Luc 2
2
Ka nitawikitc Cecoc
(Natawapata kaie Matio 1.18-25)
1Ani apitc Kice Okimaw Auguste ki itew kaskina ka tacikeritci neta Romain askik kitci masinahwakaniwiritci, kitci ki kiskeritak e tacinaniwonik neta Romain askik.#2.1 Enko anihi kaskina askiwa ka tiperitakwakopanen Romain iriniwok, Rome otenak e apirispana Okice Okimamiwawa. 2Ekoni nictam ka masinahotisonaniwonik, mekwata e kice okimawispan Quirinius neta askik Syrie ka icinikaterik. 3Kaskina iriniwok ki nta masinahotisowok neta otenak ka otcitcik.#2.3 neta otenak ka otcitcik: Peikon kata ki ici nisitotakon: neta otaniskotape omocoma ka otciritci. 4Kaie wir Sosep matcapan, Nazareth otenacik e ki otci matcatc, Galilée askik itekera, nete tca Bethléem otenacik e wi icatc, Judée askik itekera. Ekota ni ka otci nitawikitc weckatc Okimaw Tapit. Sosep meka otaniskotape omocomipan anihi Tapita. 5Ki icaw nete Sosep kitci masinahotisotc kirika anihi ke wikimatc, Mari e icinikasoritci. Anahwe Mari kanawerimawasopan.
6Mekwata e taciketcik Bethléemik, aci otcitcipariniw kitci wapamawosotc Mari. 7Ki okosiw. Ekoni pitcerak e onitcanicitc. Ki wikwekinew okosa pakiwaniciapik, atikw omitcisowakanik e mackocimatc. Nama meka tepickinaniwonikopan nipewikamikok.
Maritcenici iriniwok e pe natawapamikotcik aceriwa
8Nakewar neta askik tacikepanak iriniwok ka nanakatcihatcik maritcenica e tipiskarik, neta kitikan askik e ici mackociwonik. 9Mekwata e nanakatisitcik, kek aceriwa pe natawapamikowok, Kice Manito e ki pe iciticohwatc. Ki waskackakowok Kice Manitowa oticperitakosiwiniw e micta wacterik. Ki micta sekisiwok. 10Itikowok anihi aceriwa: “Aka sekisikw. Miro tipatcimowin ki pe nta tipatcimoctatinawaw, kaskina iriniwok ke otci micta mireritakik. 11Anotc ka mi tipiskarik, ota Tapit otenamik, awik ki nitawikiw kirawaw otci, Ke Akwacimitakw. Enko na Krist,#2.11Krist: Enko anihi Kice Manito ka ki itetc kitci pe iciticohwatc ota askik kitci akwacimitokw. Peikon icinikatakaniwiw: le Messie. Teperitciketc. 12Neta ke ici nisitowinawekw: awacicic ki ka miskawawaw e wikwekinakaniwitc pakiwaniciapik kirika atikw omitcisowakanik e ki micimakaniwitc.”
13Kek wiskata micta kice mitcetiwok aceriwok wakwek e otci pe nokositcik, e pe mirwatcimatcik Kice Manitowa, e aitetcik:
14“Icperimatan Kice Manito,
mawotci icpimik wakwek e taciketc.
Pekateritamowiniw kaie kitci takonik iriniwa otci ota askik ka sakihatc!”#2.14 ka sakihatc: Peikon kata ki ici nisitotakon: ka mirerimatc.
Bethléemik e icatcik maritcenici iriniwok
15Ka ickwa nakatikotcik anahweriw aceriwa, aci wakwek e kiweritci, ki aititowok maritcenici iriniwok: “Bethléemik tca icatan. Actew kitci natawapatamokw anihe ka ki pe iciwepak, aniheriw ka ki witamatokw Teperitciketc.”
16Wepitawok e icatcik. Ki miskawewok Mariwa kirika Sosepa, kaie onitcaniciriw e taci mackociniritci atikw omitcisowakanik. 17Ka ickwa wapamatcik, aci ki pa tipatatamok aniheriw ka ki itikotcik aceriwa, anihi awaca otci. 18Kaskina iriniwok ka petawatcik anahweriw maritcenici iriniwa micta kockomikowok e aitikotcik. 19Wir Mari kaskina ki kanaweritam otehik. Mictahi mamitoneritamopan. 20Minawatc ki kiwewok aniki maritcenici iriniwok. Micta mirwatatamwakopan Kice Manitowa oticperitakosiwiniw, kirika e mirwatcimatcik aniheriw otci, kaskina ka ki ici petakik kaie ka ki ici wapatakik. Kaskina meka mia ki iciwepaniw ka ki itikotcik aceriwa.
E wirakaniwitc Cecoc ke icinikasotc
21Ka ickwa nicwaso#2.21 nicwaso: (8) kickokarik ka ickwa nitawikitc anahwe awacic, ki kicawatocwakaniwiw. Cecoc ki icinikatakaniwiw, enkweriw icinikasowiniw aceriwa ka ki iterispana kitci icinikasotc, epwamoci kanawerimawasoritci okawiwa.
