Luke 9
9
1Nhxpnghawt khaw vj 'Boipaw Yesyuq' na a'tabeq pji kalainhiq pan ne theqna nawtsi heq sjt khoq hawn nj a'phun na, niqnawng heq khrxk khoq hawn nj a'tha heq a'pet. 2Jnpjnnj ce 'Pxtpaw Phawlaw' neng-ngeng dj soisen ne ti heq soqsai hai tok na kang yaq ti heq kang ba hawn nj poqcai pet hai yj a'tabeq heq a'tjq. 3'Boipaw Yesyuq' na "nang'hi khari nan'cet hxvj tuk, jikhi, e-ok, phjisa, suisawk heq a'kong ciq-e kawq cuq. 4I-khjk im mj kha siyj seq nan'vawng na ce jn luq j kxq nan'thok hawm yaq tjq jn im mj yawng mji bjiq cuq. 5Nang'hi lx ve tiq mji yju uq hxvj ce jn luq vj kxq thok ba na nhi tiq tok kj sawksi yj thonne hawn nj nang'hi khophvaw vj kxq dekmhxn khrawng khok nghxt bjiq cuqf" tiyj a'sin. 6A'tabeq heq kha 'Boipaw Yesyuq' ceng ngj kxq thok lo na nam-nghawt pjnnj nam-nghawt cet yok theq u-na sitawng pawi heq an'soqsai yok. Kang yaq tiq heq kha an'kang ba sawk.A'tabeq heq kha 'Boipaw Yesyuq' ceng ngj kxq thok lo na nam-nghawt pjnnj nam-nghawt cet yok theq u-na sitawng pawi heq an'soqsai yok. Kang yaq tiq heq kha an'kang ba sawk. 7'Heruk' mawng na 'Boipaw Yesyuq' poqcai khrawng heq a'yawk khaw vj a'lung lhing lo. Ibahai yj nawk hxce a'kyaw khrawng na " 'Betticen' sara 'Yawhen' a'sawk heng lo ba pjn" tiyj an'hawu. 8"A'kyaw khrawng heq na ce 'Parawphek' 'Iqliqyaq' a'lo ba" tiyj an'hawu, a'kyaw heq na ce "a'hjmmj kxq 'Parawphek' pjinghawt a'heng lo ba" tiyj a'yxyx vj khin theq u-na an'hawu khennj thonne. 9'Heruk' mawng na "'Yawhen' luki khrawng ka'khrxn nghxt pjn. Tuq j ni baw sitawng naw tiq khrawng, khrawng hu-u" tiyj hawu theqna 'Boipaw Yesyuq' dj khom me laq hai tok kj a'nyen nawk. 10'Tavawkaq' heq an'khrai lo ba na ce nhi tiq poqcai nghxt khrawng heq 'Boipaw Yesyuq' j an'hyawk ba. Jnpjnnj ce 'Boipaw Yesyuq' na jn heq sawu na 'Betcedaq' luq tjq a'yup caw vj an' cet. 11Jn sitawng heq khrawng batnghawt na an'yawk hxvj 'Boipaw Yesyuq' nhu vj an'yun ne. 'Boipaw Yesyuq' na kha nhi tiq cong theqna 'Pxtpaw Phawlaw' neng-ngeng dj soisen ne ti heq a'sai. Pjnnj ce kang yaq tiq heq kha an'kang ba sawk. 12Khomx lo na ce a'tabeq pji kalainhiq khrawng 'Boipaw Yesyuq' ceng ka vj lo na " 'Boipaw' vj, ni dxn khrawng, khrawng heq hiusip nawk dxn nj thonne. Jnkhennj ni khrawng heq ni dxn dj hyju ve tiq tjunam heq tjq cet theqna an'dxm nawk hai dxn na an'e-ok hai heq sui hai yj ni heq tjq ba va" tiyj an'hyawk ke. 13Jn baw na kha 'Boipaw Yesyuq' na "nhi tiq tok kj e-hai u-nghawt nghawt pe yjn" tiyj a'hawu. A'tabeq heq na kha mung lung panghaw na ngaw thek-nhiq yawng kan'tawk ke. Ni khrawng heq pxm-nghawt tok nawk hxvj ce a'kyaw vj cet theqna ka' lhe ye laq ai yaw tiyj an'hawu ba. 14n baw an'hawu ba laq khrawng ce jn dxn nj khrawng thong-panghaw bawngg an'mji khennj thonne. 