Lukka 22
22
Geamwaal gichchea enuusta Yeesu
(Mat 26:1-5; Mark 14:1-2; Yoh 11:45-53)
1Hean abeeda ea nineekkiit ghwelmeeda mukkattajeega miyeayiin hamiira suguura Basakka. 2Nea ashoohoodiga hees ea ng'oorshoodiga abeeda gwanda jeeda gassooda gichchea ghoang'ng'waayda ak gwanuus; ak iiduw ghoawal buuneeda.
Yuuda ghwamwas ghwalabwadaw Yeesu
(Mat 26:14-16; Mark 14:10-11)
3Hean ghoabiitta Shattaani jeeda Yuudayda suguura Iskariyotte, nea gaba jeedeaba fugiga attamaniyyeenyean; 4Ng'atta gawa goobalool ashoohoodiga hees ea shirikkareeda hees gidajea ghwalaapta bwadaw niny aba saawa. 5Gahoosan saawa muuchchi ak gwaheelleesa gideaba gajeattaw lappiya. 6Hean ghamwas ak gagasa gheatta jea ghwalapta bwadaw nea manda hiji emeeda.
Yeesu ghang'aap agitta hamitta Basakka
(Mat 26:17-25; Mark 14:12-21; Yoh 13:21-30)
7Ghwahidu eaweeda ghweelmeeda mukkattajeega meayiina hamiira, nea eaweetta sinuusa dayeenda gisilleanda ghweelmeeda Basakka gil. 8Iiduw gojeakta Yeesu Betro ea Yohaana nea gwayeeshsha, “Aweayeena asissina heechchea eyeaksiina Basakka.” 9Ak geeyeeshsha, “Gigasayi eang'aabwa aba yeenu?.” 10Gwayeeshsha saawa, “Ang'ulla, iyoahitti mujiini gajaroonnyeewana ng'edeeda sar sirbiida beega; ghoayaachchi geashtaannyi ea ahitta gheeda jea gawa jeeda, 11goyeeshshi siida bea gheeda, ‘Gwayi Ginealshochcheanda, abwaara ghoriini siyeaksi Basakka aniini ea ginealangeasu?’ 12Ak gayghoahimneegwa ghoorini haw sideeksa uhuumba nuut, ak ea sittamdaam; ak goosissi jeani.” 13Hean Gaweay amwahitta ghwadaakta ng'asheega sean gidagwachchi rukutteayda; hean gwasissin Basakka.
Hamitta Ng'uttamiida
(Mat 26:26-30; Mark 14:22-26; 1Gor 11:23-25)
14Hitta damanda agiischooda goopteada niny ea giijasoodigaaschi gweagiischi. 15Ak gwayeeshsha, “Neagasayi muuchchi daak basakkeani aniini ea agooga heeda miidanyasa hang'weanidooda; 16aba gideaba geayeeshshineegwa, mayguttaak ea eahhiit aba jeeda sugoochcheandumeeda Aseetta.” 17Hean gageanu bayookta, ak gabadischeesa ak gwayeeshsha, “Oang'ng'waanya gili, ak goolakkisiina geat; 18aba gideaba geayeeshshineegwa, majaguttali mideega haghweega misabiibu, ea ghwahidu sugoochcheandumeeda Aseetta.” 19Ak gageanu mukkatte, ak gabadischeesa ak ghabwanachchi ak ghoadawaada saawa nea gwayeeshsha, “Nii saseedeanyu gil siittayda aba badahuukkeagwa. Ahinniidunu aba gipkeatteanyu.” 20Ak gwahindunu eara bayookta ing'atta agiischooda gwayi, “Bayoogi geahhiida appadahuukkeagwa neajeeda eesh aba foojeandeanyu. 21Ak gong'ulayi geattinda siichchea ghwalaabwan bwadaw geambuchcheewi aba hiji. 22Asi Balleanda Siida gayghabeada gidaghayi sibean eerarsiinda ak ea dashageada siidida jea ghwalaabwan bwadaw!” 23Gabissa gonyeari geat saawa, nea gwayi, Ng'eaha nii aba jeedeanya jea gwasin ng'asheanjiin.
