Luc 5
5
Nictam owitcewakana wicamew Cecoc
(Natawapata kaie Matio 4.18-22; Mark 1.16-20)
1Peikwaw e kicikarik neta taci nanipowikopan Cecoc e askopekanik Génésareth sakihikanik. Micta sitcikapowictakokopan iriniwa e wi natotakotc e tipatcimotc Kice Manitowa otitewiniw. 2Wapatamokopan e nicotakarik tcimaniw neta rarewak. Namesike iriniwok ki nakatamowakopan aniheriw otcimaniwawa e tca kisisiparatcik otaripiwawa. 3Peikw ani e nicinik posatowiw Cecoc, aniheriw mia Simo otciman. Nataweritamawew Simowa kitci nimitewepahamiritci memantcic. Ekoni e ici weripitc Cecoc e tca aimihatc neta mitcet iriniwa rarewak ka tacikeritci.
4Ka ickwa aiarimwetc, aci itew Simowa: “Simo, nete icitcime e asko kickaiak. Pakopehwik tca kitaripimak kitci patahorekw names.”
5Aci itiko Simowa: “Okimaw, kape tipisko ni ki micta otamironan, aka tca e ki otci patahorakitc. Aric e iciin kitci itotiskeian, kiapatc ni ka pakopehwawok aripiik.”
6Ekoni e ici pakopehwatcik otarapiwawa. Micta mitcet ki patahorewok namesa. Kekatc ki pikopaririwa otaripiwawa. 7Ekoni tca e ici icitcitcecteparihotcik okwimesiwawa otci, neta kotakihi tcimanik e tacikeritci, kitci pe nta witcihikotcik. Ki pe icariwa. Tapickotc tca tekaci ki mockinetawok nicotak tcimaniw. Kekatc kosapewa anihi tcimana e apitc mockinetcik namesak. 8Apitc e wapatak ani e iciwepanik anahwe Simo Pien,#5.8 Simo Pien: Simon Pierre ekoni e ici nipiskoctawatc Cecoca, e tca itatc: “Matcekapowictaci, Teperitcikein. Osam ni pactati iriniwin!”
9Wir Simo, kaie kaskina anihi ka witcewikotc, micta mamiskateritamok,#5.9 micta mamiskateritamok: Peikon kata ki ici nisitotakon: micta sekisiwok. e apitc mitcetiritci namesa ka ki patahowaratcik. 10Ekoni peikon e iteritamirikopanen Simo anahweriw okwimesa, Cak#5.10 Cak: Jacques acitc Jean, Zébédée anihi okosa e niciritci.
Aci Cecoc itew Simowa: “Aka sekisi! Aci anotc iriniwok ki ka natcipahawok kitci pe natawapamitcik.”#5.10 Aci anotc iriniwok ki ka natcipahawok kitci pe natawapamitcik: Pot wi itetake: Aci anotc iriniwok ki ka natawapamawok, kitci witcihatcik kitci kiskerimitcik. Epwamoci anotc ki namesike iriniwitai, mocak namesak e ki patahoratcik. Aci aric iriniwok ki ka natcipahawok kitci pe natawapamitcik. 11Ekoni ka ici seskipitakik otcimaniwaw. Kaskina ki nakatamok e tca nosanehwatcik Cecoca.
Cecoc kikehew iriniwa e omikiwapineritci
(Natawapata kaie Matio 8.1-4; Mark 1.40-45)
12Minawatc ki icakopan kotak otenak Cecoc. Takopan kaie neta iriniw e omikiwapinespan, tekaci e itikititc e omikiwapinetc. Kotc e wapamatc Cecoca anahwe iriniw, ekoni e ici nipiskoctawatc e tca oticik motcik. Pakoserimew e itatc: “Teperitcikein, kecpin ici nataweritamane, matci ki ka ki kikehin.”
13Ekoni e ici icitcitcerictowatc Cecoc e tca takinatc e itatc: “Nit ici naheriten. Ekoni ici kike!”