'Boipaw Yesyuq' na a'tabeq heq j jn khrawng heq khrawng pxm-nghawt tj khrawng nghawkip ci cuq-e na ngvaw sawk kjn tiyj a'hawu. 15A'tabeq heq na kha 'Boipaw Yesyuq' hawu baw tjng ngj khrawng heq khrawng an'ngvawq sawk. 16Jnpjnnj ce 'Boipaw Yesyuq' na mung lung panghaw na ngaw thek-nhiq lju theqna hawnnhi so na 'Pxtpaw Phawlaw' bji khrawng heq a'tjuqkauq ve nawk. Pjnnj ce mung heq khrawng pit theqna jn khrawng heq j pheq pet hai a'tabeq heq j a'pet. 17Khrawng batnghawt na nghawq hawn nj an'e pjnnj a'tabeq heq na lhe tiq bunkeuq ti heq khrawng tong duk kj an'cxm ba hxvj tong kalainhiq a'luiq an'laq. 18Nhxpnghawt khaw vj 'Boipaw Yesyuq' pjinghawt pjtcaw suqtong tun nj a'tabeq heq a'ka vj an'mji. Jn hxvj yawng 'Boipaw Yesyuq' na nhi tiq j "khrawng heq na ke hu-u tina an'hawu" tiyj a'nghiq. 19A'tabeq heq na " a'kyaw heq na ce nang khrawng 'Betticen' sarapaw 'Yawhen' tiyj an'hawu. A'kyaw heq na ce 'Iqliqyaq' tiyj kha an'hawu. A'kyaw heq na ce a'hjmmj kxq 'Parawphek' pjinghawt a'heng lo ba tina kha an'hawu" tiyj an'sai ba. 20Jnkhaw hxvj yawng 'Boipaw Yesyuq' na "nang'hi na ce ke khrawng hu-u tina nan'hawu" tiyj a'nghiq hxvj 'Petaruq' na "nang khrawng 'Pxtpaw Phawlaw' na a'tjq khrawng ljulawk ke tiq 'Ceqcaw'" tiyj a'hawu ba. 21'Boipaw Yesyuq' na ni sitawng heq u-vj kha hawu yaq hai a'nga ye. 22Jnpjnnj 'Boipaw Yesyuq' na a'tabeq heq j 'Ceqcaw' na a'sisaw a'lhji yj a'khawm laq ai. Pjnnj ce khrawng yx canglen heq, 'Mhawpaw' canglen heq, uqpade yawcu tiq sarapaw heq na an'caqtit khrawng a'khawm laq ai. An'tuk khrawng kha a'khawm laq ai. Sinakha nhxp-thum nhxp pj nhi khrawng a'sawk heng ba vai" tiyj a'sai. 23Jnpjnnj ce 'Boipaw Yesyuq' na khrawng heq j ke tabeq j thon hai lx tiq ce nan'punghaw lxto djutit na punghaw kutyvaw koptjng khrawng punghaw na nhxp mhji ba na ke nhu vj nan'yun laq ai. 24Punghaw sawk ljulawk ke hai lx tiq heq ce an'sawk an'sum laq ai. Sinakha ke tok kj an'sawk an'sum tiq heq ce an'sawk ljulawk ke khrawng an'khawm laq ai. 25Somdek cu pjng laq cu na kha nan'sawk a'sum na ce i-a'krj mji 26Khrawng pjinghawt nghawt na ke na ke kheukhaw tok a'hyawk ke na ce 'Ceqcaw' vj thon tiq ke kha ka'punghaw phun, a'paw phun, lhxng dj tiq hawn cipaw heq phun nj a'lo hxvj jn khrawng tok a'hyawk ke yai. 27Nang'hi yj ke na a'mhawn ka'hawu hai ce tuq j ni dxn nj tung tiq a'kyaw khrawng heq khrawng 'Pxtpaw Phawlaw' neng-ngeng an'mhuq laq yaq lhawn nj bjt hai siyju uq" tiyj a'hawu. 28Jn baw a'hawu cawng na nhxp-sat a'diu pjnnj 'Boipaw Yesyuq' na 'Petaruq', 'Yawhen','Yakuk' ti heq sawu theqna tong hawn tjq suqtong hai yj an'cet. 29'Boipaw Yesyuq' na suqtong tun nj nhi mhawidxm khrawng lhai ye theqna a'suisawk heq kha bokhyvawq theqna a'ang lo. 30'Mawsye' na 'Iqliqyaq' j thon tiq pjinhiq a'lhji yj doi na dawng lo theq hji na 'Boipaw Yesyuq' dj a'hiq krju ve. 31Jnpjnnj ce nhi tiq na phun heq dawn-ang theqna 'Yeruqsalawng' luq j 'Boipaw Yesyuq' a'bjt khawm laq hai khrawng an'hawu. 32Jnkhaw vj 