Marko 5
5
Itaŋida Yesu obo Latulo Miniaŋa
(Mat 8:28-34; Luk 8:26-39)
1Afany nyia Yesu iko lejifak honyi ifohor tole ono atafar Galilea, ifau Gerasa. 2Teya teya, ninyia hèsuru Yesu to togol, oruaŋanie inyi iko obo latulo linyia ottu 'to te ilumio. Owon nyia atulo alia iko aminiaŋati, 3buo fe amanyatio ilumio. Obeŋ nyia obo atulo oremik inyiak ifit inyi ta aririk. 4Ifiti nyia inyi enyiahita arriai ta abilat iko aririk, ati odulo nyia inyi afucio aririk, buo fe iŋuŋucio abilat hunyia ifitanierek eejek iko ahas honyi. Obeŋ nyia tulo oremik inef inyi. 5Iddidaha nyia inyi ihiji ilumio ta afanni iko ta arue, buo fe odohita ihide doŋiok buo ituruho, buo fe ibibuacio ahuan honyi ta amoruoi. 6Ninyia igonyu inyi Yesu alamarai, ette inyi iŋioron jihonyi, ette irigoŋi ihosiere honyi, 7ette ituruho woŋ woŋ jiojio, “Yesu Lonyi Hollum elle Illomohi 'to 'Daŋ! Anyio enne iwak iyye jihoŋ? Ta afure Hollum, hibe awotto. Hèttigemio nani!” (8Ikiana nyia inyi ihuo nyia, nyio, ojio nyia Yesu jio, “Aminiaŋati ania, ojiŋu addi jio latulo alia!”)
9Ania, ette Yesu ifiyo inyi jiojio, “Ŋai afure hoi?” Itarraŋ inyi ojio “Afure hoŋ Iluluŋ;…nyio, eluaja hohoi.” 10Odulo nyia inyi attana Yesu jio, hèlaha ifuha aminiaŋa hunia addi jio afau ania.
11Owoni nyia omuk abataha arriai hunna attaditai lididaf doŋe. 12Ania, ette aminiaŋa hunia ittana Yesu jio, “Ifuhak hohoi jio abataha hua, ijiara hohoi ejiŋak jihosi.” 13Ania, ette Yesu iŋatana isi; buo aminiaŋa hunia ette ijiŋuna addi jio atulo alia, ette ijiŋana jio abataha, buo abataha hunia 'daŋ so so isuoro te edidaf doŋe jiojio hutu, hutu, hutu, ette ikuahino itua tafar enne ittokon jio woo, ette idioro, ette iye diya. Arai nyia abataha hunia ihuo alif arrihai (2000).
14Ofuhororoi nyia eyyahak bataha hunia, ette itisarrahina eram ania itua bore gala iko itua matta. Attati aati ifuanna mijio erre hoduo iduoŋi 'to hunia. 15Ninyia afuonni isi jio Yesu, igonyuni nyia isi latulo ollo owattatio 'to iko aminiaŋa arriai itoŋo diya elle iyyafatio aboŋojin buo fe ahou honyi abis. Ania, ette isi 'daŋ ibaŋi. 16Buo aati hunyia igonyuni 'to erre hunia ette iramana anyio hirre hoduo iduoŋi 'to jio latulo miniaŋa alia iko jio abataha.
17Ania, ette aati afau ania ittana Yesu hètelo ta fau hosi addi.
18Ninyia lalo Yesu idahina itogol, ette latulo linyia owon 'to iko aminiaŋa ittana inyi jiojio, “Efuo 'daŋ ikoŋ!”
19Ati iha nyia Yesu, ette iramana inyi jiojio, “Acaharu haŋ, ilo iramak aati hutta haŋ hatai erre hunne ihan Lamonye jihoi, iko amehino honyi jihoi.”
20Ania, ette latulo alia leten, ette ilur Aborejin Gala Huna 'Tomon 'daŋ buo iriramaru erre hunyia ihan Yesu jihonyi, buo aati 'daŋ ette illilliha.
