Mark 10
10
Yěsû a shwəŋə̀ mbə̀ʼə nɨ̀sìimə̀ a nɨ̀zoʼò
(Mat 19.1-12; Luk 16.18)
1Yěsû à lə̀ myàʼtə̀ alyiʼə ghu ndèrə̀ a pàa àlaʼà Judyà, ntwuumə̀ ndèrə̀ a ndzìnə nchyə Jodànə̀. À lə̀ ghə̀ nnwuunə̀ ghu, ɨ̀pùŋə̀ pə̀ənə̀ pɨ̀noʼnə tô ambo ze nkẅirə̀ ntô, a nèrə̀ a ghobə nɨ mɨ̀nwùə̀ tsaʼnə à lə̀ pyə̀nə mmə ngɨ̀rə̀.
2Pɨ̀Farìsî pɨ̀tse lə̀ tô ambo Yěsû ntàʼà lo zhwiʼì e. Mbyiitə̀ ambo ze lo, “Mbòomə ɨ̀wəənə̀ a nèrə̀ lo mbə̀ʼə ŋònə̀ mbyàŋnə̀ a ghàbə̀ nɨ̀zoʼò pobə ngẅùə e?”
3A kẅùə̀ ambo pobə nɨ àpyiitə̀ lo, “Mǔsî à lə̀ shwəŋə̀ ambo pɨghə lo àkə?”
4Pobə kẅùə̀ lo, “Mǔsî à lə̀ ŋâ ɨ̀sàanə̀ lo ŋwùə̀ à chyə̂ a nɨ ŋwàʼnə̀ àŋwàʼnə̀ a nɨ sìimə̀ nɨ̀zoʼò ŋŋâ nɨ ngẅùə e mbòŋə̀ myàʼtə̀ e a lèrə̀.”
5La Yěsû a kẅùə̀ lo, “Mǔsî à lə̀ ŋwàʼnə̀ ntə̌ wə̀ ŋŋâ ambo pɨghə ntiinə mɨ̀ntɨŋmə̀ ɨ̀mɨghə lə̀ tɨ̀ŋnə̀ tɨsɨŋnə a nɨ zuʼù àtəətə̀ e. 6Tsaʼnə àtwuə̀ ɨ̀shyə̂ a lə̀ pìʼnə̀nə, Nẅùə̀ à lə̀ tsùŋə̀ a ŋònə̀ mbyàŋnə̀ pobə mə̀ngyə̌. 7‘Lenəla, ŋònə̀ mbyàŋnə̀ à gha myàʼtə̀ a tǎ ɨ̀ghobə pobə mǎ e ghə̀ pwuutə̀ pobə ngẅùə e. 8Nɨ ndwuumə̀ wə̀, pànə̀ pə pɨpaa tyiʼə̀ mbə taʼà mbòbə̀ mbɨ̀ŋmə̀, ka chi pə ghobə pànə̀ pɨpaa. 9Njiilo àzwuumə̀ nɨ Nẅùə̀ à pwuutə̀nə alyiʼə moʼo, kò ŋònə̀ ɨ̀tse a ghàbə̀ e a zèrə.”
10Nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ kwə̂nə nkwuunə̀ a ndâ, pobə lə̀ chi mbyiitə̀ e nɨ ànwùə̀ zèrə zə. 11A kẅùə̀ ambo pobə lo, “Ŋònə̀ wa nɨ à fuukə̀nə a ngẅùə e, ndzoʼò a yɨ̀ nyàanə la, à fànə̀ la ambo ngẅùə e nɨ à fuukə̀nə la. 12Nɨ ndwuumə̀ wə̀, mə̀ngyə̌ nɨ à furə̀nə a ndâ ndwuumə̀ e, ndzoʼò a ŋònə̀ nyàanə, à kɨ ngɨ̀rə̀ la àfànə̀.”
