Mark 11

Yěsû a kwuunə̀ a Yèrusalèmə̀ tsaʼa ɨ̀fò

(Mat 21.1-11; Luk 19.28-40; Jòn 12.12-19)

1Tsaʼnə pobə lə̀ tônə mbaatə̀ a Yèrusalèmə̀ a mbòmpə àlaʼà Bethphage pobə Betanì, a Mbarə̀ Olìvə̀, Yěsû à lə̀ twuumə̀ ɨ̀zùŋə̀ ndzùmə̀ ɨ̀pe ɨpaa, 2nshwəŋə̀ ambo pobə lo, “Nɨ̀ lèrə̀ amwuə àlaʼà zhyə̀ a mbyə̀ pɨghə, tyìʼə̀ tsaʼnə nɨ̌ kwuunə̀, nɨ̌ zəənə̀ a moonə̀ ndzàkɨshyə̀ nɨ pɨ tɨ̀ŋnə̀nə, ẅùə̀ nɨ ŋwùə̀ à pirə̀ mə e aŋunə tɨ koʼò. Nɨ̀ kyàa a ẅèrə ndòo ntô. 3Ŋònə̀ ɨ̀tse a pə la mbyiitə̀ ambo pɨghə lo, ‘Nɨ̀ ghɨ̀rə̀ lə àkə?’ Nɨ̀ shwəŋə̀ ambo ze lo, ‘Ndòʼnə̀mbyə̂ à tàʼà a zèrə, mbə kɨ kẅuə̀ a zèrə tyìʼə̀ tɨ̀tsòŋə̀.’”

4Pobə lə̀ lèrə̀ ngə̀ ndzəənə̀ a moonə̀ ndzàkɨshyə̀, pɨ tɨ̀ŋnə̀ a zèrə a ntswùə̀ ndâ a nɨ̀pwùnə àlàŋə; pobə lèrə̀ a nɨ ghə̀ nkyàa a zèrə. 5Tsaʼnə pobə lə̀ mənə nkyàa a zèrə, pànə̀ pɨ̀tse nɨ pɨ lə̀ təəmə̀nə a alyiʼə ghu lə̀ pyiitə̀ lo, “Nɨ̀ ghɨ̀rə̀ lə àkə, nkyàa a moonə̀ ndzàkɨshyə̀ wa?”

6Tsaʼnə pobə pyiitə̀nə la, pobə lə̀ tiitə̀ a ghobə nɨ ànwùə̀ nɨ Yěsû a tənə nshwəŋə̀. Lenəla, pɨ lə̀ myàʼtə̀ a ghobə pobə lèrə̀. 7Pobə lə̀ tô nɨ moonə̀ ndzàkɨshyə̀ wa ambo Yěsû, ndòo ɨtsəʼə ɨ̀pobə nshànkə̀ a nkàʼtə̀ nyàamə̀ wa, Yěsû a koʼò nnwuunə̀ aŋunə. 8Pànə̀ pɨ̀noʼnə lə̀ shànkə̀ ɨtsəʼə ɨ̀pobə a àlàŋə ndwuumə̀, pɨ̀tse fàatə̀ mɨ̀fàa mɨ àtɨ̀ghə a mɨpaʼa nɨ mɨfuə mɨ̀noʼnə aŋunə nshànkə̀ a àlàŋə. 9Pànə̀ pyə̀ nɨ pɨ lə̀ mənə ndèrə̀ a mbyə̀ pobə pyə̀ nɨ pɨ lə̀ mənə ndzùŋə̀ a ndzùmə̀ lə̀ tyiʼə̀ nkyiinə̀ nshwəŋə̀ lo,

“Hòsanà!

Mborə̀ ɨ̀ chyə̂ ambo ŋònə̀ nɨ a tônə aŋunə nɨ̀linə̀ nɨ Ndòʼnə̀mbyə̂!

