Luc 1
1
Luc e arimikowatc iriniwa ka masinahamowatc
1Nikwimes Théophile,
Mitcet iriniwok ki kokwetcitawok kitci masinahakik ka ki pe iciwepanik ota nitaskinak. 2Ki itasinahamok kotc ka ki ici tipatcimoctawiamitcik kotakihik iriniwok wirawaw tipirawe ka ki wapatakik esko ka kitciparinik, kirika ka ki mirakaniwitcik kitci pa tipatatakik Kice Manito otitewiniw.
3Ekoni tca wetci kaie nin nanto kiskeritamapan kaskina anihe ka ki pe iciwepak esko ka kitciparik. Minawatc ni ki iteriten, nokimam Théophile, kaskina wewerita kitci masinahaman kir otci ota ohwe masinahikanik. 4Wetci itotiskeian, kitci ki kiskeritaman kaskina e tapwemakak anihe kiskinohamakewin ka ki pe otitikoin.
Aceriw e tipatcimotc kitci nitawikiritci Capatisa#1.5 Capatisa: Jean-Baptiste
5Tapan cota makatewokorew, Sakari#1.5 Sakari: Zacharie e icinikasospan. Ani apitc Hérode mekwata okimawikopan neta Judée askik ka icinikaterik. Anahwe Sakari, ekota neta kaie wir e ici apispan, aniki makatewokorewok Abia ka icinikatakaniwitcik. Taripan okoma, Risapet#1.5 Risapet: Élisabeth icinikasoripana. Anahwe iskwew otaniskotape omocoma ki kitci makatewokorewiripan, Aaron e icinikasorikopanen. 6Icikowisk iterimikowakopan Kice Manitowa tapickotc e nicitcik anahwe Sakari kirika Risapet, kaie wewerita nosanetawakopan kaskina otirakonikewiniw Teperitcikeritci. 7Nama aric tarikopan onitcaniciwawa. Nama ki onitcanicikopan anahwe Risapet. Aci kaie iti kiciwatisiwakopan tapickotc e nicitcik.
8Peikwaw e kicikarik kitci aiamihe mikiwamik nta otamiropan anahwe Sakari Kice Manitowa otci. Wirctamiwaw meka aniki Abia makatewokorewok Sakari ka ici taciketc ke otamirotcik neta mekwata.
9Ani apitc mameckotc ko icawakopan makatewokorewok e nta otamirotcik neta aricapik ka ici mawotci kicteritakonik, kitci aiamihe mikiwamik e takonik kaie kitci nta iskahak sakatakaniw neta. Aci wirctam anahwe Sakari ki orapamakaniwiw kitci nta pitaketc neta.
10Mekwata e ickwasikaterik aniheriw sakatakaniw, iriniwok ka aiamihatisitcik neta orowitimik taci aiamihapanak e mitcetitcik.
11Kek aceriwa ki pe natawapamiko anahwe Sakari, Teperitciketc otacerima. Neta e ici iskahikaterik aniheriw sakatakaniw, onihiwinik icikapowiriw. 12Ka wapamatc anahwe Sakari, ki arimeritam kaie ki sekisiw. 13Aric itiko anihi aceriwa: “Aka sekisi, Sakari. Ki petam meka Kice Manito ka ki ici pakoserimatc. Risapet, kiwokom, kata onitcaniciw. Kata okosiw. Jean ki ka icinikataw. 14Ki ka micta mireriten kaie mitcet iriniwok kata mireritamok nitawikiritena. 15Mictahi meka kata miro atoskectawew Teperitcikeritci. Nama wiskat kata minikwew minicaporiw, nama kaie kotakeriw ka minikwaniwonik ka mackawakaminik. Miro Manitowa kata mockineckako, wawatc epwamoci nitawikite. 16Kata witcihew mitcet Israël iriniwa kitci kiwe nosanehwatcik Teperitcikeritci, Okice Manitomiwawa. 17Kata pe tipatcimo Teperitcikeritci otci, e sokitehetc kaie e micta mackawisitc, mia weckatc e itatisirispana ka nikan tipatcimoritci, Élie ka ki icinikasoritci, kitci ki witcihatc iriniwa kitci koski miroparihitoritci kirika onitcaniciwawa, kaie kitci ki witcihatc iriniwa aka ka sapitowaritci Kice Manitowa kitci omiro omitoneritcikaniritci, mia aniki aci icikowisk ka iteritakositcik.#1.17 kitci omiro omitoneritcikaniritci, mia aniki aci icikowisk ka iteritakositcik: Peikon kata ki ici nisitotakon: kitci iteritamiritci kaie wirawaw mia aniki ka nosanehwatcik Kice Manitowa. Ekoni ke totak kikosis kitci ki ickwa aiketcik iriniwok pe takociniritena Teperitcikeritci.”
