Luc 24
24
Ka apitcipatc Cecoc
(Natawapata kaie Matio 28.1-10; Mark 16.1-8; Jean 20.1-10)
1Wipatc e kicepawocinik e manactakaniwonik, aniki iskwewok ki icawok matikowocik, e pe iciwitatcik pimiteriw ka miromakonik e ki ocitatcik. 2Ki miskawewok asiniwa ka kipahikewakaniwonik matikowocik e ki tetipepinakaniwiritci nte opimera ickwatemik. 3Pitakewok, nama aric miskamok owiawiriw Teperitcikeritci Cecoca. 4Kokwetowi iteritamok. Kek wapamewok nicw iriniwa e wasiterik owikasimiwariw. 5E sekisiwakopanen aniki iskwewok, kirika e atcitaskowectatcik, ki itikowok anahweriw iriniwa: “Kekwan wetci nantowapamekw anahwe ka pimatisitc, ota ka ici nahikowakaniwitcik ka nipotcik? 6Nama ni taw ota aci. Ki apitcipaw. Mikaweritamokw ka ki ititakw mekwata kiapatc e tacikespan Galilée askik, e ki itetc: 7‘Acteriw kitci makonakaniwitc anahwe Ka ki pe iriniwihitisotc,#24.7 Ka ki pe iriniwihitisotc: Arimomitiso ota Cecoc. pactati iriniwa kitci makonikotc, kitci tca tcictaskowatakaniwitc tcipaiatikok, minawatc ickwa nicto kickokarike kitci apitcipatc.’”
8Aci mikawiwok aniheriw ka ki iterispana Cecoca. 9Ki nakatamok aniheriw matikowociriw, e nta tipatcimoctawatcik anihi mitato acitc peikw e taciritci Cecoc owitcewakaniw kaie kaskina kotakihi ka pa witcewikospan. 10Aniki iskwewok, peikw Mari icinikasopan, Magdala e otcikopanen. Kirika kotak, Jeanne icinikasopan. Minawatc anahwe kotak, Mari kaie wir icinikasopan, Cak anihi okawiwa. Kaie aniki kotakihik iskwewok kaie wirawaw ka ki pe icatcik, ekoni kaskina e itatisokwatcik anihi Cecoca otarotakaniw. 11Nama aric ki otci tapwetakowok, osam e iteritamiritci e itatisoketcik: “Kiwockweritamokw aniheriw ka itetcik.” 12Aric Pien ki pasikopataw, e ispatatc e nete kanawapatak matikowociriw. Tekocik neta, wakictaw e sakiwapatak neta matikowocik. Tepirak pakiwaniciapiriw ki wapatam, tipan e icicterik. Minawatc ki kiwew omikiwamik, e micta mamiskateritak aniheriw ka ki iciwepanik.#24.12 Nama takon ohwe ka masinatek atita weckatc masinahikanik.
Ka pe iciwepak neta meskanak Emmaüs otenacik ka iticimok
(Natawapata kaie Mark 16.12-13)
13Anihe peikon e kicikak, nicw owitcewakana Cecoc icawakopan otenacik, Emmaüs ka icinikaterik. Anahwe otenacic wiec nicwo tipahikan asitcapan Jérusalem otenak. 14Aiarimotamatopanak kaskina ka ki iciwepanik. 15Mekwata e arimotamatotcik aniheriw, aci wir tipirawe Cecoca petcimoteriw e tca iti witcewikotcik. 16Ki wapamewok, aric kekociciriw ki ispariniw aka kitci ki nisitowinawatcik. 17Itikowok Cecoca: “Kekwan ka arimotamekw e pe pimoteiekw?”
Aci nokikapowiwok e tca kackeritakik. 18Peikw anahwe iriniw, Cléopas ka icinikasotc, itew Cecoca: “Kir ia ni e peikociin ota Jérusalem otenak e tacikein aka ka ki otci petakein kaskina ka ki pe iciwepak?”
