लुका 7
7
रोम देसक् कप्तानक् बिस्वास
(मत्ति ८:५-१३)
1येसु मानुसलकलाइ जम्मा कहिनलक् सिखाहिन् सक्नेसौ कफर्नहुम बाज्ल ठाँओमा जाइलक्। 2ओछि रोम देसक् एक्जेना कप्तानक् एक्दमे पियारो चाकरेक् बेरामि भेहिन् मोर्बाय लाग्ल रैल्हकुन्। 3जब उ कप्ताने येसुक् बिसइमा सुन्लक्, ओहिं कुन्हुँ-कुन्हुँ यहुदि अगुवालकलाइ येसुक्ठालाइ “मोरा बेरामि चाकरलाइ राम्रो काराइदे” बाजिहिन् बिम्ति कर्बा पाठालाहा। 4उ मानुसलके येसुक्ठालाइ जाहिन् जोर करिहिन् बिम्ति ओछ्यालुहुन्, “पर्भु हाम्रा कप्तानक् चाकरेक् सार्होय बेरामि रहेक्ला साँच्चिय उ मानुस तोरा साहेता पाबाक् योग्यक् रहैस्। 5किसाबुने ओहिं हाम्रा यहुदि जातलाइ असाध्य पेरेम करैस्, आउँ हाम्रा लागि एक्टा सभाघर आको बानाइदेल धरैस्।”
6यरङ् बिम्ति सुन्नेसौ येसु उहेखर्हाक्सङ्हिं कप्तानक् घर जाइलक्। जाइते-जाइते उ कप्तानक् घरक् लज्जिकै पुग्लटाकै ओहिं आफ्निक् सङ्लकलाइ येसुक्ठालाइ यन्हिं बाजिहिन् बोल्बा पाठालाहा, “हे पर्भु दुक्ख जुन्कर्, किसाबुने तोरालाइ मोरा घरै आन्बाक् सम्मकोक् सोहालाहार योग्यक् मुँइ बोइने, 7ना ता मुँइ आफ्निऔ हजुरक्ठालाइ जाबाक्लाइ योग्यक् रहम्ना। बरुस् बचन बाजिदेटौ मोरा चाकर राम्रो भेइस्। 8किसाबुने मुँहु बर्के हाकिमलकक् अधिनमाहा रहम्ना। आउँ मोरौ अधिनमाहा सिपाहिलक् रहट्थ्ला। उखर्हालाइ मुँइ ‘यछि आउँ’ बोलिबुने आट्थ्ला, ‘जा’ बोलिबुने उखर्ह्वा जाट्थ्ला। आउँ मोरा चाकरुहुलाइ ‘यि काम कर्!’ बोलिबुने ओहिं उ काम करिहालैस्।”
9यि कहिन् सुनिबानाइ येसु छक्क पोर्लक्। ओछिसौ आफ्निक् पाछारि लाग्लाहार जम्माय मानुसलकलाइ येसुइ दिठाइबानाइ बोल्लाहा, “मुँइ तोहोरानि बोल्मेहेर्ला यट्का बर्के बिस्वास कर्लाहार मानुस ता मुँइ इस्राएल देसहुमा नाहादेख्ल।”
10तसौ कप्ताने बोल्बा पाठाल उ मानुसलक् फर्किहिन् घर आइपुग्ते उ कप्तानक् चाकर राम्रो भेहिनौ सक्ल देख्लुहुन्।
येसुइ एक्टा बिध्वा अइमाइक् मोर्लो बेटाहिकलाइ बाँचाल
11किच्छु दिनपाछु येसु नाइन बाज्ल सहरै जाइलक्, ओछि येसुक् चेलालक् आउँ ओर्को थुप्रोय मानुसलकौ ओक्राक्पाछु जाइलुहुन्। 12सहरक् साँङ्हाँरक् लज्जिकै पुग्तेबेलाइ ओछि एक्टा बिध्वा अइमाइक् उहे एकेग्वा माटेन् बेटायकौ मोरिबानाइ गार्बाक् लागि लेगाबाठाल्ल येसुइ देख्लक्। ओक्राकसङ्हिं उ सहरक् थुप्रोय मानुसलकौ मार्हमि भेहिन् जाबा ठाल्ल रैल्लुहुन्। 13उ अइमाइक् ओरोङ् अबस्था देखिबानाइ येसुलाइ असाध्य दाया जागिहिन् आइलकुन् तसौ येसुइ ओक्रानि बोल्लोकुन्, “तुँइ जुन्काँर्!” 14तसौ लज्जिकै जाइबानाइ येसुइ उ मोर्लो मानुस बोक्लो खाट छुइलक् तसौ उ मुर्दा बोक्लाहार मार्हमिलक् टक्क थम्ल्हुहुन्। ओछिसौ येसुइ उ मोर्लो लासलाइ बोल्लोकुन्, “अ बाबु, मुँइ तोरानि बोल्मेर्ला, उठ्!” 15नभन्दै उ मानुस जुरुक्क उठिबानाइ बस्लक्, आउँ कहिन् कर्बा ठाल्लक्। तसौ येसुइ उ मोर्लोक्भटे बाँच्ल बेटाहिकलाइ ओक्राक् माँइकक् जिम्मा लागालकुन्।
16ओछि येसुक् बर्के सक्तिक्भरे मोर्लो मानुस बाँचाल देखिहिन् छक्कय पोरिबानाइ असाध्य डराहिन् जम्माहिं परमेस्वरलाइ पर्सन्सा कर्बा ठाल्लुहुन्, “एक्जेना बर्के अगमबक्ता हाम्रा ठाँओइ आइल रहैस् खम्! परमेस्वर जैहिं आफ्निक् मानुसलकलाइ बाँचाबाक् लागि आइल रहैस्!”
