Luc 14
14
E kikehakaniwitc iriniw e akositc
1Peikwaw e arwepi kicikarik, Cecoc icakopan peikw Pharisien okimaw omikiwamirik e nta mitcisotc. Kotakihik iriniwok neta ka tacikewaspan wewerita nanakatcihewakopan Cecoca e wi wapamatcik ke itotiskeritci. 2Tapan neta peikw iriniw e akosispan, e pakiparitc oskatik. Natcikapowictawepan Cecoca. 3Aci arimwew Cecoc e tca kokwetcimatc ka kiskinohamakeritci cota aiamihe irakonikewiniw kirika Pharisien iriniwa: “Itactew ia kitirakonikewinino matci kitci ki kikehakaniwitc awik e arwepi kicikarik kekotc aka kitci kikehakaniwitc?”
4Nama aric awik ki otci wi naskamo. Ekoni ka ici takinatc Cecoc anihi iriniwa ka akosiritci e kikehatc. Minawatc ki kiweticahwew.
5Itew anihi kotakihi iriniwa ka tacikeritci: “Kecpin peikw nta e taciekw tarikwena okosa kekotc ma omotcewotikoma e posipariritci otahipanik, tecikotc kata wikotcihew, taina, misawatc e arwepi kicikarik?”
6Nama ki otci kackitawok kitci naskamotcik.
Ke totcikatek e orapinaniwok e wicakemonaniwok
7Nanakatcihepan Cecoc e totamiritci anahweriw iriniwa ka ki wicamakaniwiritci e mitcisonaniwonik, e wi miro apihitisoritci. Kaskina tca ki atisokawew ohweriw atisokaniciciriw: 8“Kecpin e wicamikoin kitci nta makocein e nipowinaniwok, akawir nikanik nta api. Kwecan kotak awik ki wicamakaniwitake, kirawe e kicteritakositc patok kir. 9Kecpin tca tecikotc nta orapiine e ici micta kicteritakok, anahwe ka ki wicamitakw e niciekw ki ka pe natawapamikw, kitci tca itisk: ‘Miri anahwe kitci apitc, neta ka ici apiin.’ Ki ka tca micta waneriten kitci pimotein tekaci otananik kitci ici nta apiin. 10Meckotc tca, e wicamikoin, tekaci mamitenamik ki ka nta apin. Minawatc apitc pe takocike anahwe ka ki wicamisk, ki ka itikw: ‘Nikwimes, nikanik pe ica, kirawe kitci miropiin.’ Ki ka tca micta kicterimikowin e wapamiskik ka witci mitcisomiskik. 11Anaha kotc ka icperimitisotc, kata tipaterimakaniwiw. Anaha tca kotc ka tipaterimitisotc kata icperimakaniwiw.”
12Minawatc Cecoc itew anihi ka ki wicamikotc: “Kecpin e ocitain kitci mitcisonaniwok kimikiwamik, e apita kicikanekwaniwok kekotc e nipekwaniwok, akawir wicamik kikwimesak, akawir kaie kiwitcicanak kekotc kotakihik kitcirowemakanak, akawir kaie aniki kiwitci tacikemakanak ka micikitatcik. Wirctamiwaw meka ki ka ki kiwe wicamikok, kirika ekoni ke ici tapictakoin e ki miro totaman. 13E wicakemoin kitci makocaniwok, wicamik ka kitimakisitcik, ka maskisitcik, ka atciwockatcik kirika aka ka wapitcik. 14Ki ka tca micta caweritakosin. Nama meka aniki ki ka ki tapictakok. Aric Kice Manito ki ka tapictakw apitc apitcipahakaniwitawe aniki kaskina icikowisk ka iteritakositcik.”
Atisokanicic: E kitci makocaniwok
(Natawapata kaie Matio 22.1-10)
15Peikw iriniw neta ka apispan mitcisowakanatikok, ka ickwa petak aniheriw ka iteritci Cecoca, ki itew: “Caweritakosiw anahwe ke mitcisotc neta ka ici makocaniwonik Kice Manito Okimawinik!”
16Atisokawew ohweriw Cecoc atisokaniciciriw, e aitetc: “Peikw iriniw ocitakopan kitci micta makocaniwonik. Mitcetiwakopan ka wicamakaniwitcik kitci nta mitcisotcik. 17Aci ka ickwa aiketc anaha iriniw kitci mitcisonaniwonik, ki iciticahwew peikw otarotakana kitci nta wicakemoritci, kitci iteritci: ‘Aci nit ickwa aikanan kitci pe nta mitcisoekw.’”
18“Kaskina aric aiackotc nama wi icawok aniki ka ki wicamakaniwitcik. Anahwe nictam ka ki wicamakaniwitc itew anihi arotakana: ‘Anotcikwetc ni ki otapinen kitikan aski. Arimatc ni ka natawapaten. Ki pakoserimitin aka wiec kitci iteritaman aka e pe icaian kitci nta witci mitcisomitan.’”
