Luka 22

Ande ti Uwe Kwab ti A u Wen Yesu

(Matiyu 26:1-5; Markus 14:1-2; Yohana 11:45-53)

1Kiye na ukwab tiyang na Mbayawuda ta ajwo. Ayi si ukwab ti a ku kunn wu baa, Ukwab Itiyafe, nee a ku ci buredi ti a nde-ba yi te yisiti be. 2Akwen Rimam tiyang ti ande ti ku kwen na ande Icwe Rimam ku kwab ku sha fengo ti kitam ti a wen Yesu, ikyaen ti, ikyenricwu ande ye ba.

Yawuda Cwe ti Wu Sa Yesu Jabci

(Matiyu 26:14-16; Markus 14:10-11)

3Tiri Shetann sang utob Yawuda ti a ku kunn wu baa Iskariyoti, kinjo uwae ande ti putsa Yesu rijwe asu ifaen. 4Awu nwunn u ru ka yer unju te ande ti uwe na akwen Rimam te ande ti ku nungkyi Kusog Rimam u te ba sha fengo ti wu nde u sa Yesu jabci na ba. 5Ande ba tsen utob ti ira-wu ayi u yer unju baa, aba na u nda wu aser. 6Ikyaen yine awu cwe u sha riyae ti wu u ye Yesu na ba kiye ti ujwunn ande a ta-ba atang be.

Yesu Ci Ukwab Itiyafe

(Matiyu 26:17-25; Markus 14:12-21; Yohana 13:21-30)

7Usir ru ba pu wu ti a u wen imbae mbawen ikyaen Ukwab buredi ti yisiti si-yi atang be. 8Yesu tom Bitrus ti Yohana ru uwe u ri te ba baa, “Ni ru ti ni ka nde wuci na ukwab tsika ti, ti ati u ba ci.” 9Aba rang wu baa, “Aka ti afu ku sha baa, ati na ru ka nde wuci yi atang?” 10Awu ri te ba baa, “Ni nung! Kiye ti ani a ru ka sang pu ni uwae uten, ani u nung unde iki su kitutong ambyi ru ba tu ni. Ni putsa wu ru fe yi kununn uwog ti awu a ru ka sang atang. 11Ni ri te unde ti kununn wu baa, ‘Unde ti uwe ku rang fu baa, aka ti ame te ande ti putsa-m u ci wuci ukwab atang?’ 12Unde wu u tatso ni kusog ti apupwen tiyang ti a kyae wu nyinyang. I si uwog ti ani u kyae iken meme tsika ti.” 13Aba nwunn ru u ka tu meme iken yi pangma ti Yesu tsag te ba u nde wuci ukwab yi tsi.

Ande ti Putsa Yesu Ci Wuci na Unju ti Yer te Wu

(Matiyu 26:26-30; Markus 14:22-26; 1 Korinti 11:23-25)

14Ti kiye ti a ci wuci nde pu yi, Yesu ru ka som uwog wuci te ande ti putsa-wu. 15Awu ri te ba baa, “I tsi m ti utob ting ting ti m ci kang wuci ukwab yine te ni titawe ame u sang uwae rikaen-m. 16Kubenti ti ame ku ri te ni, ame u ci-m Ukwab Itiyafe iki cwucwo be, se kiye ti ati u ru ka ci Ukwab Itiyafe ti kubenti uwae kuru Rimam apupwen.” 17Tiri Yesu sa kitu ambyi anam u nde fxaefa na Rimam u ri baa, “Ni mbe ayine ti ni kan te atso. 18Kubenti, tsikunn ike ru fe yi uwe ame u ngwa-m ambyi anam iki cwucwo be, se kiye ti Rimam a ru ba nae ukwe-wu.”

19Isim ayine, awu sa buredi u nde fxaefa na Rimam, u nyangta wu u pu na ba u ri baa, “Awune si rimenn ijwe-m ti ame sa ku na ni. Uwe ike ni nde pangma ti ame ku nde ne, ti ni tangsom te m.” 20Isim ti a ci pu ba wuci ama, awu txi ambyi anam fa kitu u ri baa, “Kitu ambyi anam yine ku tso unju ti yer tishe ti Rimam yer te ni. Ame sa anying-m yaen mbub ikyaen-ni ti ayi ā tso baa, unju ti yer yi na si kubenti.

21“Amaa ani sae! Unde ti u sa m jabci som te m risu tebur ike. 22Rimam sa tsi pu wu baa, Umbae Unde na u cwu kang, amaa, ayi u beb timambe uwog unde wu ti u sa wu jabci.” 23Aba nwunn ku rang atso baa, aye uwae-ba ti u nde iken yine bara?