17येसुइ उ अइमाइक् बेटाहिकलाइ बाँचाल कहिनक् हल्ला यहुदिया पर्देस भोरिय आउँ उ ठाँओक् चारौपट्कोक् जिल्लालकमाहा फिंझ्लकुन्।
यहुन्नाइ सोर्भा पाठाल कहिन्
(मत्ति ११:२-१९)
18यहुन्नाक् चेलालके आको येसुइ कर्ल उ जम्मा कामक् कहिनलक् आफ्निक् गुरुलाइ सुनालुहुन् आउँ यहुन्नाइ आफ्निक् दुइजेना चेलालकलाइ हाँख्रालाहा। 19तसौ येसुक्ठालाइ यन्हिं बाजिहिन् सोर्भा पाठालाहा, “हामि आस कर्ल मुक्ति देलाहार राजा तुँहिं हो ना हामि ओर्कोय कुन्हुँक् पैंदा दिठाहिन् बस्बा पोरेका?”
20तसौ उखर्ह्वाइ येसुक्ठालाइ आहिन् सोर्ल्हिहिंक्, “हामिय आस कर्ल मुक्ति देलाहार राजा तुँहिं हो ना, हामि ओर्कोय कुन्हुँक् पैंदा दिठाबाते? बप्तिस्मा देलाहार यहुन्नाइ हाम्रालाइ यि कहिन् बुझ्बा तोराठालाइ पाठाल धरैस्।”
21उखर्ह्वा येसुक्ठालाइ पुग्लटाकै थुप्रोय मानुसलकलाइ येसुइ रोग लाग्लक्भरे आउँ भुत लाग्लक्भरे राम्रो कारातिहि रैल्हक् आउँ थुप्रोयजेना अन्धालकुहु देख्बा पार्लाहार भेल रैल्हुहुन्। 22तसौ येसुइ ओछि आइल यहुन्नाक् चेलालकलाइ बोल्लाहा, “तोहोराखर्ह्वाइ जेहे-जेहे देख्ल धरहला आउँ सुन्ल धरहला, उहे कहिन् यहुन्नालाइ जाइबानाइ बोलोहोक्– अन्धालक् देख्लाहार बन्ल रहट्थ्ला, लङ्रालक् हिंठ्बा पार्लाहार भेल रहट्थ्ला, माहारोग लाग्ल मानुस सद्धे भेल रहट्थ्ला, बैर्हालक् सुन्बा पार्ल धरट्थ्ला, मोर्लो मानुसलक् जिउँटिहिन् उठ्ल रहट्थ्ला, आउँ गरिप दुखिलके परमेस्वरक् खुस्सिक् खभर सुन्बा पाइल रहट्थ्ला।#यसैया ३५:५-६; ६१:१ 23जैहिं मोरा उप्रै सङ्खा नाकरथ् उ मानुसे साँच्चिय आसिक् पाट्थ्ला।”
24तसौ यहुन्नाक् चेलालक् ओछिसौ जाइनेसौ येसुइ ओछि रैल्ह मानुसलकक् धुइरोलकक्लाइ यहुन्नाक् बिसइमा बोल्लाहा, “तोहोराखर्हा उखास लाग्दो ठाँओमाहा किवा दिठाबा जाइल रौहे? किस् उ हावा बहहिन् हल्लल बाँसक् सिंप्कालाइ? 25ना किस् मज्जाक्-मज्जाक् लुगा पेहेर्लाहार मानुसलाइ? ओरोङ् मानुसलक् ता राजाक् दरबारलकै मजमस्ति करिहिन् बस्ल भेट्थ्ला! 26साँच्चिहिक् बाजह ता, तोहोराखर्हा किवा दिठाबा ओछि जाइल रौहे? किस् ना कुन्हुँ अगमबक्तालाइ? अँ, साँच्चिय मुँइ बाज्बापोर्टे तोहोलेके अगमबक्ताहुसौ अज्झ बर्के एक्जेनालाइ देखिहिन् सक्ल धरहला। 27किसाबुने यहुन्नाहिंक् बिसइमा परमेस्वरे देल धर्मसास्टरइ यन्हिं बाज्ल रहेला ‘दिठाउ, तोराइसौं आघु-आघु मुँइ मोरा दुतलाइ पाठाबा ठाल्ल धरम्ना। आउँ ओइहिं तोरा हिंठ्बाक् पैंदा बानाइदेस्ला।’#मलाकि ३:१ 28मुँइ तोहोराखर्ह्वानि बोल्मेहेर्ला, ‘अइमाइ मानुसक्भटे जर्मलाहार मध्यमा यहुन्नाहुसौ बर्के मानुस यि सन्सारै कुन्हुँय बोइने। भेटौसुधा परमेस्वरक् राज्जेमा जुन्सेहे जम्माहिंसौ चुटुनाइ रहैस्, उसेहे यहुन्नाइसौ अज्झ बर्के हो’।”