18Aci Sakari itew anihi aceriwa: “Tan nta ke otci kiskeritaman tapwe kitci pe iciwepak? Aci meka ni kice iriniwin, kaie wir nokom kice iskwewiw!”
19Itiko anihi aceriwa: “Kaprien#1.19 Kaprien: Gabriel ni nin. Kice Manito ni natcikapowictawaw e atoskectawak. Ni ki pe iciticohokw kitci pe nta aimihitan, kitci witamatan ohwe miro tipatcimowin. 20Nama aric ki ki otci tapweten anihe ka ki ititan tapwe ke pe iciwepak, kotc iteritakoke kitci pe icinakok. Nama tca aci ki ka kackitan kitci arimwein. Tekaci nama ki ka kiton, nac apitc otcitciparike anihe ka ki iteian kitci isparik.”
21Aiapitc aniki iriniwok orowitimik ka taci aiamihawaspan pehewakopan Sakariwa. Kockopariwakopan e apitc kinowec itanahoritci nta pitakamik ka ici micta kicteritakonik kitci aiamihe mikiwamik. 22Aric ka pe orowitc, nama ki arimwew. Aniki iriniwok kiskeritamok kekociciriw e ki icinamiritci nte pitakamik kitci aiamihe mikiwamik. Ki mitci aicitcitcepariho aka e arimwetc.
23Minawatc ka ickwa kictatc otamirowin neta kitci aiamihe mikiwamik Sakari, ki kiwew omikiwamik. 24Kek nikotin aci kanawerimawasoriw okoma Risapet. Nama ki otci orowiw omikiwamiwak anahwe Risapet niarano pisimwa irikik. 25Ki itew: “Nin otci aniheriw ka ki totak Teperitciketc. Ni ki micta cawerimikw e maninamowitc anihe wetci waneritamapan, aka e ki otci onitcanician.”
Mari e pe natawapamikotc aceriwa
26Ani apitc aci nikotwaso pisimwa kanawerimawasokopan anahwe Risapet. Kek Kice Manito ki iciticahwew aceriwa, Kaprien ka icinikasoritci, neta otenak Nazareth ka icinikaterik kitci icaritci, Galilée askik itekera, 27peikw ocki iskwewa#1.27 ocki iskwewa: Mia itemakan: ickwecic aka wiskat ka ki otci kiskerimatc iriniw. kitci natawapamaritci. Anahwe ocki iskwew, Mari#1.27 Mari: Marie icinikasopan. Aci ki orakonikaniwonikopan kitci nipowitc iriniwa, Sosep#1.27 Sosep: Joseph ka icinikasoritci. Anahwe tca Sosep okice omocomikopan Tapita,#1.27 Tapita: David weckatc ka ki kice okimawirispana. 28Anahwe aceriw natawapamew Mariwa, e itatc: “Mirerita! Kice Manito ki ki cawerimikw. Ki witci tacikemikw.”
29Ki micta arimeritam aniheriw ka itikotc Mari. Ki iteritam: “Tan wa itetc?” 30Itiko tca aceriwa: “Aka sekisi, Mari. Ki cawerimikw Kice Manito. 31Aci kekatc ki ka kanawerimawason. Ki ka okosin. Cecoc#1.31 Cecoc: Jésus ki ka icinikataw. 32Kata kitci iriniwiw kirika kata icinikatakaniwiw ‘Kice Manito ka mawotci icperitakositc Okosa.’ Kata miriko Teperitcikeritci Kice Manitowa kitci okimawitc, mia otaniskotape omocoma Tapit ka ki okimawiritci. 33Kirika mocak kata tiperimew Israël iriniwa. Nama wiskat kata ickwapariniw okimawin.”
34Aci Mari itew anihi aceriwa: “Tan tca ke ki otci isparik, aka moci e kiskerimak iriniw?”
