Luka 19

Zaka Tu Itinwangru

1Yesu nwunn sang fe yi uten Jeriko u ka ru tsa atang ku ru. 2Unde iki ta atang, rinyi-wu si Zaka. Awu si unde ti uwe ande ti ku mbe aser ukwe u si unde ti rifunn. 3Awu ku kwab ti wu nung kang Yesu ti ayib, amaa ikyaen ti awu si unde ti kipyir, awu tu fob-wu riyae ti awu u sae Yesu be ikyaen ti ande ti putsa Yesu ko pang-ba. 4Ikyaen yine awu ter inyae uwe, u ka tso kutuku kuyae ikyaen ti Yesu a ba ku ru ku tsa umbyi kuyae atang, awu na u sae wu.

5Kiye ti Yesu ru ba sang umbyi kutuku wu, awu txaen ayib tso u ri te Zaka baa, “Zaka, si ba fife, yaka ne ame u sang kang kununn-fu.” 6Zaka si ba yi riben fife u ba kyangte Yesu uwae kununn-wu ti utob titsen. 7Ande ti ta atang meme sae iken yine u nwunn ku pwen unju te atso baa, “Unde wune ru ka sang rikyen kununn unde ti ku nde ikentitibi.”

8Ti aba ta uwae kununn atang, Zaka fa sunwunn ritsen u ri te Yesu baa, “Itsekuru, kubenti, ame u kata rifunn-m ambub ifaen, u sa kumbub kinjo ka na ande ti rikaen. Asiti uwae wande-m ame ci iken unde iki tikong ame u pae na wu iken-wu ti atang ka atsepu inje.” 9Yesu ri baa, “Yaka ne unde wune ti kununn-wu meme nwangru pu ba, ikyaen ti, awu ama si umbae Ibrahim. 10Umbae Unde ru ba ikyaen ti wu u ba sha ande ti yag byibyinn u nwangru ba.”

Nde Wande ti Iken ti Afu Site yi

(Matiyu 25:14-30)

11Kiye ti Yesu ri ira yine te ande ba, aba kyang ku ba fer ti Urushelima. Ande ba ku kab ira baa, ayi na u tsi-yi tsi be ama a na u ye Kujwokwe Rimam tsi. 12Ikyaen yine awu sunn na ba ira iki baa, “Kiye iki unde iki ti a mbae wu kununn ti tinyang nwunn ru uten ti fengo ti rwen ikyaen ti unde ti uwe uten atang na nda wu kuko na ukwe. Awu a tu pu wu kuko-yi awu na u kafe ba-wu ti uten-wu. 13Ti awu ta itiru, awu kunn ande rijwe uwae apyi-wu ru ba, u ka na ba aser. Ko umbae titini tu aser iki ti kuko.#19:13 Unju Mbahelene a bae baa, mina rijwe. Mina kinjo si aser ti lebura u tu uwae wande na ishaen ita. Awu ri te ba baa, ‘Ni kafe ajwo te yi se ti ame a ru ba.’ 14Amaa ande ti uten-wu cwe-ba ira-wu be. Aba tom ande jae rifab-wu ti a na ru ka ri te unde ti uwe uten baa, ‘Ati ku sha-ti ti unde wune ā si ukwe-ti be.’

15“Amaa, a ka nae unde wu ukwe, awu ka kafe ba. Ti awu ka ru ba pu wu, awu kunn byir apyi-wu ti awu kan na ba aser ikyaen ti wu u nung iken ti aba tu som tsa risu aser ti aba mbe. 16Utikucang ru ba tsi u ri baa, ‘Itsekuru, ame kwab tu aser som tsa risu aser ti ame mbe, ka atsepu rijwe.’ 17Awu Itsekuru-wu ri te wu baa, ‘Usuko umbae! Afu kwab pu fu! Ikyaen ti afu nde iken-fu ti uwae kubenti risu iken ti pang, ame u nda fu u ta risu uten rijwe.’ 18Umbae ti putsa sunwunn u ri baa, ‘Itsekuru, ame kwab tu aser som tsa risu aser ti ame mbe, ka atsepu itsong.’ 19Awu ri te umbae wune baa, ‘Afu u ta risu uten itsong.’ 20Umbae iki cwucwo ru ba ri te wu baa, ‘Itsekuru, aser ti afu nda m ta ri. Ame pu yi tam nyinyang ijwe kutupwa. 21Ikyaen ti, ame ku kyen ikyenricwu-fu, ira-fu caeb pang-yi. Iken ti si-yi ana-fu be afu ku sa-fu sa. Afu ku bunn uwog ti afu tom-fu be.’ 22Itsekuru-wu ri te wu baa, ‘Afu umbae titibi! Ira ti afu ri tso ne ye pu yi afu. Afu nung pu fu baa, ira-m na caeb pang-yi ama ame na ku sa iken ti si-yi ana-m be na ku bunn uwog ti ame na tom-m be, 23ama imi ti nde titawe afu sa kiser wu nae-fu banki be? Á baa, afu na nde ayine, ame ú tu pu m iya aser-m fa ti iken iki risu-yi.’ 24Isim yine itsekuru-wu ri te ande ti tsi atang baa, ‘Ni mbe ra kiser wu kujwo-wu ti ni nda umbae ti site ayaen aser kuko.’ 25Aba ri te wu baa, ‘Unde tiyang, mbaa, awu site pu wu rijwe re!’ 26Awu ri te ba baa, ‘Ame ku ri te ni, unde titini ti site iken, a u si na kyi wu cwucwo, amaa, unde ti site-wu iken be, ko iken kpang ti awu site, a u shir mbe ra wu uwog-wu. 27Ama aba ande ti rika-m ti ku sha-ba ti m na si ukwe-ba be ne, ni ru ka pu ba ru ba ike ti ni wen ba uwe-m.’ ”