29ओछि यहुन्नाक् सिच्छा सुनिबानाइ थुप्रोय मानुसलके “परमेस्वरक् आग्या साँच्चिय राम्रो रहेला” बाजिहिन् यहुन्नाइ देल बप्तिस्मा लेलुहुन्। तिरो उठालाहार पापिलकुहु आको ओक्राक् आग्यालाइ मानिबानाइ बप्तिस्मा लेलुहुन्।#मत्ति २१:३२; लुका ३:१२ 30भेटौसुधा फरिसि आउँ ओस्कोक् धर्म-गुरुलकेसेहे यहुन्नाक्भटे परमेस्वरे देल उ उपायलाइ बेट्थाइकोक् कहिन् बाजिहिन् बप्तिस्मा नहिंलेलुहुन्।
31येसुइ बोल्लाहा, “ओरोङ् खालक् मानुसलकलाइ मुँइ किसक् सङ्हिं दाँजाबा? उखर्ह्वा कनौं रहट्थ्ला बाज्बा? 32उखर्ह्वा ता बाजार लाग्लठालाइ बसिबानाइ यरङ् कहिन् कर्लाहार केराकुटिलकक् परौ रहट्थ्ला। ‘तोहोरालागि हामि बाँसुरि बाँजायटौ तोहोराखर्ह्वा नहिंनाच्लेहे! हामि तोहोरालागि बिलौना करिहिन् गित्कायटौ तोहोलेक नहिंकाँर्लेहे!’ 33अङ्गुरक् छिप्ल रस नहिंपिइलाहार आउँ बर्त बसिहिन् रहलाहार यहुन्ना आइलक्, ‘ओक्रालाइसेहे तोहोलेके भुत लाग्ल रहेक्ला बाजिहिन् बोल्लेहेक्!’ 34तर मुँइ मानुसक् बेटायक खाइते, पिइते आइल रहम्ना आउँ मोरालाइ तोहोलेके, ‘दिठाहाक्, यि ता घिंचाहा, जाँर्याहा, तिरो उठालाहार आउँ पापिलकक् सङ्!’ बाजिहिंन् दोस लागातिहि रहला। 35परमेस्वरक्भरे बुद्धि पाइलाहारे माटेन् ओक्राक् बुद्धिलाइ ठिक रहेक्ला बाजिहिन् ठान्भा पारट्थ्ला।”
येसु सिमोन बाज्ल फरिसिक् घरै जाइल
36एक्दिन सिमोन बाज्ल एक्टा फरिसि मानुसे येसुलाइ खाबाक्नि हाँख्रालकुन्। तसौ येसुऔ ओक्राक् घरै जाहिन् खाबा बस्लक्। 37ओछि उहे सहरक् एक्जेना असाध्य पाप करिहिन् बस्लाहार अइमायँ येसु उ घरै खाबा आइल रहैस् बाजिहिन् थाहा पाइलक्। तसौ ओहिं एक्टा सिङ्गमरमरक् भाँरामा एक्दमे महँङो खालक् राम्रो अट्टरक् तेल लेहिन् फरिसिक् घरिहिमा आइलक्।#मत्ति २६:७; मर्कुस १४:३; यहुन्ना १२:३ 38तसौ येसुक् पाछारिक्करे आहिन् ओक्राक् पाउ पोरिबानाइ, काँर्तिहि येसुक् टाङलक् लोरेसौ भिजातिहि आफ्निक् झोंटाइसौ पोंछ्तिहि ओक्राक् टाङ्लकै चुम्मा कर्तिहि महँङो खालक् अट्टर लागाइदेलकुन्। 39ओरङ् देखिहिन् येसुलाइ खाबा हाँख्रालाहार फरिसिय यन्हिं बाजिहिन् मनमने सोंच्बा ठाल्लक्, “यि येसु साँच्चिय अगमबक्ता हो भेनेता ओहिं आफ्निलाइ छुइलाहार अइमाइ कनङ्भेका बाजिहिन् थाहा पाइहाल्टगे, किसाबुने ओक्रानि छुइलाहार अइमाइ पापि हो।”
