Luc 15
15
Atisokanicic: Maritcenic ka ki onihakaniwitc
(Natawapata kaie Matio 18.12-14)
1Ka natockaketcik kirika kotakihik iriniwok aka e kicterimakaniwitcik pe natawapamepanak Cecoca e wi natotawatcik e aiarimweritci. 2Aric Pharisien iriniwok kirika kotakihik ka kiskinohamaketcik cota aiamihe irakonikewiniw marerimepanak Cecoca, e itetcik: “Anahwe iriniw mireritam e pe natawapamikotc iriniwa aka e kicterimakaniwiritci, kaie witci mitcisomew!”
3Aci atisokawew Cecoc, e itatc: 4“Kecpin peikw neta e taciekw e taratc mitato mitana maritcenica, e tca onihatc peikw omaritcenicima, kata nakatew anihi kotakihi cakitato mitana acitc cakitato maritcenica, taina, e iciwiratc neta e ici kanawerimakaniwiritci e miro mackociwonik, kitci ki tca nta nantowapamatc anihi peikw ka ki onihatc, nac kitci miskawatc. 5Ickwa miskawate, kata micta kice mireritam. Kata miwocimew e kiwewiratc. 6Takociwirate omikiwamik, aci kata wicamew okwimesa kirika owitci tacikemakana, kitci itatc: ‘Pe nta mireritamokw, kaie nin e micta mireritaman! Aci nit ickwa miskawaw nimaritcenicim, anahwe ka ki onicikipan!’ ”
7Minawatc itew Cecoc: “Ki witamatinawaw, ekoni peikon ke icinakok wakwek. Kirawe kata micta mirwatcitcikaniwoniw neta peikw pactati iriniw otci aci ka ki kweskatisiritci, patok cakitato mitana acitc cakitato e tacitcik ka miro iriniwitcik otci, ka iterimitisotcik aka e acterik kitci kweskatisitcik.”
Atisokanicic: Coria ka ki onitakaniwok
8Kiapatc atisokew Cecoc: “Kecpin peikw iskwew e tatak mitato coriapiskoriw, peikw tca e onitatc, tecikotc kata iskaham wactenamakaniw, taina? Kata wepahikew, wewerita e nantowapatak, nac kitci miskak. 9Ickwa miskake tca, kata wicamew okwimesa kirika owitci tacikemakana, kitci itatc: ‘Petcimotekw! Pe nta mireritamokw, kaie nin e micta mireritaman! Aci nit ickwa misken nicoriapiskom ka ki onitaiapan!’”
10Minawatc itew Cecoc: “Kaie ki witamatinawaw, ekoni peikon e asitci mireritamiritci Kice Manito otacerima, peikw pactati iriniw e kweskatisitc.”
Atisokanicic: Ockinikiw ka ki onicik, minawatc ka ki miskawakaniwitc
11Aci kiapatc Cecoc atisokew: “Weckatc takopan iriniw, nicirikopan okosa. 12Ka mawotci awaciwitc ki itew otawiwa: ‘Nitata, mirici ma kicatc irikik ka ici tataman, anihe tipan ka ki actain kitci mirikoian ickwa nipoine.’ Aci anahwe iriniw kaskina e ici tatak tetawonamawew e niciritci okosa. 13Kek nikotin e kicikarik anahwe ka mawotci awaciwitc atawew aniheriw ka ki ici mirakaniwitc. Ekoni e ici matcatc e matcewitatc ocoriam, warawik askik e icatc. Ekote nte ka taciketc, aci kaskina e iti tcakinak ocoriam, e tcakapawotatc, kaie e tcaki miriwetc pacikwatisiwinik.”
