14-29)
37Orqomanta paqarinnintin punchaw uraykamuptinkum, achka-achka runakuna paykunaman taripaykurqaku. 38Hinaptinmi paykunamanta huk runa lloqsiykuspan kaynata qaparirqa:
Yachachikuq, ruegakuykim kay sapallan churiyta qawaykunaykipaq. 39Paytam huk demonio hapiruspan qonqaymanta qaparkachachin, taspispanmi posoqollataña aqtuchin, hinaspanmi ñakarichispan sasa-sasata kacharin. 40Discipuloykikunatam qarqonankupaq ruegakurqani, ichaqa manam atirqakuchu, nispan.
41Chaymi Jesusñataq nirqa:
Mana allin ruwaqkunapa miraynin mana iñiyniyuq runakuna, ¿haykapikamataq qamkunawan kasaq hinaspa aguantasqaykichik? Chay churikita asuykachimuway, nispa.
42Chaymi warma asuykuchkaptin demonio wikaparuspan wañuy mañawan hapirachirqa. Hinaptinmi Jesusñataq demoniota qaqcharqa, chaymi warma sanoyaruptin taytanman qoykurqa. 43Chayta qawaykuspankum Diospa hatun atiyninmanta llapallan runakuna admirakurqaku.
Wañunanmanta Jesús huktawan willakusqanmanta
(Mt 17.22-23; Mr 9.30-32)
Chay ruwasqankunawan llapallan runakuna admirasqallaña kachkaptinkum, Jesusñataq discipulonkunata nirqa:
44Allintayá uyariychik: Runapa Chu-rinqa runakunapa makinman entregasqam kanqa, nispa.
45Discipulonkunam ichaqa mana entienderqakuchu, paykunapaqqa pakasqa hina kasqanrayku, manchakurqakutaqmi tapuykuytapas.
Pim puntapi kananmanta
(Mt 18.1-5; Mr 9.33-37)
46 # Lc 22.24. Chaynapim discipulonkunaqa may-qanninkum puntapi kanankumanta atipanakurqaku. 47Jesusñataqmi paykunapa atipanakusqanta musyaruspan, huk warmachata waqtanpi sayaykachirqa, 48#Mt 10.40; Lc 10.16; Jn 13.20.hinaspam nirqa: Kay warmachata ñoqapa sutiypi pipas chaskiqqa ñoqatam chaskiwan, pipas ñoqata chaskiwaqniyñataqmi kachamuwaqniyta chaskin. Qamkunamanta mayqannikichikpas taksan kaqmi puntapiqa kanqa, nispan.
Jesuspa favorninpi kaqkunamanta
(Mr 9.38-40)
49Chaymi Juanñataq nirqa:
Yachachikuq, huk runatam rikuramurqaniku demoniokunata sutikipi qarqochkaqta, hinaptinmi mana ñoqan-chikwan purisqanrayku michakaramuniku, nispa.
50Jesusñataqmi nirqa:
Ama michakuychikchu, pipas mana contranchikpi kaspaqa ñoqanchikwanmi kachkan, nispa.
Juantawan Jacobota Jesús qaqchasqanmanta
51Hanaq pachaman kutinan tiempoña kaptinmi valorchakuykuspa Jerusalenman Jesús pasarqa. 52Ichaqa willakuqkunatam ñawpachirqa. Pay-kunam Samaria lawpi huk llaqta-man chayaruspanku Jesuspa samananpaq wasita maskarqaku. 53Chay llaqtachapi runakunam ichaqa Jeru-salenman risqanta qawarispanku mana chaskirqakuchu. 54#2~R 1.9-16.Chayta qawaykuspankum Jacobowan Juanñataq nirqaku:
Señor, ¿munankichu cielomanta ninata uraykachimuptiyku kay runakunata kañarunanta? nispanku.
55Jesusñataqmi paykunata qaqcharqa. 56Chaymantam huklaw llaqtaman pasakurqaku.
Jesusta qatiy munaqkunamanta
(Mt 8.19-22)
57Ñanta richkaptinkum, Jesusta huk runa nirqa:
Señor, maymanña riptikipas qatisqaykim, nispa.
58Jesusñataqmi nirqa:
Atoqkunapapas kanmi machayninku, alton pawaq urpikunapapas kanmi qesanku, runapa Churinpam ichaqa maypim umallantaña samaykachinanpaqpas mana kanchu, nispa.
59Huk runatapas nirqataqmi:
Qatiway, nispa.
Chaymi payñataq nirqa:
Señorlláy, taytaytaraqyá pamparamusaq, nispan.
60Chaymi Jesusñataq nirqa:
Wañuqkunataqa wañusqakunayá pampamuchun, qamyá ichaqa rispayki Diospa munaychakuyninmanta willakamuy, nispa.
61 # 1~R 19.20. Huk runapas nirqataqmi:
Señor, qanwan riytam munani, ichaqa puntatayá wasiypi kaqkunamanta despedikaykamusaq, nispa.
62Hinaptinmi Jesusñataq nirqa:
Takllawan yapuchkaspa qepata qawariq runaqa manam Diospa munaychakuyninpaq hinachu, nispan.

Поточний вибір:

Lucas 9: RCQ12

Позначайте

Поділитись

Копіювати

None

Хочете, щоб ваші позначення зберігалися на всіх ваших пристроях? Зареєструйтеся або увійдіть