Luc 21
21
E aiamihe pakitiniketc iskwew ka kitimakisitc
(Natawapata kaie Mark 12.41-44)
1Mekwata kitci aiamihe mikiwamik e taciketc Cecoc, waska e aitapitc, aci micikita iriniwa wapamew e aiamihe pakitinikeritci, pikitenakanik ko ka ici pakitinikaniwok. 2Cikawa kaie wapamew e kitimakisiritci e pakitinikeritci, nicw comarikeriw e actaritci. 3Itew Cecoc: “Tapwe ohwe ka witamatakok: anahwe cikaw ka kitimakisitc, kirawe nipara ki pakitinikew patok kaskina aniki kotakihik iriniwok. 4Kaskina meka aniki kotakihik ka ki aiamihe pakitiniketcik ka ici ickoparitcik. Aniheriw aric ka ki pakitinak anahwe iskwew, enkweriw ni mamitcitc ocoriam, e micta kitimakisitc. Enkweriw ni ke ki otci pimatisiwakespan.”
Kicatc e witak Cecoc kitci oraparinik kitci aiamihe mikiwamiriw
(Natawapata kaie Matio 24.1-2; Mark 13.1-2)
5Atita iriniwok taci arimotamwakopan kitci aiamihe mikiwamiriw e micta mirwinakonik, kaie e micta mirwapiskosiritci asiniwa ka ki wecitcikewakaniwonik kirika ka ki ici cawerimakaniwiritci Kice Manitowa. Itew aric Cecoc: 6“Kaskina ohwe anotc ka ici wapatamekw, kecko kata otcitciparin aka otci peikw asiniik kitci akwatowickik. Kaskina kata oraparin.”
Cecoc arimotam ke iciwepanik epwamoci ponaskiwonike
(Natawapata kaie Matio 24.3-14; Mark 13.3-13)
7Kokwetcimewok Cecoca, e itatcik: “Kiskinohamake iriniw, tan apitc anihe ke isparik? Tan nta ke otci nisitowinamak apitc mia ke pe iciwepak?”
8Itew Cecoc: “Aiekwamisikw aka kitci paskewirikoiekw. Mitcet meka iriniwok kata takociniwok niticinikasowiniw kitci apatcitatcik, kitci tca itetcik: ‘Nin ni anihi ka ki itespan Kice Manito kitci pe iciticohwatc ota askik kitci akwacimiweritci!’ Kotakihik kata itewok: ‘Aci kata pe iciwepan!’ Akawir aric tapwetowakw. 9Petakeiekwe kitci micta natoparictatonaniwok, akawir sekisikw. Actew kitci icinakok. Nama aric ni moci kata ponaskiwon.”
10Kiapatc itew Cecoc: “Kata mamowinehitowok iriniwok ite kotc e ici aitaciketcik. Peikw okimaw kata nta natoparictawew kotakihi okimawa. 11Kata micta kwekon, kata kokataniwon kirika kata mitceno akosiwina e pamipariki, mitcet kata nipahikowok. Icpimik kata micta koctasinakon, kata mamiskasinakon, e pe kicawatcitakaniwok kekocic, wakwek kitci pe otciparik. 12Aric epwamoci kaskina anihe pe iciwepak, ki ka makonikowinawaw, ki ka nekatcihikowinawaw. Ki ka iciwirikowinawaw cota aiamihe mikiwamik kitci tipaskonikoiekw, kirika ki ka kipohokowinawaw. Osam e nosanehwiekw, ki ka iciwirikowinawaw okimawok kirika kice okimawok ka ici taciketcik, kaie wirawaw kitci tipaskonitakok. 13Ani apitc, ki ka tipatcimonawaw ka ki totaman kirawaw otci. 14Aric ki ka oreritenawaw aka kicatc kitci arimeritamekw ke iteiekw mia kitci ici naskamoctowekok e kispiwatitisoekw. 15Nin tipirawe ki ka witamatinawaw ke iteiekw. Kirika miro mitoneritcikan ki ka miritinawaw, aka tca otci peikw neta e tacitcik iriniwok kitci kackitatc kitci acitemitakw, aka tca kitci takonik ke ki ititakw. 16Ki ka pakiterimikowinawaw. Wawatc kinikihikowawok ki ka pakiterimikowawok, kiwitcicaniwawok, kitcirowemakaniwawok acitc kikwimesiwawok. Mitcet neta e taciekw kata atamerimakaniwiwok kitci nipahakaniwitcik. 17Kaskina awik ki ka cikerimikowaw, osam e nosanehwiekw. 18Nama aric wawatc peikw nta e tatik kirisisiwaw ki ka onitanawaw.#21.18 Wi itemakanotake: Aric misawatc micta matciparike kirawaw otci, ki ka kanawerimitinawaw. 19Sokikapowikw tca! Ekoni meka ke otci mirikoiekw kakike pimatisiwin!”