Yěsû a chyâ mborə̀ aŋunə kɨyii àghòbə
(Mat 19.13-15; Luk 18.15-17)
13Pànə̀ pɨ̀tse lə̀ lòo a kɨyii àghòbə ntô ambo Yěsû lo â nùŋə̀ mbô ɨ̀me aŋunə pobə, la ɨ̀zùŋə̀ ndzùmə̀ ɨ̀pe lə̀ saʼà a ghobə. 14La nkwùə̀ nɨ Yěsû à lə̀ zəənə̀nə lo ɨ̀zùŋə̀ ndzùmə̀ ɨ̀pe saʼà pànə̀ pa, ntɨŋmə̀ e ɨ lə̀ zaŋə̀, a shwəŋə̀ ambo pobə lo, “Nɨ̀ myàʼtə̀ a kɨyii àghòbə wa â tô ambo mɨ̀ŋə̀, kò nɨ̀ nàanə̀ a ghobə. Mbə̀ʼnə ànwùə̀ Nɨ̀fò Nẅùə̀ a chyə̂ la ambo pànə̀ tsaʼa pə. 15Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ ka à pə kẅiirə̀ e ànwùə̀ Nɨ̀fò Nẅùə̀ tsaʼa mɨlyiʼə mɨnkɨ̂, ka à pə ghǎ kwuunə̀ e amwuə.” 16Yěsû a shwəŋə̀ a lenə la, nkẅiirə̀ ɨ̀poonə̀ pa nkẅaʼà moʼo moʼo nnùŋə̀ mbô ɨ̀me àtwuə̀ pobə, nchyâ mborə̀ aŋunə.
Ngàŋə̀ nkabə̀
(Mat 19.16-30; Luk 18.18-30)
17Yěsû à lə̀ furə̀ mmə ndèrə̀ e a àkarə̀, ŋònə̀ mbyàŋnə̀ ɨ̀tse a kɨ̀ɨrə̀ ntô nkẅiʼtə̀ a mbyə̀ ze mbyiitə̀ e lo; “Ɨ̀nèrə̀ ɨ̀nwùə̀ ghù ɨ̀shìʼnə̀, mbə̀ʼə ǹgɨ̀rə̀ lə ɨla a nɨ gha mbə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀?”
18Yěsû a kẅùə̀ nɨ àpyiitə̀ lo, “A ghɨ̀rə̀ àkə wə̀ fuŋə̀ mə̀ nɨ ŋònə̀ ghù ɨ̀shìʼnə̀? Ka ŋònə̀ ɨ̀tse a pə e ŋònə̀ ghù ɨ̀shìʼnə̀ ndàŋə̀ e Nẅùə̀. 19Wə̀ zhyə̂ mɨ̀ntə̌ mə: ‘Kò wə̀ zhwuutə̀, kò wə̀ fànə̀, kò wə̀ zə̀ərə̀, kò wə̀ pyiimə̀ a ndzəənə̀ zəənə̀nə yɨ̀ pɨ̀chwìrə̀, kò wə̀ fɨ̀ghə̀ a ŋwùə̀, zuʼnə̀ tǎ ɨwɨghə pobə mǎ o.’”
20A kẅùə̀ ambo Yěsû lo, “Ɨ̀nèrə̀, ndə̀ pìʼnə̀ a nɨ nùŋə̀ mɨ̀nwùə̀ mə tsaʼnə ndə̀ pənə môngwàswùumə̀.”
21Yěsû a naŋə̀ e, nkòŋə̀ e, nshwəŋə̀ ambo ze lo, “Wə̀ puŋə̀ a taʼà àzwuumə̀. Lèrə̀ ngə̀ shwùunə̀ àzwuumə̀ àtsùmə̀ nɨ wə̀ pənə nɨ zèrə, ŋŋâ nkabə̀ ambo ngàŋə àfumə̀, àfùʼù o â tyiʼə̀ mbə a nɨ̀pwuurə̀; wə̀ pəla ngə̀ ngɨ̀rə̀ a lenə, wə̀ tô ndzùŋə̀ mə̀.”
22Tsaʼnə à lə̀ zuʼnə ànwùə̀ zə̀ la, mbɨ̀ŋmə̀ e ɨ̀ lə̀ tyèbrə̀, a pə̀ŋə̀ ndèrə̀ e nɨ àsòmnə̀ ntiinə ɨ̀pwuumə̀ ɨ̀pe lə̀ noʼnə. 23Yěsû a naŋə̀ nkamnə̀, nshwəŋə̀ ambo ɨ̀zùŋə̀ ndzùmə̀ ɨ̀pe lo, “A tɨ̀ŋnə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀!”
