Luka 23

A Pu Yesu Ru ka Tsi Uwe Unde ti Uwe Uten

(Matiyu 27:1-2; 27:11-14; Markus 15:1-5; Yohana 18:28-38)

1Meme kumbub ande ti funn atang nwunn u pu Yesu ru yi uwe Bilatus ti si gomna. 2Aba ka yer ira nae tsa wu atang baa, “Ati tu unde wune ku kyaefa ande-ti baa, aba na pae aser ukwe na-ba Kaisar be. Cwucwo awu ri baa, awu na si Unde wu ti Rimam Tsab Tsi, awu na si ukwe.” 3Bilatus rang Yesu baa, “Afu ti si ukwe Mbayawuda wu a?” Yesu cwe na wu baa, “Afu ri pu fu.” 4Tiri Bilatus ri te ande ti uwe ande ti ku fen Rimam ti ande ti tsitsi ti funn atang baa, “Ame tu-m riraen iki uwog unde wune be.” 5Amaa, aba tsikunn ti ti ri ti ribom baa, “Iken ti awu ku kwen na ande nda uten-ti meme kyirunn. Awu bag yi uwae Galili u nwunn kyang tag uwae uten Yawudiya meme. Tine awu sang ba pu wu ike.”

A Pu Yesu Ru ka Tsi Uwe Ukwe Herodus

6Kiye ti Bilatus fxen ira yine awu rang ba baa, “Unde wune si unde ti Galili a?” 7Isim ti awu fxen baa, Yesu na ruye uten ti Herodus nae ukwe atang, awu pu Yesu tom ru ka na Herodus. Uwae kiye yi, Herodus ti risu-wu ta Urushelima. 8Ti Herodus nung Yesu awu tsen utob timambe, ikyaen ti awu fxen pu wu pu ira risu Yesu ti kucang akwen u ku kwab ti awu na sae Yesu ti ayib. Awu ku sha ti Yesu na nde na wu iken iki ti ku fur ayib ti awu na nung. 9Ikyaen yine awu rang Yesu ira ti tsotso, ama Yesu mbub na-wu awu unju be. 10Ande ndufu ti uwe na ande ti ku ten iken na Rimam te ande ti ku kwen na ande Icwe ko ru ba tsi uwe u yer tikong nae tsa Yesu ti ribom-ba. 11Herodus ti akyirten-wu txir Yesu itxir u sae ru wu. A pu arun ukwe sī wu, u pu wu kafe ba na Bilatus. 12Bilatus ti Herodus si ande ti rika te atso ti kucang, amaa, usir wu aba kafe arwan atso.

A Pwen Yesu Rikwen Iticwu

(Matiyu 27:15-26; Markus 15:6-15; Yohana 18:39-40; 19:1-16)

13Bilatus kunn byir tag ande ndufu ti ku fen Rimam, ti akwe ti ande ndufu ti tsitsi 14u ri te ba baa, “Ani pu unde wune ru ba pu ni uwog-m u ri baa, awu na nde ku mbeb wu ande. Tine ame rang pu m awu ira ti ayib-ni ike u tu-m awu ti riraen iki uwae meme ira titibi ti ani ri risu-wu be. 15Herodus ama tu-wu awu te riraen iki be, ikyaen yine awu pu wu tom kafe ba na ti ti ike. 16Ikyaen na yine, ame u byinn wu kimbab amam u ya wu ta ti awu a ru.”#23:16 Ariki uwae atsingken ti kucang site ira iki uwog ne baa, 17 Ko kusang titini kiye ti aba ku ci Ukwab na Ukwab Itiyafe, Bilatus ku tsab unde kinjo uwae ande ti ta uwae pursuna u saen wu ta na ande.

18Ande ti funn atang meme taen ira tso ise baa, “Ni wen wu! Saen Barabas ta na ti.” 19Barabas si unde iki ti a pu sang pursuna ikyaen ti awu sa ufxaen si ande uwae uten u wen unde iki. 20Bilatus ku sha ti awu na saen Yesu ta, ikyaen yine awu ri kyi ira te ande ba cwucwo. 21Amaa aba tsi kunn ku nyae ira baa, “Ni pu wu ka kwer.” 22Bilatus rang kyi ba ti atsepu ita baa, “I si ira imi ti awu raen? Ame tu-m ira iki titibi uwog-wu ti a u wen wu be. Ikyaen yine ame u byinn nyang wu kimbab amam ti m ya wu ta.” 23Ama aba tsikunn ira ti taen baa, a na pu Yesu na ru ka kwer risu kutuku ti cice. Ricwunnkyi-yi, a cwe ira ti taen-ba ayi. 24Ikyaen yine Bilatus pwen Yesu rikwen iticwu, pangma ti aba ku sha. 25Awu saen ta na ba unde wu ti aba ku sha, awu unde ti sa ufxaen si kutampwa ande u wen unde fa ti atang. Bilatus sa Yesu na ba ti aba na nde te wu iken ti aba ku sha.

A Kwer Yesu Risu Kutuku ti Cice

(Matiyu 27:32-44; Markus 15:21-32; Yohana 19:17-27)

26A ye pu Yesu ru. Ti aba nwunn ru ku ye uwae uten, unde iki ti rinyi-wu si Siman, unde ti Kirene, ru ufang ku ba yi uwae uten. A ye wu u ye kutuku ti a kaa kwer Yesu atang nae tsa wu ukwae ti awu na su putsa Yesu isim.

