लुका 21
21
बिध्वाइ चार्हाल भेंटि
(मर्कुस १२:४१-४४)
1येसु मन्दिरमाहा भेलटाकै धनि मानुसलके मन्दिरक् भेंटि चार्हाबाक् भाँराइ भेंटि चार्हाल देख्लक्। 2ओहिं एक्टा गरिप बिध्वाहु ताँबोक् दुइ पैसा चार्हाल देख्लक्। 3यि देखिहिन् येसुइ बाज्लक्, “साँच्चिय मुँइ तोहोरानि बोल्मेहेर्ला, यि गरिप बिध्वाइ ओर्को जम्माहिंसौ बर्ता भेंटि चार्हाल धरैस्। 4किसाबुने ओर्कोलके ता थुप्रो धनसम्पतिक्भटे चुटेक् माटेन् भेंटि चार्हाल धरट्थ्ला, तर यि बिध्वाइसेहे ता गरिपे भेटौ आफ्निक्ठालाइ रैल्ह छाक तार्बाक् खर्चहुँलाइ चार्हाल धरैस्।”
यरुसलेमक् मन्दिर नास भेला बाजिहिन् येसुइ अगमबानि कर्लक्
(मत्ति २४:१-१४; मर्कुस १३:१-१३)
5एक्फेरा येसुक् चेलाहिकलके, “मज्जाक्-मज्जाक् दोंखोक्भटे बानाल आउँ भेंटिक् रुपइ चार्हाल सामानलके साजाल यि मन्दिर कट्का राम्रो!” बाजिहिन् कहिन् करिहिन् बस्ल रैल्लुहुन्। येसुइ उखर्ह्वालाइ बोल्लाहा, 6“तोहोलेके अख्नि जे देख्तिहि रहला, यरङ् समइऔ आयला यि घरलकै रैल्ह एक्टा दोंखोक् उप्रक् ओर्को दोंखोउ बाँकि नाबसेक्, उ सेब्भ्रोउ भट्किहिन् जायला!”
दुक्ख आउँ कस्ट
(मत्ति २४:३-१४; मर्कुस १३:३-१३)
7तसौ चेलालके येसुलाइ सोर्ल्हिहिंक्, “गुरु, यि कख्नि भेला? आउँ यरङ् भेबा ठाल्ल बाजिहिन् हामि कहने थाहा पाबाते?”
8तसौ येसुइ बोल्लाहा, “हस्-करिहिन् बसह, तोहोरालाइ कुन्हुँहि झुँक्याबा जुन् पारुस्, किसाबुने थुप्रोय मानुसलक् मोरा नाउँ लेहिन् ‘मुँइ खिरिस्ट हो’ बाज्ते आट्थ्ला आउँ ‘समइ लज्जिके आइल रेहेला!’ बाज्ते आट्थ्ला। भेटौ उखर्ह्वाक् पाछु तोहोलेक बुन् लाग्बा। 9आउँ जख्नि घामासान् लाराइ आउँ झग्रा भेल कहिनलक् सुनहला उटाकै तोहोलेक बुन् आहाटह, किसाबुने अन्त भेबाइसौ आगारि यि सेब्भ्रोउ कहिनलक् पुरा भेबाय पोर्लाहार रहेला। तर उहे बेलाइसेहे सन्सारक् अन्त नाभेक्!”
