Luke 8
8
1Pjnnj ce 'Boipaw Yesyuq' khrawng luq nam heq j cet yok na 'Pxtpaw Phawlaw' neng-ngeng dj soisen ne tiq sitawng pawi heq a'soqsai yok. Nhi dj 'Tavawkaq' pji kalainhiq heq kha an'pui. 2Jn tawn yju an'niqnawng khrxk nghxt ti heq, nawtsi koppe khrawng khrxk nghxt ti heq, mhutaw heq na kha 'Boipaw Yesyuq' kon an'yun yok. Jn mhutaw heq duk kj nawtsi lu-seq koppe theqna bji nghxt tiq 'Magaqdaqlaq' namsaw 'Mariq', 3'Heruk' mawng ceng ngj lup tiq 'Khuqcaq' immawq nu 'Yawhennaq' na 'Syusyennaq' hji kha a'hiq pui. Pjnnj ce 'Boipaw Yesyuq' na a'tabeq heq j an'punghaw boiq yj phui tiq a'kyaw mhutaw heq kha an'pui. 4Khrawng heq batnghawt khrawng luq nam tjng ngj kxq jn tjq lo na pxm me u-na an'mji khaw hxvj 'Boipaw Yesyuq' na jn heq j khuicut nawk u-nghawt a'hawu khrawng ce 5"Lai mawqpaw pjinghawt na laikhan nj a'ciq phvawq hai a'cet. Lai mawqpaw na a'ciq a'phvawq khaw hxvj a'kyaw a'ciq heq ce khrawng cet nawk lawm mj an'kraw khennj khrawng heq liq khrawng khawm laq theqna haw heq kvawq-e kha an'khawm laq. 6A'kyaw a'ciq heq ce lung kong nawk dek kj an'kraw khennj a'thing cjt lo na kha dekphuk a'mji yaq khennj yawi na an'calak ba. 7A'kyaw a'ciq heq ce a'lhing thing tu vj an'kraw khennj a'lhing thing heq dj len lo nghaq na a'lhing thing heq ceq-e nawk an'khawm laq. 8A'kyaw a'ciq heq ce bji tiq dek khrung ngj an'kraw khennj a'thing cjt theqna a'saq khra-nghawt an'thepa" tiyj a'hawu. Jn baw a'hawu pjnnj ce 'Boipaw Yesyuq' na "nhaw mji tiq takaq na yaw theqna yawcu bjiq seq uq" tiyj a'pang. 9Jnkhaw vj a'tabeq heq na 'Boipaw Yesyuq' vj jn khuicut nawk heq ce hi-i hawu ljk nawk khrawng an'nghiq. 10Jnkhaw vjyawng 'Boipaw Yesyuq' na " 'Pxtpaw Phawlaw' neng-ngeng dj soi ye tiq tala tawmthong heq nan'cok laq pjn. Sinakha a'kyaw khrawng heq na ce tjuq ve na kha mhuq yaq tiq baw vj, nge na kha yaw yaq tiq baw an'mji khennj khuicut nawk kj ka'hawu laq. 11'Boipaw Yesyuq' na "a'ciq phvawq khrawng khuicut nawk an'hawu ljk khrawng ce a'ciq ce 'Pxtpaw Phawlaw' mongthem valung ngj a'thonne. 12Khrawng cet nawk lawm mj kraw tiq a'ciq heq nawk khrawng ce 'Pxtpaw Phawlaw' mongthem valung heq yaw laq na kha 'Pxtpaw Phawlaw' ljulawk ke khrawng yum khoq yaq hawn nj nhi tiq lungko duk kj kxq 'Pxtpaw Phawlaw' mongthem valung heq nawtsi na lo theqna a'ciq-e khawm laq tiq heq dj an'lju ve. 13Lung kong nawk dek khrung ngj kraw tiq a'ciq heq nawk khrawng ce 'Pxtpaw Phawlaw' mongthem valung heq an'yawk khaw hxvj an'lung lhju pheng an'yum. Sinakha an'lungbong duk kj mhawt te kaw vj tanawcaw yum theqna a'cawm khrawng an'khawm laq na ce an'lung lhai ye theq tiq heq dj an'lju ve. 14A'lhing thing tu vj kraw tiq a'ciq heq nawk khrawng ce 'Pxtpaw Phawlaw' mongthem valung heq yaw laq na kha