Sheang'nyeeda hawunda
24Iiduw gwardu sheang'nyeeda aba jeanyaawa gideaba ahaw ng'eaha aba jeedeanya. 25Gwayeeshsha saawa, “Sugoodiga emoojiga inyessa gombaliischi aba heannyaawa; giikka mideawa ghealmbalmeedean aba heannyaawa geguura fuga weeda buuneeda. 26Agooga ea mii gichchea awurjeewana; aba agooga siida gasa hawunda dawuurjeewana siida mwanang'eawa sean, nea siida gasa ghang'atta mwadi dawuurjeewana siida gadiyeeda. 27Aba gideaba ahaw ng'eaha, siida apteada ak gweagiischi, ghana siitta gadiyeesa buneedeani? Ak ghaghanyi gajea siitteani agiischiini. Ak aniini aba jeedeang'wa geawurjeewi siida gadiyeeda.
28“Agooga gowoschi fuga ghayi milikkiida galagasean sea aniini aba jeeda simsindeanyu; 29gawuurji gidaghayi gondaneani Bwaabwa sugoochcheandumeeda, earaniini gaydagooneegwa, 30Ak gajayeagiischeena nea goleeshi aba jeeda sugoochcheandumeedeanyu, nea goppitpiidi horgajeega sugoodiga ak gorgweaksi doshin damaniyyeenya bea Israeeli.”
Yeesu ghwaramoar gideaba Betro gayghwashaang'an
(Mat 26:31-35; Mark 14:27-31; Yoh 13:36-38)
31“Simon, Simon, ng'ulla, Shattaani gagasseegwa ghoalealdaneegwa nngano, 32ak aniini ea namwaaschi Aseetta amwasuunya masaweagaagu, ama ibiikeani gimajeegi oorjooga geamadu.” 33Hean gwayeeshsha niny, “Ng'uttamiida, geawoschi hidaat eara etteayeena ghealooniga ghana dami.” 34Gwayeeshsha, “Geayeeshshineey, Betro, eannean maygoguul nnghaghooda eaweani nea miishaang'aan niba samwagu gideaba ginallaan.”
Shageeda ea sandakwajeanda ea bwaanga
35Gwayeeshsha saawa, “Damanda eajeakteawaneegwa, nea mondeawani shageeda ghana sandakwajeanda ghana geekka, abeeda gwanda gida nishoadeweegwa?” Geyeeshsha, “Mandana.” 36Gwayeeshsha saawa, “Ghamneawa siida mideawa shageeda daada, ak gwasnu eara dea mideawa sandakwajeanda. Nea siida mandeawana bwaanga ea dashaayda hang'daannyi ak ghwasha.
37“Aba gideaba geayeeshshineegwa ng'ooruussu majaghanyi ea meahhiida aba badaydeanyu, ‘Aba gideaba geegalageat sea fuga munyas,’ aba gideaba gissung'waar appadaydeanyu gwanda mudeanoadaannyi.” 38Hean gwayeeshsha, “Ng'uttamiida, ang'wearda, hiji gwanda bwaangaji iyyeenya.” Gwayeeshsha saawa, “Gwadeay.”
Yeesu ghamwaash Aseetta aba giijeeda Masaytuuni
(Mat 26:36-46; Mark 14:32-42)
39Iiduw gwariitta ak gawa gawuurji gideaba eawoojusu, ea ghwahitta giijeeda Masaytuuni, nea ghwaat geeshta ginealanga. 40Hitta hooweani gwayeeshsha saawa, “Amwaasha Aseetta adiiduw gesmeegwa ak ghoappitti jeeda samsiinda.” 41Ghwanung'wa saawa heeda, ak ghwaloat geash gili ayang'da jakteayda lagheaneeda, ak ghang'uda gutng'weakkaaschi ng'eanyi ak ghamwaash Aseetta, ak gwayi, 42“Bwaabwa, igidiibwariiydi gil gischoarjaan bayokcheanji; nea adaghoaw gideagassiidi, nung' ghoaw daang'u.” [ 43Hean ghwahidu malaykajeanda leabu humng'eeda ak ghoadaw uurda. 44Iiduu nea gwanda jeeda sawanadeeda, hean ghamwaash seetta muuchchi; ak gawuurji gheawwochcheandaannyi foojeanda nea gobitpissa ng'eanyi.] 45Ng'eada mooshta Aseetta, nea gabiikta heeda ginealanga, ghwahitta nea nilil aba gideaba ning'ut giseaneega, 46ak gwayeeshsha, “Ghwasaan anda goolilli? Ang'eatng'eada amwaasha Aseetta adiiduw ghooppitti jeeda simsimda.”
