Luc 23
23
E iciwirakaniwitc Cecoc okimak Pilate
(Natawapata kaie Matio 27.1-2,11-14; Mark 15.1-5; Jean 18.28-38)
1Kaskina neta ka mawotcihitowaspan pasikowakopan tapickotc, neta tca Pilate e ici tipaskoniketc, e iciwiratcik Cecoca. 2Tekocikik neta ki itactahorewok, e itetcik: “Ni ki petawanan ohwe iriniw e kokwetcitatc arotc kitci kiskinohamawatc nitiriniminana. Itew aka kitci kicikasonaniwonik Kice Okimawa otci, kaie ki icinikatikosiw: ‘Nin anahwe aci weckatc ka pehakaniwitc, anihi ka ki itespan Kice Manito kitci pe iciticohwatc ota askik kitci akwacimiweritci. Nin ni okimaw.’”
3 Pilate ki kokwetcimew, e itatc: “Kir ia ni cota iriniwok okimamiwawa?”
Naskamako Cecoca: “Kir ni ka itein.”
4 Pilate itew cota makatewokorewa ka tiperitamiritci kirika anihi kotakihi iriniwa: “Nama kekociciriw ni miskamwan kitci anwerimakaniwitc anahwe iriniw.”
5Eckam kiciwewok e itetcik: “Kaskina wiec Judée askik matciparihew iriniwa, e cikimatc kitci cakotciharitci okimawa, arotc e ici kiskinohamaketc. Nete Galilée askik ki otci kitcipariw, nac ota ki pe takociniw.”
E iciwirakaniwitc Cecoc kice okimak Hérode
6Ka ickwa petak Pilate ni e itwaniwonik ki kokwetcikemo: “Anahwe iriniw, Galilée askik ia ni otciw?”
7Ka petaketc ite e otciritci Cecoca neta askik Héroda e tiperitamiritci, ki iciticahwew Cecoca kitci wapamikoritci anihi okimawa Hérode. Mekwata meka neta Jérusalem otenak tacikekopan Hérode.
8Ki micta mireritam Hérode ka wapamatc Cecoca. Ki petakekopan meka e arimomakaniwiritci. Aci weckatc e wi wapamakopanen, kitci mata kackitaritci. 9Mitcet kekociciriw ki kokwetcimew. Nama aric ki otci naskamo Cecoc. 10Aniki cota makatewokorewok ka tiperitakik kaie ka kiskinohamaketcik cota aiamihe irakonikewiniw kaie wirawaw tacikewakopan neta. Ki itactahorewok Cecoca e marerimatcik. 11Minawatc Hérode kirika ocimakanicima ki pokonemewok Cecoca, e papirotowatcik. Ki pictokopehewok akopiriw e micta mirwekinik. Ekotca Hérode e ici koski iciticohwatc Cecoca, nete Pilate e ici tacikeritci. 12Hérode kirika Pilate mocak ki cikerimitowakopan. Ekoni esko aniheriw e kicikarik ka otci okwimesimitotcik.
E atamerimakaniwitc Cecoc kitci nipotc
(Natawapata kaie Matio 27.15-26; Mark 15.6-15; Jean 18.39–19.16)
13Minawatc Pilate ki mawotcihew cota makatewokorewa ka tiperitamiritci, kirika kotakihi ka nikaniwiritci acitc kotakihi iriniwa, 14e itatc: “Ki ki pe iciwitowinawaw anahwe iriniw e iteiekw matciparihew iriniwa. Ni ki kokwetcimaw, kaskina kitci ki petawekw. Nama aric ni ki otci miskamwan kekociciriw e ki matci totak ka ki ici itactahorekw. 15Kaie wir okimaw Hérode nama ki otci miskamawew ke ki otci atamerimakaniwiritci. Ekoni wetci ki pe kiwe iciticahamatokw. Anahwe iriniw nama ki otci matci totam kitci nipahakaniwitc. 16Ni ka tca itewan kitci pasakactehwakaniwitc, minawatc tca ni ka pakitinaw.”
[ 17Tatwaw e mirwatcitcikaterikopanen, Pâque ka icinikatcikatek, pakitinekopan ko Pilate peikw ka kipohwakaniwiritci.]#23.17 Nama takon ohwe mitcet weckatc masinahikanik.
18Tepitepwewok tapickotc kaskina e tacitcik e itetcik: “Pakitini kitci nipahakaniwitc anahwe iriniw! Barabbas tca pakitini kitci orowitc kipohotowikamikok, ninan otci!”
19Anahwe Barabbas ki kipohwakaniwikopan osam e ki matciparihatc iriniwa Jérusalem otenak, e ki cikimatc kitci cakotciharitci kice okimawa, kirika e ki manohotc.