nhi tiq cimkya tiq muikhraw heq len khoq yaq hawn nj an'lhawqpawq khrawng heq, an'boiqma heq, an'lung lhju khrawng heq na vondya tiq heq dj an'lju ve. 15Dek pawi yj kraw tiq a'ciq heq nawk khrawng ce 'Pxtpaw Phawlaw' mongthem valung heq an'yawk hxvj an'lungbong duk kj a'pawi caw vj mhawt te theqna an'mji khennj a'theq batnghawt thepa tiq heq dj an'lju ve. 16"Simipung khrawng daw pheng tong ngj kxp theqna taw yju uq. Khrung dawng ngj kha thuq theqna taw yju uq. Vawng lo ti heq na a'ang an'laq hai tok simipung khrawng tjng hawn nj yawng bawq na an'tawk. 17Khom yaq hawn nj an'thuq khrawng heq kha a'dawng kyaq ai. An'cxm me khrawng heq kha a'pjuha kyaq ai. Ibahai yj nawk hxce an'thuq cxm me khoq nawk khrawng mji yju. A'ang lo na ce a'dawng kyaq khennj. 18Jnkhennj a'pawi caw vj nge yjn. Ke na ka'coksawng khrawng heq yawcu hai lx tiq heq j a'lhji yj yawcu hawn nj 'Pxtpaw Phawlaw' na a'poqcai pet tai. Sinakha yawcu hai lx yaq tiq heq j ce nhi tiq na an'yawkcok cjn khrawng heq kha yawcu khok tiyaq hawn nj 'Pxtpaw Phawlaw' na a'poqcai yai" tiyj a'hawu. 19Jnpjnnj ce 'Boipaw Yesyuq' nu'u na a'nawu'u heq khrawng 'Boipaw Yesyuq' ceng tjq an'lo. Jn baw na kha khrawng batnghawt na an'vom me khennj 'Boipaw Yesyuq' dj khom me khoq yju uq. 20Jnkhaw vjyawng khrawng pjinghawt na 'Boipaw Yesyuq' j "na'nu'u, na'nawu'u heq na nang dj khom me hai yj krawng ngj tung na an'cong nge" tiyj a'sai. 21'Boipaw Yesyuq' na "'Pxtpaw Phawlaw' mongthem valung heq nge theqna poqcai ti heq ke nu'u, ta-nawu heq j an'thon kyaq tiyj a'hawu ba. 22Nhxpnghawt khaw vj 'Boipaw Yesyuq' na a'tabeq heq j "vawng lawmya pawt kawt sin" tiyj a'hawu. Jnkhaw vjyawng nhi tiq long hawn nj kawi theqna rawk phai na an'cet. 23Jn baw an'kawt tun nj 'Boipaw Yesyuq' a'ip pe. Jn tun nj khrikho heq a'lhji yj a'lo khennj long ngj tui luiq na si an'khom. 24A'tabeq heq na 'Boipaw Yesyuq' ka vj cet theqna an'khak ke. Pjnnj ce "'Boipaw' vj, 'Boipaw' vj ke'hi tui mxm theqna kan'bjt laq ai nghxq" tiyj pang pheng an'hawu. 'Boipaw Yesyuq' na thju theqna khrikho heq lheng heq a'cokhawu. Jnkhennj khrikho heq lheng heq a'dxm ba kyaq. 25Jnkhaw vjyawng 'Boipaw Yesyuq' na a'tabeq heq j "nang'hi yum khrawng i-khjk kj " tiyj a'hiq na ce nhi tiq na mhawnkau theq u-na "ni khrawng ce hu-u tyaw. Lheng heq Khri heq na kha nhi hawu khrawng an'nge sxtx" tiyj an'punghaw ko an'hawu ve tong. 26Jnpjnnj ce nhi tiq khrawng 'Galiqle' awng kawmpawng ngj mji tiq 'Garacaq' kre tjq an'khrai. 