27Kumbub ande yang-yi putsa Yesu. Uwae-ba anda fa atang, aba ku jwub ku táe ikyaen-wu. 28Yesu kafe uwe tag ba u ri te ba baa, “Ani anda ti Urushelima! Ni jwub-ni ira ikyaen na m be, ni jwub ikyaen risu-ni ti anyisu-ni. 29Ikyaen ti, usir ku ba ti ande u ba ri baa, ‘Itinyang si ana anda ti mbae ji-ba anyisu be! Itinyang ama si ana anda ti nyam ji-ba anyisu be.’ 30Ikyaen ti, uwae kiye wu ande u ri te rikwen baa, ‘Mbub si kyi ti.’ Aba u ri te abab rikwen baa, ‘Burkyi ti.’ 31A u ri ahan ikyaen ti, asiti a ku nde iken yine te kutuku ti tirisub, ayi u ba si rimang ti ituku ti ti wam?”

32A ye pu ande iki ifaen ru te ba ti a ka kwer ba te Yesu. Aba ande ifaen bane si ande ti riyib. 33Ti aba ru ba sang uwog iki ti a ku kunn baa Golgota, a sa Yesu kwer risu kutuku atang te ande ti riyib bane, kinjo ta kujwo rici, kinjo ta kujwo ife-wu. 34Yesu jwam Rimam risu ande ti sa wu kwer baa, “Itse, yata na ba. Aba nung-ba iken yi ti aba ku nde be.”

Aba pu atupwa-wu kan na atso yi fengo iticaen. 35Ande tsi atang u ku sae, amaa ande ti uwe ku txir Yesu itxir baa, “Awu ku nwangru ariki, ni ya wu ta ti wu nwangru risu-wu, asiti awu a si Unde wu ti Rimam Tsab Tsi#23:35 Unde wu ti Rimam Tsab Tsi. Uwog Mbayawuda, Unde ti Rimam Tsab Tsi u si ukwe tiyang ti awu u ru ba nwangru ande. u tom ba ti wu na nwangru ande!”

36Akyirten txir wu itxir ama. Aba ru ba uwog-wu u ba txi na wu ambyi anam ti fifab 37u ri te wu baa, “Asiti afu a si ukwe Mbayawuda, nwangru risu-fu!” 38A bae ira iki ijwe kutuku risu-wu baa, “Awune si Ukwe Mbayawuda.”

39Kinjo uwae ande ti riyib ba ti a pu kwer te Yesu txun Yesu asu baa, “Afu si-fu unde wu ti u nwangru Mbayawuda be a. Nwangru risu-fu te ati!” 40Amaa unde ti ifaen fwan utikucang kibyag baa, “Afu ku kyen-fu Rimam be a? A pwen ti rikwen iticwu meme-ti, 41amaa, ana-ti, a pwen ti rikwen pang atang. Ati ku bunn iken ti ati tom. Ana-wu, awu nde-wu iken iki titibi be.” 42Awu ri te Yesu baa, “Yesu, tangsom te me kiye ti afu a ru ba nae ukwe-fu.” 43Yesu ri te wu baa, “Ame ku ri te fu, yaka ne, afu u te m ta tetso Kuru ti tinyang apupwen.”

Iticwu na Yesu

(Matiyu 27:45-56; Markus 15:33-41; Yohana 19:28-30)

44Kiye ti usir ta kitaen pam pam pam, kufub si kyi uten atang meme. 45Usir tsen-wu cwucwo be ba kwar ti usir kujwo ureb. Uwae Kusog Rimam, kutupwa ti a sa yer kyi Kusog Rimam katsen ifaen. 46Ama tiri Yesu jwub ira ti tso ritsen baa, “Itse-m, ame sa kusung-m ku na fu kujwo.” Ti awu ri mam ira yine, awu cwu.

47Unde ti uwe akyirten nung iken yi ti nde ne u teb rinyi Rimam u ku ri baa, “Kubenti, unde wune nde-wu iken titibi be.” 48Ande ti tsitsi ti ru ba funn atang ti a na ba sae iken yine ama, aba kafe ru yi kununn ti utob ti ndembeb. 49Meme ande ti nung Yesu ben ben, fa ti anda ti putsa wu ru Galili ba, aba tsi ti fengo ti rwen u ku sae iken yi.

A Nji Yesu

(Matiyu 27:57-61; Markus 15:42-47; Yohana 19:38-42)

50Unde iki ta atang ti rinyi-wu si Yusufu. Awu si urae Mbaibrane, awu ta uten ti Arimateya. Awu si kinjo uwae ande ti ku pwen rikwen. Awu si unde ti kubenti ti ku nde iken ti tinyang. 51Awu som ku ji kiye ti Rimam u ba nae ukwe-wu. Ko ti awu si kinjo uwae na ande ti ku pwen Yesu rikwén, awu cwe-wu ira-ba ti rikwén-ba ti a ku pwen be. 52Awu ru ka tu Bilatus u jwam rukom na Yesu. 53Isim ti a cwe na pu ba awu, awu ru ka saen rukom Yesu si yi riben u sa kutupwa rukom bur wu u ye wu ru ka nae uwáe kutxú#23:53 uwáe kutxú. Uwog Mbayawuda, a nji-ba unde ti cwu be. A ku pu rukom nae si uwae uwáe kutxom. A nji-ba ande uwae kukwae be. ti a pab tsi u nji-ba unde atang khika be. 54Usir wu si usir ti a ku kyae ijwe-ba ikyaen Usir ikyinn.

55Anda ti putsa Yesu ru Galili ba putsa Yusufu ru u ka nung kuskab wu, ti fengo ti a sa rukom Yesu nae uwae uwáe kutxú. 56Isim yine aba kafe ru ba ti yi kununn u ba jab kindob ti usu iki ti ku nung kuyang ti a u shin rimenn-wu te yi. Usir ikyinn aba pu nyang pangma ti Icwe ri baa, a na nde.

Поточний вибір:

Luka 23: kubNT

Позначайте

Поділитись

Копіювати