Ging'ng'ooyda Yeesu
(Mat 26:47-56; Mark 14:43-50; Yoh 18:3-11)
47Miighoabiit ghuutta aba baloolda ghwahidu emeeda nea godeana siisi suguura Yuuda, bea jeeda ginealanga attamaniyyeenya, nea gooshooyna saawa. Gwaneekkiissa Yeesu ak ghwasam gheatta; 48gwayeeshsha Yeesu, “Yuuda ghamneawa gilaabi bwadaw Balleanda siida aba samitta gheatta?” 49Deagu fukka mideawean gwayeeshsha, “Ng'uttamiida gajeabwarana bwaangajeega?” 50Gafagu siyagi bwaangeadaannyi ak ghwalas soomjeanda ashoohoochcheanda haw ak gwalaksa ng'eanyi iitta geattinda dugwa. 51Gwayeeshsha Yeesu, “Anung'waada nideay!” Ghoang'ng'waay iitta ak ghoahaap. 52Ng'atta gwayeeshsha Yeesu ashoohoodiga hees, ea shirikkareeda gheeda sibatta Aseetta ea gweargwa, buwa ghoang'ng'waay niny, “Ghoapkaandi gili oapkaanji oang'ng'oonya mareangheanda, nea gooyeadu bwaangajeega ea gulupkeakka? 53Eajusu nea gendeaydooschi galeagasean aba jeeda gheeda sibatta Aseetta, ghanea miyoang'ng'wanyaan ak ghamneawa nii ea damandeang'wa gil ea uurda misaneeda.”
Betro ghwashaang' Yeesu
(Mat 26:57-58, 69-75; Mark 14:53-54, 66-72; Yoh 18:12-18, 25-27)
54Hean geang'ng'waay ak geayaat ea eayaat gheeda Ashoohoochcheanda haw. Gamaseaw Betro nea sheagi; 55iiduw geayyeat beasta aba bugharjeanda daghatta gheeda nea gendeayi sean, ak eara Betro gwanda hiji. 56Ng'atta ghwadaa hutpa gadiyeeda nea gwanda heedeesh ak gohang'ooysa ghaang' ak gwayeeshsha, “Eara siisi gwandeaydooschi sea niny.” 57Ghwashaang' nea gwayeeshsha, “Gatmooda, siisi aniini mwaanali.” 58Miigageawiit ghwadaa siinuut ak gwayeeshsha, “Eara ang'iing'i gibeahi jeedeaba fukka.” Gwayeeshsha Betro, “Siida meabeahi.”
59Iiduw nea ning'atta aseedeanagi gwayeeshsha siinuut, “Aba huumwa siisi earada goodeaydooschi niny; aba gideaba niny siida Galilaaya.” 60Gwayeeshsha Betro, “Siida, mwaanali eara gidinyaashi.” Deagheatta damani duu gabaloolean, goguul nnghaghooda. 61Ghwayam geaw Ng'uttamiida ak gang'ula Betro. Ghoapkaat Betro ng'asheanda Ng'uttamiida, gidaghayi rukusiinda gideaba, “Eannean heeda miigoguula nnghaghooda gajea niheawanaan niba samwagu.” 62Hean gwariitta jarooda ak goyyeawda muuchchi.
Yeesu geeshka nea geabwar
(Mat 26:67-68; Mark 14:65)
63Ghwahitta Fukkeanji gwachchi ang'ng'waay Yeesuun ak gwashka nea ghabwar; 64Gegeanu ak geeduukta gheanyanga ak geppearsa nea geeyeeshsha, “Heappi rukuneasa siida lasnyi?.” 65Ak gerukusa ng'asheega saang'a bea ging'weakkwa.
Yeesu geayaat madeeda girgweageeda
(Mat 26:59-66; Mark 14:55-64; Yoh 18:19-24)
66Sakteayda nea gorearu aseetta, gabadageat gweargwa sea ashoohoodiga hees, ea ng'oorshoodiga, ak geyeadu madeeda girgweageeda, ak geeyeeshsha, 67“Iiwosi Gristo, girukuneasa.” Gwayeeshsha saawa, “Eara darukuneegwa, majaghanyi amwasa; 68ak eara daanyaashcheagwa ng'asheanda ea mwajashaaha. 69Nea gidang'eada ghamneawa Balleanda Siida gaygoopteada aba meatkweeda geattinda dugwa bea Aseetta hoauur.” 70Gwayeeshsha sean, “Aba sarean guwasi Balleanda Aseetta?” Gwayeeshsha saawa, “Goorgu agooga gideaba geawoschi.” 71Hean geeyi, asi gudeegassa mushooduspwa naaha? Aba gideaba siyiing'si geat ng'asheega ghuuttaannyi.
Поточний вибір:
Lukka 22: DTGANT09
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Datooga New Testament © Bible Society of Tanzania, 2009.
