Lucas 13
13
Huchamantaqa wanakunamanta
1Chay punchawkunapim wakin runakuna Jesusman rispanku willarqaku: Galilea lawmanta kaqkunam animalkunata wañuchichkarqaku Diospaq ofrecenankupaq, paykunata Pilato wañurachispanmi yawarninkuwan chay animalkunapa yawarninwan chapururqa, nispa.
2Chaymi Jesusñataq nirqa:
¿Creenkichikchu chay galileo runakuna wakin llaqtamasinkumantapas astawan huchasapa kasqankurayku chayna wañuchisqa kasqankuta? 3Nikichikmi, manam chaynachu. Huchaykichikmanta mana wanakuspaqa qamkunapas chaynam wañunkichik. 4Siloé pozo-pa waqtanpi torre tuñiykuspanmi chun-ka pusaqniyuq runakunata wañurachirqa. ¿Creenkichikchu Jerusalenpi runakunamantapas aswan huchasapa kasqankuta? 5Nikichikmi, manam chaynachu. Huchaykichikmanta mana wanakuspaqa qamkunapas chaynam wañunkichik, nispa.
Mana ruruyuq higos sachamanta
6Jesusmi rikchanachispan nirqa:
Huk runapam uvas chakranpi higos sachan karqa, chaymi rurunta maskaq rispan mana tarirqachu. 7Hinaspam chakra cuidaqta nirqa: “Kimsa watañam kay higospa rurun maskaq hamuni, ichaqa manam tarinichu. Kuchuruy amaña kichkichakunanpaq”, nispa. 8Chakra nanachikuqñataqmi nirqa: “Señor, kay watatawanraqyá saqeykuy. Muyuriqninta aspiruspaymi wanuchaykusaq, 9icha-raqpas rurunman, mana chayqa kuchu-runkiñachiki”, nispa.
Onqoq warmita samana punchawpi Jesús sanoyachisqanmanta
10Jesusmi samana punchawpi sinagogapi yachachichkarqa. 11Chaypim kachkarqa chunka pusaqniyuq wataña onqoq warmi. Kurkunpalla puriqta demonio ruwaruptinmi chayna kurkunpalla puriq. 12Payta Jesús rikuruspanmi qayaykuspa nirqa:
Yaw warmi, onqoynikimantaqa sanoñam kanki, nispa.
13Warmipa hawanman makinta chu-raykuptillanmi chay warmiqa dere-chakuruspan Diosta hatuncharqa. 14#Ex 20.9-10; Dt 5.13-14.Si-nagogapi kamachikuqñataqmi samana punchawpi Jesuspa sanoyachisqanwan piñakuruspan runakunata nirqa:
Soqta punchawmi llamkanapaqqa kachkan. Sanoyachisqa kayta munaspaqa chay punchawkunapiyá hamuychik, amayá samana punchawpichu, nispa.
15Señorñataqmi nirqa:
¡Yaw, llapa iskay uyakuna! ¿Manachum qamkunapas toroykichikta otaq asnoykichikta samana punchawpi paskaspa yaku tomachiq pusankichik? 16Kay warmiqa Abrahampa mirayninmanta karqa, paytam chunka pusaqniyuq wataña Satanás watarurqa, ¿chaychu samana punchawña kachkaptinpas mana sanoyaykachiyman? nispa.
17Chaynata niptinmi lliw enemigonkuna penqaypi rikurirurqaku. Runakunañataqmi admirakuypaq tukuy ruwasqankunata qawaspanku anchallataña kusikurqaku.
Mostaza muhuwan rikchanachisqanmanta
(Mt 13.31-32; Mr 4.30-32)
18Jesusmi nirqa:
¿Imamantaq Diospa munaychakuyninqa rikchakun? ¿Imawantaq tupanachiyman? 19Diospa munaychakuyninqa rikchakun huk runapa tarpusqan mostaza muhumanmi, wiñaruspa sachayaruptinmi urpikunapas kallmankunapi qesachakun, nispa.
Levadurawan rikchanachisqanmanta
(Mt 13.33)
20Jesusmi huk rikchanachiytawan nirqa:
¿Imawantaq Diospa munaychakuyninta tupachiyman? 21Chayqa rikchakun, huk warmipa kimsa tupu harinata chapuruptin poqorachiq levaduramanmi, nispa.
Kichki punkumanta
(Mt 7.13-14, 21-23)
22Jerusalenman Jesús rispanmi llaqtakunapi hinaspa taksa llaqtakunapi yachachistin rirqa. 23Chaymi hukkaqnin tapurqa:
Señor ¿asllachu salvakunqaku? nispa.
Hinaptinmi payñataq nirqa:
24Kichki punkunta yaykunaykichikpaqyá kallpanchakuychik; cheqaptam nikichik, achkaqmi yaykuyta munanqaku, ichaqa manam atinqakuchu. 25Punkuta wasiyuq wichqaramuptinmi qamkunañataq hawamanta takaspa ninkichik: “Señor, kichaykamullawayku”, nispaykichik. Hinaptinmi payñataq nimusunkichik: “Manam reqsikichikchu, maylawcha kankichikpas”, nispa. 26Hinaptinmi qamkunañataq ninkichik: “Señor, qanwanqa kuskam mikurqanchikpas, tomarqanchikpas, plazaykupitaqmi yachachirqankipas”, nispaykichik. 27#Sal 6.8.Hinaptinmi payñataq nimusunkichik: “Manam reqsikichikchu, maylawcha kankichikpas, qayllaymanta asuychik mana allin ruwaqkuna”, nispa. 28#Mt 22.13; 25.30.#Mt 8.11-12.Hinaptinmi hawapi qeparuspa, Abrahamta, Isaacta, Jacobta hinaspa profetakunata Diospa munaychakuyninpi kachkaqta qawaspa, kiruykichikpas kirichichisqa qaparkachankichik. 29Intipa qespimunan lawmanta, intipa seqaykunan lawmanta, norte lawmanta hinaspa sur lawmanta hamuspankum Diospa munaychakuyninpi mikunankupaq tiyaykunqaku. 30#Mt 19.30; 20.16; Mr 10.31.Qepa kaqkunam puntapi kanqaku, puntapi kaqkunañataqmi qepapi kanqaku, nispa.
Jerusalén llaqtarayku Jesuspa waqasqanmanta
(Mt 23.37-39)
31Chaykunata rimachkaptinmi llapa fariseokuna chayaruspanku Jesusta nirqaku:
Herodesmi wañuchiyta munasuchkanki, kaymanta pasakuy, nispanku.
32Chaymi Jesusñataq nirqa:
Rispaykichik chay atoqta nimuychik: “Kunanwan paqarinqa demoniokunata qarqospaymi onqoqkunata sanoyachisaq, mincharaqmi ruwanayta tukusaq” 33Ichaqa kunanpas, paqarinpas chaynataq minchapas maymi rinaytam risaq. Profetaqa manam Jerusalenmanta hawapiqa wañunmanchu.
34¡Jerusalén, Jerusalén! ¡Profetaku-natam wañuchinki! Diospa kachamususqayki willakuqkunatam rumiwan chamqapanki, ¡maynatam munarqani chiwchinkunata rapran ukupi huñuykuq wallpa hina wawaykikunata huñuykuyta, ichaqa manam munarqankichu! 35#Sal 118.26.Chayraykum wasikichikpas chunninqa. Nikichikmi, manañam rikuwankichikñachu: “Señorpa sutinpi hamuqyá qapaqchasqa kachun” nispa niwanaykichik punchawkama.
Поточний вибір:
Lucas 13: RCQ12
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
