Luke 10
10
1Jnpjnnj ce 'Boipaw Yesyuq' na a'kyaw a'tabeq seqkip khrawngi lui na nhi cet nawk hai luq heq nam heq tjq a'tabeq pjinhiq ci a'yawng ngj a'tjq maw. 2'Boipaw Yesyuq' na nhi tiq j "cawng batnghawt mji na kha yan hai khrawng an'neu. Jnkhennj yan pet hai khrawng heq laikhan nj tjq pet hai lai mawqpaw vj tong ngjn. 3Cet nghxq yawng ngjn. 'Nhe' heq tu vj 'tocaw' heq ka'tjq baw vj nang'hi ka'tjq. 4Phjisa ik, jikhi, khopatawp heq a'lhji ciq-e kawq cuq. Lawm mj kha khrawng heq beye kawq cuq. 5I-bawng im mj kha siyj seq nan'vawng hxvj "ni im khrawng yadik dawmdak mji bjiq seq" tiyj hawu maw bjiq cuq. 6Jn im mj yadik dawmdak hai lx ve tiq an'mji hxvj ce an'laq ai. Jn baw lx ve tiq mji yju uq nawk hxvj ce mitta khrawng nang'hi na nan'laq ba vai. 7Im nghawt pjnnj im nghawt om yok yaq kaw vj im-nghawt pjttj yawng om theqna immawq heq na an'duqcawq khrawng i-kha siyju seq e-o bjiq cuq. Ibahai yj nawk hxce thok lok tiq na kha tawn ne tiq a'phu a'laq laq ai khennj. 8Luq, luq nghawt tj nan'vawng hxvj jn luqsaw heq na an'lole nawk na ce nhi tiq na nang'hi mhawimhaw vj an'duqcawq khrawng i-kha siyj seq e-bjiq cuq. 9Kang yaq ti heq kang ba sawk theqna 'Pxtpaw Phawlaw' neng-ngeng nang'hi tjq a'khrai lo hai a'hyju pjn tiyj hawu bjiq cuq. 10Sinakha luq j nan'vawng hxvj jn luqsaw heq na an'lole nawk yaq na ce lawm lunglai tjq thok theqna 11Ke'hi khophvaw vj koppe tiq nang'hi luq j kxq dekmhxn kung kha kan'mot te pjn. Sinakha 'Pxtpaw Phawlaw' neng-ngeng pju lo hai a'hyju lo pjn nawk khrawng yawcu bjiq cuq" tiyj hawu bjiq cuq. 12Nang'hi yj ke na ka'hawu khrawng ce a'kret an'phansa nhxp pj 'Tawdung' luqj thawk kj jn luq na a'kret pet khrawng heq a'lhji yj a'khawm laq ai. 13"J 'Khawracing' luqsaw heq j nang'hi khrawng bjikhji yju cuq. J 'Betcedaq' luqsaw heq nang'hi khrawng bjikhji yju cuq. Ke na nang'hi yj mhawnkau hai bji tiq heq ka'dawng nghxt pjn. Nang'hi yj ka'dawn baw vj 'Tuqruq' luq na 'Ciqdung' luq kj ka'dawn nghxt tai nawk hxvj ce jn luq j kxq khrawng heq khrawng khawu suisawk khoqbawq-e theqna vaivxt duk kj ngvaw theqnal a'hjmmj ka'thoq an'punghaw kret heq tok an'suisaw ye cjn nj thon nai. 14A'kret an'phansa nhxp khrai na ce nang'hi khrawng 'Ciqdung' luq na 'Tuqruq' luq thawk kj a'lhji yj nan'khawm laq ai. 15J 'Kaperanong' luq j, nang khrawng hawn luq tjq khrai hawn nj tjuqkauq ve khrawng nan'khawm laq ai yaw. Jn baw khawm laq hai siyju tiq. Nang khrawng ngalai kre tjq khrai hawn nj nhem khrawng na'khawm laq ai. 16Nang'hi kheukhaw nge ti heq khrawng ke kheukhaw nge tiq j an'thon. Nang'hi lx yaq tiq khrawng heq khrawng ke lx yaq tiq heq j an'thon. Ke lx yaq tiq khrawng heq khrawng ke tjq lo tiq 'Pxtpaw Phawlaw' lx yaq tiq heq j an'thon" tiyj