लुका 22
22
येसुलाइ मार्बाक् मौका खोज्लो
(मत्ति २६:१-५; मर्कुस १४:१-२; यहुन्ना ११:४५-५३)
1खमिर नहिंमिसाल पिठा खाबाक् पाबन लज्जिके आइल रैल्हकुन्। ओक्रालाइ छुट्काराक् पाबन बाजेला।#प्रस्थान १२:१-२७ 2बर्के-पुझरिलक् आउँ धर्म-गुरुलक् येसुलाइ कहने मार्बा बाजिबानाइ मौका खोजिहिन् बस्थ, तर मानुसलके थाहा पाबुहुँना ना बाजिबानाइ उखर्ह्वा डराथ्।
यहुदा इस्करियोतिय बिस्वासघाट कर्ल
(मत्ति २६:१४-१६; मर्कुस १४:१०-११)
3उहे समइमा बार्होजेना चेलालकक्मध्येमा यहुदा इस्करियोत बोल्लो चेलाक् हिर्दायाइ सैतान पोस्लोकुन्। 4ओहिं बर्के-पुझरिलक् आउँ मन्दिर रुङ्लाहारलकक् कप्तानलकक् ठालाइ जाइबानाइ येसुलाइ कहने पक्रबा पारेला बाजिहिन् सरसाल्हा कर्लक्। 5यि कहिन् सुन्नेसौ उखर्ह्वा रामालुहुन् आउँ ओक्रानि पैसा देबाक् कबुल कर्लुहुन्। 6ओट्का भेनेसौ यहुदाइ राजि कर्लक् आउँ मानुसलकक् धुइरो नहिंभेल बेलाइ येसुलाइ चुप्चुपे पक्राबाक्नि दाउलक् खोज्बा ठाल्लक्।
छुट्काराक् पाबनक् लागि भोज तियार
(मत्ति २६:१७-३०; मर्कुस १४:१२-२६; यहुन्ना १३:२१-३०)
7खमिर नहिंमिसाल पिठा खाबाक् छुट्काराक् दिन (निस्तार) बाज्ल पाबन आइल रैल्हकुन्, उहे दिनै भेंराक् बोका बलि चार्हाबा पोर्लाहार चलन रैल्लाहा। 8येसुइ पत्रुस आउँ यहुन्नालाइ यन्हिं बोलिहिन् पाठालाहा, “जाहा हाम्रा लागि छुट्काराक् दिन बाज्ल पाबनक् भोजक् थोकलक् तियार काराहा।”
9तसौ उखर्ह्वाइ येसुलाइ सोर्ल्हिहिंक्, “हामि भोज कछि जाहिन् तियार काराबा?”
10ओहिं बोल्लाहा, “दिठाहो, जब तोहोलेक सहरमाहा छिंरहला एक्जेना गाग्रिमा पानि बोकिबानाइ जाइतिहि कर्ल मानुस तोहोलेके भेंटाहोला। उ मानुस जुन् घरइ जाइस् तोहोलेकौ ओक्रिहिक् पाछु-पाछु जाबेहेरा, 11आउँ उ मानुस जुन् घरइ पोसोइस्, उ घरक् मालिकलाइ यन्हिं बोल्बेहेका, ‘गुरुइ हाम्रानि तोराठालाइ यन्हिं सोर्भा पाठाल धरैस्, मुँइ आफ्निक् चेलालकक्सङ्हिं छुट्काराक् दिनक् पाबनक् भोज खाबा बस्बाक्नि पहुना कोठा कछि रहेला?’ 12तसौ उ घरक् मालिके तोहोरानि उप्रक् तालाइ सेब्थोक् साजाल एक्टा बर्के कोठा देखाहेर्ला। तसौ ओच्छिहि भोज खाबाक् सेप्थोक् तियार काराहो।”
13तसौ उखर्ह्वा जाइलुहुन् आउँ सेप्थोक् चिंज येसुहि बोल्लोहिंक् ठिकन् भेंटालुहुन्, आउँ उखर्ह्वाइ छुट्काराक् दिनक् पाबनइ खाबाक् भोज तियार कारालुहुन्।
पर्भुभोज
(मत्ति २६:२६-३०; मर्कुस १४:२२-२६; १ कोरिन्थि ११:२३-२५)
14तसौ भोज खाबाक् बेला भेनेसौ येसु आफ्निक् बार्होउजेना प्रेरितलकक्सङ्हिं खाबा बस्लक्। 15ओहिं उखर्ह्वालाइ बोल्लाहा, “मुँइ दुक्ख भोग्बाइसौ आगारि तोहोरासङ्हिं छुट्काराक् दिनक् पाबनक् यि भोज खाबाक्नि बर्के इच्छा कर्ल धर्लम्। 16किसाबुने मुँइ तोहोरानि बोल्मेहेंर्ला, परमेस्वरक् राज्जेमाहा यि भोजक् अर्थ पुरा नहिंभेबायसम्म असौ मुँइ फेरि यि भोज नाखाम्।”