24Ɨ̀zùŋə̀ ndzùmə̀ Yěsû lə̀ yerə̀ ànwùə̀ zèrə zə. La Yěsû a chi nshwəŋə̀ ambo pobə lo, “Ɨ̀poonə̀, a tɨ̀ŋnə̀, ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀. 25A zàŋə̀ ambo ləəmə nkunə a nɨ tswurə̀ amwuə nɨ̀lyə̂ nɨ lyàmnə̀ ntsàarə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.”
26Tsaʼnə ɨ̀zùŋə̀ ndzùmə̀ ɨ̀pe lə̀ zuʼnə àshwəŋnə̀ zanə, ànwùə̀ ghu a lə̀ tsàarə̀ a ghobə ka mɨ̀zùŋə. Pobə tyiʼə̀ nshwəŋnə̀ pobə nɨ pobə lo, “Ŋònə̀ nɨ ǎ tyiʼə̀ chwarə̀ lə ɨ̀wə̌?”
27Yěsû a naŋə̀ a ghobə nshwəŋə̀ lo, “Ànwùə̀ tsaʼa zə̀ a za ntsàarə̀ pə a ŋwùə̀ mɨsoŋə la ka tsàarə̀ e a Nẅùə̀, ntiinə ka ànwùə̀ àtse a pə e ghu nɨ a tsàarə̀nə a Nẅùə̀.”
28Pità à lə̀ pìʼnə̀ a nɨ shwəŋə̀ ambo ze lo, “Wə̀ zhyə̂ lo pəə waʼà ɨ̀nwùə̀ ɨ̀pəə ɨ̀tsùmə̀ ndzùŋə̀ o.”
29Yěsû a shwəŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ ntsùmə̀ wa nɨ à myàʼtə̀nə ndâ e kə̀ pɨlyimə ɨ̀pe pɨ mbyàŋnə̀ pobə pɨ pə̀ngyə̌, kə̀ a mǎ e pobə tǎ ɨ̀ghobə, kə̀ ɨ̀poonə̀ ɨ̀pe, kə̀ ɨlyiʼə ɨ̀shyə̂ ntii mə̀ ghobə ntwuumə̀ ghù ɨ̀shìʼnə̀, 30à ghǎ kẅiirə̀ mɨ̀ndâ pobə pɨlyimə pɨ mbyàŋnə̀ pobə pɨ pə̀ngyə̌, nɨ pɨ̀mǎ pobə ɨ̀poonə̀, nɨ ɨlyiʼə ɨ̀shyə̂, nɨ nɨ̀nyàŋə̀ tɨ̀tsòŋə̀ a àtwuə̀ ɨ̀shyə̂ ghə nkwùə̀ nkɨrə, ghǎ lẅùutə̀ kẅiirə̀ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ tɨ̀tsòŋə̀ amwuə nkwùə̀ nɨ ɨ̀ ghǎ tô. 31La pɨ̀noʼnə nɨ pɨ pənə pɨ̀tsàa pɨ̀mbyə̀ tɨ̀tsòŋə̀ pobə ghǎ tyiʼə̀ pɨ̀lẅùə̀ pɨ̀ndzùmə̀, pyə̀ nɨ pɨ lẅùutə̀nə ndzùmə̀ tɨ̀tsòŋə̀ tyiʼə̀ mbə pɨ̀tsàa pɨ̀mbyə̀.”
Yěsû a chi nshwəŋnə̀ tsaʼnə nɨ̀wɨghə̀ e à ghǎ pə
(Mat 20.17-19; Luk 18.31-33)
32Yěsû a lùŋə̀ mbyə̀ pobə ɨ̀zùŋə̀ ndzùmə̀ ɨ̀pe mə nkoʼò ndèrə̀ a Yèrusalèmə̀. Ànwùə̀ ghu a lə̀ kə̀ʼnə̀ a ghobə, pànə̀ nɨ pɨ lə̀ mənə ndzùŋə̀ a ghobə pə nɨ àkẅàrə̀. Lenəla, a chi ndòo ɨ̀zùŋə̀ ndzùmə̀ ɨ̀pe pa ntsòbə̀ ɨpaa mmìntə̀ a nɨ̀pwùnə ntiitə̀ a ghobə nɨ ànwùə̀ nɨ a tô ghɨ̀rə̀ aŋunə ze. 33Yěsû à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Tsaʼnə pə̀ənə̀ mənə nkoʼò ndèrə̀ a Yèrusalèmə̀ lə, pɨ̌ lòo a Moonə̀ Ŋwùə̀ ŋŋâ ambo ɨ̀twuə̀ pɨ̀fò màʼà Nẅùə̀ pobə pɨ̀nèrə̀ mbòomə. Pobə̌ saʼà ɨ̀sàʼa e nnùŋə̀ lo pɨ̀ zhwuutə̀ e, lenəla, ŋŋâ e ambo pànə̀ nɨ ka pobə pə ghobə pɨ̀Jew, 34pobə nyèŋə̀ e, ntẅùə̀ mɨ̀tẅuə̀ aŋunə ze, nkəʼə̀ e nɨ ngwàanə̀, nzhwuutə̀ e, njyə̂ kɨ làŋə̀ ɨtarə â zhwuumə̀ a nɨ̀wɨghə̀.”