24Kiye wune ama, aba nwunn ishaen te atso baa, aye uwae-ba ti na skeb patag bara. 25Yesu ri te ba baa, “Akwe na ande ti nung-ba Rimam be tso kob kuko risu ande-ba. Ariki ama ku nda ande-ba kunn ba baa, ande ti ku ndeya uten. 26Amaa ayi ā si-yi ahan uwog-ni be. Uwog-ni unde ti skeb ti tag ā si pangma umbae ti ricwunnkyi, unde ti uwe ā si pangma upyi. 27Aye ti siskeb, unde ti kununn ti som ku ci wuci ree, re upyi ti ku sha wuci ba na wu? I si-yi unde kununn ti skeb be a? Amaa, ame som te ni pangma unde ti ku kuku.

28“Ani ti si ande ti som te m ti ti kucang u nung pu ni rikaen ti ame ngwa. 29Tine, pangma ti Itse-m nda m nae ukwe, ame ama u nda ni nae ukwe. 30Kiye ti ame a nae ukwe, ani u ci u ngwa te m uwae kuru-m. Ani u som tsa atxom ukwe u pwen rikwen risu kumbub rijwe asu ifaen na anyisu Isirela.

Yesu Ri te Siman baa Awu na u Kafe ti Isim

(Matiyu 26:31-35; Markus 14:27-31; Yohana 13:36-38)

31“Siman! Naa kutong! Shetann mbe pu wu riyae ti wu skae ni pangma ti unda ku skae ru ifwen uwae ayaen awum. 32Amaa ame jwam Rimam ikyaen-fu ikyaen ti fu kafe-fu ti isim be. Ama kiye ti afu a kafe ba sang pu fu fengo, ri bom ameinja-fu utob ama.” 33Bitrus ri baa, “Itsekuru, ame cwe pu m ti m te fu ru kaa kusog pursuna tetso. Ame te fu u cwu tetso.” 34Yesu ri te wu baa, “Bitrus, ame ku ri te fu, mbakunn u ta-wu ira yaka be, se ti afu a shaen pu fu ame atsepu ita baa, afu na nung ji-fu ame usir iki be.”

Usu ti Ande Yesu u Ye su Uwae Ikyin ti Kyang-ba

35Tiri Yesu ri te ba baa, “Ti kucang ti ame tom ni ru, ama ani ye su-ni ukyig ko ibae ko apwafxen be, ani shanum iken iki a?” Aba ri baa, “Iyee.” 36Yesu ri te ba baa, “Amaa tine, unde ti site ukyig ko ibae awu ā sa ye su. Unde ti a site-wu te kisim be, awu ā sa kutupwa-wu jabci ti awu ā pu aser-yi ru ka jab kisim atang. 37A u kumunn kang ira ri a bae risu-m uwae Kutsingken Rimam baa, ‘A sa wu tsi pangma awu na si kinjo uwae ande ti ku nde ikentitibi.’ Een, ira ti a bae risu-m kute ku nde tine.” 38Anyisu afxen-wu ri baa, “Itsekuru, nung, kisum wen ifaen ta ri.” Awu ri te ba baa, “Ayi pang pu yi.”

Yesu Jwam Rimam Risu Rikaen ti Awu u Ngwa

(Matiyu 26:36-46; Markus 14:32-42)

39Yesu nwunn u ruye uwae uten u ru yi Rikwen Zetunn, pangma ti awu ku nde kob. Ande ti imbyi-wu nwunn u putsa wu. 40Kiye ti aba ru ba sang uwog ti awu ku ka kob atang, awu ri te ba baa, “Ni jwam Rimam be ani u jwunnsi uwae kumyae ti ku ba risu-ni.” 41Isim ira yine, awu nwunn u ya ba ta u ko ru kpang u ru ka kú riben u jwam Rimam baa, 42“Itse, afu a cwe ira, sa ra kitu rikaen wune ru uwog-m. Amaa, iken ti afu ku sha, ayi ā nde.” 43Uwog wune, atom Rimam iki si apupwen ba u ba nda wu kpakang. 44Ama anying yer wu utob si-yi ti ti ri be. Awu jwam Rimam ti ribom-wu skeb kyi ti kucang. Atsam ru wu ijwe u ku jang si riben pangma anying.

45Ti awu jwam mam Rimam, awu sunwunn u kafe ru ka tu ande ti putsa wu aba ku cwag kicwag, ikyaen utob ti beb. 46Awu rang ba baa, “Ani kyang rimang ku cwag-ni kicwag? Ni sunwunn ti ni jwam Rimam ikyaen ti ani ā nwangru uwae itimyae ti ku ba risu-ni.”

Yawuda Pu Ande Ba Ye Yesu

(Matiyu 26:47-56; Markus 14:43-50; Yohana 18:3-11)

47Ti ira unju ti awu ku ri ne, kumbub ande iki ba sang. Yawuda, kinjo uwae ande ti putsa Yesu rijwe asu ifaen pu ba ru ku ba. Awu ko ru ka fer ti wu ye Yesu bur utob, 48amaa, Yesu ri te wu baa, “Yawuda, afu u ye Umbae Unde jabci fengo utob ti ye bur a.”

