Lucas 8

Jesuspa yanapaqnin warmikunamanta

1Chaykunapa qepantam, Jesusqa achka llaqtakunapi hinaspa taksa llaqtakunapipas Diospa munaychakuyninmanta allin noticiata willakustin purirqa. Chunka iskayniyuq discipulonkunapas paywanmi rirqaku. 2#Mt 27.55-56; Mr 15.40-41; Lc 23.49.Rirqakutaqmi demoniopa huntasqanmanta chaynataq tukuy rikchaq onqoykunamanta sanoyachisqan warmikunapas. Paykunamantam karqa Magdala llaqtayuq María, paymantam qanchis demoniokunata qarqorurqa; 3Herodespa mayordomon Chuzapa warmin Juana hinaspa Susana; chaynallataq kapuqninkuwan yanapaqnin warmikunapas.

Tarpuqwan rikchanachiymanta

(Mt 13.1-9; Mr 4.1-9)

4Sapa llaqtakunamantam Jesusta qawaykunankupaq achkallaña runakuna huñunakaramurqaku, chaymi kay rikchanachiyta yachachirqa:

5Huk runam tarpukuq lloqsirqa. Muhuta maqcheptinmi ñanman wakin wichiykuptin sarutyarurqaku, chaymi urpikuna mikururqa. 6Wakinmi ranraman wichirqa, chaymi wiñaruspan mana yaku kasqanrayku chaylla chakirurqa. 7Wakinmi kichka-kichka ukuman wichirqa, chaymi kichkakunawan kuska wiñaramuptin kichkakuna eqoyarachirqa. 8Wakinñataqmi allin allpaman wichirqa, chaymi wiñaruspan huk muhullamanta pachakta rururqa.

Chaynata nispanmi qapariq hina nirqa:

“Haykam uyarikuqkunaqa, uyarichun”, nispa.

Rikchanachiykunaqa imapaqmi kasqanmanta

(Mt 13.10-23; Mr 4.10-20)

9Discipulonkunam tapurqaku chay rikchanachiypa imam ninan kasqanmanta, 10#Is 6.9-10.chaymi Jesusñataq nirqa:

Qamkunamanqa Diosmi munaycha-kuyninpi pakasqa kaqkunata yachachisunkichik. Wakin runakunatam ichaqa rikchanachiykunawan yachachini, chay-napi qawakuchkaspapas mana rikunankupaq, uyarichkaspapas mana entiendenankupaq.

11Rikchanachisqaypa imam ninanqa kaymi: Muhuqa Diospa palabranmi. 12Ñanman wichiq muhum rikchakun Diospa palabranta uyariq runakunaman, ichaqa diablom hamuruspan sonqonkumanta hurqorun, chaynapi mana creenankupaq hinaspa mana salvakunankupaq. 13Ranraman wichiqñataqmi Diospa palabranta uyariykuspa kusikuyllawanña chaskiqkuna, ichaqa manam sapichakunkuchu. Paykunaqa pisi tiempollapaqmi iñinku, chaynapim sasachakuykuna hamuruptin chaylla kutikunku. 14Kichkakunaman wichiqñataqmi haykam uyariqkuna, paykunaqa allimantam kay pachapi afanakuykunawan, qori-qollqe maskaywan hinaspa aycha kusichiykunawan pamparachikunku, chaynapim mana rurunkuchu. 15Allin allpaman wichiqkunam ichaqa, Diospa palabranta uyariykuspa cheqap sonqowan chaskikuq runakuna, paykunaqa allinta takyaspankum achkanpi rurunku.

Achkiwan rikchanachisqanmanta

(Mr 4.21-25)

16 # Mt 5.15; Lc 11.33. Manam pipas mecherotaqa ratachin imawanpas taparunanpaqchu, otaq camapa ukunman churarunanpaqchu, aswanqa patakman churaptin wasiman yaykuqkunata achkinanpaqmi. 17#Mt 10.26; Lc 12.2.Pakasqa kaqkunaqa qawachisqam kanqa, upallallamanta rimasqakunapas yachasqam kanqa.

18 # Mt 25.29; Lc 19.26. Chaynaqa, sumaqtayá uyariychik: Kapuqniyuqmanqa masraqmi qosqa kanqa, aslla kapuqniyuqmantam ichaqa, “kayqa ñoqapam” nisqanpas qechusqa kanqa.