17ओट्का बाजिहिन् सक्नेसौ येसुइ कचौरा लेलक् आउँ परमेस्वरलाइ धन्यबाट चार्हाइबानाइ यन्हिं बाज्लक्, “यि लेहो, आउँ तोहोराखर्ह्वा जम्माहिं बाँटिबानाइ खाहा। 18मुँइ तोहोरानि बोल्मेहेंर्ला, अखसौ ओर्साक् परमेस्वरक् राज्जे नहिं आबायसम्मक्लाइ असौ अङ्गुरक् रस मुँइ नापिम्।”
19तसौ फेरि येसुइ पिठा लेलक् आउँ परमेस्वरलाइ धन्यबाट देइबानाइ उ पिठा भाँच्लक् आउँ चेलालकलाइ यन्हिं बाजिहिन् देलाहा, “तोहोरा खातिरमाहा देल यि मोरा देहि हो। मोरा सम्झनाक् लागि यहेरङ् करिहिने खाबेहे।” 20उहेरङ् करिहिन् खाहिन् सक्नेसौ ओहिं कचौरा लेइबानाइ यन्हिं बाजिहिन् चेलालकलाइ देलाहा, “यि कचौरा मोरा रकटक्सङ्हिं थपना भेलाहार लौओ बाचा हो। यि रकट तोहोरे खातिरमाहा बाहाल रहेला।#यर्मिया ३१:३१-३४
21“तर दिठाहो, मोरानि पक्रालाहार मानुस मोरेसङ्हिं खाबा बस्ल रहैस्।#भजनसङ्ग्रह ४१:९ 22किसाबुने मानुसक् बेटायक ता परमेस्वरे पैल्हाहि ठहराल अन्सारे मोर्बाय पोर्लाहार, तर धिक्कार भेक् उ मानुसलाइ! जैहिं ओक्रालाइ धोक्खा देइस्।”
23यि कहिन् सुनिबानाइ चेलालके “यरङ् काम कर्लाहार कुन्जेना भेका?” बाजिबानाइ एक्टाइ ओर्कोलाइ सोर्हासोह् कर्बा ठाल्लुहुन्।
कुन्ग्वासेहे बर्के भेका बाज्बाक् कहिनमा हानाथाप
24तसौ चेलालकक् मध्यमाहा कुन्जेनासेहे बर्के बाज्बाक् कहिनै हानाथाप भेबा ठाल्लाहा।#मत्ति १८:१; मर्कुस ९:३४; लुका ९:४६ 25येसुइ उखर्ह्वानि बोल्लाहा, “सन्सारै भेल राजालके सेहे आफ्निक् पर्जालकक् उप्रमाहा अधिकार चालाट्थ्ला, आउँ अधिकार चालालाहारलकलाइ उपकार कर्लाहार बाजिजाट्थ्ला। 26तर तोहोरा ठालाइ सेहे ओरोङक् जुन् भेउस्। तोहोलेक मध्यमा सेब्भुइसौ बर्के बन्बा चाइल्हाहारेसेहे सेब्भुइसौ चुटुनाइ बनुस् आउँ अगुवा बन्बा चाइल्हाहारेसेहे चाकरक् परौ काम करुस्।#मत्ति २३:११; मर्कुस ९:३५ 27किसाबुने खाबा बस्लाहार मालिक आउँ खाबाक् टक्रालाहार चाकरमाहा कुन्जेनासेहे बर्के हो ते? खाबा बस्लाहारसेहे बोइने ते? तर दिठाहो, मुँइ तोहोरा माझै खाबा टक्रालाहार चाकरक् परौ बन्ल रहम्ना।#यहुन्ना १३:१२-१५
28“तोहोराखर्ह्वाइसेहे मोरा जम्मा थरिक् दुक्खलकमाहा मोरालाइ साथ देल धरहला। 29जहरङ् मोरा बाबाइ मोरानि राज कर्बाक् अधिकार देल धरैस्, उहेरङ् करिहिन् मुँहु तोहोरानि राज कर्बाक् अधिकार देमेहेंर्ला। 30उहेसैर्हे मोरा राज्जेमाहा तोहोलेके मोरेसङ्हिं बसिबानाइ खाबा पाहोला आउँ सिंहासनै बसिबानाइ इस्राएलक् बार्होउ कुलक् नियाँ कर्बा पाहोला।”#मत्ति १९:२८
पत्रुसे येसुलाइ त्याग्बाक् भबिस्यबानि
(मत्ति २६:३१-३५; मर्कुस १४:२७-३१; यहुन्ना १३:३६-३८)