a'hawu. 17A'tabeq seqkip heq an'khrai lo ba na ce nhi tiq khrawng a'lhji yj an'lung lhju theqna ke'hi na nawtsi heq khrawng nang ming sum me na kan'hawu na ce nhi tiq na an'nge" tiyj 'Boipaw Yesyuq' j an'sai. 18'Boipaw Yesyuq' na "nawtsi caten khrawng khraikhra a'lhawulhawu baw hawnnhi yj kxq a'kraw lo khrawng ka'muhq laq. 19Phvawsi heq, awi kha heq kha liqyap khoq hawn nj nang'hi sunpui phun heq kha njn ne hawn nj ke phun heq khrawng nang'hi yj ka"pet pjn. I u-nghawt na kha nang'hi yj si khom sawk laq yju. 20Sinakha nawtsi heq na nang'hi kheu an'nge khennj nan'lung lhju kawq cuq. Nang'hi ming heq hawn luq j an'mhawt te pjn khrawng ngj yawng nan'lung lhju bjiq cuq" tiyj a'hawu. 21Jnkhaw hxvj 'Boipaw Yesyuq' khrawng cimkya tiq muikhraw vj a'lung lhju theqna "hawn luq na somdek pjng tiq paw Phawlaw vj. A'coktawt mji tiq heq na coksawng nge tiq heq j i-e heq thuq pet theqna dikcaw heq j yawng na'dawn khen cuvj ka'seye nawk. A'mhawnmx paw phawlaw vj nang na ni khrawng na'nawye nawk. 22Ke paw na ke yj i-tomti a'pet pjn. A'caw'u khrawng a'paw'u vj kxq ljt na u-na kha co yju uq. A'paw'u kha a'caw'u na a'caw hu-u nawk khrawng dawn pet hai a'lui khrawng khrawng heq j kxq ljt na u-na kha co yju uq" tiyj a'hawu. 23Jnpjnnj ce 'Boipaw Yesyuq' khrawng a'tabeq heq ceng pawt ten ne na a'nghawcaw a'hawu khrawng ce nang'hi na tuq j mhu pha tiq heq nan'mhuq laq khen cuvj nang'hi mik khrawng a'bjikhji. 24Ke hawu hai lx khrawng ce nang'hi mhuq laq khrawng heq khrawng a'hjmmj kxq 'Parawphek' heq, 'mawnglen' heq na mhuq hai a'lx nghxt. Sinakha mhu nghxt laq yju uq. Nang'hi yawk laq khrawng heq kha yawk hai an'lx nghxt. Sinakha yaw nghxt laq yju uq" tiyj a'hawu. 25Nhxp-nghawt khaw vj uqpade yawcu tiq sarapaw pjinghawt khrawng 'Boipaw Yesyuq' cawm hai yj a'tung nge ye. Pjnnj ce "Sarapaw vj hawn sawktakhonm laq hai tok i-heq ka'poqcai laq ai" tiyj a'nghiq. 26Jnkhaw vjyawng 'Boipaw Yesyuq' na "petnyet kyeng cawuk kj i-baw yo ve na a'mji jn heq khrawng nang na i baw na'phawt" tiyj a'nghiq ba. 27Jn khrawng na nang 'Pxtpaw Phawlaw' khrawng mji tiq na'lungbong tomti, mji tiq na'muikhraw tomti, mji tiq na'pumyo tomti, mji tiq na'nyen tomti yj mitta taw na khet bjiq. Jn tawn yju nang dj soisen ne tiq heq khrawng na'punghaw vj mitta taw na na'khet te khrawng baw vj mitta taw na khet bjiq tina yo ve na a'mji" tiyj a'hawu ba. 28'Boipaw Yesyuq' na kha "nang hawu khrawng heq a'mhawn. Jn baw tjng ngj na'poqcai na ce nang khrawng hawn sawk na'laq ai" tiyj a'hawu. 29Sinakha uqpade yawcu tiq na a'punghaw ko a'punghaw a'mhawn tiyj dawn hai a'lx khennj 'Boipaw Yesyuq' j "ni baw khaw ce ke dj soisen ne tiq nawk khrawng ce hu-u heq" tiyj a'nghiq. 