10येसुइ उखर्ह्वानि अज्झउ यन्हिं बोल्लाहा, “जात-जातक् बिचइ लाराइ चलेट्थ्ला। एक्टा देसे ओर्को देसक् उप्रै हमला कर्बुहुन्बे। 11बारा-बारा भुँइच्याल आयला, ठाउँ-ठाँओमाहा अलिकाल पोरेला, थरि-थरिक् रोगलकक् माहामारि चलेला। आकासइ डरलाक्टो कहिनलक् आउँ बारा-बारा अचम्मक् चिन्होलक् देखा पोर्बा थालेला। 12यि सेप्थोक् भेबाइसौ पैल्हा मानुसलके तोहोरानि पक्रेहेर्ला, साताहेर्ला आउँ तोहोरानि सभाघरलकै लेगाहिन् मुद्दा चालाइ देहेर्ला, आउँ झेलखारइ हालिजाहाला। मोरा नाँओइ बिस्वास कर्ल सिहिरे तोहोरानि उखर्ह्वाइ राजालक् आउँ बारा-हाकिमलकक् आगारि पुर्याहेर्ला। 13उ बेलाइ तोहोराखर्ह्वाइ मोरा बारेमाहा साछि देबाक् मौका पाहोला। 14उहेसैर्हे आफ्निलाइ जोगाबाक् लागि किस्ग्वा बाज्मिका बाजिहिन् थ्याप्पय चिन्ता बुन् करह।#लुका १२:११-१२ 15किसाबुने मुँइ तोहोरानि उ बेलाइ ठिक कहिन् आउँ यरङ् बुद्धि देमेहेर्ला कि तोहोरा कहिनलकै तोहोरा बिरोधिलके जुबाप देबा नहिंपार्लाहार करिहिन् उखर्ह्वाक् मुखै बुजा लागेट्थ्ला। 16तोहोरा आफ्निक् बाप्पो-महँटार, दाजुभाइलक्, आफ्निक् मानुसलक् आउँ सङ्लकुहु आको तोहोरानि पक्राहेर्ला। तोहोराखर्ह्वामध्यमा कट्कालकलाइ ता उखर्ह्वाइ मार्बाउ मारट्थ्ला। 17मोरालाइ बिस्वास कर्ल सिहिरे जम्माहिं तोहोराखर्ह्वानि घिन कर्बाहार्बे। 18भेटौसुधा तोहोरा कापारक्भटे एक्टा झोंटाउ खेरो नाजाइहार। 19उहेसैर्हे सेब्थोक् सहिबानाइ बसह आउँ तोहोलेके जिबन पाहोला।
यरुसलेम सहरक् बिनास
(मत्ति २४:१५-२१; मर्कुस १३:१४-१९)
20“तर जख्नि यरुसलेम सहरलाइ सेनालके घेर्ल देखहला, तसौ यि सहरक् बिनास भेबाक् समइ लज्जिके आइल बाजिहिन् तोहोराखर्ह्वाइ जानह। 21उटाकै यहुदिया पर्देसमाहा रैल्लाहारलक् डाँराक्पटि पाराहिन् जाउस्, सहरक् भिट्रइ भेलाहारलक् सहरक् बाहारक्पटि जाउस्, आउँ गाँओइ रैल्हारलक्सेहे सहरक् भिट्र जुन् पोसुस्। 22किसाबुने धर्मसास्टरइ लेख्ल जम्मा कहिन् पुरा भेबाक्लाइ उ साजाइ पाबाक् दिनलक् भेबकुन्बे।#होसे ९:७ 23उटाकै दुइजिवा आउँ छावाटिलि अइमाइलकलाइ सार्होय अफ्ठ्यारो पोरेट्थ्ला। किसाबुने सन्सार भोरिय डरौलाक्टो दुक्खलक् आयला। आउँ परमेस्वरक् साजाइ यि जातक् मानुसलकक् उप्रै आइपोरेट्थ्ला। 24तसौ सत्रुलके मानुसलकलाइ तरवालेसौ काटेट्थ्ला, आउँ उखर्ह्वालाइ पक्रिबानाइ देस-बिदेसइ बन्दि बानाहिन् लेगायट्थ्ला। तसौ अर्जाति मानुसलकक् समइ पुरा नहिंभेबायसम्म उखर्ह्वाइ यरुसलेमलाइ टाङक् टरै खुँरिबानाइ धर्बुहुन्बे।