31तसौ येसुइ बाज्लक्, “सिमोन, अ सिमोन यटे सुन्, सैताने तोहोराखर्हा जम्माहिंलाइ गहुँलाइ फट्कलक् परौ फट्कबाक्नि अधिकार माङ्ल धरैस्। 32तर तोरा बिस्वास बुन् डगुस बाजिहिन् मुँइ तोरा लागि पाराथ्ना कर्ल धर्देमेर्ला। फेरि मोराठालाइ फर्कनेसौ तुँइ आफ्निक् दाजुभाइलकलाइ बिस्वासमाहा दर्ह्वो पार्बा पोर्लाहार।”
33तसौ पत्रुसे बाज्लक्, “हे पर्भु, मुँइ तोरासङ्हिं झेलखारइ जाबाक् आउँ मोर्बाहुँक् लागि तियार रहम्ना।”
34तसौ येसुइ बोल्लोकुन्, “पत्रुस साँच्चिय मुँइ तोरानि बोल्मेर्ला, तुँइ मोरानि चिन्भाय नाचिन्हम् बाजिहिन् तिनबाजि नहिं त्याग्बासम्म काल्हु बिहानि भाल्या नाँ डक्रथ।”
दुक्ख सहबाक् तियार भेबा
35येसुइ उखर्ह्वानि बोल्लाहा, “जख्नि मुँइ तोहोराखर्ह्वालाइ झोला, जुत्ता आउँ पैसा नहिं लेहिने पाठाल धर्लमेहाँर्, किस् तोहोराखर्ह्वालाइ किच्छु चिंजक् खाँचो भेलाहार?”
उखर्ह्वा बाज्लुहुन्, “अहँ, बोइने भेल।”#मत्ति १०:९-१०; मर्कुस ६:८-९; लुका ९:३; १०:४
36येसुइ बोल्लाहा, “तर असौसेहे जक्राक्ठालाइ पैसा रहेक्ला ओहिं पैसा बोकुस्, झोला भेलाहारे झोला बोकुस्। आउँ जक्राक्ठालाइ तरवाल बोइने भेनेमा आफ्निक् होर्बाक् लुगा बेंचिबानाइ भेटौ एक्टा तरवाल किनुस्! 37किसाबुने मुँइ तोहोरानि बोल्मेहेर्ला, धर्मसास्टरमाहा ‘ओक्रालाइ अप्रारिलक्सङ्हिं मिसालिहिंक्’ बाजिबानाइ लेख्ल कहिन् मोरा जिबनै पुरा भेबाय पोर्लाहार रहेला। साँच्चिय मोरा बिसइमा लेख्ल कहिन् पुरा भेइतिहिऔ रहेला।”#यसैया ५३:१२
38तसौ चेलालके बाज्लुहुन्, “पर्भु दिठाउ, यछि दुइगोटा तरवाल रहेला।”
येसुइ जुबाप देलाहा, “ओट्का भेने पुगेला!”
येसुइ जैतुन बाज्ल डाँराइ पाराथ्ना कर्लक्
(मत्ति २६:३६-४६; मर्कुस १४:३२-४२)
39साँद्धाउहिंक् परौ येसु सहरक्भटे निस्किबानाइ जैतुन बाज्ल डाँराइ जाइलक्, आउँ ओक्राक् चेलायकलकौ पाछु-पाछु जाइलुहुन्। 40उ ठाँओइ पुग्नेसौ ओहिं चेलालकलाइ बोल्लाहा, “परिछ्यामाहा फँस्बा जुन् पोरुस् बाजिहिन् तोहोलेके पाराथ्ना करह।”
41ओक्राक्पाछु येसु उखर्ह्वाइसौ चुटेक् टार्होके जाइबानाइ घुँरा टेकिबानाइ यन्हिं पाराथ्ना कर्बा ठाल्लक्। 42“हे बाबा, तोरा इच्छा भेइबुनेमा, यि मोरा दुक्खक् कचौरा मोराभटे हटाइदे। तर मोरा इच्छा बोइने कि, तोरे इच्छा बमजिम पुरा भेउस्।” 43ओक्राक्पाछु स्वर्गोक्भटे एक्टा स्वर्गोदुत आइबानाइ येसुलाइ सहबाक् सक्ति देलकुन्। 44येसु हिर्दायाक् भिट्रक्भटे असाध्य पिर पोरिहिन् अज्झउ धेरेक्कुर पाराथ्ना कर्बा ठाल्लक्। उ बेलाइ ओक्राक् जिओक् गरमलक् रकटक् बारा-बारा थोप्लाक् परौ भिंसओइ झर्तिहि रैल्हकुन्।
45येसुइ पाराथ्ना करिहिन् उठिबानाइ चेलालकक् ठालाइ फर्किबानाइ आइलटाकै ओछि उखर्ह्वा सोकइ पोरिबानाइ हड्याहिन् सुट्ल भेंटालाहा। 46तसौ येसुइ उखर्ह्वालाइ यन्हिं बोल्लाहा, “तोहोराखर्ह्वा किसा सुतिहिन् रैल्ह हाँ? उठह आउँ परिछ्यामाहा जुन् पोरुस् बाजिहिन् पाराथ्ना करह!”