Cecoc e iciwirakaniwitc kitci aiamihe mikiwamik
22Aci ki otcitcipariniw kitci nta aiamihatcik Sosep kirika Mari, e wi nosanetatcik aniheriw ka ici nataweritcikaterik cota aiamihe irakonikewinik, aka awocamec kitci iteritakositcik “ometciwok” cota aiamihewinik itekera, kotc e itemakanik Moïse otirakonikewinik.#2.22 kotc e itemakanik Moïse otirakonikewinik: Itemakan neta cota aiamihe irakonikewin, ometciw iteritakosiw iskwew nemitana kickwa e ickwa okositc. Aci kitci aiamihe mikiwamik iciwirewok onitcaniciwawa, nete Jérusalem otenak e takonik, kitci nta acotamawatcik Teperitcikeritci.#2.22,23 Nosanetawakopan aniheriw cota aiamihe irakonikewiniw e itemakanik: E ickwa nitawikitc ockinikicic, okosinan, kitci aiamihe mikiwamik kitci icaniwonik, kitci nta aiamihectamowakaniwitc. Tarasak Teperitciketc acotamawakaniwiw anihi awaca, “tipan” kitci iterimakaniwiritci wir otci, nikotin tca kitci atoskectakotc. 23Masinatew meka Teperitciketc otirakonikewinik:
“Tato ockinikicic nictam ka nitawikitc
kata mirakaniwiw Teperitcikeritci otci.” Exode 13.2,12
24Kaie ki icawok kitci aiamihe pakitiniketcik Kice Manitowa otci. Enkweriw kiapatc peikon irakonikewiniw ka itacterik:
“Nicw omemewok kitci nipahakaniwitcik e aiamihe pakitinikaniwonik,
kekotc nicw kotakihik ocki pirecicak.” Lévitique 12.8
25Tapan iriniw neta otenak Jérusalem, Simion#2.25 Simion: Siméon icinikasopan. Anahwe iriniw icikowisk itatisipan. Kicterimepan Kice Manitowa kirika pehepan anihi ke pe nta akwacimaritci Israël iriniriw. Miro Manitowa witci tacikemikopan anahwe Simion, 26kirika ki witamakokopan aka kitci nipotc epwamoci wapamatc anihi ke pe iciticohokoritci Teperitcikeritci kitci akwacimiweritci.#2.26 anihi ke pe iciticohokoritci Teperitcikeritci kitci akwacimiweritci: le Messie. Peikon icinikatakaniwiw Krist. 27Aci neta kitci aiamihe mikiwamik ki icaw anahwe Simion, Miro Manitowa e keskinowirikotc. Ekota nta kaie ka ki iciwirikotc Cecoc onikihikwa kitci nta itotiskeritci wir otci ka ici nataweritcikaterik cota aiamihe irakonikewinik.
28Ki otapinew anihi awaca Simion. Ki naskamew Kice Manitowa, e aitetc:
29“Teperitcikein, anotc ki pe isparin anihe ka ki ici nespi tapwein.
Aci ki ka ki pakitinin, nin ka atoskectatan,
kitci nipoan, aci e pekateritaman.
30Aci meka nin tipirawe ni ki wapamaw
anahwe ka ki pe iciticohwotc kitci akwacimimitc,
31anahwe ka ki nisawihatc, kaskina awik kitci wapamatc.
32Enko kaie anahwe mia wactenamakan ke irapatisitc
kitci wactenamowatc iriniwa aka moci ka kiskerimiskik,
wewerita kitci kiskerimiskik.
Enko kaie anahwe ke totak
kitci icperimakaniwiritci kitirinima, Israël iriniwa.”
Simion ka nikan tipatcimotc
33Cecoc otawiwa kaie okawiwa ki micta mamiskasitamok e itatcimakaniwiritci onitcaniciwawa. 34Simion ki aiamitowatew Cecoca kirika onikihikoriw. Minawatc itew Mariwa, Cecoc okawiwa: “Ki orapamakaniwiw anahwe awacic kitci itotisketc mitcet Israël iriniwa kitci pakiciniritci, matci kaie kotakihi kitci otci pasikopitakaniwiritci.#2.34 Wi itwemakanotike: mitcet kitci oniciniritci, matci kaie kotakihi kitci miskamiritci miro meskanariw, kitci akwacimakaniwiritci. Ki orapamakaniwiw kaie kitci wapatahiwetc e ici nataweritamiritci Kice Manitowa. Mitcet tca iriniwa kata marerimiko, 35kitci tca wactenak e iteritamiritci, ka ki ici kataritci otehiwarik. Kir tca Mari, ki ka micta nekateriten. Mia micta mokomaniw e capo pataskahwikotc kitcitcakoc, ekoni ke apitc nekateritaman.”