मानुसक् बेटायक फेरि आबाक् चिन्होलक्
(मत्ति २४:२९-३१; मर्कुस १३:२४-२७)
25“सुर्ज, चान्दा आउँ तारालकमाहा चिन्होलक् देख्वार पोरेला। समुन्रक् गर्जन आउँ डरलाक्टो छ्यालुकक्भरे पिर्थिबि भोरिय जम्मा जातक् मानुसलक् डराइबानाइ आहाट्थ्ला।#यसैया १३:१०; इजकिएल ३२:७; योएल २:३१; प्रकास ६:१२-१३ 26पिर्थिबिमा आइपोर्लाहार कहिनलकक् डरे मानुसलक् मुर्छा पोर्बुहुन्बे, किसाबुने आकासमाहा भेल सक्तिलक् हल्लबकुन्बे। 27ओक्राक्पाछु मानुसक् बेटायक बादरमाहा बर्के सक्ति आउँ बर्के महिमाक् सङ्सङ्हिं आबा ठाल्ल उखर्ह्वाइ देखट्थ्ला।#दानिएल ७:१३; प्रकास १:७ 28ओरोङ् कहिनलक् भेहे-बिट्के आँटिलो भेहिन् उप्रक्पटि दिठाहो, किसाबुने तोहोराखर्ह्वाक् छुट्कारा लज्जिके आबाठाल्ल भेहेर्ला।”
नेभाराक् गाछक्भटे सिच्छा
(मत्ति २४:३२-३५; मर्कुस १३:२८-३१)
29ओक्राक्पाछु येसुइ उखर्ह्वालाइ यरङ् खिसा सुनालाहा, “नेभारा आउँ जम्मा गाछलकलाइ दिठाहो, 30उ गाछलकै लौओ पाटालक् पल्ह्वाल देख्नेसौ तोहोराखर्ह्वाइ गरम समइ लाग्कुन्बे बाजिहिन् जानहला। 31उहेरङ् करिहिन् मुँइ बोल्लो जम्मा कहिनलक् भेइतिहि कर्ल देख्ते परमेस्वरक् राज्जे आहिन् सक्बा लाग्ल बाजिहिन् तोहोराखर्ह्वाइ जान्हला।
32“साँच्चिय मुँइ तोहोराखर्ह्वालाइ बोल्मेहेर्ला, यि सेब्भ्रोउ कहिनलक् पुरा नहिंभेबायसम्म अख्निकोक् यि पुस्ता बितिहिन् नाजायक्। 33आकास आउँ पिर्थिबि बितिहिन् जायला, तर मुँइ बाज्ल बचनलक् कख्नुहुँ बितिहिन् नाजायक्।
चङ्खारो बसह
34“चङ्खारो भेहिन् बसह, भोज-भट्यारक् पाछु बुन् लागह, माटिहिन् बुन् हिंठह आउँ यि जिबनक् लागि चिन्ता धेरे बुन् करह। नाटेन् बुनेता तोहोराखर्ह्वाक् मन खुम्चिहिन् जाहेर्ला आउँ उ दिन तोहोराखर्ह्वाइ नहिंचिताल समइमा आहेरा। 35किसाबुने अपर्झट पासोमाहा पोर्लोक् परौ करिहिन् उ दिन पिर्थिबिक् सेब्भ्रोउ मानुसलकक् उप्रै आइपोरेला। 36उहेसैर्हे चङ्खारो भेहिन् बसह। ‘यि जम्मा डरौलाक्टो कहिनक्भटे उम्कबा आउँ मानुसक् बेटाहिकक् आगारि ठड्ध्याबा पार्बाक् सक्ति हाम्रानि देउस्’ बाजिहिन् परमेस्वरक्सङ्हिं साँद्धाउनि पाराथ्ना करह।”
37उ दिनलकै येसुइ दिनैसेहे मन्दिरमाहा सिच्छा देओइ आउँ रातिसेहे सहरक्भटे निस्किबानाइ जैतुन बाज्ल डाँराइ बासो बस्बा जाओइ।#लुका १९:४७ 38जम्मा मानुसलक् बिहान पोरेहे येसुक् सिच्छा सुन्बाक्नि मन्दिरै आथ्।
Seçili Olanlar:
लुका 21: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