'Petaruq' na a'pekpui heq ce an'ip khri ye. An'ip nawk kj kxq an'khak lo na ce nhi tiq na 'Boipaw Yesyuq' phun a'ang khrawng, 'Boipaw Yesyuq' dj tung nghaq tiq khrawng pjinhiq an'mhuq. 33'Mawsye' na 'Iqliqyaq' a'hiq cet ba hxvj 'Petaruq' na 'Boipaw Yesyuq' j "'Boipaw' vj ni dxn khrawng mji nawk hai yj di hyju a'bji siyju. Jnkhennj nang tok sang nghawt, 'Iqliqyaq' tok sang nghawt na 'Mawsye' tok sang nghawt ke'hi na sang sang thum kan sawk kai bj tiyj "i-ka hawu nawk khrawng co ve yaq kaw a'hyawk". 34'Petaruq' na jn baw a'hyawk tun nj khoset khrawng pju lo na nhi tiq a'lhom xp. Nhi tiq khoset duk kj an'vawng hxvj an'kiqca tong. 35Jnkaw cxn nj khoset tj kxq "ni khrawng, khrawng ke na ka'lui cjn khrawng ke caw vj a'thon. Nhi kheukhaw nge bjiq cuq" tiyj a'thai thai-nghawt an'thok lo. 36Jn a'thai thok lo cawng na ce 'Boipaw Yesyuq' pjinghawt pjt yawng an'mhuq laq nghxq yawng. A'tabeq heq na an'mhuqyawk khrawng heq jn kvawqkra duk kj u-vj kha sai yaq kaw vj an'lung duk kj an'cxm me. 37A'tha nhxpnghawt tj ce 'Boipaw Yesyuq' na a'tabeq heq pjithum khrawng tong hawn nj kxq an'khom lo ba hxvj khrawng batnghawt kung na 'Boipaw Yesyuq' an'khom me lo. 38Khrawng batnghawt duk kj kxq putaw pjinghawt na "sarapaw vj, pjinghawt pjtcaw ka'tawk ke khrawng ke caw so pet hai yj nang ngj ka'khawqhyawq-e. 39Nhi yj nawtsi a'koppe khennj nhi khrawng mhoknghawt pjttj a'pangcak soi. A'mongkhok kj kxq a'kyavjn phvaw hawn nj nawtsi na a'khauq sawk. Nawtsi khrawng nhi ceng ngj kxq i-khaw vj kha thok yaq kaw nhi cimkrak hawn nj a'khrak. 40Ke na nang tabeq heq j jn nawtsi sjt pet hai yj khawqhyawq-e na kha nhi tiq na sjt njn yju uq" tiyj pang pheng a'sai. 41Jnkhaw vjyawng 'Boipaw Yesyuq' na "nan'yum khrawng mji yju. Malang tiq kawlawq caw heq j nang'hi dj i-hyawq diu hawn nj ka'mji nghaq laq ai. Nang'hi khrawng i-hyawq diu hawn nj ka'xptop pe laq ai. "Nang caw ke ceng tjq lo pui naw va" tiyj cokhawu theqna a'hawu. 42Jn dikcaw a'lo tun nj nawtsi na hjnluk theqna krekkrek kj a'khauq sawk. Jn baw na kha 'Boipaw Yesyuq' na jn nawtsi cokhawu theqna jn dikcaw bji ba hawn nj a'poqcai pet. Pjnnj ce jn dikcaw khrawng 'Boipaw Yesyuq' na a'paw ceng ngj a'awp ba. 43Khrawng heq batnghawt na kha 'Pxtpaw Phawlaw' phun khrawng an'mhuq laq khennj a'lhji yj mhawnkau theqna an'tjuqkauq ve nawk. 'Boipaw Yesyuq' na a'poqcai khrawng heq, khrawng heq na an'mhawnkau tun nj 'Boipaw Yesyuq' na a'tabeq heq j 44"Nang'hi na ke hawu khrawng heq a'pawi caw vj nge bjiq cuq. 