Luka 21

Uwa Icwu ti Tā Aser Skeb Ande ti Rifunn

(Markus 12:41-44)

1Yesu txaen ayib tso ritsen u nung ande ti rifunn ku pu rinyangwae-ba si uwae kitu Rimam u ku tso Rimam fxaefa-ba uwae Kusog Rimam tiyang. 2Ama uwa icwu ti rikaen ru ba atang. Awu pu ana-wu ayaen kobo ifaen ta. 3Tiri Yesu ri baa, “Kubenti ti ame ku ri te ni, iken ti uwa-icwu ti rikaen wune ta na Rimam skeb pu yi ana ande ti tsitsi meme. 4Ikyaen ti, ande bane ku ta iken kpang uwae rifunn yang-yi ti Rimam nda ba, amaa, uwa-icwu wune ti ta uwae rikaen nda Rimam meme iken ti awu site kujwo-wu.”

Yesu Ri baa A na u Byinn Mbub Kusog Rimam

(Matiyu 24:1-14; Markus 13:1-13)

5Uwog wune ariki uwae ande ti putsa Yesu ku ri ira risu Kusog Rimam baa, a na mbye wu ti atxom tinyang u kyae nyang wu nyinyang ti iken ti ande nda Rimam. Ama Yesu ri te ba baa, 6“Meme iken ti ani ku sae ne, kiye iki ru ku ba ti ande u nung-ba ko kutxom kinjo risu uriki be. Meme-yi u kyaensi tag riben.”

7A rang Yesu baa, “Unde tiyang, isinn ti iken yine u nde? Imi ti u tso baa, kiye wu na ba pu yi ti iken yi u nde?” 8Yesu fa ba kusen baa, “Ni som te ujwin ikyaen ti unde iki ā kyaefa-wu ani fa be. Ande yang-ba akwen u ru ba yi rinyi-m baa, aba na si Unde ti Rimam Tsab Tsi. Cwucwo aba u ri baa, kiye wu na ba pu wu. Ni putsa-ni aba be. 9Ni kyen-ni ikyenricwu be. Kiye ti ani a fxen baa, ande na ku cwe-ba ira atso be u ku ta rika te atso, ni ndembeb-ni utob be. Iken yine u nde kang titawe, amaa ayi si-yi iken ti u tso ricwunnkyi utense khika be.

10“Uten ti uten u ta rika te atso. Akwe ti akwe u ta rika te atso. 11Utense u kyi ijwe kyi fe uwog meme. Rimenn u pu uten ti tsotso. Acaeb u munn kyi uwog meme. Ani u nung iken apupwen ti u nda ande ikyenricwu ti iken ti u tso kuko Rimam ti ande nung-ba usir iki be. 12Ande u ye ni u nda ni rikaen titawe meme iken ti tsitsi yine u nde. A u pu ni ru yi asog Rimam-ba u ru ka pwen ni rikwen atang u pu ni ru ka kusog pursuna. Ikyaen na ira-m, a u shir ni ba tsi uwe akwe ti ande ti uwe uten. 13Ayine u si riyae ti ani u tu u ri te ande ira-m ti tinyang. 14Ni kab-ni uwae risu ira ti ani u ri kiye ti ani a ru ka tsi uwe-ba be, 15ikyaen ti, ame u sha na ni itinyang ti ben-ayib, ikyaen ti ko kinjo rikaen uwae ande ti rika-ni u tsi tu-wu uwe-ni ti wu u ci rika risu-ni be. 16Abitse-ni ti abiya-ni ti ameinja-ni, ti ande ti uten-ni ti arwan-ni u pu ni jabci na ande ti rika-ni. Aba u wen ariki uwae-ni. 17Ikyaen rinyi-m ande meme u sa ni khika. 18Amaa, ko ikyinn risu-ni kinjo u yag byinn-wu be. 19Asiti ani a yer-ni anying utob be, ani u nwangru.