येसुलाइ पक्रल
(मत्ति २६:४७-५६; मर्कुस १४:४३-५०; यहुन्ना १८:३-११)
47येसुइ कहिन् कर्तिहि-कर्तिहि एक हुल मानुसलक् ओच्छिहि आइपुग्लुहुन्। बार्हौजेना चेलालकमध्यमा यहुदा बोल्लो एक्जेना चेलाहिकेसेहे मानुसलकक् मुलि बनिबानाइ येसुलाइ चुम्मा#२२:४७ चुम्मा: यहुदिलकक् चलनइ चुम्मा कर्बाक् अभिबादन हो कर्बाक् लागि येसुक् लज्जिकै आइलक्। 48तर येसुइ ओक्रालाइ बोल्लोकुन्, “यहुदा, किस् तुँइ चुम्मा करिबानाइ मानुसक् बेटाहिकलाइ धोक्खा देबा चाहास्ला?”
49तसौ येसुक् लज्जिकै भेल चेलाहिकेलके ओछि आबाठाल्ल डराउनिक् कहिन्लाइ देखिहिन् यन्हिं बाज्लुहुन्, “पर्भु, असौ हामि तरवाल चालाबा ना किस् हाँ?” 50उहे बेलाइ येसुक् एक्जेना चेलाहिकेसेहे तरवाल चालाइ हाल्लक्, आउँ माहा-पुझरिक् चाकरिहिक् दैन्हँ कान छ्वाट्टय काटि देलकुन्।
51तर येसुइ ओक्रानि बोल्लोकुन्, “भेइ-भेइ, छारिहिक्!” तसौ ओहिं उ मानुसक् कान छुइबानाइ राम्रो पारिदेलकुन्।
52तसौ येसुक् बिरोधमा ओक्रानि पक्रबा आइलाहारलक्सेहे बर्के-पुझरिलक्, मन्दिर रुङ्लाहारलकक् कप्तानलक् आउँ अगुवालक् रैल्हुहुन्। येसुइ उखर्ह्वानि बोल्लाहा, “किस् तोहोलेके डाँकुलाइ पक्रबा आइलक् परौ करिहिन् तरवाल आउँ ठेङ्हा लेइबानाइ मोरानि पक्रबा आउहे? 53मुँइ दिनदिने मन्दिरमाहा तोहोरेखर्ह्वाक्सङ्हिं रैल्हम्। उ बेलाइसेहे तोहोलेके मोरानि पक्रबाक् आँट नहिं कर्लेहे! तर अख्निसेहे तोहोरालाइ काम कर्बाक् समइ आइल रहेर्ला, आउँ अन्धकारक् सक्ति यिहे हो।”#लुका १९:४७; २१:३७
पत्रुसे येसुलाइ त्याग्लकुन्
(मत्ति २६:५७-५८,६९-७५; मर्कुस १४:५३-५४,६६-७२; यहुन्ना १८:१२-१८,२५-२७)
54तसौ उ मानुसलके येसुलाइ पक्रिबानाइ माहा-पुझरिक् घरै लेगालिहिंक्। पत्रुससेहे चुटेक् टार्होहिक्भटे येसुलाइ पछ्याटे जाइलकुन्। 55मानुसलके माज्झ-अङ्नाइ आगि जिगाइबानाइ टापिहिन् बस्ल रैल्हुहुन्, आउँ उखर्ह्वाक्सङ्हिं पत्रुसौ जाहिन् बस्लक्। 56एक्टा चक्र्याहाइनिय पत्रुसलाइ आगि टापिबानाइ बस्ल देखिहिन् टोलो-टोलो एकेहोरि दिठाइबानाइ यन्हिं बोल्लोकुन्, “यिहौ मानुस ता येसुहिक्सङ्हिं रैल्हक्।”
57तर पत्रुसे बोल्लोकुन्, “नानु, ओक्रालाइ ता मुँइ चिन्भाय नाँचिन्मिक्!”
