Luc 7
7
Cecoc e kikehatc kitci cimakanica otarotakaniw
(Natawapata kaie Matio 8.5-13)
1Ka ickwa aiarimwetc Cecoc, mitcet iriniwa e ki natotakotc, ekoni e ici icatc nete otenak, Capernaüm ka icinikaterik. 2Takopan neta kitci cimakanic ka tiperimatc Romain cimakanica.#7.2 kitci cimakanic ka tiperimatc Romain cimakanica: Mitato mitana tacirikopan ocimakanicima anahwe kitci cimakanic. Nama cota irinikopan anahwe, pitoc ici aiamihakopan. Peikw otarotakana tarikopan neta anahwe kitci cimakanic, orina e akosiritci, aci kekatc e niporitci. Mictahi mirerimekopan anihi ka atoskectakotc iriniwa. 3Ka petaketc anahwe kitci cimakanic Cecoca e arimomakaniwiritci, ki iciticahwew atita cota aiamihe okimawa kitci natawapamarimaritci Cecoca, kitci nataweritamawaritci kitci ki pe nta kikeharitci anihi otarotakana. 4Aci pe takociniwok aniki cota aiamihe okimawok neta Cecoca e ici tacikeritci, wikockatc e wicamatcik, e itatcik: “Anahwe kitci cimakanic micta kicteritakosiw. Acteriw tca kitci pe nta witcihatc. 5Ki sakihikono e cota iriniwiikw, acitc wir ka ki tcimitatc kitaiamihe mikiwaminariw.”
6Aci Cecoc nosanehwew anahweriw iriniwa ka ki pe natcipahikotc. Nama aci rawonakonikopan kitci cimakanic omikiwam, apitc aci kiapatc anahwe kitci cimakanic ki pe iciticahwew kotakihi okwimesa kitci witamawaritci Cecoca: “Teperitcikein, aka arimihitiso kitci pe icain. Nama ni tipi asiteritakosin kitci ki pe pitakein nimikiwamik. 7Ekoni wetci aka nin tipirawe ki otci pe natawapamitan. Aric tepirak peikw itewin ki ka itan, ekoni kitci kiketc anahwe nitarotakan. 8Kaie nin tawok ka tiperimitcik. Minawatc tawok cimakanicak nin ka tiperimakik. Kecpin peikw nicimakanicim itake: ‘Matca,’ kata matcaw. Kecpin kotak itake: ‘Petcimote,’ kata pe icaw. Kirika kecpin kiapatc kotak nitarotakan itake: ‘Anihe itotiske,’ kata itotiskew.”
9Ka petawatc Cecoc ani e iteritci, ki mamiskaterimew. Aci kiwekapowiw e aimihatc anihi iriniwa e mitcetiritci ka nosanehikotc, e itatc: “Ki witamatinawaw, ekoni pitcerak e miskawak awik e apitc asperimototawitc, nama wawatc nete Israël iriniwok ka ici taciketcik!”
10Aci kiwewok aniki ka ki iciticohwakaniwitcik kitci cimakanica omikiwamirik. Tekocikik wapamewok anihi arotakana aci e miro pimatisiritci.
Cikaw okosa e kikehakaniwiritci
11Minawatc kotak otenacik ki icaw Cecoc, Naïn e icinikaterik. Owitcewakana pe witcewikopan acitc mitcet kotakihi iriniwa. 12Apitc ka iti pecowapatakik aniheriw otenaciriw, mia iti takociniwok micta ickwatemik itekera, kipaskonikanik ka takonik, waskak aniheriw otenariw e takonik. Wapatamok e pimotaniwonik e wi nta rikwaskaniwonik, iskwew e cikawitc okosa e ki niporikopanen. Peikocirikopan okosa. Mitcetinaniwoniw e witcewakaniwitc e nta rikwasketc anahwe iskwew. 13Ka wapamatc anihi iskwewa Teperitciketc, ki micta kitimakerimew, e tca itatc: “Aka mato!”
14Ekoni e ici natcikapowictak aniheriw matikowociriw e takinak. Nokikapowiwok iriniwok ka miwotatcik. Aci itew Cecoc: “Ockinikiw, kit ititin, pasiko!”
15Ki apiw anahwe ka ki nipotc e iti arimwetc. Cecoc itew anihi cikawa: “Enko ohwa kikosis!”
16Kaskina ki micta sekisiwok. Ki mirwatcimewok Kice Manitowa, e itetcik: “Aci kitci iriniw e nikan tipatcimotc ki pe takociniw ota kitci witci tacikemitokw!” Kirika e itetcik: “Aci Kice Manito ki pe icaw kitci wikotcihatc otirinima!”
17Kaskina wiec tca Judée askik, kaie kirawe warawik, iti tipatcitcikaterikopan Cecoc ka ki aitotisketc.