10Mborə̀ ɨ̀ chyə̂ aŋunə ànwùə̀ nɨ̀fò tǎ ɨ̀wə̀ənə̀ Dàfirə̀ nɨ a zə ntô!

Hòsanà ambo Nẅùə̀ Àkoʼntsirə̀!”

11Yěsû à lə̀ kwuunə̀ a Yèrusalèmə̀, ndèrə̀ amwuə Ndâ mɨ̀shwàʼà Nẅùə̀, nnaŋə̀ nkamnə̀ ndzəənə̀ àzwuumə̀ àtsùmə̀ nɨ a lə̀ pənə amwuə. La tsaʼnə nkwùə̀ ɨ̀ lə̀ làŋə̀nə tɨsɨŋnə la, à lə̀ furə̀ ndèrə̀ pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a Betanì.

Yěsû a chyâ ndòonə̀ aŋunə àtɨ̀ghə figə̀

(Mat 21.18-19)

12Njyə̂ ɨ̀ lə̀ laanə̀, pobə furə̀ a Betanì nkẅirə̀ mə nkwə̂, njyə̀ ɨ̀ pə ndzaŋə̀ a Yěsû. 13Lenəla, a təəmə̀ a ndyə̌ sàa ndzəənə̀ àtɨ̀ghə figə̀ nɨ mɨfuə pənə aŋunə nnoʼò, ntyiʼə̀ ndèrə̀ a ɨ̀sùmə lo mbə̀ʼə a zəənə̀ nɨ̀ntàamə nɨ àtɨ̀ghə aŋunə. Nkwùə̀ nɨ à lə̀ ghə̀nə mbyàa a ɨ̀sùmə, à lə̀ zəənə̀ lo ka àzwuumə̀ àtse a pə e aŋunə ndàŋə̀ e mɨfuə, ntiinə nkwùə̀ ɨ̀ lə̀ pirə̀nə e tɨ kùʼù lo mɨ̀tɨ̀ghə mɨ figə̀ zumə̀ mɨ̀ntàamə. 14Tsaʼnə Yěsû à lə̀ zəənə̀nə lo ka àzwuumə̀ a pə e aŋunə la, à lə̀ shwəŋə̀ ambo àtɨ̀ghə figə̀ za lo, “A nɨ furə̀ sìnə̀, ka ŋwùə̀ a pə laʼa zɨghə̀ e nɨ̀ntàamə nɨ nɨ furə̀nə aŋunə ghò.” Lenəla, ɨ̀zùŋə̀ ndzùmə̀ ɨ̀pe zuʼù ànwùə̀ ghu.

Yěsû a kantə̀ ngàŋə mɨ̀tàanə amwuə Ndâ Mɨ̀shwàʼà Nẅùə̀

(Mat 21.12-17; Luk 19.45-48; Jòn 2.13-22)

