Luc 4
4
E kokwetcihakaniwitc Cecoc
(Natawapata kaie Matio 4.1-11; Mark 1.12-13)
1Cecoc nete otci matcaw Jourdain sipik, Miro Manitowa e mockineckakotc. Minawatc ki iciwiriko nete askik ka ici cipewatawokarik. 2Nemitana tato kickwa irikik ki kokwetcihiko Matci Manitowa. Tekaci nama otci mitcisopan mekwata neta ka taciketc. Nac ka ickwa aniheriw nemitana tato kickokarik aci pakatepan. 3Itiko anihi Matci Manitowa: “Kecpin tapwe kir Kice Manito Okosa, ici anaha asini kitci pakwecikaniwitc.”
4Itew Cecoc: “Itemakan nta Kice Manito Omasinahikanik:
‘Nama tepirak pakwecikana kata otci pimatisiw iriniw.’” Deutéronome 8.3
5Aci okitatin ki iciwiriko anihi Matci Manitowa, nakiska e wapatahikotc kaskina okimawiniw, 6e tca itikotc: “Kaskina ka takok ohwi okimawinik ki ka ki miritin, kaskina mackawisiwin#4.6 mackawisiwin: Peikon kata ki ici nisitotakon: tiperitamowin. acitc kaskina ka micta mirwacik ka ici takok neta. Kaskina anihe ni ki mirikowin. Matci ni ka ki miraw awik tan anahwe ka wi mirak. 7Kecpin tca nipiskoctawiine, kir kaskina ki ka tiperiten.”
8Aci itew Cecoc: “Itemakan nta Kice Manito Omasinahikanik:
‘Ki ka kicterimaw Kikice Manitom Ka Tiperitciketc.
Wir tepirak ki ka atoskectawaw.’” Deutéronome 6.13
9Minawatc Jérusalem otenak ki matcewirew Cecoca Matci Manito, aci e iciwiratc okitapokw kitci aiamihe mikiwamik, e itatc: “Kecpin tapwe kir Kice Manito Okosa, nitcikwackoti! 10Itemakan meka Kice Manito Omasinahikanik:
‘Kice Manito kata itew otacerima kitci nanakatcihiskik.’ Psaumes 91.11
11Itemakan kaie:
‘Ki ka takonikok aka kitci wisakisiteciniin asinik.’” Psaumes 91.12
12Naskamawew tca Cecoc, e itatc: “Itemakan Kice Manito Omasinahikanik:
‘Nama ki ka kokwetcihaw Teperitciketc Kikice Manitom!’” Deutéronome 6.16
13E ickwa kaskina wiec ici kokwetcihatc Cecoca Matci Manito, ki ponihew, nitowatc e petatc kecko minawatc kitci kokwetcitatc.
Cecoc ka kitciparitc otamirowin Galilée askik
(Natawapata kaie Matio 4.12-17; Mark 1.14-15)
14Minawatc ki kiwew Galilée askik Cecoc, Miro Manitowa e micta mackawisihikotc. Kaskina wiec neta askik itekera ici arimomakaniwikopan. 15Kiskinohamakepan ko mitcet cota aiamihe mikiwamik kirika kaskina awiriwa mirwatcimikokopan.
Cecoc e wepakonakaniwitc Nazareth otenak
(Natawapata kaie Matio 13.53-58; Mark 6.1-6)
16Cecoc ki icaw Nazareth otenak. Ekota ni ka ki otci matcekitc. Minawatc ka arwepi kicikarik, cota aiamihe mikiwamik ki pitakew, kotc e itotiskespan. Aci pasiko kitci tapwatak Kice Manitowa Omasinahikaniw. 17Ki mirakaniwiw masinahikaniw e aitowi notimickweminikaterik, weckatc ka ki masinahamiritci anihi ka nikan tipatcimorispana Ésaïe. Ka ickwa tacockwemipatak aniheriw masinahikaniw Cecoc, aci miskam ka itasinaterik:
18“‘Teperitciketc Omiro Manitoma ni tiperimimikw.