Mamanwan wawqenkuna Jesusta maskasqankumanta

(Mt 12.46-50; Mr 3.31-35)

19Mamanwan wawqenkunam hamu-rurqaku Jesuswan tupaykuyta munaspanku, ichaqa kichkiy-kichkiy runa kasqanraykum paypa kasqankamaqa mana yaykuyta atirqakuchu. 20Chaymi hukkaqninña Jesusman willaykurqa:

Mamaykiwan wawqekikunam qanwan tupaykuyta munaspanku hawapi suyasuchkanki, nispa.

21Hinaptinmi Jesusñataq nirqa:

Mamaywan wawqeykunaqa, Diospa palabranta uyarispa ruwayman churaqkunam, nispa.

Wayratawan lamar qochata Jesús hawkayachisqanmanta

(Mt 8.23-27; Mr 4.35-41)

22Huk kutipim, Jesuswan discipulonkuna huk barcaman qespirurqaku, hinaptinmi Jesús nirqa:

Waklaw chimpaman hakuchik, nispa.

23Qochata chimpachkaptinkum Jesús puñururqa, chayllamanmi sinchi wayra lamar qochaman pukumurqa, hinaptinmi yakupas barcaman huntaptin yaqaña chinkaykurqaku. 24Chaymi discipulonkuna Jesusman asuykuspanku rikchachirqaku:

¡Yachachikuq, Yachachikuq, chinkaykuchkanchikñam! nispanku.

Payñataqmi puñusqanmanta hatarispan wayratawan qochapa olankunata qaqcharqa, hinaptinmi hawkayarurqa. 25Hinaspanmi discipulonkunata nirqa:

¿Maytaq iñiynikichikqa? nispa.

Paykunañataqmi mancharisqallaña hinaspa admirasqallaña kaspanku ninakurqaku:

¿Pitaq kay runaqa wayratapas, yakutapas kamachiptin kasunanpaqqa? nispanku.

Demoniokunapa ñakarichisqan runamanta

(Mt 8.28-34; Mr 5.1-20)

26Gadara lawmanmi chayarurqaku, chayqa kachkan Galilea qochapa chimpanpim. 27Barcamanta Jesús lloqsiykuptinmi demonioyuq runa paywan tupaykunanpaq llaqtamanta lloqsimurqa. Payqa unayñam qalalla karqa, wasipipas manaña yachaspanmi panteonllapiña yachakurqa. 28Jesusta rikuykuspanmi qaparirqa, hinaspam ñawpaqninpi qonqorakuykuspan nirqa:

Tukuy imapa hawanpi munaychakuq Diospa Churin Jesús, ¿imatataq ñoqawan munanki? ¡Ruegakuykim ama ñakarichiwanaykipaq! nispa.

29Chaynataqa qaparirqa paymanta demonio lloqsinanpaq Jesús kamachisqanraykum. Paypiqa unayñam demonio munaychakurqa; chaymi makinkunata, chakinkunata cadenakunawan wataptinkupas tipiparuspan chunniqkunaman demoniopa kallpanchasqan ayqeq. 30Jesusmi payta tapurqa:

¿Imataq sutiki? nispan.

Hinaptinmi payñataq nirqa:

# 8.30 Legionwanmi sutichanku soqta waranqa soldadokunata. Legionmi, nispa.

Chaynataqa nirqa achkallaña demo-niokuna chay runapi kasqanraykum. 31Demoniokunam Jesusta ruegakur-qaku:

Amayá uku pachamanqa wischuykuwaykuchu, nispanku.

32Achka kuchikunam orqopa waqtanpi mikuchkarqaku. Chaymi demoniokuna Jesusta ruegakurqaku chay kuchiku-naman yaykurunankupaq. Jesús “arí” niykuptinmi, 33demoniokunaqa runa-manta lloqsiruspanku kuchikunaman ustururqaku, hinaptinmi chay kuchi-kunaqa tukuy waqtata kallpaspan-ku qochaman pawaykuspanku heqepa-rurqaku.