Tecikotc ki mirwatisiw anahwe iriniw. 14Minawatc ki itiko Cecoca: “Akawir awik arimotamo e ki kikehitan. Aric matca natawapam makatewokorew kitci ki wapamisk. Minawatc ki ka aiamihe pakitinikan, kotc ka ki itactatc Moïse kitci totcikaterik, otcitakotc kitci kiskeritakok aci tapwe e ki kikein.”
15Aric eckam ki iti micta arimomakaniwiw Cecoc. Mitcet iriniwok pe nta natotawewakopan e arimweritci acitc kitci kikehakaniwitcik e ici akositcik. 16Mocak matcakopan Cecoc, nete ko e icaspan aka e ici taniwonik, e nta aiamihaspan.
Cecoc kikehew iriniwa ka niponesiritci
(Natawapata kaie Matio 9.1-8; Mark 2.1-12)
17Peikwaw e kicikarik Cecoc taci kiskinohamakepan pitakamik mikiwamik. Pecotcik tacikepanak atita Pharisien iriniwok kaie iriniwok ka kiskinohamaketcik cota aiamihe irakonikewiniw. Nte pe ototewakopan kaskina otenaskak ka ici takonik Galilée kaie Judée askik, atita kaie Jérusalem otenak ki pe ototewok. Cecoc ki micta mackawisihiko Teperitcikeritci, e mirikotc kitci kikehatc ka akosiritci. 18Aci atita iriniwok pe takociniwok, e pe tetaskonatcik peikw iriniwa e niponesiritci. Natowi totamok kitci ki pitakahatcik anihi ka niponesiritci, nikanik e wi aratcik e ici tacikeritci Cecoca kitci ki kikehikoritci. 19Nama aric ki otci kiskeritamok mia ke otci pitakehatcik, osam e mitcetinaniwonik e sitcikapowinaniwonik. Ki tca iskwatowirewok, okitcitak e icatcik. Ekoni e ici pakonehakik okitc ite mia e ici tacikeritci Cecoca. Ekota ka otci nitapikenatcik anihi ka niponesiritci, otetaskonikanik e miciniritci, nictowitc e ici mitcetinaniwonik, mia nikanik e ici tacikeritci Cecoca. 20Ka wapatak Cecoc e asperimototakotc anihi iriniwa ka niponesiritci kirika okwimesiriw, ekoni e ici itatc anihi ka niponesiritci: “Nikwimes, ki kasihamakowin kipactatowina.”
21Iteritamok aniki Pharisien iriniwok kaie ka kiskinohamaketcik cota aiamihe irakonikewiniw: “Kekw iriniw anahwe Cecoc ka marerimatc Kice Manitowa? Awin ke ki kasihak pactatowiniw? Tepirak kotc Kice Manito!”
22Kiskerimikowok Cecoca e iteritakik. Itikowok: “Kekwan wetci iteritamekw anihe? 23Kirawe ia wetan kitci iteian: ‘Ki kasihamakowin kipactatowina,’ kekotc ma kitci iteian: ‘Pasiko, pimote tca!’? 24Aric ni nataweriten kitci kiskeritamekw ohwe: kackitaw anahwe Ka ki pe iriniwihitisotc#5.24 Ka ki pe iriniwihitisotc: Arimomitiso ota Cecoc. kitci kasihak pactatowiniw ota askik.”
Ekoni e ici itatc anihi iriniwa ka niponesiritci: “Ki witamatin, pasiko! Otapina kitetaskonikan! Kiwe kimikiwamik!”
25Tecikotc pasiko anahwe iriniw, kaskina awiriw e wapamikotc. Otapinam otetaskonikan ka ici micikipan, e iti tca pimotetc, omikiwamik e icatc, e mirwatcimatc Kice Manitowa. 26Kaskina awik ki micta kockowapamowok. Mirwatcimewok Kice Manitowa kirika e micta sekisitcik, e tca aitetcik: “Anotc micta kice mamiskateritakon ka ki ici wapatamokw!”