E tipatcimotc Cecoc kitci oraparinik Jérusalem otenariw
(Natawapata kaie Matio 24.15-21; Mark 13.14-19)
20“Wapamekwe cimakanicak e micta mitcetitcik e waskakapowictakik Jérusalem otenariw, ki ka kiskeritenawaw aci kekatc kitci oraparinik. 21Ani apitc iriniwok Judée askik ka taciketcik arimatc nte kata ici ocimowok e ici matinarik. Kotakihik tca pitakamik otenak Jérusalem ke taciketcik arimatc kata matcawok, kaie aniki orowitimik otenak ke taciketcik nama kata pitakewok neta otenak. 22Ekoni meka apitc ke tipaskonikaniwonik, aci kaskina kitci otcitciparinik ka itasinaterik Kice Manito Omasinahikanik. 23Ani apitc aici kicikarike, kata micta nekatcitawok iskwewok ka kanawerimawasotcik kaie aniki ke nocanihawasotcik! Kata meka micta arimiparin neta askik, kirika kata wapatahiwemakan e kiciwasictowatc anahweriw iriniwa Kice Manito. 24Atita kata nipahakaniwiwok, micta mokomaniw kitci totcikaterik. Kotakihik kata matcewirakaniwiwok, kaskina papitoc askik kitci nta kipohwakaniwitcik. Iriniwok aka ka cota iriniwitcik tekaci kata tatakoskatamok aniheriw otenariw Jérusalem, nac apitc kitci iti ickwaparinik irikik ke mirakaniwitcik kitci totakik.”
Ke pe iciwepanik, minawatc pe takocike anahwe Ka ki pe iriniwihitisotc
(Natawapata kaie Matio 24.29-31; Mark 13.24-27)
25“Kata micta pe mamiskasinakon neta pisimok, tipiskaw pisimok kaie atcikocik, e pe kicawatcitakaniwok kekocic e kicteritakok. Ota askik kaskina iriniwok kotc e aicinakositcik kata micta nekateritamok kaie kata arimeritamok e petakik kitcikamiriw e micta mitcahanik. 26Atita kata nipowok ke apitc sekisitcik, e mamitoneritakik ke iti isparinik kaskina wiec ota askik. Kaskina meka icpimik ka ici takok, pisimw kaie tipiskaw pisimw kaie atcikocak, kata ninikipariwok. 27Kata wapamakaniwiw anahwe Ka ki pe iriniwihitisotc,#21.27 Ka ki pe iriniwihitisotc: Arimomitiso ota Cecoc. oskok kitci otci pe nokositc, minawatc pe takocike, e mackawisitc kirika e icperitakositc. 28Kitciparike anihe kitci pe isparik, pasikokw! Itapikw icpimik! Aci meka kata peconakon kitci wikotcihikoiekw!”
Atisokanicic: Ka ici kiskinohamatokw wapiminatikw
(Natawapata kaie Matio 24.32-35; Mark 13.28-31)
29Minawatc ki atisokew Cecoc, ohweriw atisokaniciciriw e witamawatc: “Kanawapamakw anahwe wapiminatikw#21.29 wapiminatikw: figuier. kaie kotakihik mictikok ka onipicimitcik. 30E wapatamekw e iti sakipakak, ki kiskeritenawaw aci peconakok kitci pe nipik. 31Peikon tca kaie wapatamekwe kitci pe iciwepak anihe ka ki arimotamatakok, ki ka kiskeritenawaw aci e peconakonik Okimawin Kice Manito. 32Tapwe ohwe ka witamatakok: anotc ka pimatisitcik iriniwok nama moci kaskina kata nipowok epwamoci kaskina aniheriw pe iciwepanik. 33Waskok kaie aski tekaci kata ickwaparino, aric nititewin nama wiskat kata ickwaparin.”
Kitci aiekwamisinaniwok
34“Aiekwamisikw! Ekwa kitci osami kiwockweparitisoekw mekwa e mirwatatamekw, aka kitci arimeritamekw e mamitoneritamekw ka ici arimipariekw e pimatisiekw. Kecpin meka tepirak anihe mamitoneritamekwe, takociparike anihe ke kicikak kitci tipaskonikaniwok, ki ka kockoparinawaw ke ispariekw, 35mia awesis e tasosotc tasorakanik. Ekoni meka ke pe iciwepasitcik iriniwok kaskina wiec ota askik. 36Akawir notekocikw! Pakoserimokw mocak. Ekoni tca ke otci tipi mackawisiekw kitci miwotaiekw kaskina ke pe iciwepasiekw, kaie nikanik kitci ki icikapowiekw, wapamekwe anahwe Ka ki pe iriniwihitisotc.”
37E mekwa kicikarik kitci aiamihe mikiwamik kiskinohamakekopan ko Cecoc. Aric e iti otakocinik, nete icakopan matinacik, Mont des Oliviers ka icinikaterik, kape tipiskwa e nta taciketc. 38Minawatc wipatc e kicepawonik, kaskina iriniwa pe icarikopan kitci aiamihe mikiwamik e wi natotakotc.
Поточний вибір:
Luc 21: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