34Kuchi michiqkunañataqmi chayta rikuruspanku ayqekurqaku hinaspam llaqtakunapiwan chakrakunapi willakurqaku chay pasakusqanmanta. 35Chaymi llapa runakuna imam pasakusqanta qawamunankupaq kallparqaku. Jesuspa kasqanman chayaruspankum, demoniopa huntasqan runataqa allin pachasqataña hinaspa yuyayninman kutisqataña Jesuspa waqtanpi tiyachkaqta tariykurqaku, hinaspam mancharikurqaku. 36Lliw rikuqkunam paykunaman willarqaku demoniokunapa huntasqan runa imaynam sanoyachisqa kasqanmanta. 37Chaymi Gadara lawpi runakuna mancharikuspanku Jesusta ruegarqaku, paykunapa kasqanmanta huklawman pasakunanpaq. Hinaptinmi Jesusqa barcaman qespiykuspan pasakurqa. 38Demoniopa huntasqanmanta sanoyaruq runam Jesusta ruegarqa payta qatinanpaq, ichaqa Jesusmi mana munaspan kaynata nispan aviarurqa:

39Wasikiman kutispayki, Diospa qanwan imam ruwasqanmanta willakamuy, nispa.

Chaymi pasaspan tukuy hinastin llaqtakunapi Jesuspa hatun kaqkuna paywan ruwasqanmanta willakurqa.

Yawarpakuy onqoymanta sanoyaq warmimantawan Jairopa churin kawsarisqanmanta

(Mt 9.18-26; Mr 5.21-43)

40Qochapa waklawninmanta Jesús kutiruptinmi llapa runakuna kusikuyllawanña chaskiykurqaku. 41Chayllamanmi sinagogapi kamachikuq Jairo hamuruspan Jesuspa ñawpaqninpi qonqorakuykurqa, hinaspanmi wasinman rinanpaq kaynata ruegakurqa: 42Chunka iskayniyuq watanpi kaq sapallan warmi churiymi wañuruchkanña, nispan. Riptinmi Jesusta achkallaña runakuna ñiti-ñiti qatirqaku.

43Chay runakunapa chawpinpim chunka iskayniyuq wataña yawarpakuywan onqoq warmi kachkarqa, tukuy kapuqninkunata rantikuspam medicokunawan hampichikurqa, ichaqa manam mayqanninkupas sanoyachiyta atirqakuchu. 44Kay warmim Jesuspa qepanta rispan capanpa patanta llapchaykurqa, hinaspam yawarpakuyninmanta chaylla sanoyarurqa.

45Chaymi Jesús tapukurqa:

¿Pitaq llapchaykaramuwan? nispan.

Hinaptinmi llapallanku nirqaku: Manam ñoqaykuchu, nispanku.

Pedroñataqmi nirqa:

Yachachikuq, kaynaña runakunam tanqanakuspa ñitimuchkasunkiqa, nispa.

46Hinaptinmi Jesusñataq nirqa:

Hukkaqmi llapchaykamuwan musyakurunim ñoqamanta atiy lloqsirusqanta, nispa.

47Warmiñataqmi musyarachikusqanta yacharuspan katkatatastin Jesuspa ñawpaqninpi qonqorakuykurqa, hinaspam llapa runapa qayllanpi imaynam llapchaykuspa chaylla allinyarusqanta willakurqa. 48Chaymi Jesusñataq nirqa:

Churilláy, iñiynikiraykum sanoyarunki, hawkañayá pasakuy, nispa.

49Chaynata Jesús nichkaptinmi Jairopa wasinmanta hukkaqnin hamuruspan kaynata willarqa:

Churikiqa wañukunñam, yachachikuqtaqa amaña pusayñachu, nispa.

50Chayta uyariykuspanmi Jesusñataq nirqa:

Ama manchakuychu, iñiy hinalla churikiqa sanoyanqam, nispa.

51Jairopa wasinman yaykuspanqa manam munarqachu paywan kuska pipas yaykunanta, aswanqa Pedrotawan, Jacobota, Juanta hinaspa warmapa tayta-mamallantam pusaykurqa. 52Llapallanku pitukuykuspa-pitukuykuspa qaparillawanña waqaptinkum Jesús nirqa:

Ama waqaychikchu, warmaqa manam wañusqachu kachkan, aswanqa puñuyllam puñuchkan, nispa.

53Ichaqa wañusqaña kasqanta yachas-pankum Jesusmanta asikurqaku. 54Chay-mi Jesusñataq warmata makinmanta aysarispan nirqa:

¡Warma, hatariy! nispa.

55Chaymi espiritun kutiykuptin chaylla kawsarirurqa. Hinaptinmi chaypi kaqkunata Jesús kamachirqa mikuyta qomunankupaq. 56Tayta-mamanñataqmi admirasqallaña karqaku chaymi Jesusñataq kamachirqa ama pimanpas chayta willakunankupaq.

Поточний вибір:

Lucas 8: RCQ12

Позначайте

Поділитись

Копіювати