14“Ka ickwa kaskina tcakinak ocoriam, aci mitawokatew nta askik, aci kiskeritam kekociciriw e noteparitc, aka e takonik ke mitcik. 15Aci nta pakoserimew kitike iriniwa kitci atoskectawatc. Ki iciticohoko kitikan askik, kokoca kitci nta nanakatcihatc. 16E apitc pakatekopanen kata kackitapan aniheriw kokoca omitcimimiriw kitci mitcik. Nama aric awiriw ki otci miriko mitcimiriw. 17Mamitoneritam: ‘Kaskina notawi otirinima micta miro mitcisoritakena, wawatc ickopariritakena. Nin aric orina ni pakatan. 18Ke ki totaman, ni ka kiwan notawik. Ni ka itaw: “Notawi, ni ki pactatin, Kice Manito e ki akohak, kirika kaie kir e ki akohitan. 19Nama ni tipi iteritakosin ‘nikosis’ kitci iterimiin. Mitowi peikw nta e tacitcik kitarotakanak ki ta iterimin.” ’ 20Ekoni e ici matcatc, e kiwetc otawik.”
“Mekwata kiapatc orina e rawonakositc kitci ki takocik omikiwamiwak, wapamiko otawiwa. Anahwe iriniw micta kitimakerimew anihi okosa. Mawinitew e nta nakickowatc. Wakinew e cawerimatc kaie otcemew. 21Aci itew anahwe ockinikiw: ‘Notawi, ni ki pactatin, Kice Manito e ki akohak kirika kaie kir e ki akohitan. Nama ni tipi iteritakosin “nikosis” kitci iterimiin.’ ”
22“Aric anahwe iriniw itew otirinima: ‘Wewepitakw! Petakw nte kapotowan ka mawotci mirwacik! Piskamotarakw tca! Arimakw tapitcitcepasona otcitcik, acitc ke omaskisinitc! 23Pe iciwirakw anaha motcewotikocic ka ki wirinohakaniwitc! Nipahakw tca! Ki ka ocitanano kitci micta makocaniwok kirika ki ka micta mirwatcitcitenano! 24Anahwe meka nikosis ka ki nipospan aci koski pimatisiw. Ki onicin, aci aric ickwa miskawakaniwiw!’ Ekoni ka ici kitciparik e micta mirwatcitcikatek.”
25“Mekwata anahwe ka octesimawitc e otamirotc nta kitikan askik. Minawatc e iti kiwetc, aci kekatc e takocik omikiwamiwak, petam e nakamonaniwonik kirika e niminaniwonik. 26Ekoni e ici wicamatc peikw arotakana, e kokwetcimatc: ‘Tan e isparik?’”
27“Itiko anihi arotakana: ‘Aci ickwa takociniw kicim, kirika kotawiwaw ki itew kitci nipahakaniwiritci motcewotikocica ka ki wirinohakaniwiritci kitci makocaniwonik, e micta mireritak e ki pe kiweritci okosa e miro pimatisiritci.’”
28“Kiciwasiw octesimaw. Nama wi pitakew nta e ici makocaniwonik. Pe natawapamiko otawiwa, e pakoserimikotc kitci pe pitaketc.”
29“Itew aric otawiwa: ‘Natotaci! Aci mitceto pipona kit atoskectatin, aka wiskat e ki otci anwetatan kekocic e ici witamawiin ke totaman. Nama aric wiskat ki ki otci mirin wawatc tepirak atikocic kitci ki ocitaian makocan, kitci ki mirwatitamak kirika nikwimesak. 30Aci aric pe kiwew anahwe kikosis, anahwe ka ki tcakinamokwen kicoriamiriw kirika iskwewa pacikwatisiwinik ka ici pimoteritci. Wir otci ki ki nipahaw motcewotikocic ka ki wirinohakaniwitc kitci ki makocaniwonik!’”
31“Aci itew iriniw: ‘Nikosis, mocak kir ki witci tacikemin. Kaskina e ici tataman kaie kir anihe kit ici taten. 32Aric actew kitci ocitaikw makocan kirika kitci micta mirwatitamokw! Anahwe meka kicim ka ki nipospan, aci koski pimatisiw! Ki onicin, aci aric ickwa miskawakaniwiw!’”
Поточний вибір:
Luc 15: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