40उहे बेलाइ येसुइ ओक्राक् मनमा भेल कहिन् थाहा पाहिन् ओक्रालाइ बोल्लोकुन्, “अ, सिमोन मुँइ तोरालाइ एक्टा कहिन् बोल्बाक् रहेला।”
तसौ सिमोने बाज्लक्, “भेइहालेला गुरु बाज्ना।”
41तसौ येसुइ ओक्रालाइ बोल्लोकुन्, “एक्टा साहु मानुसक् दुइजेना आसामिलक् रैल्हकुन्। एक्जेनाइ पाँचसइ चाँरिक् डब्बल पैसा आउँ ओर्को जेनाइ पाचास रुप्या चाँरिक् डब्बल पैसा रिन लेल धर्लुहुन्। 42तर उ साहुक् आसामिलके लेल रिन चुक्ता कर्बाक् किच्छु नहिंरैल्ह भेइटे उ दोहोजेनाक् रिन माफ करिदेलाहा। असौ तुँइ बाज् ता, उ दुइजेनामाहा कुनेसेहे साहुलाइ बर्ता पेरेम करेला भेका?”
43तसौ सिमोने येसुलाइ बोल्लोकुन्, “मोरा बिचारे जक्राक् रिन बर्ता रैल्ह, ओइहिंसेहे ओक्रानि बर्ता पेरेम करेला।”
“तसौ येसुइ सिमोनलाइ बोल्लोकुन्, तुँइ ठिके बाजैबे।”
44तसौ येसुइ उ अइमाइक्पटि फर्किहिन् सिमोनलाइ बोल्लोकुन्, “सिमोन, यि अइमाइलाइ दिठाहिक् ता, मुँइ तोरा घरै आइल रहम्ना, भेटौ तुँइ मोरालाइ टाङ् धोबाहुक् पानिऔ नहिंदेओइ, तर यि अइमाइ मोरा टाङ् लोरेसौ धोहिन्, आफ्निक् कापारक् झोंटाइसौ पोंछिदेओक्। 45तुँइ मोरानि चुम्मा करिहिन् स्वागत नहिंकरै, तर यि अइमाइ ता यछि मुँइ आइल तसौ मोरा टाङै चुम्मा कर्तिहि रहैस्। 46तुँइ मोरा कापारै तेलउ नहिंलागाइदेओइ, यहिं ता मोरा टाङै अट्टरे लागाइदेल धरैस्। 47उहेसैर्हे सिमोन मुँइ तोरानि बोल्मेर्ला, यि अइमाइय किसा यट्का धेरे पेरेम कर्ल धरैस्, किसाबुने यक्राक् धेरेक्कुर पापलक् छेमा भेल रहेक्ला। उहेसैर्हे यहिं मोरानि धेरेक्कुर पेरेम कर्ल धरैस्। तर जैहिं थोर्के पापक् छेमा पाइल भेला उ मानुसे पेरेमउ थोर्के करट्थ्ला।”
48तसौ येसुइ उ अइमाइलाइ बोल्लोकुन्, “तोरा पापलक् छेमा भेहिन् सक्ल रहेस्ला।”
49तसौ येसुक्सङ्हिं ओछि खाबा बस्लाहार मानुसलके आपसमा बाज्बा ठाल्लुहुन्, “यि कुन्ग्वा हाँ, यहिं ता पाप छेमा भेवास्बे बाजिहिन् बाज्बाठाल्ल धरैस्?”
50भेटौ येसुइ उ अइमाइ मानुसलाइ बोल्लोकुन्, “तुँइ मोरा उप्रै कर्ल बिस्वासक्भरे तोरालाइ पापेसौ जोगाल धरेस्ला, उहे भेइटे असौ तुँइ मज्जाइसौ जा।”
Seçili Olanlar:
लुका 7: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