15Nkwùə̀ nɨ pobə lə̀ kwuunə̀nə a Yèrusalèmə̀, Yěsû à lə̀ kwuunə̀ amwuə Ndâ Mɨ̀shwàʼà Nẅùə̀ ndzəənə̀ pànə̀ pə nshwùunə̀ nkɨ mmə ndzwuunə̀ ɨ̀pwuumə̀. À lə̀ kantə̀ a ghobə, mbə̀ŋə̀ pɨ̀tepèrə̀ pɨ pànə̀ nɨ pɨ lə̀ mənə nkyopə̀ nkabə̀ nkumnə̀ a ɨ̀shyə̂ pobə ɨləŋə pànə̀ nɨ pɨ lə̀ mənə nshwùunə̀ ɨ̀lwuʼə̀, 16mbə chi pyiimə̀ e lo ŋwùə̀ a pìʼì àzwuumə̀ mɨ̀tàanə ndàŋə̀ a alyiʼə Ndâ Mɨ̀shwàʼà Nẅùə̀ gha apə̀. 17À lə̀ ghɨ̀rə̀ la, mbìʼnə̀ a nɨ nèrə̀ a ghobə nshwəŋə̀ lo, “A chyə̂ amwuə Àŋwàʼnə̀ Nẅùə̀ lo, ‘Pɨ ghǎ fuŋə̀ ndâ mə̀ la nɨ ndâ nɨ pànə̀ ghǎ furə̀ amwuə ɨ̀laʼà ɨ̀tsùmə̀ tô chàʼtə̀ a Nẅùə̀,’ la nɨ̀ kùmə̀ ngɨ̀rə̀ ɨ̀ tyiʼə̀ mbwùʼə̀ pɨ̀ntuŋə̀ ɨ̀shyə̂.” 18Tsaʼnə a lə̀ pənə a lenə la, pɨ̀fò màʼà Nẅùə̀ pobə pɨ̀nèrə̀ mbòomə lə̀ zuʼù ànwùə̀ ghu ntyiʼə̀ ntàʼà àlàŋə a nɨ zhwuutə̀ e. Pobə lə̀ mə mbô e, ntiinə àpùŋə̀ pànə̀ nɨ a lə̀ pənə a alyiʼə ghu a lə̀ yerə̀ ndwuumə̀ nɨ à lə̀ mənə nnèrə̀ mɨ̀nwùə̀. 19A lə̀ pə a nẅùumə̀ nkwə̌, Yěsû pobə ɨ̀zùŋə̀ ndzùmə̀ ɨ̀pe furə̀ amwuə Yèrusalèmə̀ ndèrə̀ a ghobə.

Ànwùə̀ nɨ Yěsû à lə̀ nèrə̀nə mbə̀ʼə àtɨ̀ghə figə̀

(Mat 21.20-22)

20Tsaʼnə njyə̂ ɨ̀ lə̀ laanə̀nə, Yěsû pobə ɨ̀zùŋə̀ ndzùmə̀ ɨ̀pe pə ndàŋə̀, ndzəənə̀ àtɨ̀ghə figə̀ za a zwuumə̀ tə ngə̀ mbyàa aŋunə mɨŋaŋə ɨ̀me. 21Pità à lə̀ zəənə̀ nkẅempə̀ ànwùə̀ nɨ Yěsû à lə̀ shwəŋə̀nə, nshwəŋə̀ ambo ze lo, “Masàa, naŋə̀! Àtɨ̀ghə figə̀ za nɨ wə̀ lə̀ chyânə ndòonə̀ aŋunə la a zwuumə̀.”

22Yěsû a kẅùə̀ ambo pobə lo, “Nɨ̀ pə nɨ àpyiimə̀ ntɨŋmə̀ aŋunə Nẅùə̀. 23Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ wa ntsùmə̀ nɨ à shwəŋə̀nə ambo mbarə̀ zə̀ lo tsoʼnə̀ ngə̀ nkunə̀ amwuə nchyə ghu nɨŋnə̀nə ka pə e nɨ mɨnkə amwuə ntɨŋmə̀ e, la mbyiimə̀ lo ànwùə̀ nɨ à shwəŋnə̀ ǎ lòo alyiʼə, a pɨ ghɨ̀rə̀ a lenə ambo ze. 24Nɨ ndwuumə̀ wə̀, ǹshwəŋə̀ ambo pɨghə lo àzwuumə̀ àtsùmə̀ nɨ nɨ̀ pyiitə̀nə amwuə àchàʼtə̀ Nẅùə̀, nɨ̀ pə nɨ àpyiimə̀ ntɨŋmə̀ lo nɨ̀ kẅiirə̀ mə a zèrə, lenəla Nẅùə̀ ǎ kɨ ŋâ a zèrə ambo pɨghə. 25Nkwùə̀ ntsùmə̀ za nɨ nɨ̀ pənə nchàʼtə̀ a Nẅùə̀, nɨ̀ tə ndə̀ənə̀ ɨ̀fàntə̀ mɨ̀nwùə̀ mɨ pànə̀ nɨ pobə pa nfàntə̀ ambo pɨghə, njiilo Tǎ ɨwɨghə nɨ à pənə a nɨ̀pwuurə̀ a kɨ ndə̀ənə̀ ɨ̀pɨghə. 26[Nɨ̀ tə ngoŋə̀ a wɨghə ɨ̀fàntə̀ mɨ̀nwùə̀ pə̀ənə̀ tɨ pə ngwaʼà, yi ka Tǎ ɨwɨghə nɨ à pənə a nɨ̀pwuurə̀ â pə kɨ waʼà e ɨ̀pɨghə ɨ̀fàntə̀ mɨ̀nwùə̀.]”