Ànwùə̀ nɨ Jemə̀ pobə Jònə lə̀ pyiitə̀nə ambo Yěsû
(Mat 20.20-28)
35Jemə̀ pobə Jònə nɨ pobə lə̀ pənə ɨ̀poonə̀ pɨ Zebedì lə̀ tô ambo Yěsû, nshwəŋə̀ ambo ze lo, “Ɨ̀nèrə̀, pəə tàʼà lo wə̀ ghɨ̀rə̀ ànwùə̀ àtse ambo pəə.”
36Yěsû a pyiitə̀ a ghobə lo, “Nɨ̀ tàʼà lo n̂gɨ̀rə̀ la ɨla ambo pɨghə?”
37Pobə kẅùə̀ lo, “Ghɨ̀rə̀ taʼà ŋwùə̀ ɨ̀wəə wə̀ yɨ̀tse â nwuunə̀ a pàa àpô ghò yè zɨghə̀nə, ẅùə̀ â nwuunə̀ a pàa àpô yè kẅàbə̀ amwuə alyiʼə nɨ̀fò o.”
38La Yěsû shwəŋə̀ ambo pobə lo, “Ka nɨ̀ zhyə̂ a wɨghə àzwuumə̀ nɨ nɨ̀ wə̀ mbyiitə̀. Mbə̀ʼə nɨ̀ nô ndoŋə̀ nɨ mbɨ nô lanə, kə̀ nkɨ nkẅiirə̀ àkẅiirə̀ nchyə nɨ mbɨ kẅiirə̀ lanə?”
39Pobə kẅùə̀ lo, “Mbə̀ʼə pəə ghɨ̀rə̀.”
Yěsû a tyiʼə̀ nshwəŋə̀ ambo pobə lo, “Njiilo, nɨ̌ nô ndoŋə̀ nɨ mbɨ nô lə, kɨ kẅiirə̀ àkẅiirə̀ nchyə nɨ mbɨ kẅiirə̀ lə, 40la ka à pə e alyiʼə mə̀ a nɨ tsoʼò a ŋònə̀ nɨ ǎ nwuunə̀ a pàa àpô mɨ̀ŋə̀ yè zɨghə̀nə kə̀ yè kẅàbə̀. Pɨ chwuʼtə̀ mə ɨlyiʼə pə ambo pànə̀ nɨ pèrə pənə ɨ̀pobə.”
41Nkwùə̀ nɨ pyə̀ ɨ̀zùŋə̀ ndzùmə̀ ɨ̀pe nɨ̀ghumə̀ lə̀ zuʼnə ànwùə̀ zanə, mɨ̀ntɨŋmə̀ ɨ̀mobə lə̀ pìʼnə̀ a nɨ zaŋə̀ aŋunə Jemə̀ pobə Jònə. 42Lenəla, Yěsû a fuŋə̀ a ghobə pobə tô nshwatə̀. A shwəŋə̀ ambo pobə lo, “Nɨ̀ zhyə̂ lo pànə̀ nɨ pobə pənə a nɨ pə àtwuə̀ pànə̀ nɨ ka pobə pə ghobə Pɨ̀jew pa nzhyiʼə̀ a ghobə, lenəla, pə̀ənə̀ ɨ̀pobə pɨ̀ẅùunə tyiʼə̀ mbə nɨ ɨ̀tɨ̀ŋnə̀ àtwuə̀ pobə. 43La ka a pə e tsaʼnə a ghǎ pə amwuə tɨ̀tɨ̀rə̀ pɨghə. Ŋònə̀ nɨ à tàʼnə a nɨ pə ŋònə̀ ngẅùunə a tɨ̀tɨ̀rə̀ pɨghə ǎ pə tsaʼa ngàŋə̀ àfàʼà, 44lenəla, ŋònə̀ nɨ à tàʼnə a nɨ pə ntsàambyə̀, â pə àpùʼù ambo ŋwùə̀ ntsùmə̀. 45Ntiinə ka Moonə̀ Ŋwùə̀ a lə̀ tô e la lo pɨ fàʼà ambo ze, à lə̀ tô pə a nɨ fàʼà ambo pə̀ənə̀, lenəla ŋŋâ a nɨ̀chyə̂mbyə̂ e a nɨ lòo ntsuʼù ɨ̀twuə̀ pànə̀ pɨ̀noʼnə.”