Lévi
(Natawapata kaie Matio 9.9-13; Mark 2.13-17)
27Minawatc ki orowiw Cecoc. Ka natockakeritci ki wapamew, Lévi ka icinikasoritci, e taci apiritci neta ka ici otamiroritci masinahikewikamikok. Itew Cecoc: “Pe nosanehici.” 28Ki pasiko anahwe Lévi, kaskina e nakatak e tca nosanehwatc.
29Minawatc Lévi ki ocitaw kitci micta makocaniwonik omikiwamik, Cecoca otci. Ki micta mitcetinaniwoniw peikon kaie ka natockaketcik ki pe icawok e witci mitcisomatcik. 30Aric Pharisien iriniwok kaie iriniwok ka kiskinohamaketcik cota aiamihe irakonikewiniw tapickotc e ici aiamihatcik, ki kiciweritamok. Itewok Cecoca owitcewakaniriw: “Kekwan wetci witci mitcisomekok acitc e minikweiekw kirika ka natockaketcik kaie kotakihik iriniwok aka e kicterimakaniwitcik?”#5.30 iriniwok aka e kicterimakaniwitcik: Peikon kata ki ici nisitotakon: “pactati iriniwok” ka iterimakaniwitcik.
31Itew Cecoc: “Iriniwok ka miro pimatisitcik nama takatc mackiki iriniwa natawapamewok. Ka akositcik, enko aniki ke natawapamatcik mackiki iriniwa. 32Nama ni ki otci pe ican kitci wicamakik iriniwok aci icikowisk ka iterimitisotcik, aric kirawe aniki ka kiskerimitisotcik e pactatitcik, kitci ki tca kweskatisitcik.”
E roskosonaniwok
(Natawapata kaie Matio 9.14-17; Mark 2.18-22)
33Minawatc Pharisien iriniwok itewok Cecoca: “Aniki wirawaw Capatis owitcewakana, mocak roskosoriwa, mocak kaie aiamihariwa, peikon kaie ninan nitiriniminanak e totakik. Aric aniki wirawaw, kir kiwitcewakanak, mitcisowok kaie minikwewok.”
34Itikowok tca Cecoca: “Kecpin e ickwa nipowinaniwok, makocaniwon. Anahwe ka nipowitc wicamew okwimesa kitci pe nta witci mitcisomikotc. Kit iteritenawaw ia, kata miroparinopan aniki ka wicamakaniwitcik kitci roskosohakaniwitcik mekwata kiapatc e tacikeritci anihi okwimesiwawa ka nipowiritci? Nama ketcinatc! 35Nikotin aric maninamowakaniwitawe aniki ka nipowiritci. Aci nta kata roskosowok.”
36Minawatc Cecoc iti atisokawew ohweriw atisokaniciciriw, e aitetc: “Nama awik kata pikopitam ocki wikasiriw kitci ki pokohak kete wikasiriw aci e pikockarik. Kecpin meka ni totake, aniheriw ocki wikasiriw kata pikockariw, acitc aniheriw ocki opokohikanekin nama tapickotc kata icinakoniw kirika aniheriw ka ketewekanik. 37Nama kaie awik kata sikinam kete mackimotewanik ka pakekiniwonik ocki minicaporiw anotcikwetc e ki ocitakaniwok. Kecpin ni totake, matci kata pakickiparino anihi kete mackimotewana, ekotca kaskina ke sikiparik anihe minicapo acitc kitci onactakaniwoki anihi mackimotewana. 38Nama nte actew kitci totcikatek! Patoc ocki mackimotewanik kata actakaniwon ocki minicapo! 39Nama kaie awik kata wi minikwew ocki minicaporiw, e ickwa kotcictak kete minicaporiw.#5.39 Kete minicapo: Minicapo kinowec e ki kanaweritcikatek opotak, kinowec e petakaniwok kitci miro ocihomakak, nac kitci micta wikacik. Itwaniwon meka: ‘Kirawe wikacin ka keteak.’”
Поточний вибір:
Luc 5: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