19“Kekwan ni ka ki pe iciwepak?” kokwetcimakaniwiwok aniki iriniwok.
Naskamowok e itatcik: “Anihe ka ki pe iciwepak, kaskina aniheriw wir Cecoc, Nazareth ka otcitc, ka ki pe iciwepasitc. Micta mackawisipan anahwe, e pe nikan tipatcimospan Kice Manitowa otci. Ki wapatahiwew aniheriw, ka ki aitotisketc, kirika ka ki aitetc, Kice Manitowa e kicterimikotc kaie iriniwa. 20Nimakatekoreminanak ka tiperitakik kirika ka nikaniwitcik ninan otci ki pakiterimewok Cecoca kitci kicakonakaniwiritci. Ki tca tcictaskowatewok tcipaiatikok. 21Aric enko anahwe ka asperimoakipan kaskina kitci wikotcihatc Israël iriniwa. Ekoni aci anotc nicto kickwa esko kaskina ki pe iciwepak anihe. 22Minawatc atita iskwewok neta e taciak ni ki kockomikonanak. Wipatc e kicepawak ki icawok matikowocik, 23nama aric ki otci miskamok Cecoca owiawiriw. Ki tca pe kiwewok e pe nta tipatatakik e ki wapamatcik aceriwa, e ki tca itikotcik: ‘Pimatisiw ni Cecoc!’ 24Atita neta e tacitcik nikwimesinanak ki icawok nete matikowocik. Ki tca wapatamok mia e icinakonik, kotc ka ki iteritci iskwewa, nama aric ki otci wapamewok Cecoca.”
25Minawatc itikowok Cecoca: “Tekaci nama kekocic ki kiskeritenawaw! Ki niramisinawaw kitci tapwetamwekw aniheriw weckatc ka ki masinahakik ka ki pe nikan tipatcimowaspan! 26Nama ia ni ki otci acteriw kitci ici nekatcitaritci anihi ka ki itespan Kice Manito kitci pe iciticohwatc ota askik kitci akwacimiweritci, epwamoci pitakeritci oticperitakosiwinik?” 27Minawatc kaskina ki witamawew Cecoc wa itemakanik aniheriw e itasinaterik Kice Manito Omasinahikanik, wir otci, Moïse omasinahikanik e ki otci kitciparinik, kaie kaskina ka ki pe nikan tipatcimotcik omasinahikaniwak e itemakanik.
28E takocikik nte ka icatcik otenacik, mia kiapatc e wi capotoweckaspan e totakipan Cecoc. 29Aric ki matcikonewok, e itatcik: “Witci tacikemicinan. Nama aci kinowec kitci tipiskak.” Aci pitakew Cecoc omikiwamirik kitci witci tacikematc.
30Mekwata ka apitc neta e witci mitcisomatc anihi iriniwa, ki otapinew pakwecikana. Ki naskamew Kice Manitowa. Minawatc ki pakwepitew e tca mamiratc anahweriw iriniwa. 31Aci ki ispariniw kitci ki nisitowinawatcik. Keskat aric nama ki otci wapamewok. 32Aititowok: “Nama ani mia e kisisoikw ka ki iteritamokw, mekwata ka aimihitokw meskanak ka pe pimoteikw, kirika Kice Manitowa Omasinahikaniw ka arimotak!”
33Tecikotc ki pasikowok e kiwetcik Jérusalem otenak. Ki miskawewok anihi mitato acitc peikw Cecoc owitcewakana kirika anihi kotakihi iriniwa ka ki pe witcewikoritci, e ki mawotcihitoritci, 34e tca itikotcik: “Tapwe ni ki apitcipaw Teperitciketc! Ki ni wapamew Simo!”
35Aci kaie wirawaw ki tipatcimowok ka ki isparitcik mekwata ka pimotetcik, kaie mia apitc ka ki otci nisitowinawatcik Cecoca ka pakwepiteritci pakwecikaniw.