30'Boipaw Yesyuq' na "khrawng pjinghawt khrawng 'Yeruqsalawng' luq j kxq 'Yeriqkhaw' luq pawt a'cet tun nj lawm mj khrawng kxqkjn hutte tiq heq tjk khrawng a'khawm laq. Jn kxqkjn hutte tiq heq na jn khrawng, khrawng a'suisawk heq sut na bjt tai thuiq hawn nj an'mvaw tvaw. Jnpjnnj bjt tai thuiq yj a'thon lo hxyawng lawm pawng ngj an'dju nghxt tit. 31Jn hxvj '''Mhawpaw''' pjinghawt khrawng jn lawm baw a'lo tun nj niqnawng heq dj hjng nghaq tiq jn khrawng a'mhuq khaw hxvj a'kyaw lawm pawt phen na a'cet tawk. 32Jn baw tjng ngj 'Leviq' khrawng yxn pjinghawt kha jn dxn nj a'khrai lo khaw hxvj jn khrawng mhu na kha a'kyaw lawm pawt yawng phen taw na a'cet. 33Sinakha 'Syamariq' putaw pjinghawt jn dxn nj a'khrai lo na jn niqmawq heq dj khrawng a'mhuq na a'manne tong. 34Nhi khrawng jn niqmawq ceng ka vj hawp pe na a'niqnawng heq khrawng 'Capyek' voi na 'Tenglvawng' situio lji naw theqna suisawk kj a'lhom pet. Pjnnj ce nhi khrawng 'Mre' pkhrung ngj khawi na khrawng heq dxmom nawk im im-nghawt tj lo ve na a'pan nawk. 35A'tha nhxp-nghawt tj ce nhi na a'dxmom nawk immawq paw vj 'Denari' hensaw lhap-nhiq pe na " seye naw na ni kang yaq tiq khrawng pan naw pet maw bjiq. Na'pan nawk khen khrawng ni tawn yaq a'pji hxvj kha ka'lo ba khaw vj ka'pet ba vai" tiyj a'sin nghxt. 36Jnkhaw hxyawng 'Boipaw Yesyuq' na jn khrawng pjithum duk kj khrawng kxqkjn hutte khrawng khawm laq tiq niqmawq dj soisen ne tiq ce hu-u" tiyj a'nghiq. 37Uqpade yawcu tiq na "nhi manne theqna poqcai pet tiq khrawng ngj a'thonne" tiyj a'hawu na ce 'Boipaw Yesyuq' na nang kha cet ba theqna jn baw vj poqcai bjiq" tiyj a'hawu. 38'Boipaw Yesyuq' na a'tabeq heq khrawng 'Yeruqsalawng' luq tjq an'cet tun nj 'Boipaw Yesyuq' khrawng nam nam-nghawt tj a'vawng. Jn nam mj kxq 'Mataq' ming naw tiq mhutaw pjinghawt na 'Boipaw Yesyuq' khrawng a'im nghaw vj a'khin nawk. 39'Mataq' na 'Mariq' ming naw tiq a'nawu'u mhutaw pjinghawt a'tawk ke. 'Mariq' khrawng 'Boipaw Yesyuq' khocju vj ngvaw theqna 'Boipaw Yesyuq' hawu khrawng heq nge theqna a'mji ye. 40Sinakha 'Mataq' khrawng a'mxlawm mj a'khin nawk hai tok a'lhji yj a'lung lhing na 'Boipaw Yesyuq' ka tjq a'hawp lo. Pjnnj ce 'Boipaw' vj ke nawu'u na khin nawk hai heq poqcai yaq kaw ke pjinghawt pjtcaw a'dju nghxt tit khrawng na'mhuq-e khok kaw. Ke phui hai tok hawu pet maw va" tiyj a'hawu. 41Jnkhaw vjyawng 'Boipaw Yesyuq' na 'Mataq' j nang khrawng na'poqcai khrawng a'kong khennj na'lung lhing na an'lhotlhet khrawng na'khawm laq pjn. 42A'mhawnmx lx tiq ce yx nghawt pjt yawng a'mji. 'Mariq' na kha jn bji tiq khrawng a'lui pjn. Jn khrawng nhi ceng ngj kxq u-na kha kxq-e khok yju" tiyj a'hawu ba.
Seçili Olanlar:
Luke 10: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