Yesu Ri baa Urushelima na u Mbubsi

(Matiyu 24:15-21; Markus 13:14-19)

20“Kiye ti ani nung akyirten ru ba pakob Urushelima fa uwae, ani u nungye baa, ayi u tsi-yi tsi be a u byinn mbub wu si riben. 21Kiye ti ani a nung iken yine, ani ande ti uten Yawudiya, ni ter inyae tso yi rikwen ti ni ka titam. Ande ti ta uwae uten ā nwunn ruye kang uwae uten. Ande ti ruye pu ba uwae uten ā kafe sang-ba ti uwae uten cwucwo be. 22Ikyaen ti, usir wune si usir ti Rimam u byinn ande kimbab atang. Ayine si ikyaen ti a u kumunn meme ira ti a bae risu usir rikwen uwae Kutsingken Rimam. 23I si iken ti ku nde risi uwog anda ti site rishwu uwae kiye wu, ti anda ti ku nyám umbae ikyaen ti, rikaen ti u ru ba risu uten wune si-yi ti ti ri be. Rinae Rimam u ta risu ande bane. 24A u cin wen ariki uwae-ba ti kisim. Ande ti uten ti iyen meme u ru ba ye ba ru usom apyi. Ande ti kufub u ba tsikunn ti ku byinn mbub Urushelima si riben, se kiye ti Rimam sa tsi na ba a mam pu yi.

Itiba na Umbae Unde

(Matiyu 24:29-31; Markus 13:24-27)

25“Kiye wu usir, ti ushaen, ti atitaen ti ta apupwen u tso iken ti ku fur ayib ti tsotso. Ikyenricwu u ye ambukwen ande utense. Ira ti kab-ba u shag faa ikyaen ambyi uyinn ti u kyeb tso ba mbub shag, ku túm ka ikyae ne ba ikyae ne. 26Ande u pu cwu ikyaen ti aba ku kyen ikyenricwu ira titibi ti ru ku ba risu utense meme. Ikyaen ti, iken ti rurob ti ta apwa apupwen u kyi ijwe u ya fengo-yi ti kucang ta u putsa itishe. 27Iken yine u nde itawe Umbae Unde u mbug ruye u si uwae kubyi ku ba ti riyinn Rimam, ti rurob. 28Kiye ti iken yine a ru ba ku nde, ni fa sunwunn ritsen ti ni shir ra risu-ni nwunn ritsen ikyaen ti, itinwangru-ni kyang ku yaen pu-yi.”

Ira ti Kwen Risu Kutuku Kututung

(Matiyu 24:32-35; Markus 13:28-31)

29Isim yine Yesu tsag na ba ira ti sunn iki baa, “Ni kwen iken uwog kutuku kututung ti ituku ti tsitsi. 30Kiye ti ani a nung atsing-yi a shab ru ku ba ani nungye pu ni baa, ushaen upwen na kyang yaen pu yi. 31I si ahan ama, kiye ti ani a nung iken ti m ri ne ku nde, ni kab ye baa, Kujwokwe na Rimam na yaen pu yi ti ti ba.

32“Kubenti ti ame ku ri te ni, iken yine meme u nde titawe ande ti tsi ti user ne u cwu. 33Apupwen ti utense u wur ru ru, amaa ira ti tso unju-m u tsi kukunn.”

34“Ni nung ijwe-ni nyinyang, be usom ti som ti ukaen, ti iken ti ngwa, ti rikaen utense wune u shir pu utob-ni ru, ama usir wu u ba kpugfa ni fa pangma kutxae. 35Ikyaen ti, usir wu u ru ba kang uwog ande meme ti ta uwae utense patag. 36Ni tsi ti ujwin ko kiye titini. Ni jwam Rimam ti wu nda ni ribom ijwe ti ni nwangruye uwae iken yine meme ti ku ba, ti ani u ru ba tsi kutxuwe Umbae Unde.”

37Uwae kiye wune Yesu ku kwen na ande iken Kusog Rimam tiyang. A ba ye ureb awu ku ruye uwae uten u ku tso ka nae rikwen ti a ku kunn wu baa Rikwen Zetunn. 38Kiskinn fifae ti usirsir ande ku ru ka som Kusog Rimam ikyaen ti a na fxen ira ti awu u kwen na ba.

Поточний вибір:

Luka 21: kubNT

Позначайте

Поділитись

Копіювати