19“Kotak ka ki wicamakaniwitc itew: ‘Anotcikwetc ni ki otapinawok mitato motcewotikok. Ni wi tca nta kotci otamirohawok. Ki pakoserimitin aka wiec kitci iteritaman aka e pe icaian kitci nta witci mitcisomitan.’”
20“Minawatc kotak ka ki wicamakaniwitc itew: ‘Anotcikwetc nit ickwa nipowin. Ekoni wetci aka ke ki pe icaian.’”
21“Ekoni e ici kiwetc anahwe arotakan. Witamawew anihi okimama aniheriw ka ki itakaniwitc. Aci micta kiciwasiw anahwe iriniw. Itew anihi otarotakana: ‘Ekoci nta ica otenak, meskanak kirika kotak wiec e tacikaniwok. Pecowikw ota aniki ke wapamatcik nta, ka kitimakisitcik, ka maskisitcik, aka ka wapitcik acitc ka atciwockatcik.’”
22“Minawatc e ickwa pa wicakemotc anahwe arotakan, aci pe nta witamawew anihi ka tiperimikotc: ‘Okimaw, aci nit ickwa itotiskan anihe ka ki iciin. Kiapatc aric takon apiwin kotakihik kitci ki pe nta mitcisotcik.’”
23“Aci itew anahwe iriniw otarotakana: ‘Orowi nte otenak, nete ica warawik kitikan askik itekera. Wikockatc wicamik aniki nakewar ka taciketcik, kaskina ke wapamatcik kitci pe nta mitcisotcik, nac kitci micta mitcetinaniwok nimikiwamik. 24Ki witamatinawaw: nama otci peikw nta e tacitcik aniki nictam ka ki wicamakaniwitcik kata pe nta mitciso ota.’ ”
Ke totak awik kitci ki nosanehwatc Cecoca
(Natawapata kaie Matio 10.37-38)
25Mekwata e pimotespan Cecoc, micta mitcet iriniwa witcewikopan.#14.25 Jérusalem otenak taci icakopan Cecoc. Aci kiwekapowiw, kaskina e itatc: 26“Awik ka iteritak kitci witcewitc, acteriw kirawe kitci sakihitc patok e asitci sakihatc otawiwa, okawiwa, owiwa, onitcanica, octesa, omisa, kirika ocima, kirawe kaie kiapatc kitci sakihitc, patok wir tipirawe e asitci sakihitisotc. Kecpin aka ici sakihite, nama ni ka ki witcewikw.#14.26 nama ni ka ki witcewikw: Peikon kata ki ici nisitotakon: Nama ki iteritakosiw niwitcewakan. 27Kaie anahwe aka ka miwiratc otcipaiatikoma kitci ki tca nosanehwitc, nama kaie wir ni ka ki witcewikw.”
28“Kecpin peikw nta e taciekw e wi ocitatc mikiwamiciciriw e icpaskahak, warawik kitci ki wapatcikaterik kekwariw, apiw pitama. Akitam irikik ke itakitakonik, e nta kiskeritak kaie irikik coriariw wir tipirawe e takonik, kitci ki tca kictatc otamirowin. 29Kecpin meka kitciparite e asinikanikitciketc, aka aric e kackitatc kitci kictatc, kaskina ke wapamikotc kata matce papirototako, 30kitci tca itikotc: ‘Ki kitcipariw e ocitatc mikiwamiriw, nama aric ki kackitan kitci kictatc otamirowin!’”
31“Peikon ni kecpin peikw okimaw e matcatc, e wi natoparictowatc kotakihi okimawa, apiw pitama e mamitoneritak ke apitc kackitakwen kitci kanewitc, wir tipirawe mitatowaw kice mitato mitana e taciritci ocimakanicima, anahwe tca kotak okimaw nicitana tatwaw kice mitato mitana e taciritci ocimakanicima. 32Kecpin iteritake: ‘Nama ni ka kanewin,’ kata iciticahwew atita iriniwa kitci natawapamaritci anihi kotakihi okimawa kiapatc e rawonakosiritci, e kokwetcimatc ke ki totcikaterik kitci ki miroparihitotcik.”
33Minawatc itew Cecoc: “Ekoni wetci ititakok, nama otci peikw nta e taciekw ni ka ki witcewikw kecpin aka pitama pakiteritake kaskina e ici tatak.”
Ciwotakan aka wiec ka irapatak
(Natawapata kaie Matio 5.13; Mark 9.50)
34“Mirwapatan ciwotakan.#14.34 ciwotakan: Ekoni e irapatak ciwotakan: wikacin mitcimik e actakaniwok. Nama kaie wipatc maratan mitcim e ciwotakatcikatek. Kecpin aric aka awocamec nisitospokoke ciwotakan, tan ke ki totcikatek kitci koski ciwak? 35Nama aci wiec irapatan kitikan askik kitci ki actakaniwok, nama kaie atikw okatci kata ki actakaniwon.#14.35 atikw okatci: kecko tca nikotin kitci ki actakaniwok kitikan askik, kitci ki tca miro pimitewonik askiriw. Ekoni e ici orowepinikatek. Wewerita natotamokw ohwe, kirawaw ka kackitaiekw kitci nisitotamekw!”
Поточний вибір:
Luc 14: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