Ŋarri Yayiro iko Aŋotte onno Ottir 'to Aboŋo Yesu
(Mat 9:18-26; Luk 8:40-56)
21Ninyia inyiak Yesu 'laŋan afohor tole ono atafar enne ittokon, owon nyia inyi ilotifor tafar buo eluluŋ waati enne ittok ette ittubanio jihonyi. 22Attati elettok olo aaji emojit, afure honyi Yayiro, ittuna. Ninyia igonyu inyi Yesu, ette inyi irruaŋana ahuan ihosiere hejek honyi, 23ette ittana inyi jio, “Oŋuai ŋarri hoŋ onno odiha 'to many imohita, waŋ ottirok ahas hoi jihonyi, oŋida adi inyi, ette isu!”
24Attati Yesu leten ikonyi buo aati arriai hunne ifudanie nyik nyik ajihonyi ette ifuatan ikonyi.
25Owon nyia buo fe obo aŋotte diya onno oŋuai iko ayaf yaf aŋasi 'tomon harrihai. 26Otuhok nyia inyi erre honyi 'daŋ jio a diktorat arriai buo obeŋ oŋida, ati oŋitek 'daŋ orrorrohojaru nyia aŋuai honyi ania. 27Itaniŋu nyia inyi eram Yesu, ania ette inyi ihihisuno te ehiji waati te ehalu Yesu. 28Nyio, ikiana nyia inyi ta ataji honyi jio, “Duadi bu attir ni aboŋo honyi ijiai, aŋida adi ni.”
29Ania, ette inyi ittir aboŋo Yesu, teya teya, ette ayaf yaf honyi ŋidari buo inyi, ette mijana jio aŋida inyi. 30Teya teya, omijak nyia Yesu jio alo aduaran jihonyi addi, ette inyi iyito jio eluluŋ waati, ette ifiyo jiojio, “Ŋai ottir aboŋo hoŋ?”
31Itarraŋi lejifak honyi jiojio, “Igonyu bu iyye aati ifudanie nyik nyik ajihoi buo iyye inyiak ifiyo jiojio ŋai ottir iyye?” 32Ati odulo nyia inyi attifia ŋai ottir inyi. 33Ati omijak nyia aŋotte ania erre hunyia iduoŋi 'to jihonyi, ette inyi ittuna jio Yesu anna abaŋ, ette irigoŋi ihosiere honyi, ette ipulonia ahode hode hirre 'daŋ. 34Buo Yesu ette jiaran jihonyi, “Ŋarri hoŋ, itaŋida eruk hoi iyye. Ilo te elik taji.”
35Ninyia hekiana Yesu erre huna, ofuonni nyia omuk eyak sayyo ta haŋ Yayiro, ette iramana inyi jiojio, “Aye ŋarri hoi. Hènyiak ittigemio ettiyanani obojiai!”
36Ati itafayacio#5:36 itafayacio : kuyya itayiru nyia Yesu eram hosi, ette inyi jiaran jio elettok haji emojit alia jio, “Hèbaŋ, itagolo ataji.” 37Attati Yesu itik aati 'daŋ afuatan ikonyi arari Petro iko Yakobo buo illanyi Yoane hama. 38Ninyia afanyi isi ihaŋ Yayiro, ette Yesu igonyuna aati arriai oyihinie 'tor buo fe ituruhoi woŋ woŋ. 39Ojiŋak nyia inyi attua ette jiaran jihosi, “Nyio iyihiniete itai 'tor buo fe ituruhoti? Obeŋ neto ania oye, ojoto inyi joto!”
40Ati osuhotierek nyia isi inyi, ania ette inyi ifuhara isi 'daŋ allet, ette iyaru monye iko honye hito buo lejifak honyi hula hunihoi, hoduo ofuonni 'to ikonyi, ette isi ijiŋara imaji ninyia awanari eto nyia. 41Ette Yesu inef aani eto ania, ette jiaran, “Talita, kum,” onno ojio 'to jio, “Iŋie, ajio ni jihoi totte!”
42Teya teya, ette eto ania idioto, ette idaha. (Arai nyia aŋasi honyi 'tomon harrihai.) Illillihai nyia isi 'daŋ bebe ninyia iduoŋi erre hunia. 43Ati ihum nyia Yesu iramana isi hèlaha iramani obo atulo, ette iramana isi jio, “Isiatta inyi obo aŋiyo.”
Поточний вибір:
Marko 5: EA2003
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© The Bible Society in South Sudan 2003
