Luka 20

A Rang Ira Risu Kuko na Yesu

(Matiyu 21:23-27; Markus 11:27-33)

1Usir iki, ti Yesu ta Kusog Rimam tiyang ku kwen na ande u ku ri te ba ira Rimam ti tinyang, ama akwen Rimam tiyang ti ande ti ku kwen na ande Icwe Rimam ti andufu ti tsitsi ru ba funn. 2Aba rang Yesu baa, “Ri te ti uwog ti afu tu kuko atang itawe afu ku nde iken yine. Aye ti cwe na fu baa afu na nde iken yine?” 3Yesu ri te ba baa, “Ame ama u rang ni ira iki. Ani ri te m, 4kiye ti Yohana ku nde na ande batisma, Rimam ti cwe na wu ree, re unde iki ti cwe na wu?”

5Aba nwunn ku shaen ishaen te atso u ku rang atso baa, “Ati u ri baa imi? Asiti ati a ri baa, awu na tu yi uwog Rimam, awu u ri baa, ati nde rimang ru-ti kubenti uwog Yohana be bara? 6Amaa asiti ati a ri baa, awu na tu yi uwog unde, ande ti funn ike ne u jwunn wen ti ti atxom, ikyaen ti, aba kab mam pu ba baa, Yohana na si unde ti ku ya iskin ira Rimam.”

7Ikyaen yine a ri te Yesu baa, “Ati nung-ti unde ti cwe na Yohana ti wu na ku nde batisma be.” 8Yesu ri te ba baa, “To, ame ama u ri te-m ani uwog ti ame tu kuko atang nee ame ku nde iken yine be.”

Ira ti Sunn Risu Ande ti Uwe Uten

(Matiyu 21:33-46; Markus 12:1-12)

9Tiri Yesu nwunn ku tsag te ande ira ti sunn iki. Awu ri baa, “Unde iki pye risaen-wu u yen ituku anam atang u sa risaen wu na ande iki ti a na nungkyi wu. Isim yine awu nwunn u ru yi uten uwog iki u ka som yer atang. 10Ti awaen ituku yi ben mam ti itici, awu tom umbae-wu iki ru ka tu ande ba ti awu sa risaen wu na ba kujwo ikyaen ti wu na ru ka mbe awaen-yi iki na ru ba na wu. Amaa ande ba ti ku nungkyi risaen wu ye umbae wu kum u jae wu ru yi kununn ti ajwo ukaen. 11Ikyaen yine unde ti risaen tom umbae-wu iki ru ba kyi cwucwo, amaa ande ba ye kyi wu kum u waen tag wu ribam u jae wu kafe ru ajwo ukaen. 12Unde wu tom kyi umbae-wu iki ru kyi fa ti atsepu ita. Ande ba kum wu u mbog wu rimenn u jae wu ruye. 13Isim yine unde ti risaen wu kab baa, ‘Ame u nde rimang tine? Ame u tom umbae-m ti riyaen utob-m ru. Iki be a u kyen ikyenricwu-wu.’ 14Amaa kiye ti ande ba nungye umbae wu, a ri te atso baa, ‘Nung umbae unde ti risaen ti ta ri. Ni ru ba ti ti wen wu, ikyaen ti risaen wune ā kafe ana-ti!’ 15Ikyaen yine a fam wu ruye uwae risaen atang u ka kum wen wu.”

Yesu rang ande ti ku fxen wu baa, “Ani nung iken ti unde ti risaen u nde te ande bane a? 16Awu u ru ka wen tag ba meme u sa risaen na ande iki.” Kiye ti ande fxen ira yine aba ri baa, “Ayaa! Rimam ā cwunnkyi fengo wune!” 17Ama Yesu pu ayib sae ba, u rang baa, “Ani tang rimang risu ira ti a bae uwae Kutsingken Rimam kute baa,

‘Kutxom ti ande ti ku mbye kusog pyir wu pyir

ba kafe kutxom

ti a ku mbye kusog putsa wu.’

18Ame ku ri te ni cwucwo, kutxom ti ame ku ri ne, asiti unde iki a pu ipu ijwe kutxom wune, awu u munnyer munnyer. Asiti kutxom wu a jwunnsi risu unde iki, awu u sher wen wu.”

Aser Ukwe ti ti Pae

(Matiyu 22:15-22; Markus 12:13-17)

19Ande ti ku kwen na ande Icwe Rimam ti ande ti uwe na ande ti ku fen Rimam ku kwab ti a ye Yesu ti riben atang ikyaen ti aba nungye baa, ira ti sunn ti awu na ri ne na ye pu yi aba, amaa a nde fob-ba be, ikyaen ti a ku kyen ikyenricwu ande ti funn atang. 20Ikyaen yine aba som ji kiye ti a u tu riyae ti a ye wu. Aba sha tu ande iki ti tatso pangma aba na si ande ti kubenti. A ru ka jwen Yesu u ku tang baa, iki be a na u tu riraen unju-wu ti a na pu wu ru ka kunn rikwen uwog unde ti uwe uten. 21Aba nwunn u ru ka ri te Yesu baa, “Unde tiyang, ati nung pu ti baa, iken ti afu ku ri tso u ku kwen na ande si kubenti. Ti fa atang afu ku nda-fu ande iki rurob skeb ande iki be u ku kab-fu ira risu iken ti ande ku ri be, ama afu ku kwen na ande ira ti kubenti risu fengo Rimam. 22Ri te ti, Icwe Rimam cwe baa, ati na pae aser na Ukwe ti Roma ree, re ati na pae aser na-ti awu be?”