27'Boipaw Yesyuq' kong hawn nj a'kawi khaw hxvj nawtsi koppe tiq luqsaw pjinghawt khrawng 'Boipaw Yesyuq' dj a'khom me lo. Jn khrawng khrawng khokum batnghawt kung im mj kha mji yju, suisawk kya mji theqna co heq j yawng a'mji yok. 28Jn khrawng na 'Boipaw Yesyuq' a'mhuq na ce a'mhawimhaw vj khukdyawq caw vj a'ngvaw. Pjnnj ce batnghawt pang pheng "'Pxtpaw Phawlaw' caw 'Yesyuq' j ke dj hi-i ha'soi. Ke kulu naw pet kawq tiyj a'khawqhyawq-e. 29Jn baw a'khawqhyawq e-laq khrawng ce 'Boipaw Yesyuq' na nawtsi yj jn khrawng ceng ngj kxq thok lo hai a'hawu khen cuvj thonne. Jn nawtsi khrawng, jn khrawng ngj tanaw tanaw na ce a'koppe soi. Jn khrawng kutkho heq khrawng thiyoi yj khun theqna cong na kha nhi na nawtsi a'tawt tj jn an'khun khrawng heq a'loibjiq caw vj khrakheng theqna tjunu khocxn duk tjq a'cen soi. 30'Boipaw Yesyuq' na nhi yj "nang ming hu-u" tiyj a'nghiq na ce 'Legonge' tiyj a'sai ye. Ibahai yj nawk hxce jn khrawng ceng ngj nawtsi heq batnghawt an'koppe khennj. 31Jn nawtsi heq na nhi tiq nawtsi a'kret an'pet nawk dvawng thuk duk kj thawk yaq hai 'Boipaw Yesyuq' j thawp na thawp na an'khawqhyawq-e. 32Jn dxn nj tong pawng ngj cawk-e na mji tiq vok bong nghawt an'mji. Nawtsi heq na jn vok bawng nghawt duk kj vawng hai an'tong na ce 'Boipaw Yesyuq' na kha a'vawng sawk. 33Jnkhaw vjyawng nawtsi heq khrawng jn khrawng ceng ngj kxq thok na vok heq ceng ngj an'vawng khaw vj jn vok bong nghawt khrawng bawnglak tiq kawmpawng ngj thoq hawlong pawt mhoknghawt pjttj soi u-na tui an'mxm kju kyaq. 34Jnkhaw hxyawng vok cong tiq heq na jn baw thonlok khrawng an'mhuq khaw vj luq nam heq tjq con na an'sai yok. 35Khrawng heq na kha jn thonlok heq so hai yj luq duk kj kxq an'thok lo. Nhi tiq jn tjq an'khrai hxvj nawtsi koppe khrawng ngj kxq ljt tiq ce suisawk khoq-e ba na 'Boipaw Yesyuq' khocju vj a'pawi ba theqna a'ngvaw khrawng an'mhuq na ce an'mhawnkau nghxq yawng. 36Jn thonlok heq mhu nghxt laq ti heq na nawtsi koppe khrawng ngj kxq i-baw ljulawk ke khrawng a'khawm laq nawk khrawng, jn khrawng heq j an'hawu. 37Jnkhaw hxvj 'Garacaq' kresaw heq na a'lhji yj an'kiqca khennj 'Boipaw Yesyuq' khrawng jn dxn nj kxq cet ba hai an'khawqhyawq-e. Jn baw khennj 'Boipaw Yesyuq' kha a'tabeq heq dj long ngj kawi na an'cet ba. 38Jnkhaw hxvj nawtsi na a'koppe nawk khrawng ngj kxq ljt ba tiq khrawng na 'Boipaw Yesyuq' nhu vj a'yun laq hai tok a'khawqhyawq-e. Jn baw na kha 'Boipaw Yesyuq' na 39"na'im nghaw vj cet ba theqna nang ngj 'Pxtpaw Phawlaw' na a'poqcai khrawng heq sai yok bjiq" tiyj hawu theqna a'tjq ba. Jnkhennj nhi khrawng cet ba theqna nhi yj 'Boipaw Yesyuq' na a'poqcai pet khrawng heq luq cuvj a'sai yok. 40'Boipaw Yesyuq' khrawng awng vawng lawmya vj a'khrai lo ba hxvj khrawng bong nghawt na an'dju ve. Ibahai yj nawk hxce nhi tiq khrawng 'Boipaw Yesyuq' cong nge tiq heq j an'thonne khennj. 