49Kiye ti ande ti putsa Yesu ti tsitsi nungye iken ti u nde, aba rang Yesu baa, “Itsekuru, ati pu rika kunn ba a. Kisim wen-ti ta ri.” 50Kinjo uwae-ba nwaen ra ada u ru ka pye ra kutong ti kujwo rici na unde iki ti si upyi. Unde wu si upyi kukwen Rimam tiyang. 51Ama Yesu ri baa, “Ya ta. I pang pu yi.” Ama awu sa kujwo tekunn kutong unde wu, ribang wu ben kyi.

52Uwog wune Yesu sae akwen Rimam tiyang, ti ande ti ku nungkyi Kusog Rimam, ti ande ndufu ti tsitsi ti ru ba ti a u ye wu ne, ama ri te ba baa, “Ani kyang rimang u pu iti ti asim ru ba pangma ame na si unde ti riyib? 53Ti usirsir ame ku te ni som te atso Kusog Rimam, ani ye-ni ame be. Amaa, kiye wune si ana-ni ti ni nde wande-ni atang. Ayi si kiye na awu ukwe kufub.”

Bitrus Ri baa Awu na Nung-wu Yesu be

(Matiyu 26:57-58; 26:69-75; Markus 14:53-54; 14:66-72; Yohana 18:12-18; 18:25-27)

54A ye Yesu u pu wu ku ru yi kununn kukwen Rimam tiyang. Bitrus ama putsa ba isim ti fengo ti rwen. 55Ti aba ka sang pu ba atang, ariki jwu urwa cwe pu ba kutampwa utabshi. Bitrus ru ba som atang ama u ku wē urwa. 56Umbae wandab iki ti ku nde wande kununn atang ru ba nungye wu som ku wē urwa. Umbae wandab wu pu ayib cwutsa Bitrus u ri baa, “Unde wune te Yesu ta te atso ama.” 57Amaa, Bitrus txen-wu txen baa, “Ame nung-m awu be.” 58A paji kpang unde iki nungye kyi wu u ri te wu baa, “Afu si kinjo uwae-ba.” Ama Bitrus ri te unde wu baa, “Si-yi ame be.” 59Isim ti kiye kpang wur ru, unde iki tishe ka ru ba ri baa, “Kubenti, unde wune som te wu ikyaen ti, awu si unde ti Galili.” 60Ama Bitrus ri te wu baa, “Ame nung nyang-m ira yi ti afu ku ri be.” Ti ritsen, ti awu tsi ku ri ira ne, mbakunn ta ira. 61Uwog ne, Itsekuru kafe ayib u sae Bitrus piin, ama Bitrus tangsom ti ira ti Itsekuru ri te wu baa, mbakunn u ta-wu ira utitang ne be, se iken ti awu Bitrus a txen wu txen ka atsepu ita baa, awu na nung-wu awu be titawe. 62Bitrus ruye ka jwub ira aten si wu ayib.

A Byinn Yesu u Txir Wu Itxir

(Matiyu 26:67-68; Markus 14:65)

63Ande ba ti ku nungkyi Yesu ku txir wu txir u ku byinn wu iken. 64A bur kyi wu ayib ti kutupwa u rang wu baa, “Aye ti byinn fu? Caen unde ti byinn fu!” 65A txun tsi wu asu u ri ira titibi titibi ti tsotso risu-wu.

Yesu Tsi Uwe Ande ti ku Pwen Rikwen

(Matiyu 26:59-66; Markus 14:55-64; Yohana 18:19-24)

66Ti ucwe fam yae, ande ndufu Mbayawuda ti ande ti uwe akwen Rimam ti ande ti ku kwen na ande Icwe ru ba funn u ka pu Yesu ru ba tsi uwe ande ti ku pwen rikwen. 67Aba byib wu baa, “Ri te ti, afu ti si Unde wu ti Rimam Tsab Tsi ti u nwangru ti a?” Yesu ri te ba baa, “Asiti ame a ri te ni, ani u ru-ni kubenti uwae ira-m be. 68Asiti ame a rang ni ira ama, ani u cwé-ni ame unju be. 69Amaa sa tsikunn ike ru fe yi uwe Umbae Unde u som kujwo rici na Rimam ti skeb ti tag.” 70Meme-ba rang wu baa, “Afu ti si Umbae Rimam wu a?” Awu ri baa, “Ani ri pu ni baa, ame si awu.” 71Tiri aba ri baa, “Ira-wu ayine pang-yi ati be a? Ati ti risu-ti fxen pu ti ira ti tso unju-wu ne.”

Поточний вибір:

Luka 22: kubNT

Позначайте

Поділитись

Копіювати