Lukka 21
21
Gidasabwa geadi gatmooni was masinung'weanda
(Mark 12:41-44)
1Ng'atta gang'ula ak ghwadaa gidiinda meanang'oodiga haleanjeeda sisappa geadi bea ghadoweeda jeeda gheaseeda. 2Ghwadaah eara masinung'weanji bwarbwar nea ghwayiin jeeda gida heelaji iyyeenya akghwahit. 3Ak gwayeeshsha, “Geayeeshshineegwa aba huumwa masiinung'weanji bwarbwariin ghoadayda gidahaw ea ghwalaabwa hoowa buuneessean; 4Aba gideaba suurja ghoadayda gidabinna jeeda barureega nyaawa, sinung' niny aba jeeda barbarandaannyi niidayda gidamideawa sean.”
Yeesu gabaloola nyarjeawda gheeda sibatta Aseetta
(Mat 24:1-2; Mark 13:1-2)
5Iiduw nea gabaloola mwaatkwa gheeda sibatta Aseetta, gida siittamdaamda aba lagheanga miyaas ea haleanjeeda sisappa geadi bea ghadooweeda gwayeeshsha, 6“Aba haleanjeeni ong'ulayiin, gayghwahidu damanda jea ea mayghoabit lagheana aba uhuumba nuut jea ea majeeng'ng'adeasa ng'eanyi.”
Sawanadeeda ea ghabasta
(Mat 24:3-14; Mark 13:3-13)
7Hean geannyaash niny nea geyeeshsha, “Ginealshoochcheanda, ng'asheesu gayghoaw eeju, ak gwadeagoodeaba ng'asheesu ea naaha jea ghoahiimu gideaba hinnoodeaba ng'asheesu nineekkiit?” 8Hean gwayeeshsha, “Ashageada adagahuttaneegwa siida; gwanda fuga saang'a jea ghapkaana gheawungeasu, nea gwayeena, ‘Siida aniini gil!’ Nea ‘Damanda nineekkiit!’ Adoayachchi geeshta. 9Inyeessa gajayiinya iitta ng'uchcheeda ea jaleadinga, ea adoabealli; aba gideaba ng'asheesu gaygoosheeda ghwahidu, nea muudeanooda ea maygabay ghwahidu.”
10Ng'atta gwayeeshsha saawa, “Gaygaba daroori ng'uchchi daroar nuut, ea sugoochcheandumeeni ng'uchchi sugoochcheandumeeda nuut; 11gaygwanda sawooda haw bea ng'eanyiida, ak gaygang'eeda gejeadinga aba daroorakka sean ea geyoonung'wea kka; ng'asheega jea ghwanung' eahamng'eanyi, ea gwadeagwajeega hees leabu humng'eeda. 12Ak damanda migapnu ng'asheesu seaniin gajeang'ng'waanyeagwa ak geesawaneegwa, nea geayadeagwa gealga sinnealshachcheewa ak gajeejakseegwa ghealooniga ak gajeayadeagwa madeeda sugoodiga hees ea madeeda fuga hees ambaliischi aba gheawungeasu. 13Ak abeeda gili gayghoaw muwwunooda aba heedeang'wa. 14Asi ong'ng'ooysiina jeesingeagwa ak ea adootteemshi aba gichchea ashaayda ng'asheega; 15aba gideaba gaydagoneegwa ng'asheega ea weaghumeeda jea inyeessa eara weajoodigeagwa ghwaraay ng'alealleeda ghana gichchea ghwashang'da. 16Ak gayghaghaseagwa ghweanigeagwa ea gheamadigeagwa ea oorjooga geamadu, ea buweadeegeagwa ea fuga oduupcheewi nea mwaatkwa gaygwanuusseegwa; 17ak agooga gajeasteagwa aba gheawungeasu. 18Ea mayghwaroat eara budeanjagi bea iheenngeagwa. 19Ak agooga aba milikghteaydeang'wa gajookghuuha eaweegeagwa.