Cecoc e wapamikotc owitcewakana
(Natawapata kaie Matio 28.16-20; Mark 16.14-18; Jean 20.19-23; Ka ki aitotiskeritci Cecoc otarotakana 1.6-8)
36Mekwata kiapatc e arimwewakopanen, kek wir tipirawe Cecoca pe natcikapowictako ka ici taciketcik, e tca itikotcik: “Pekaterimokw!”
37Micta kockowapamowakopan kirika sekisiwakopan. Iteritamwakopan e amatisotcik. 38Aric itikowok Cecoca: “Kekwan wetci arimeritamekw? Kekwan wetci anwetamekw kitehiwak? 39Kanawapatamokw nitcitci kirika nisit. Tapwe ni nin! Takinicikw kitci ki wapatamekw aka e amatisoekw! Nama meka owiawiw tcipai, nama kaie oskaniw. Aric ki wapatenawaw nin e owiawian kirika e oskanian.”
40Ka ickwa itetc aniheriw, aci Cecoc wapatahew otcitci kirika osit. 41Aric nama kiapatc orina tapwetako, osam e micta mireritamiritci kirika e mamiskateritamiritci. Aci ki kokwetcimew: “Takon ia ota mitcim?” 42Ki mirewok namesa e ki saswakaniwiritci. 43Ki tca otapinew e mowatc, e wapamikotc anahweriw owitcewakana.
44Itew tca: “Enko anihi kaskina ka ki witamatakok mekwata ka pa witcewitakok. Kaskina ka ki masinahak Moïse otirakonike masinahikanik, acitc aniheriw ka ki ici masinahakik ka ki pe nikan tipatcimotcik, acitc Mirwatatamo Nakamowin Masinahikanik,#24.44 Mirwatatamo Nakamowin Masinahikanik: les Psaumes. kaskina ka ki itactakaniwok kitci iciwepasian, actepan kitci pe icinakok.”
45Minawatc ki mirew kitci miro nisitotamiritci aniheriw ka masinaterik Kice Manito Omasinahikanik, 46e tca itatc: “Enko ohwe ka itasinatek: anihi ka ki itespan Kice Manito kitci pe iciticohwatc ota askik kitci akwacimiweritci, acteriw kitci nekatcitatc kirika kitci nipotc, minawatc tca kitci apitcipatc ickwa nicto kickokarike. 47Kaie kata tipatcimonaniwoniw wir oticinikasowin otci, kaskina wiec ota askik, Jérusalem otenak kitci otci kitciparinaniwonik. Kaskina kata wicamakaniwiwok kitci kweskatisitcik kirika kitci kasihamawakaniwitcik opactatowiniwaw. 48Aci ki ki wapatenawaw anihe ka ki pe iciwepak, kaie ki ka tipatcimonawaw e ki wapatamekw. 49Kirika ki ka iciticahamatinawaw anihi Notawi ka ki itetc kitci miritakw.#24.49 anihi Notawi ka ki itetc kitci miritakw: Enko na Miro Manito. Kirawaw tca, ota otenak ki ka tacikanawaw, nac kitci ickwa mockineckakoiekw mackawisiwin, icpimik ka otciparik.”
Ka ocpickatc Cecoc
(Natawapata kaie Mark 16.19-20; Ka ki aitotiskeritci Cecoc otarotakana 1.9-11)
50Minawatc neta otenak ki orowitirew owitcewakana Cecoc, nete e iciwiratc pecotcik otenacik Béthanie ka icinikaterik. Ekota neta ka icpipitonectatc e aiamitowatatc. 51Mekwata tca ka aiamitowatatc, ki nakatew, e ocpickatc wakwek. 52Wirawaw tca aniki iriniwok, aci micta kicterimewok Cecoca, e kiwetcik Jérusalem otenak e micta mireritakik. 53Aspinikotc kitci aiamihe mikiwamik tacikewakopan, e mirwatcimatcik Kice Manitowa.
Поточний вибір:
Luc 24: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