23Ama Yesu nungye pu wu kutxae-ba u ri te ba baa, 24“Ni nda m kobo ti m nung.” A nda wu. Awu rang baa, “Uwe unde ti ta ijwe kobo wune, ti rinyi ti a bae atang ne, si ana aye?” A ri te wu baa, ayi na si ana Ukwe ti Roma. 25Yesu ri baa, “I nyang pu yi. Iken ti si ana Ukwe, ni nda Ukwe, iken ti si ana Rimam ama, ni nda Rimam.” 26Ande ba tu-ba ira titibi unju Yesu ti a ye wu uwe ande be, ama fengo ti awu nda ba ira risu ira ti ti rang-ba fur ba ayib. Aba shanum ira ti ri.

Itinwunn Uwae Kuskab

(Matiyu 22:23-33; Markus 12:18-27)

27Usir iki ande iki ti ta kumbub Saduke ru ba uwog Yesu. Aba si ande ti ku ri baa, unde a cwu pu wu awu na u nwunn-wu uwae iticwu cwucwo be. 28Aba rang Yesu baa, “Unde tiyang, itse-ti Musa bae na ti uwae icwe baa, asiti unde a cwu u ya uwa-wu ta u mbae-wu umbae be, inja-wu na mbe unda wu ikyaen ti aba na mbae anyisu tsi kyi afxen inja-wu ti cwucwu. 29Ande iki ta atang ka itsongfaen, aba si ameinja atso. Utindufu uwae-ba mbe unda u mbae-wu anyisu be, u sa cwu. 30Utifaen pu unda wu u pu mbe ama, uwa icwu wu mbae na-wu awu umbae be. Unde wu sa cwu. 31Unde ti fa ti ita pu uwa cwu wu mbe, unda wu mbae na-wu awu umbae iki be. Unde wu ama sa cwu. Meme-ba itsongfaen mbe uwa icwu wune kwar ti ikyinn risu-ba. Meme-ba sa cwu ti kinjo ti kinjo. Uwa icwu wu mbae na-wu uriki uwae-ba umbae be. 32Ricwunnkyi-yi meme, unda wu ama ba cwu. 33Ama, ti meme-ba itsongfaen mbe wu kwar ti ikyinn risu-ba ne, usir ti a u ba kunn shwur ande uwae iticwu, unda wune u si uwa aye uwae-ba?”

34Yesu ri te ba baa, “Uwae kiye wune arom ku mbe anda, anda ama ku baen ande, 35amaa arom ti anda ti a kunn nwunn ba uwae iticwu, aba ti Rimam cwe baa, aba na pang pu ba ti aba na sang kununn-wu apupwen, aba u mbe-ba anda be u baen-ba ande be. 36Ayi nde tu-yi ti aba u cwu cwucwo be, ikyaen ti aba pangma atom Rimam. Aba u si pangma itse-ba Rimam, ikyaen ti aba si ande ti nwunn pu ba uwae iticwu.

37“Ira risu ande ti cwucwu ti itinwunn-ba ama, Musa tso biben baa, ande ti cwucwu na u nwunn uwae iticwu, ikyaen ti uwae ira ti awu bae risu afub ti ku ten urwa uwae kutur, awu ri ira risu Itsekuru-ti Rimam baa, awu na si Rimam Ibrahim u si Rimam Ishaku u si Rimam Yakubu ama. 38Rimam si-wu Rimam na ande ti cwucwu be. Awu si Rimam na ande ti site unyang. Uwog-wu, ande meme site unyang, aba ti tsi user ti aba ti cwucwu.” 39Ariki uwae ande ti ku kwen na ande Icwe Rimam ri baa, “Unde ti uwe, afu ri pang atang.” 40Aba site-ba ti kpakang utob ti a u rang wu ira iki cwucwo be.

Kristi, Unde ti Rimam Tsab Tsi

(Matiyu 22:41-46; Markus 12:35-37)

41Ama Yesu rang ba baa, “A nde rimang bae baa, Unde wu ti Rimam Tsab Tsi na u si kang umbae Ukwe Dawuda? 42Dawuda ti risu-wu ri uwae Kutsingken Akyang baa,

‘Rimam ri te Itsekuru-m#20:42 Itsekuru-m. Uwae Zabura wune, Mbayawuda sa “Itsekuru-m” tsi baa, a na ku ri ira risu Unde ti Rimam Tsab Tsi ti wu u si ukwe-ba tiyang ti ku ba uwe. baa,

som kujwo rici-m ike,

43se ti ame twenji pu m

ande ti rika-fu

u nda fu ceb risu-ba.’

44Dawuda ri baa, Unde wu ti Rimam Tsab Tsi na si Itsekuru-wu. Asiti awu si Itsekuru-wu, awu u kyang rimang u si umbae-wu cwucwo?”

Yesu Ri Ira Risu Ande ti ku Kwen na Ande Icwe

(Matiyu 23:1-36; Markus 12:38-40)

45Ti ande meme funn ku fxen wu, Yesu ri te ande ti imbyi-wu baa, 46“Ni nung ijwe-ni nyinyang te ande ti ku kwen na ande Icwe Rimam. Aba ku pu arun tiyang tiyang si u ku kyang kyi fe uwog meme u ku sha ti ande na fen ba uwae ritug. Aba ku sha uwog ti som ti rurob uwae asog Rimam ti uwog ti som ti rurob uwog ukwab unda ishe. 47Amaa aba ku ci isu na awa icwu ti tikong. Aba ku jwam Rimam ti rikob ti rikob ikyaen ti ande na tang baa a na si ande ti tinyang. Rikwen ti Rimam u pwen ba u beb skeb tag pu yi ana ande ti tsitsi meme.”

Поточний вибір:

Luka 20: kubNT

Позначайте

Поділитись

Копіювати