Pɨ pyiitə̀ a Yěsû nɨ alyiʼə nɨ à lòonə ɨ̀tɨ̀ŋnə̀ e

(Mat 21.23-27; Luk 20.1-8)

27Pobə lə̀ kẅirə̀ ndèrə̀ a Yèrusalèmə̀. Tsaʼnə pobə lə̀ tônə, Yěsû a pə nkarə̀ amwuə Ndâ Mɨ̀shwàʼà Nẅùə̀, pɨ̀fò màʼà Nẅùə̀ nɨ pɨ̀nèrə̀ mbòomə pobə pɨ̀lɨ̀ŋmə̂ pɨ àlaʼà tô ambo ze, 28mbyiitə̀ ambo ze lo, “Wə̀ ghɨ̀rə̀ mɨ̀nwùə̀ mə lə nɨ ɨ̀tɨ̀ŋnə̀ ɨ̀wə̌? Kə̀ a ŋâ ɨ̀wə̌ ŋŋâ mɨ̀tɨ̀ŋnə̀ lo wə̀ ghɨ̀rə̀ mɨ̀nwùə̀ mə?”

29Yěsû a shwəŋə̀ ambo pobə lo, “Mbɨ pyiitə̀ a wɨghə nɨ taʼà àpyiitə̀. Nɨ̀ tə nkẅùə̀ mə̀, ǹtiitə̀ a wɨghə nɨ alyiʼə nɨ ǹdòonə mɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mə. 30Jònə ngàŋə̀ àŋâ àkẅiirə̀ nchyə̂ à lə̀ lòo mɨ̀tɨ̀ŋnə̀ la ɨghə a nɨ ŋâ àkẅiirə̀ nchyə? À lə̀ lòo la ambo Nẅùə̀ kə̀ ambo pə̀ənə̀? Nɨ̀ kẅùə̀ ndzuʼù.”

31Pobə lə̀ tànkə̀ pobə nɨ pobə mmə nshwəŋə̀ lo, “Pə̀ənə̀ tə mbəla nshwəŋə̀ lo, ‘A lə̀ lòo la ambo Nẅùə̀,’ yi à pɨ pyiitə̀ lo, ‘Nɨ̀ ka tyiʼə̀ pyiimə̀ a wɨghə ànwùə̀ nɨ à lə̀ mənə nshwəŋə̀ mbə̀ʼə àkə?’ 32La mbə̀ʼə pə̀ənə̀ shwəŋə̀ lo, ‘À lə̀ lòo ambo pànə̀?’” Pobə lə̀ pə mbô pə̀ənə̀, mbə̀ʼnə ŋwùə̀ ntsùmə̀ à lə̀ zhyə̂nə lo Jònə ngàŋə̀ àŋâ àkẅiirə̀ nchyə̂ à lə̀ pə ngàŋə̀ ntwuumə̀ Nẅùə̀. 33Lenəla, pobə kẅùə̀ ambo Yěsû lo, “Ka pəə zhyə̂ a wəə.”

Yěsû a shwəŋə̀ ambo pobə lo, “Ka mbə kɨ tiitə̀ mə̀ a wɨghə nɨ alyiʼə nɨ ǹdòonə mɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mə.”

Поточний вибір:

Mark 11: pny

Позначайте

Поділитись

Копіювати