20 Pilate nataweritamokopan wir Cecoca kitci pakitinatc. Kiapatc tca ki aimihiwew. 21Aric kiapatc tepweriwa, e itikotc: “Tcictaskowaci tcipaiatikok! Tcictaskowaci tcipaiatikok!”
22Kiapatc Pilate ki aimihew, ekoni aci nictowaw e itatc: “Kekwariw ka ki ici matci totak? Nama kekociciriw ni ki otci miskamwan e ki matci totak kitci nipahakaniwitc. Ni ka itewan kitci pasakactehwakaniwitc, minawatc tca ni ka pakitinaw.”
23Kiapatc tepitepwewok e nataweritakik kitci tcictaskowatakaniwiritci tcipaiatikok Cecoca. Nac ki cakosimewok Pilata. 24Ki oreritam Pilate kitci miratc e ici nataweritamiritci. 25Ki tca pakitinew anihi iriniwa kitci orowiritci ka ki kipohwakaniwirispan e ki matciparitaritci kirika e ki manohoritci. Minawatc Pilate ki itew kitci nipahakaniwiritci Cecoca, kotc ka ici nataweritakik kitci totcikaterik aniki iriniwok.
E tcictaskowatakaniwitc Cecoc tcipaiatikok
(Natawapata kaie Matio 27.32-44; Mark 15.21-32; Jean 19.17-27)
26Aci cimakanicak ki matcewirewok Cecoca ki nakickawewok iriniwa, Cyrène otenak e pe otciritci. Simo#23.26 Simo: Simon icinikasoripan. Pe kiwepan anahwe Simo, kitikan askik e ototetc. Cimakanicak ki makonewok. Ki pitciwonikehewok tcipaiatikwa kitci miwiraritci Cecoca otci, e nosanehwaritci.
27Micta mitcetiwakopan iriniwok ka mi nosanehwatcik. Mitcet kaie iskwewok nosanehikewakopan e matowaspan kirika e micta kackeritamwaspan Cecoca otci. 28Pe kiwekapowiw Cecoc, e itatc: “Jérusalem iskwewok, aka matokw nin otci! Matokw kirawaw otci kirika kinitcaniciwawok otci! 29Peconakon meka kitci itwaniwok: ‘Kata micta mireritamok iskwewok aka ka miroparinik kitci onitcanicitcik, acitc aka wiskat ka ki otci taratcik awaca, acitc aka wiskat ka ki otci nocanehawasotcik.’ 30Aci nta iriniwok kata itewok: ‘Matinawa kitci pe pakitiki, kitci patakockakoak!’ Kirika kitci itetcik: ‘Matinaca kitci rikockakoak!’ 31Kecpin meka ani e ici mitakaniwok ackatikw, tan tca ke totcikatek pacte miti?”#23.31 Pot wi itemakan: Wetci ke icinakok, osam anotc e micta nekatcihitcik iriniwok, misawatc nin e totaman e ici nataweritak Kice Manito, otcitakotc kirawe mictahi kata nakickamok kitci arimisitcik aniki aka ka totakik e ici nataweritamiritci Kice Manitowa.
32Nicw kotakihik iriniwok ki pe iciwirakaniwiwok kaie wirawaw kitci nipahakaniwitcik kirika Cecoc, ka matci totakik e iteritakositcik. 33Tekocikik neta Octikwanikekan Matinacic ka icinikaterik, aniki cimakanicak ki tcictaskowatewok Cecoca tcipaiatikok kirika anihi iriniwa ka ki matci totamiritci. Peikw anahwe iriniw, Cecoc onihiwinik ki ici tcimirakaniwiriw otcipaiatikoma. Minawatc anahwe kotak, Cecoc onimitciwinik ki ici tcimirakaniwiriw otcipaiatikoma. 34Aiamihaw Cecoc, e itetc: “Notawi, kasihamawik ohki ka nekatcihitcik. Nama meka kiskeritamok e totakik.”
Minawatc owikasimiriw ki tetawonamatowok aniki cimakanicak, kaie ki metowewok kitci kiskeritakik anahwe ke kanewitc aniheriw wikasiriw. 35Mitcetiwakopan e icikapowitcik e kanawapiketcik. Cota okimawok kaie wirawaw e tacikewaspan, ki papirotawewok Cecoca, e tca itetcik: “Ki akwacimew kotakihi iriniwa. Kata akwacimitisopan, kecpin tapwe wir anihi ka ki itespan Kice Manito kitci pe iciticohwatc ota askik kitci akwacimiweritci, anihi Kice Manito ka ki orapamatc.”
36Cimakanicak kaie wirawaw papirotawewakopan Cecoca. Pecotcik natawapamewakopan, pinekinaporiw e itinamowatcik kitci minikweritci, 37kirika tca e itatcik: “Kecpin tapwe kir cota iriniwok okimamiwawa, kir tipirawe wikotcihitiso!”