35Itiko anihi aceriwa: “Miro Manito ki ka otitikw kirika Kice Manito e mawotci icperitakositc omackawisiwin ki ka akwacteckakowan, mia e masinactecik. Ekoni ke otci iteritakositc ‘kitcitwawisiw’ anahwe kinitcanic ke nitawikitc. Ekoni kaie ke otci icinikatakaniwitc ‘Kice Manito Okosa.’ 36Kitcirowemakan Risapet kaie wir kanawerimawaso, misawatc anotc aci e kice iskwewitc. Kata okosiw. Anahwe ka ki itakaniwitc ‘nama wiskat kata wapamawaso,’ aci nikotwaso pisimwa kanawerimawaso. 37Nama meka takoniw kekociciriw aka e kackitatc Kice Manito!”
38Aci Mari itew anihi aceriwa: “Teperitciketc nit atoskectawaw. Ni nataweriten kaskina kitci icinakok mia anihe ka ki pe itein.” Ekoni ka nakatikotc aceriwa.
Mari e nta kiwotamatc Risapeta
39Minawatc ki nisawiw Mari e wepitawa icatc nete otenacik ka ici pamatinarik Judée askik itekera. 40Tekocik ki pitakew Sakariwa omikiwamirik. Ki arimikawew Risapeta. 41Kotc Risapet ka petawatc Mariwa, ki kiskerimew anihi onitcanica e micta atciparihoritci. Kek Risapet ki mockineckako Miro Manitowa. 42Ki itew e micta kiciwetc: “Kirawe ki caweritakosin patok kaskina kotakihik iskwewok! Caweritakosiw kaie anahwe kinitcanic ke tatc! 43Awin tca ni nin wetci pe natawapamiin nimikiwamik, kir Ka Tiperimitc okawiwa. 44Mia apitc meka ka petatan ka arimikowiin, ki micta atcipariho ninitcanic e apitc mireritak. 45Ki caweritakosin e ki tapwetowotc Teperitciketc kitci totak aniheriw ka ki ici tipatcimoctask kitci itotisketc.”
Mari onakamowin
46Aci itew Mari:
“Ni micta mirwatcimaw Teperitciketc nitcitcakocik,
47kaie ni micta mireriten nitehik,
wir otci Kice Manito, anahwe Ka Ki Akwacimitc.
48Ki iteritam meka kitci mamitonerimitc,
otarotakana e irapatisiwak aka ka tipaterimitisoan.
Aci anotc nac nespitc
ni ka arimomikok iriniwok kitci itetcik ‘caweritakosiw.’
49Mictahi meka kekociciriw ki totam nin otci Kice Manito,
wir Ka Mawotci Mackawisitc.
Kitcitwawisiw e Kice Manitowitc!#1.49 Kitcitwawisiw e Kice Manitowitc: Mia itemakan: Kitcitwaweritakoniw oticinikasowin!
50Mocak miro totawew kaskina ka kicterimikotc.
51Ki wapatahiwew omackawisiwin,
e micta kice mackawisitc!
Ki nakaticahwew iriniwa e sasekaritci.
52Kaie ki maninamawew okimawiniwariw anahweriw ka okimawiritci.
Minawatc anahweriw iriniwa ka tipaterimitisoritci
ki mirew kitci nikanapiritci.
53Mitcet miro kekociciriw ki mirew ka pakateritci.
Ka micikitaritci tca ki matceticahwew,
aka kekociciriw e miratc.
54Ki pe nta witcihew Israël iriniwa, otarotakana.
Nama ki otci onikew kitci wapatahatc omirwasiwin
55 Abrahama kirika otaniskotape osimiriw otci,
nespitc kitci miro totawatc,
kotc ka ki ici nespi tapwespan
kitaniskotape kimocominapana otci.”
56Wiec nicto pisimwa ki witci tacikemew Risapeta anahwe Mari, minawatc ki kiwew omikiwamik.
Ka nitawikitc Capatis
57Aci otcitcipariniw Risapet kitci wapamawasotc. Ki okosiw. 58Otcirowemakana acitc kotakihik iriniwok pecotcik ka taciketcik omikiwamik anahwe Risapet ki petakewok aniheriw e ki ici wapatahikotc Teperitcikeritci e apitc kitimakerimikotc. Ki micta mireritamok aniki kaie wirawaw. 59Nicwaso kickwa#1.59 Nicwaso kickwa: 8 jours. ka ickwa nitawikitc anahwe awacic, kaskina e tacitcik ki pe icawok, aci kitci kicawatocwakaniwitc.#1.59 kitci kicawatocwakaniwitc: Ekoni ko e totcikatek e okosinaniwok cota aiamihewin e nosanetakaniwok. Kicawatocwakaniwiw ocki awacic, cota iriniw okosa, e peikwo manactakanisiritci. Aniheriw wi mirewakopan kitci icinikasoritci Sakari, mia otatama ka icinikasoritci. 60Aric Risapet ki itew: “Nama! Jean ni kata icinikaso.”