58एक्छिन पाछु ओर्को एक्जेनाइ ओक्रानि देखिबानाइ यन्हिं बोल्लोकुन्, “तुहुँ ता उहेखर्ह्वाक् सङ् बोइने ते?”
पत्रुसे ओक्रुहुलाइ बोल्लोकुन्, “धेट्, मुँइ ता बोइने रे!”
59एक घन्टा जट्का भेहिन् पाछु ओर्को एक्जेना मानुसे बाज्लक्, “साँच्चिय यि मानुस आको येसुहिक्सङ्हिं रैल्हक्, किसाबुने यिहौ गालिलिहिंक् ता खम्।”
60तर पत्रुसे बाज्लक्, “धेट्, तोहोलेके कनङ् कहिन् करहला, मोरालाइ किच्छु ता थाहा बोइने!” तसौ पत्रुसे यरङ् बाज्तिहि-बाज्तिहि भाल्या डक्रलुहुँन्।
61उहे बेलाइ पर्भुइ फर्किबानाइ पत्रुसलाइ दिठालकुन्। “आजुराति भाल्या डक्रबाक् आगारि तुँइ मोरानि तिन फेरासम्म चिन्भाय नाँचिन्हम् बाजस्ला” बाजिहिन् पर्भुइ बोल्लो कहिन् पत्रुसे सम्झलक्। 62तसौ पत्रुस बाहारक्पटि जाइबानाइ धर्धरि काँर्लक्।
येसुक् खिसि कर्लिहिंक्
(मत्ति २६:६७,६८; मर्कुस १४:६५)
63येसुलाइ रुङ्लाहार मानुसलके ओक्रालाइ खिसि कर्लिहिंक् आउँ पिट्लिहिंक्। 64आउँ येसुक् आँख झाँकाइबानाइ पित्तिहि सोर्ल्हिहिंक्, “तुँइ अगमबक्ता भेइबुने, लु बाज्ता, तोरानि कुनेग्वाइ पिट्वास्?” 65यहेरङ् करिहिन् उखर्ह्वाइ येसुलाइ धेरे नराम्रो कारातिहि नाना-रङक् गार्लक् देलिहिंक्।
येसु माहासभाक् आगारि
(मत्ति २६:५७-६६; मर्कुस १४:५५-६४; यहुन्ना १८:१९-२४)
66तसौ बिहान पोर्नेसौ यहुदिलकक् अगुवालक्, बर्के-पुझरिलक् आउँ धर्म-गुरुलक् जम्मा भेलुहुन्, उखर्ह्वाइ येसुलाइ माहासभामाहा लेगाइबानाइ यन्हिं बोल्लिहिंक्, 67“तुँइ मुक्ति देलाहार खिरिस्ट हो भेने हाम्रानि जानाउ।”
येसुइ उखर्ह्वालाइ बोल्लाहा, “मुँइ बाजेटौ तोहोराखर्ह्वाइ मोरानि बिस्वास नाँयकरह्, 68मुँइ किच्छु सोर्हेटौ तोहोराखर्ह्वाइ जुबाप देबा नाप्पारह। 69तर अखसौ ओर्साक् मुँइ मानुसक् बेटायक सेग्घुइसौ सक्तिगर परमेस्वरक् दैन्हँक्पाखा भेहिन् बसम्ना।”
70तसौ उखर्ह्वा जम्माहिं सोर्ल्हिहिंक्, “ओरोङ् भेने किस् तुँइ परमेस्वरक् बेटायक होयटे?”
ओहिं उखर्ह्वालाइ जुबाप देलाहा, “तोहोराखर्ह्वाहि बाज्तिहि रहला, मुँइ उहे हो।”
71येसुक् कहिन् सुनिबानाइ उखर्ह्वाइ बाज्लुहुन्, “असौ यक्राक् बिरोधइ हाम्रालाइ ओर्को कुन्हुँ साछि बबेचाइल्ह। हामि यक्रिहिक् मुखक्भरे सुनिंहालुहुँगे!”
Seçili Olanlar:
लुका 22: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