41Jn dxn nj 'Yaiqruq' ming naw tiq damarung mawqpaw pjinghawt na 'Boipaw Yesyuq' khocju vj khukdyawq caw vj ngvaw theqna 'Boipaw Yesyuq' j nhi im tjq lo pet hai tok kj a'khawqhyawq-e. 42Ibahai yj nawk hxce kum kalainhiq mji tiq nhi caw mhutaw caw khrawng bjt tai thuiq yj a'thon khennj. 'Boipaw Yesyuq' lawm mj a'cet tun nj khrawng batnghawt na 'Boipaw Yesyuq' an'vom me lo nawk. 43Jn heq duk kj kum klainhiq kung thibo niqnawng khawm laq tiq mhutaw pjinghawt a'mji. Jn mhutaw na a'boiq heq to-to tiq heq j pe theqna to ve na kha nhi niqnawng khrxk ba hawn nj to khoq tiq mji yju uq. 44Jn mhutaw khrawng 'Boipaw Yesyuq' nhulawm pawt thji theqna 'Boipaw Yesyuq' suisawk a'phai caw a'lhem na mhoknghawt pjttj jn mhutaw thibo niqnawng khrawng a'khrxk ba. 45Jnkhaw vjyawng 'Boipaw Yesyuq' na "ke khrawng u-na a'lhem" tiyj a'nghiq hxvj khrawng heq na kha ke'hi ce lhem u-hx" tiyj an'caq. 'Petaruq' na kha "'Boipaw' vj khrawng batnghawt an'net te tong khennj an'lhem baq yawng" tiyj a'hawu ba. 46Jn baw na kha 'Boipaw Yesyuq' na "ke khrawng pjinghawt nghawt na a'lhem khennj ke phun a'thok khrawng ke na ka'piye" tiyj a'hawu ba. 47Jn mhutaw na a'lhem khrawng thuq-e yj laq yju nawk khrawng a'cok hxvj letlet pheng 'Boipaw Yesyuq' mhawimhaw tjq thji lo na khukdyawq caw vj a'ngvaw ye. Jnpjnnj ce ibahai yj a'lhem laq, a'niqnawng heq mhoknghawt pjttj i-baw a'khrxk ba nawk khrawng, khrawng heq mhawimhaw vj a'sai. 48'Boipaw Yesyuq' na jn mhutaw vj "ke caw'u vj,nang yum khrawng na nang a'kang ba pet pjn. Na'lung khrawkrxk na yadik dawmdak kj cet nghxq yawng" tiyj a'hawu. 49'Boipaw Yesyuq' na jn baw a'hawu tun nj damarung mawqpaw 'Yaiqruq' im mj kxq khrawng pjinghawt khrai lo na 'Yaiqruq' j "nang caw a'sawk thok pjn, 'Boipaw Yesyuq' khrawng beq naw ti kawq" tiyj a'hawu. 50'Boipaw Yesyuq' na jn a'yawk khaw hxvj "kiqkawq. Yum thawk ka. Nang caw a'kang lo ba vai" tiyj a'hawu. 51'Boipaw Yesyuq' khrawng 'Yaiqruq' im tjq a'khrai khaw vj 'Petaruq','Yawhen','Yakuk' na jn dikcaw nu-paw hji yj kxq ljt theqna u-kha im mj duk kj vawng sawk yju. 52Khrawng heq na an'kang pun ne na jn mhutaw caw khrawng a'lhji yj an'kaq e-nawk. Sinakha 'Boipaw Yesyuq' na "kap kawq cuq jn, ni mhutaw caw khrawng bjt yju a'ip pe yawng" tiyj a'hawu. 53Khrawng heq na jn dikcaw a'bjt pjn nawk khrawng co theqna 'Boipaw Yesyuq' khrawng an'nuiqkheu nawk. 54Jn baw na kha 'Boipaw Yesyuq' na jn mhutaw caw kut kjng theqna "ke caw'u vj, thju va" tiyj a'pan ne. 55Jn tun nj jn mhutaw caw ceng ngj a'muikhraw vawng lo ba theqna mhoknghawt pjttj a'thju ba. 'Boipaw Yesyuq' na jn mhutaw caw vj a'e-ok hai u-nghawt pet hai nhi nu-paw hji yj a'hawu. 56Nu-paw hji na kha a'lhji yj a'hiq mhawnkau nghxq yawng. Sinakha 'Boipaw Yesyuq' na ni thonlok heq khrawng u vj kha hawu yaq hai a'sin.
Seçili Olanlar:
Luke 8: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