Ni ki orapamikw kitci nta tipatcimoctawakik ka kitimakisitcik Mirwatcimowiniw.
Ni ki iciticohokw kitci nta witamawakik iriniwok ka kipohowakaniwitcik
aci kitci pakitinakaniwitcik,
kaie kitci witamawakik iriniwok aka ka wapitcik
aci kitci wapitcik,
kirika kitci nta wikotcihakik iriniwok ka nekatcihakaniwitcik,
19kitci ki tca tipatataman aci e otcitciparinik
Kice Manito kitci cawerimatc otirinima.’” Ésaïe 61.1-2
20Ekoni e ici notamickwemikinak aniheriw masinahikaniw Cecoc. Mirew arotakana ka mitaritci masinahikaniw, kirika ki apiw. Micta kanawapamiko kaskina iriniwa neta cota aiamihe mikiwamik ka tacikeritci. 21Ekoni tca e ici itatc: “Anihe anotc ka ki tapwataman Kice Manito Omasinahikanik, aci isparin ota anotc kirawaw otci ka natotawiekw.”
22Kaskina ki mirwatcimewok Cecoca e mamiskasitowatcik e micta mirotakonik aniheriw ka ki iteritci. Kokwetcimitowok e itetcik: “Enkweriw ia ni Sosep okosa?”
23Itew Cecoc anahweriw iriniwa: “Ketcinatc ki ka mikawasiminawaw ohwe ka itemakak: ‘Mackiki iriniw, kikehitiso.’ Matci kaie ohwe ki ka pe icinawaw: ‘Ni ki petakanan kaskina ka ki aitotiskein Capernaüm otenak. Peikon aitota ota otenak ka ki otci nitawikiin.’” 24Aci kiapatc itew: “Tapwe ohwe ka witamatakok: nama otci peikw ka nikan tipatcimotc mirerimakaniwiw neta otenak ka ki otci pe matcekitc. 25Tapwe kaie ohwe ka witamatakok: weckatc, mekwata Élie e nikan tipatcimospan neta Israël askik, mitcetiwakopan cikawok ka kokatewakopanen. Nicto pipona acitc apita irikik nama ki otci kimiwonikopan neta askik. Kaskina wiec micta kokataniwonikopan. 26Nama otci peikw cikawa e taciritci ki otci iciticohwakaniwiw Élie kitci witcihatc. Tepirak kotc peikw cikawa ki iciticohwakaniwiw kitci nta witcihatc, Sarepta otenak e tacikeritci, Sidon askik itekera.#4.26 Sarepta otenak e tacikeritci, Sidon askik itekera: Nama cota iskwewirikopan anihi cikawa, pitoc e ici aiamiharitci. 27Minawatc mekwata Élisée e nikan tipatcimospan, mitcetiwakopan kaie neta Israël askik e micta akosiwakopanen e omikiwapinewakopanen. Nama aric peikw nta e tacitcik ki otci kikehiko anihi Éliséa, tepirak peikw iriniw aka e cota iriniwispan, Syrie askik ka ki otcitc. Naaman icinikasokopan. Enko na tepirak ka ki witcihikotc.”
28Aci micta kiciwasiwok kaskina aniki iriniwok nta cota aiamihe mikiwamik e petakik aniheriw ka iteritci Cecoca. 29Ki pasikowok, e orowitiratcik otenak, nte e ici otcipitatcik okitatin e matinacinik, neta ka ki ici tcimatakaniwonik aniheriw otenariw Nazareth, e wi tca nitciwepinatcik. 30Ekoni aric e ici pe matcatc Cecoc, tetawitc iriniwa e ici nanipowiritci e pimotetc.