38Okitc octikwanik otcipaiatikomik, ohweriw ki masinateriw: “Enko ohwa cota iriniwok okimamiwawa.”
39Peikw anahwe neta e tacitcik matci iriniwok ka ki tcictaskowatakaniwitcik opimera Cecoc otcipaiatikomik marerimepan, e itatc: “Namaiew ia ni kir anihi ka ki itespan Kice Manito kitci pe iciticohwatc ota askik kitci akwacimiweritci? Wikotcihitiso tca! Kaie tca kaie ninan wikotcihicinan!”
40Aric anahwe kotak iriniw kaie wir ka ki tcictaskowatakaniwitc kitotew anihi kotakihi matci iriniwa, e tca itatc: “Nama ia ki koctaw Kice Manito, peikon kaie kir e ki kicakonikoin? 41Kirano e niciikw actew kitci ici kicakonikoikw, osam e ki pe matci totamokw. Aric anahwe iriniw, nama ki otci matci totam.” 42Minawatc kiapatc itew: “Cecoc, mikawi totacikan tacikeine kokimawinik.”
43Aci itiko Cecoca: “Tapwe ohwe ka witamatan: anotc ki ka witci tacikemin neta e ici micta mirwatcitaniwok!”#23.43 neta e ici micta mirwatcitaniwok: le paradis.
Ka nipotc Cecoc
(Natawapata kaie Matio 27.45-56; Mark 15.33-41; Jean 19.28-30)
44-45Aci wiec apita kicikakopan. Kek pisimw nama awocamec ki otci pe itasikew. Tekaci ki tipiskaw kaskina wiec neta askik, nac nicto tipahikan e ickwa apita kicikak.
Akwekahikan, neta kitci aiamihe mikiwamik e itekitinokopanen,#23.44-45 Akwekahikan, neta kitci aiamihe mikiwamik: Ekota neta mia ka ici micta kicteritcikatek. ki rarikiparin e tetawekiparik.
46Aci ki tepwew Cecoc e kiciwetc: “Notawi, ki miritin nitcitcakoc.” Ka ickwa itetc aniheriw, ekoni ka iti nipotc.
47Ka tiperimatc Romain cimakanica ka wapatak ani e isparinik, ki mirwatcimew Kice Manitowa, e itetc: “Otcitakotc icikowisk iteritakosipan anahwe iriniw!”
48Kaskina e tacitcik neta ka ki pe icawakopanen e mitcetinaniwonik ki wapatamok aniheriw ka ki isparinik. Aci tca kiwewakopan e otatamohotisotcik oskaskikaniwak e micta kackeritakik. 49Kaskina okwimesa Cecoc, kaie aniki iskwewok Galilée askik ka ki otci pe witcewatcik, nakewara icikapowiwakopan, kaskina tca kitci wapatakik e isparinik.
Matikowocik e nahikowakaniwitc Cecoc
(Natawapata kaie Matio 27.57-61; Mark 15.42-47; Jean 19.38-42)
50-51Tapan iriniw, Sosep e icinikasotc. Arimathée otenak otcikopan. Miro iriniwikopan. Icikowisk itatisikopan. Asperimopan kaie kitci takociparinik Kice Manitowa Okimawiniw. Nte e ici apispan ka ici apiritci Ka Kitci Tipaskonikeritci cota iriniwok otci. Nama aric ki otci ici mireritam aniheriw ka ki ici oreritcikaterik kitci totawakaniwiritci Cecoca, nama kaie aniheriw ka ki totcikaterik. 52Ki tca natawapamew Pilata, e nataweritamawatc Cecoca owiawiriw. 53Ki tca nta nitinam. Pakiwaniciapik ki wikwekinam. Ki nta nahikam neta matikowocik, asinik e ki ocitakaniwonik. Anihe matikowoc nama moci wiskat awik neta ki otci arakaniwikopan. 54Ani e kicikak, tcipaiatikw kicikakopan,#23.54 tcipaiatikw kicikakopan: Enkweriw e kicikarik cota iriniwok kicatc e nisawitawakopanen kaskina kekociciriw aci kitci arwepi kicikarik. Aci tca aniheriw kata iti arwepi kicikariw, pakicimoritena pisimwa. aci tca kekatc kitci kitciparik e arwepi kicikak.
55Aniki iskwewok Galilée askik ka ki otci pe witcewatcik Cecoca, ki witcewewok Sosepa. Ki tca kanawapatamok matikowociriw, kirika ki wapatamok neta ka ki ici nahikaterik Cecoc owiawiriw. 56Minawatc ki kiwewok e nta ocitatcik pimiteriw ka miromakonik ke nta actawatcik Cecoca owiawirik. Minawatc tca, aci e arwepi kicikarik, ki arwepiwok, kotc e itemakanik cota aiamihe irakonikewiniw kitci totcikaterik.
Поточний вибір:
Luc 23: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