Capatis ka pe iciticohwatc owitcewakana
(Natawapata kaie Matio 11.2-19)
18Ki pe natawapamiko Capatis owitcewakana e witamakotc kaskina ka ki iciwepanik Cecoc otci. Aci tca nicw e taciritci wicamew, 19e iciticohwatc kitci natawapamaritci Cecoca, kitci tca kokwetcimaritci, kitci itaritci: “Kir ia ni anihi ka ki itespan Kice Manito kitci pe iciticohwatc ota askik kitci akwacimiweritci, kekotc ma kotak kiapatc kitci pehakitc?”
20Tekocikik neta e ici tacikeritci Cecoca, aci itewok: “Capatis ni ki pe iciticohokonan, ohweriw e wi kiskeritak: ‘Kir ia ni anihi ka ki itespan Kice Manito kitci pe iciticohwatc ota askik kitci akwacimiweritci, kekotc ma kotak kiapatc kitci pehakitc?’”
21Ani apitc mekwata mitcet iriniwa taci kikehepan Cecoc ka akosiritci acitc ka maskisiritci, kirika orowiticohamowepan matci manitoriw anihi ka ki pitciteheckakoritci, kirika mitcet iriniwa aka e wapiritci mirepan kitci wapiritci. 22Aci aniki ka ki pe iciticohikotcik Capatisa itikowok Cecoca: “Matca nta witamawakw Capatis ka ki ici wapatamekw kaie ka ki ici petamekw. Iriniwok aka ka wapiwaspan aci wapiwok, ka maskisiwaspan aci pimotewok, ka micta omikiwapinewaspan ki kikehakaniwiwok, ka kipitewaspan aci petamok, ka ki nipowaspan ki apitcipahakaniwiwok, kirika ka kitimakisitcik witamawakaniwiwok Mirwatcimowiniw. 23Caweritakosiw anahwe aka ke ponitatc e asperimototawitc!”
24Ka ickwa matcatcik aniki iriniwok ka ki pe iciticohikotcik Capatisa, aci Cecoc ki iti aimihew iriniwa e mitcetiritci, Capatisa e arimomatc, e itetc: “Ka icaiekw neta askik ka ici cipewatawokak, awin ka ki iteritamekw kitci wapamekw? Iriniw ka otike cakosimakaniwitc, mia pisekan ia e aiatacitc e rotinik e iteritakositc? Nama ketcinatc! 25Kekwan tca ka ki nta kanawapatamekw? Iriniw ia e micta mirwaspisotc? Aric aniki ka apatcitatcik ka micta mirwacinik wikasiriw kaie ka micta mirwatcitahitisotcik nete ko tacikewok kice okimawa omikiwamirik. 26Kekwan tca ka ki natawapatamekw? Iriniw ka nikan tipatcimotc? Ehe, ki witamatinawaw. Wawatc kaie kirawe kicteritakosiw patok awik ka nikan tipatcimotc. 27Enko meka Capatis anahwe ka arimomakaniwispan Kice Manito Omasinahikanik ka ki masinaterik:
Ki itew Kice Manito,
‘Ni ka iciticohwaw anahwe ke nikan witamaketc, ke nikanickask,
kitci nta ocitamask meskanariw.’ Malachie 3.1
28Ki witamatinawaw,” itew Cecoc, “nama wiskat ki otci pe nitawikiw iriniw kirawe e kicteritakositc patok Capatis. Peikon aric anahwe mawotci aka ka kicteritakositc neta tca Kice Manitowa Okimawinik kirawe wir kicteritakosiw patok Capatis.”
29Kaskina awik natotawekopan Cecoca, wawatc ka natockaketcik. Kaskina tca kaie nisitowinamowakopan icikowisk e iteritakosiritci Kice Manitowa. Ki tca sikahatakowok Capatisa. 30Aric Pharisien iriniwok acitc ka kiskinohamaketcik cota aiamihe irakonikewiniw ki wepakonamok ka ici nataweritamiritci wirawaw otci Kice Manitowa. Nama ki otci mireritamok kitci sikahatakotcik Capatisa.
31Kiapatc ki itew Cecoc: “Anotc iriniwok, tan ani peikon e iteritakositcik? Awin mia tapickotc e icinakositcik? 32Mia ko awacak, wiec e ici mitcetinaniwonik e aipitcik, e tepitepwetcik e aititotcik: ‘Ni ki potatcikanan kitci nimihitak. Nama aric ki ki otci niminawaw! Ni ki nakamonan tcipai nakamowin. Nama aric kaie ki ki otci matonawaw!’#7.32 Wi itemakanotake: Ekoni peikon e itatisitcik aniki anotc iriniwok aka ka otapinakik Mirwatcimowiniw. 33Tapwe wirata, Capatis ki pe icaw, aka e mowatc pakwecikana, aka kaie e minikwetc minicaporiw, kirika kit itanawaw: ‘Matci manitowa ki pitciteheckako!’ 34Minawatc anahwe Ka ki pe iriniwihitisotc#7.34 Ka ki pe iriniwihitisotc: Arimomitiso ota Cecoc. ki pe takociniw, e mitcisotc kaie e minikwetc, kirika kit itanawaw: ‘Kanawapamakw sa anaha iriniw. Tepirak mamitoneritam kitci mitcisotc kirika kitci minikwetc minicaporiw! Wawatc okwimesiw ka natockakeritci kaie kotakihi iriniwa aka ka kicterimakaniwiritci!’#7.34 iriniwa aka ka kicterimakaniwiritci: Peikon kata ki ici nisitotakon: “pactati iriniwok” ka iterimakaniwiritci. 35Aric miro nisitowinakoniw icikowisk e iteritakonik Kice Manito omiro omitoneritcikan e wapamakaniwitcik aniki ka nosanetawatcik.”