Yesu Tso Ikyinnsu Sang Uwae Uten Urushelima

(Matiyu 21:1-11; Markus 11:1-11; Yohana 12:12-19)

28Isim ti awu ri mam ira yine, awu nwunn, u pu uwe ku tso yi Urushelima. 29Ti awu ru ka ye Betifaji ti Betani, ti ta fifer ti umbyi Rikwen Zetunn, awu tom atugbug-wu ifaen ru uwe. 30Awu ri te ba baa, “Ni ru yi uwae uten ti ta uwe akwen. Kiye ti ani a ru ka sang uwae uten atang ani u nung umbae ikyinnsu kya tsi atang. A tso ji-ba wu khika be. Ni saen wu ti ni tae wu ru ba ike. 31Asiti unde iki a rang ni, iken ti nde itawe ani ku saen wu, ni ri te wu baa, Itsekuru na ku sha ti wu u nde wande te wu.”

32Aba nwunn ru u ka nung iken yi meme pangma ti Yesu ri te ba. 33Kiye ti aba ku saen umbae ikyinnsu wu, ande ti ikyinnsu wu rang ba baa, “Imi ti nde ani ku saen wu saen?” 34Aba ri baa, “Itsekuru ku sha ti wu na nde wande te wu.” 35Ama a saen wu u tae ru ka na Yesu. Ti aba ru ba sang, aba pu atupwa-ba ta isim ikyinnsu wu u ye Yesu tso ka som tsa atang. 36Ti awu tso ikyinnsu wu ku ru, ande ku nda wu kuko u ku pu atupwa-ba ta fengo uwe-wu. 37Ti awu ru ba ku fer Urushelima, uwog ti fengo si yi ikyaeb ti Rikwèn Zetunn, meme ande ti putsa wu nwunn ku taen ira ku nde Rimam fxaefa u ku teb wu ikyaen meme iken tiyang tiyang ti ku fur ayib ti awu nde ti aba nung. 38Aba ku ri baa, “Kujimshwur ā ta apupwen. Kuko ā si ana Rimam! Itinyang ā si ana Ukwe ti ku ba yi rinyi Itsekuru.”

39Tiri ariki uwae kumbub na Farisi sa ra unju tso u jwam Yesu baa, “Unde tiyang, ri te ande ti putsa fu ti aba ā ri-ba itso ira yine be.” 40Yesu ri baa, “Asiti aba a bwe tag skirr ama, ame ku ri te ni, atxom ti ta ne u taen ira u teb rinyi-m.”

Yesu Jwub Ira Ikyaen Urushelima#19:40 Urushelima. Imbyi rinyi “Urushelima” si Uten Kujimshwur.

41Ti awu ru ka fer Urushelima, awu pu ayib sae uten wu, ama aten si wu ayib. 42Awu ku jwub ku ri baa, “Á baa, yaka ne ani na nungye iken ti ku sa kujimshwur ba, Ayi ú nyang! Amaa, iyee! Ani u nungye-ni cwucwo be. 43Ikyaen ti, usir ku ba ti ande ti rika-ni u ru ba pakob ni. Aba u mbye ukoh pakob uten-ni ti rikob. Ani u ruye tu-ni atang be. 44Aba u twenji uka-ni fa ti ande ti ta uwae-yi meme. A u rug mbub tag asog-ni meme u twenji tag ni ikyaen ti, kiye ti Rimam ru ba uwog-ni, ani nungye-ni be.”

Yesu Ru ka Kusog Rimam

(Matiyu 21:12-17; Markus 11:15-19; Yohana 2:13-22)

45Ama tiri Yesu nwunn u sang uwae uten u ru yi Kusog Rimam tiyang u ka jae ru ande ti ku jab ci ti iken atang. 46Awu ri te ba baa, “A bae uwae Kutsingken Rimam baa, ‘Kusog Rimam u si kusog ti ande ku jwam Rimam atang.’ Amaa ani sa wu kafe-ni uwog ti ande ti riyib ku tam atang.”

47Yesu kwen na ande iken uwae Kusog Rimam tiyang ti usirsir. Akwen Rimam tiyang ti ande ti ku kwen na ande ira Icwe ti ande ti uwe ande meme ku kwab ti a u wen wu, 48amaa aba tu-ba riyae ti a ye wu be, ikyaen ti, meme ande som kunn ku fxen wu. Meme-ba ku sha ti a u fxen tag ira yi ti awu ku ri.

Поточний вибір:

Luka 19: kubNT

Позначайте

Поділитись

Копіювати