Yeesu gabaloola nyarjeawda Yerusaleemu
(Mat 24:15-21; Mark 13:14-19)
20“Asi iyoadaayi mujiineeda Yerusaleemu nea nineaweesa lugooda, abeeda anala gideaba nineekkiit nyaroadaannyi. 21Nea fuga mida Yudeeya ea dasalsiina iheenga gijeega, nea gea mida mujiin ea daritteaysiina nea gea mida gharang'da ea adiidu ghapka jeani; 22aba gideaba eawoojigiga gajea gea sawanadeeda ak ghoaw gida nyaashta ng'ooruutka. 23Dashageada gadeemga mideawa diibiga ea gea areerji diibiga aba askwearjoojikka! Aba gideaba gayghwadaa ng'asheanda ng'waan, aba gideaba gaygwanda sawanadeeda haw jeeda ng'eanyiida ea nyarasta aba badaydeaba fiisu; 24Ak gajeenuseadawa bwaanga nea suuk geattabwaardawa jeeda emoojiga sean nea Yerusaleemu gayghoalla emoojiga ea ghwahidu damanda fuga emoojiga.
Hinnooda Balleanda Siida
(Mat 24:29-31; Mark 13:24-27)
25“Gajadaaha gwadeagwajeega aba gheang'da aseetta ea sheeda ea miinga, gayghwanyas emoojiga jeeda ng'eanyiida sawanadeeda nea ghahamng'eanyi aba nyeashta laweajajeega basooda, 26buuneeda gaygoohiili aba muuwda aba gimmuukghnooda gichchea gwahissa ng'eanyiida, aba gideaba uurda mida humng'eeda gajeetuumduum. 27Ak gajeadaah Balleanda Siida nea ghwaana jeeda shamoghooda nea gwandeawa uurda ea gigheambiitta haw. 28Asi ghamneawa ng'asheesu iihidu ghoahalli geat, amiinada ak goong'ullay humng'eeda, aba gideaba nineekiit lealnoodeang'wa.”
Gidanaal fii shabogheechcheanda
(Mat 24:32-35; Mark 13:28-31)
29Hean iiduw gwarukusa saawa galeega nea gwayeeshsha, “Ang'ulla shabogheechcheanda ea geediga suurja sean; 30Iyoadaayi nea ghafirfiir seenga nyawiiri, abeeda goojeeng'u gideaba doomeelda nineekkiit. 31Asi eara agooga iyoadaayi ng'asheesu nea gapnu, anala gideaba sugoochcheandumeeda Aseetta nineekkiit. 32Aba huumwa geayeeshshineegwa jeachcheengsu bea ghamneawean mayghwanaawuda nea miyadaaha ng'asheesu. 33Humng'eeda ea ng'eanyiida gaygammudean. Duukku ng'asheesu ea maygammudean eara hay.
Gammiisa ging'weernooda
34“Asi afra geat adagoobal guroruunatkeagwa beeshkweeda ea booktuumeeda ea eaweesu bea ghamneawean, ea gwashameegwa eaweettida; gawuurji gidang'ng'oonnyiida ghudumbwaada haleanjeeda; 35aba gideaba nii gichchea gwahissinda fuga sean abiitta badayda ng'eanyiisseani. 36Asi agooga afra geaet galaagasean, nea ghoamwaashchi Aseetta gagoonegwa uurda jea oattaraamwa ng'asheesu sean jea gapnun, ea aminaada aba madeeda Balleanda Siida.” 37Inyeessa gonealshi askweari aba jeeda gheeda sibatta Aseetta, nea eawa gwaritteawa jeeda mujiini ak gawa gobiida uhuuda gijeeda suguura Masaytuni. 38Hean inyeessa sakteayda duw gaweay buuneessean headaannyi eelleeysiit aba jeeda gheeda sibatta Aseetta.
Поточний вибір:
Lukka 21: DTGANT09
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Datooga New Testament © Bible Society of Tanzania, 2009.