'Ceqcaw' khrawng, khrawng heq kut tjq a'awp khawm laq ai nghxq" tiyj a'hawu. 45<span class="usfm_v" id="cv9_45"></span>&nbsp; Sinakha jn kheukhaw na hi-i a'hawu ljk nawk khrawng a'thuq-e khennj a'tabeq heq na yawcu yju uq. Yawcu hawn nj kha nghi vawm yju uq. 46Jnpjnnj ce a'tabeq heq na nhi tiq duk kj hu-u khrawng len dj tiq tiyj an'caq ye nawk. 47Sinakha 'Boipaw Yesyuq' na nhi tiq khin khrawng heq a'cok khennj cuvj dikcaw pjinghawt pan ne theqna a'ceng ka vj a'tung sawk. 48A'tabeq heq j ke mhawi so theqna ni bawng dikcaw kxq-e tiq ce ke kxq-e tiq j an'thon. Ke kxq-e tiq heq khrawng ke tjq lo tiq ke paw Phawlaw kxq-e tiq j an'thon. Ibahai yj nawk hxvj ce nang'hi yj dik dj tiq khrawng a'len dj vj a'thon nai" tiyj a'hawu. 49Yawhen' na "'Boipaw Yesyuq' j khrawng pjinghawt na nang ming ngj nawtsi heq a'sjt khrawng ka'khom nghxt. Nhi khrawng ke hi nhu yun tiq siyju khennj jn baw a'poqcai hai ka'nga ye" tiyj 'Boipaw Yesyuq' vj hawu theqna a'sai. 50'Boipaw Yesyuq' na "nhi khrawng nga ye kawq cuq. Nang'hi yj kvawqleng nge yaq ti ce nang'hi lawm mj 'pui ye tiq yawng" tiyj a'hawu. 51'Pxtpaw Phawlaw' na 'Boipaw Yesyuq' khrawng hawn luq a'ciq ba hai cxn a'hyju lo nghxq khennj nhi na 'Yeruqsalawng' luq pawt cet hai a'lung a'khrawkkrok. 52Jnkhennj 'Boipaw Yesyuq' na a'cipaw heq khrawng a'mhawimhaw vj a'tjq. Nhi tiq khrawng 'Boipaw Yesyuq' tok lx hai tiq poqcai pheng hai 'Syamariq' khrawng yx heq nam nam-nghawt tj an'vawng. 53Sinakha 'Boipaw Yesyuq' khrawng 'Yeruqsalawng' luq pawt a'cet tai khennj 'Syamariq' namsaw heq na 'Boipaw Yesyuq' khrawng lx yju uq. 54Nhi tabeq 'Yakuk' na 'Yawhen' na jn thonlok heq a'hiq mhuq hxvj "Boipaw Iqliqyaq' na a'poqcai baw vj, han'hi na hawnnhi yj kxq mi khra sawk na nhi tiq o-lut hai na'lx mji yaw" tiyj 'Boipaw Yesyuq' j a'hiq hawu. 55Sinakha 'Boipaw Yesyuq' na nhi tiq pawt ten ne theqna nang'hi na nan'lungbong nghaw kha nan'punghaw na co ve yju cuq. Ibahai yj nawk hxce 'Ceqcaw' khrawng, khrawng heq sawk tu hai yj a'khrai lo siyju. Ljulawk ke hai yj a'khrai lo tiyj a'cokhawu. 56Jnpjnnj ce nhi tiq khrawng a'kyaw nam pawt an'cet. 57Nhi tiq khari an'cet tun nj khrawng pjinghawt na 'Boipaw Yesyuq' j " 'Boipaw' ceq yok nawk dxn tjng ngj ke kha ka'yun nai" tiyj an'hawu. 58'Boipaw Yesyuq' na "khevaw heq na kha an'mji nawk hai dvawng an'tawk ke, haw heq na kha an'mji nawk hai an'bu an'tawk ke. 'Ceqcaw' na ce a'luki khrawk nawk hai dxn kung kha mji yju" tiyj a'hawu. 59Jn pjnnj ce 'Boipaw Yesyuq' na a'kyaw khrawng pjinghawt tj ke nhu yun lo va tiyj a'hawu. Jn khrawng na " 'Boipaw Yesyuq' j, im tjq cet ba theqna ke paw yok khrawng mhyaq sawk maw va" tiyj a'hawu. 60'Boipaw Yesyuq' na jn khrawng ngj " an'pumyo bjt tiq heq khrawng muikhraw bjt tiq heq na mhyaq lhaq lhji uq. Nang ce 'Pxtpaw Phawlaw' neng-ngeng dj soisen ne tiq heq yawng soqsai yok ka" tiyj a'hawu. 61A'tha pjinghawt na kha " 'Boipaw Yesyuq' j, ke kha nang nhu yun dang ka ti. Sinakha im pawt cet na ka'imlong pui heq be ye dang ka ti" tiyj a'hawu hxvj 62'Boipaw Yesyuq' na " aiq tjng kjng pheng a'nhulawm so ve tiq khrawng khrawng 'Pxtpaw Phawlaw' neng-ngeng dj tawn ne yju" tiyj a'hawu.
Seçili Olanlar:
Luke 9: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