Yěsû a parə̀ a ɨ̀fə̀ ɨ̀myə̂ Bartimaeus
(Mat 20.29-34; Luk 18.35-43)
46Yěsû pobə ɨ̀zùŋə̀ ndzùmə̀ ɨ̀pe lə̀ kwuunə̀ a Jèrikò; tsaʼnə pobə lə̀ pənə nfurə̀ ghu, àpùŋə̀ pànə̀ pɨ̀noʼnə lə̀ pə ndzùŋə̀ a ghobə. Pobə lə̀ zəənə̀ a ɨ̀fə̀ ɨ̀myə̂ Bartimaeus, moonə̀ Timòsə̀ a nwuunə̀ a nɨ̀pwùnə àlàŋə mmə ndoonə̀ ɨ̀pwuumə̀. 47Nkwùə̀ nɨ à lə̀ zuʼnə lo la Yěsû ŋwùə̀ Nazarètə̀, a lə̀ pìʼnə̀ a nɨ kyiinə̀ nshwəŋə̀ lo, “Yěsû Moonə̀ Dàfirə̀, koorə̀ mɨ̀lɨŋə̀ ɨ̀mâ!” 48Lenəla, pànə̀ pɨ̀noʼnə lə̀ saʼà e nshwəŋə̀ lo â zhwemnə̀, la a chi nkyiinə̀ ntsàarə̀ nshwəŋə̀ lo, “Moonə̀ Dàfirə̀, koorə̀ mɨ̀lɨŋə̀ ɨ̀mâ!” 49A nɨ zùŋə̀ ndwuumə̀ nɨ à lə̀ mənə nkyiinə̀, Yěsû à lə̀ təəmə̀, nshwəŋə̀ lo, “Nɨ̀ fuŋə e â tô.” Lenəla, pobə lə̀ fuŋə a ɨ̀fə̀ ɨ̀myə̂ ẅèrə wə̀ nshwəŋə̀ ambo ze lo, “Lòo a ɨ̀shyə̂ nshwèntə̀ mbɨ̀ŋmə̀ o. Yěsû à wə̀ nfuŋə̀ o.”
50À lə̀ tsoʼò atsəʼə nɨ a lə̀ lyibə̀nə aŋunə ze mmàʼà a ɨ̀shyə̂ ndòo nɨ ɨ̀tɨ̀ŋnə̀ ntô ambo Yěsû.
51Yěsû a pyiitə̀ e lo, “Wə̀ tàʼà lo n̂gɨ̀rə̀ ɨla ambo ghò?”
Ɨ̀fə̀ ɨ̀myə̂ wa a kẅùə̀ ambo ze lo, “Ɨ̀nèrə̀, ghɨ̀rə̀ n̂dzəənə̀ ɨlyiʼə.”
52Lenəla, Yěsû à lə̀ shwəŋə̀ ambo ze lo, “Lèrə̀ o, àpyiimə̀ ntɨŋmə̀ o a ghɨ̀rə̀ wə̀ fiitə̀.”
À lə̀ zùŋə̀ ndzəənə̀ ɨlyiʼə ndzùŋə̀ a Yěsû a àlàŋə nɨ à lə̀ mənə ndèrə̀.
Поточний вибір:
Mark 10: pny
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2017, Cameroon Association for Bible Translation and Literacy