Iskwew actomowatc ka miromakonik Cecoca ositirik
36Peikw Pharisien iriniw ki wicamew Cecoca kitci pe nta witci mitcisomikotc omikiwamik. Cecoc ki icaw neta. Tekocik, ki orapiw mitcisowakanatikok. 37Takopan kaie nete otenak peikw iskwew e kiskerimakaniwitc orina e nosanetatc matci pimatisiwiniw. Ka petaketc Cecoca e nta mitcisoritci Pharisien iriniwa omikiwamirik, orakaniciriw ki iciwitaw neta, asiniwa e micta mirwapiskosiritci e ki otci ocitakaniwonik, “albâtre” e icinikasoritci anihi asiniwa. Pimiteriw ka miromakonik#7.37 Pimiteriw ka miromakonik: Ki micta misakitakonitake aniheriw ka miromakonik. nte acteriw. 38Ki nta icikapowiw otananik Cecoca ka ici apiritci, ositirik e icikapowitc. Matopan, ekoni tca e ici nipiwotawatc Cecoca ositiriw, omatowinapo e totak. Minawatc ki pekonamawew, owirisis e totak. Ekoni e ici otcematc Cecoca ositirik kirika e sikinamowatc aniheriw pimiteriw ka miromakonik. 39Kek anaha Pharisien iriniw ka ki wicamatc Cecoca e wapamatc anihi iskwewa, iteritam: “Kecpin tapwe e nikan tipatcimo iriniwitc anahwe iriniw, kata kiskerimepan awin anihi iskwewa ka takinikotc. Kata kiskerimepan e itatisiritci, matci pimatisiwiniw ko e nosanetaritci.”
40Ekoni e ici arimwetc Cecoc e itatc anihi Pharisien iriniwa: “Simo, kekocic ki wi witamatin.”
Itew anahwe Simo: “Witamaci, Kiskinohamake iriniw.”
41Cecoc atisokawew, e itatc: “Nicw iriniwok masinahamowepanak coriariw iriniwa ka awihiweritci coriariw. Peikw anaha niaranaw mitato mitana tatowapiskw masinahamawew. Minawatc anaha kotak niarano mitana tatowapiskw tepirak. 42Nama otci peikw ani e nicitcik kackitaw kitci tapictowatc. Ekoni kaskina ka ici kasisinahikaterik omasinahikaniwaw, aka e kackitatcik kitci kicikasotcik. Tan tca anahwe nta e nicitcik ke mawotci sakihatc anihi ka awihiweritci coriariw?”
43Itew anahwe Simo: “Nit iteriten, anaha kirawe ka ki masinahamowatc, kirawe awocamec ka ki ici kasisinahikaterik omasinahikan, enko na kirawe e sakihatc.”
Aci itew Cecoc: “Ki tapwan.”
44Minawatc ki itactimikapowictawew anihi iskwewa, e itatc Simowa: “Ki wapamaw ia anahwe iskwew? Ka pe pitakeian ota kimikiwamik, nama ki ki otci petan nipi kitci kisisipatcisiteian. Aric wir anaha iskwew ki kisisipataw nisitiriw, omatowinapo e ki totak. Owirisis ki apatcitaw e pekonak. 45Kir tca, nama ki ki otci otcemin ka pe pitakeian ota kimikiwamik. Wir nama ki otci ponitaw e otcemitc nisitik esko ka pe pitaketc. 46Nama ki ki otci posatepenin pimite. Aric wir ni ki posisitenikw pimiteriw ka miromakonik. 47Ekoni wetci witamatan: kaskina opactatowina e micta mitcenik aci ickwa kasihikateriwa. Ekoni wetci wapatahitc e apitc sakihitc anahwe iskwew. Aric awik aka nipara e kasihikaterik opactatowin, nama orina wapatahiwew e sakihiwetc.”
48Aci Cecoc itew anihi iskwewa: “Aci ki kasihamakowin kipactatowina.”
49Kotakihik neta ka witci mitcisomatcik ititowok: “Awin ia anaha iriniw? Wawatc kasiham pactatowiniw!”
50Aci minawa itew Cecoc anihi iskwewa: “Kit akwacimikowin osam e ki asperimototawiin. Ekoni ici matca, acitc pekaterita.”
Поточний вибір:
Luc 7: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