61Ki itewok: “Kekwan tca, aka tca e ki otci tatc kitcirowemakaniwaw ni e icinikasotc?”
62Aci kokwetcimewok anihi Sakariwa e mitci aicitcitceparihotcik kitci kiskerimatcik wa icinikataritci anihi onitcanica. 63Napakatikwatikociciriw ka masinahikewakaniwonik ki nataweritam Sakari. Ki masinaham: “Jean icinikaso.” Kaskina ki micta kockopariwok. 64Ekoni mia keskat Sakari minawatc ki kackitaw e arimwetc. Tecikotc ki mirwatcimew Kice Manitowa. 65Aci kaskina anahweriw iriniwa pecotcik ka tacikeritci omikiwamik ki micta mamiskateritamiriwa, kaie kaskina nte e aititanarik Judée askik ki pa atisokaniwoniw aniheriw ka ki isparinik. 66Kaskina ka ki petaketcik ki mamitoneritamok kaie ki kokwetcimitowok: “Tan tca ke irapatisitc anahwe awacic?”
Tapwe meka Teperitcikeritci omackawisiwiniw ki witci tacikemiko opimatisiwinik anahwe awacic.
Sakari nikan tipatcimo e nakamotc
67Sakari, otawiwa anahwe awacic, ki mockineckako Miro Manitowa. Ki iti tipatcimo Kice Manitowa otci, e aitetc:
68“Mirwatcimatan Teperitciketc, Israël iriniwok Okice Manitomiwawa,
e ki pe natawapamatc otirinima kitci akwacimatc.
69Ki ka mirikono anihi Ke Akwacimimitokw, ke micta mackawisiritci,
peikw nta e taciritci Okimaw Tapitipan otaniskotape osima.
70Enkweriw aci micta weckatc ka ki ici tipatcimatc Kice Manito.
Aniki tca ka ki pe nikan tipatcimotcik ka kitcitwaweritakositcik ki witamawew:
71Ki nespi tapwepan kitci wikotcihitokw,
kitci cakotcihatc kaskina ka wi wani totamowitcik
kaie kaskina ka cikerimitakok.
72Ki wapatahiwew omirwasiwin kitaniskotape kimocominowa otci.
Nama kaie ki otci onikew aniheriw orictwatowin e kitcitwaweritakonik.#1.72 Pot wi itemakanotake: Ki mikawiw ka ki itatc Abrahama kitci totak kirano otci.
73Ki nespi tapwepan meka Kice Manito kitaniskotape kimocominowa otci Abraham,
74kitci otci wikotcihitokw omackawisiwiniwaw anahweriw iriniwa ka wi cikerimimitokw,
kitci kackitaikw e atoskectawokw aka kitci koctatciikw,
75kaie kitci ki kitcitwaweritakosiikw
acitc icikowisk kitci iteritakosiikw,
tato kickwa irikik ke pimatisiikw.
76Minawatc kir, ninitcanic, ki ka icinikatikowin
‘Ka nikan tipatcimotc wir otci,
Kice Manitowa ka mawotci icperitakosiritci.’
Ki ka meka nikanickawaw Teperitciketc
kitci meskanakowotc,
77kitci kiskeritamihimatc otirinima kitci pe nta akwacimatc,
e kasihamawatc opactatowiniwariw.
78Mictahi meka mirotehew Kikice Manitomino
kirika ki micta miro totakono:
Ki ka pe nta wactenamakono,
icpimik e pe otci wactek,
mia e pe sakasiketc pisimw kitci icinakok,
79kitci ki wactenamowatc iriniwa
ka ici kiski tipiskarik ka pimatisiritci,
kaie ka pwororitci,
kitci ki iciwiritokw miro meskanak,
pekateritamowinik ka iticimok.”
80Miro matcekikopan anahwe awacic kaie iti micta mackawerimokopan otcitcakocik. Ka ickwa kiceapewitc, nte pa tacikekopan askik ka ici cipewatawokarik, nac aniheriw e kicikarik ka kitciparitc e pa tipatcimotc Israël iriniwa otci.
Поточний вибір:
Luc 1: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