Iriniw ka makockatcihikotc matci manitowa
(Natawapata kaie Mark 1.21-28)
31Cecoc ki icaw Capernaüm otenak, nte Galilée askik itekera. Ka arwepi kicikarik ki nta kiskinohamawew kaskina iriniwa nta cota aiamihe mikiwamik. 32Ki mamiskasitawewok Cecoca iriniwok e ici kiskinohamakeritci, mictahi meka ki mackawisimakaniw okiskinohamakewin. 33Neta cota aiamihe mikiwamik takopan peikw iriniw e micta nekatcihikotc matci manitowa. Keskat ki tepitepwew anaha iriniw, e itatc Cecoca: 34“Ah! Kekwan ka nataweritamawiak, Cecoc, Nazareth otenak ka otciin? Ki ki pe ican ia kitci nipahiak? Ki kiskerimitin ni: kir Ka Kitcitwawisiin, ka ki pe iciticohwisk Kice Manito!”
35Kaketin aimihew anihi matci manitowa Cecoc, e itatc: “Aka kito! Pakitini kaie anahwe iriniw!”
Kek anahwe matci manito wepicimew anihi iriniwa, kaskina awiriwa e wapakeritci, e pe orowitc irinik, tekaci aka e wisakohwatc. 36Kaskina ka ki wapaketcik ki mamiskateritamok, e tca aititotcik: “Mamiskatc otitewin anahwe iriniw! Ki mirakaniwiw meka tiperitamowiniw kirika mackawisiwiniw kitci ki itatc matci manitowa kitci orowiritci, kaie sapitako!” 37Anahwe ka ki iciwepak, ki micta arimomakaniwiw Cecoc neta Galilée askik.
Cecoc kikehew mitcet iriniwa e akosiritci
(Natawapata kaie Matio 8.14-17; Mark 1.29-34)
38Ka ickwa nakatak cota aiamihe mikiwamiriw Cecoc, nte minawa ki icaw Simo#4.38 Simo: Simon omikiwamirik. Simo osikosa micta akosiriw, e kisiswapineritci. Ki tca nataweritamawakaniwiw Cecoc kekociciriw kitci totak kitci witcihatc. 39Ki natawapamew Cecoc anihi iskwewa e nowectowatc. Ki kanawapamew e taci mackociniritci otapicimonik. Kaketin ki aimitaw aniheriw kisiswapinewiniw, e orowiticohak. Ekoni ka ici mirwatisiritci e matcamakanik okisiswapinewiniw. Tecikotc ki pasiko. Ekoni e ici pe atoskectawatc anahweriw ka tacikeritci omikiwamik anaha iskwew.
40E iti pakicimotc pisimw, mitcet iriniwa ka akosiritci ki pe iciwitowakaniwiw Cecoc, otcirowemakaniwawa kekotc okwimesiwawa e pe iciwirikotcik. Mitcenikopan akosiwiniw ka ki aitapinerikopanen. Tato nta e taciritci ki takinew, kaskina tca ki kikeriwa. 41Kaie ki orowiticohwew matci manitowa, mitcet iriniwa e tiperimaritci. Kotc e orowiticohwakaniwitcik irinik aniki matci manitowok, ki tepitepwewok e itetcik: “Kir Kice Manito Okosa!” Aric kaketin ki aimihew anahweriw matci manitowa Cecoc e otcinehwatc aka awocamec kitci arimweritci. Kiskerimikopan meka wir anihi ka ki itespan Kice Manito kitci pe iciticohwatc ota askik kitci akwacimiweritci.#4.41 anihi ka ki itespan Kice Manito kitci pe iciticohwatc ota askik kitci akwacimiweritci: le Messie. Peikon icinikatakaniwiw Krist.
Cecoc pa kakeskwew cota aiamihe mikiwamiskak
(Natawapata kaie Mark 1.35-39)
42E iti wapanik, Cecoc ki nakatam otenariw. Ki matcaw nte e ki icatc aka e ici taniwonik. Aric mitcet iriniwok ki nantowapamewok. Ka ickwa miskawatcik Cecoca, ki kotci matcikonewok aka kitci nakatikotcik. 43Itikowok: “Arimatc ni ka pa ican otenaskak kitci ki pa tipatataman Mirwatcimowin, ka otci kiskeritcikaterik Kice Manito Okimawin. Ekoni meka wetci ki pe iciticohokoian ota askik.”
44Minawatc kiapatc pa kakeskwepan cota aiamihe mikiwamiskak nete Judée askik.
Поточний вибір:
Luc 4: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