Anne ka nikan tipatcimotc
36Tapan kaie neta Jérusalem otenak iskwew ka nikan tipatcimotc. Anne icinikasopan, Penouel otanisa. Asser icinikasoripana otaniskotape omocoma. Aci micta kice iskwewipan anahwe Anne. Nicowaso#2.36 Nicowaso: (7) pipona irikik ki nipowipan ka ocki iskwewispan, minawatc ki niporiw onapema. 37Mocak tca ki cikawiw. Aci nicwaso mitana acitc new#2.37 nicwaso mitana acitc new: (84) tato piponesipan. Nama wiskat orowipan kitci aiamihe mikiwamik. Kape kickwa kaie kape tipiskwa atoskectawepan Kice Manitowa. Roskosopan kirika aiamihapan. 38Aci mia takociniw anahwe Anne neta e taci arimweritci anihi Simiona. Ekoni e ici micta naskomatc Kice Manitowa. Aiarimomew kaie anihi awaca, e arimotamawatc kaskina iriniwa ka peharispana Kice Manitowa kitci akwacimaritci Jérusalem iriniwa.
Ka kiwerikotc Cecoc onikihikwa Nazareth
39Ka ickwa kaskina totakik ka ici nataweritcikaterik Teperitciketc otirakonikewinik, Sosep, Mari acitc onitcaniciwawa ki kiwewok nete otenamiwak Nazareth, Galilée askik itekera. 40Anahwe awacic matcekipan kirika iti mackawisipan. Micta omiro omitoneritcikanipan kaie mirerimikopan Kice Manitowa.
Ka isparitc Cecoc kitci aiamihe mikiwamik ka mitato acitc nicw tato piponesitc
41Tato pipona Jérusalem otenak icawakopan Mari kirika Sosep,#2.41 icawakopan Mari kirika Sosep: Witcewewakopan otcirowemakaniwawa kirika okwimesiwawa. kitci nta makocetcik nete e ici makocaniwonik, Pâque e icinikaterik.#2.41 e ici makocaniwonik, Pâque e icinikaterik: Wetci makocewakopanen, aka ni kitci oniketcik cota iriniwok weckatc e ki orowitahikotcik Kice Manitowa neta Égypte askik. Ekota neta Jérusalem otenak e ici takonokopanen kitci aiamihe mikiwam, cota iriniwok otci. 42Minawatc ka mitato acitc nicwo tato piponesispan Cecoc, aci ki iciwiriko onikihikwa nete e ici makocaniwonik, kotc e itemakanik cota aiamihe irakonikewiniw kitci totamiritci kaskina e asitatisiritci cota ockinikiwa. 43Ka ickwa makocaniwonik, iti kiwewok Sosep kirika Mari. Aric kiapatc nete Jérusalem otenak tacikerikopan Cecoca. Nama kiskeritamwakopan aka e witcewikotcik okosiwawa. 44Iteritamwakopan: “Witcewetake anihi kotakihi ka ki pe witcewitokw kikosino.” Peikwo kickwa irikik aci ki pimotewakopan. Minawatc ki iteritamok kitci nantowapamatcik anihi okosiwawa, e nta kokwetcimatcik otcirowemakaniwawa kaie okwimesiwawa. 45Nama aric miskawewok. Ekoni e ici kiwetcik Jérusalem otenak kiapatc e nantowapamatcik. 46E ickwa nicto kickokarik, aci miskawewok kitci aiamihe mikiwamik, e apitc tetawitc e ici apiritci iriniwa ka kiskinohamakeritci cota aiamihe irakonikewiniw, e natotawatc kirika e kokwetcimatc. 47Kaskina iriniwok ka petawatcik Cecoca micta mamiskasitawewok e apitc kakitaweritamiritci, kaie e apitc kackitaritci e naskamoritci. 48Sosep kirika Mari ka wapamatcik, ki micta mamiskaterimewok kaie wirawaw. Aci itew Mari: “Ninitcanic, kekwan wetci ki totawiak? Kotawi kirika nin, kaskina wiec ki ki nantowapamitinan. Ki ki micta sekihinan.”
49Aci itew Cecoc: “Kekwan wetci ki nantowapamiekw? Nama ia ni ki kiskeritenawaw ota e actek kitci tacikeian, Notawi omikiwamik?” 50Nama aric ki otci nisitotamok aniheriw ka itikotcik.
51Minawatc ki witcewew onikihikwa Cecoc, Nazareth otenak e icatcik. Mocak ki sapitawew onikihikwa. Mocak kaie Mari ki kanaweritam otehik kaskina aniheriw ka ki isparinik. 52Ki matcekiw Cecoc kirika eckam kirawe ki iti omiro omitoneritcikaniw. Kice Manitowa ki micta mirerimiko, kirika iriniwa.
Поточний вибір:
Luc 2: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
