लुका 20
20
येसुक् अधिकारक् बिसइमा सोर्ल्हो कहिन्
(मत्ति २१:२३-२७; मर्कुस ११:२७-३३)
1एक्दिन येसुइ मन्दिरै मानुसलकलाइ सिखातिहि रैल्लाहा आउँ परमेस्वरे देइपाठाल खुस्सिक् खभर सुनातिहि रैल्हक्। उहेटाकै जम्माहिंसौ बर्के-पुझरि, धर्म-गुरुलक् आउँ ओर्को अगुवालक् ओक्राक् ठाँओइ आहिन् यन्हिं बाज्बा ठाल्लुहुन्, 2“लु हाम्रालाइ जानाँउ, कछिसौ अधिकार पाहिन् तुँइ यि कामलक् कर्तिहि रहस्ला? यि अधिकार तोरानि कुनेग्वाइ देवास्?”
3तसौ येसुइ उखर्ह्वानि जुबाप देहिन् बोल्लाहा, “मुँइ आको तोहोरालाइ एक्टा कहिन् सोर्म्हेंहेर्ला। मोरोउलाइ जुबाप देहे। 4यहुन्नाइ बप्तिस्मा देबाक्नि कछिसौ अधिकार पाइलक्, परमेस्वरक्भटे ना मानुसक्भटे?”
5यट्का सुन्नेसौ उखर्ह्वा आफ्निहिंमा कहिन् खोज्बा ठाल्लुहुन्, “असौ हामि किवा बाज्बा भेका? परमेस्वरक्भटे बाजौ बुने ‘तोहोराखर्ह्वाइ किसा यहुन्नालाइ बिस्वास नहिं कर्लेहेक् ते?’ बाजिबानाइ ओहिं सोर्हिहालेला। 6मानुसक्भटे बाजौ बुने यछि रैल्ह जम्मा मानुसलके हाम्रानि दोंखोइ ढुङ्याहिंन् मारिहालेला, किसाबुने उखर्ह्वाइ यहुन्नालाइ अगमबक्ताय हो बाजिहिने बिस्वास करट्थ्ला।” 7उहेसैर्हे येसुलाइ यन्हिं जुबाप देलिहिंक्, “खै केजान, ओहिं उ अधिकार कछिसौ पाइलक् हाम्रानि थाहा बोइने।”
8तसौ येसुइ उखर्ह्वानि बोल्लाहा, “ओरोङ् भेने मुँइ कछिसौ अधिकार पाहिन् यि कामलक् कर्तिहि रहम्ना, मुँहु तोहोरानि नाजानामेहाँर्।”
अङ्गुरक् बारि बत्या कर्लाहारलकक् खिसा
(मत्ति २१:३३-४६; मर्कुस १२:१-१२)
9ओक्राक्पाछु येसुइ मानुसलकलाइ यन्हिं बाजिहिन् खिसा लेहिन् सुनालाहा, “एक्जेना मानुसे अङ्गुरक् बारि लागालक् आउँ खेति कर्बाक् लागि बत्या कर्लाहारलकक्लाइ देलाहा। उ आफ्निसेहे टार्होक् देसै जाइबानाइ थुप्रय दिन ओत्तिहि बस्लक्।#यसैया ५:१ 10अङ्गुरक् फोर पाकिसक्नेसौ ओहिं अङ्गुरक् बारिक्भटे आफ्निक् भाग लेबा एक्जेना चाकरक्लाइ पाठालकुन्। तर उ बत्या कामालाहारलके ओक्रानि किच्छु नहिं देहिन् बरुस् पिटिबानाइ पाठालिहिंक् 11ओरोङ् भेटौ उ बारिक् धनि फेरि ओर्को चाकरक्लाइ ओछि पाठालकुन्। बत्या कर्लालाहारलके ओक्रुहुलाइ पिटिबानाइ लाजौमोर्डो बानाहिन् किच्छुय नहिं देहिन् नङ्राहिंन् पाठालिहिंक्। 12अज्झ ओक्राक्पाछु उ बारिक् धनिय तिन फेराहुक् बाजिऔ ओर्को चाकरक्लाइ पाठालकुन्। उहउ चाकरुहुलाइ बत्या कर्लाहारलके घाइत्या पारिहिन् घुँघालिहिंक्। 13ओट्का भेइसक्नेसौ अङ्गुरक् बारिक् धनिय यन्हिं बाज्लक्, ‘असौ मुँइ किस् कर्बा भेका? मुँइ आफ्निक् पियारो छावाक्लाइ पाठामिना। मोरा छावाक्लाइ ता पक्काय उखर्ह्वाइ टेर्थिला भेका।’ 14तर उ बारि धनिक् बेटाहिकलाइ टार्होहिमा आइल देखेहे उ बत्या कर्लाहारलके यरङ् साल्हा कर्लुहुन्, ‘लु असौ, उ आबा ठाल्ल ता बारिक् धनिहिंक् बेटायक हो। हामि असौ ओक्रालाइ मारुहुँक्, आउँ ओक्राक् सम्पति जम्मा हाम्रे भेला।’ 15ओट्का बाज्नेसौ उखर्ह्वाइ ओक्रानि बारिक्भटे घेंक्र्याटे-घेंक्र्याटे बाहारक्पटि लेगाइबानाइ मार्लिहिंक्।”
तसौ येसुइ सोर्ल्हाहा, “असौ उ अङ्गुर बारिक् धनिय उखर्ह्वालाइ किवा कारायट्थ्ला भेका?
16“असौ ओहिं आफ्नि आइबानाइ उ बइमानि बत्या कर्लाहारलकलाइ मारेट्थ्ला, आउँ आफ्निक् बारि ओर्कोय बत्या कामालाहारलकलाइ देयट्थ्ला!”
यि कहिन् सुनिबानाइ मानुसलके यन्हिं बाज्लुहुन्, “यरङ् ता कख्नुहुँ जुन् भेउस्!”
17तसौ येसुइ उखर्ह्वाक्पटि दिठाइबानाइ यन्हिं बोल्लाहा, “ओरोङ् भेनेमा धर्मसास्टरमाहा लेख्ल यि कहिनक् अर्थसेहे किस्ग्वा ते?#भजनसङ्ग्रह ११८:२२
“‘डकर्मिलके काम नालागेक् बाजिबानाइ घुघाल दोंखोय,
घरक् जग लागालटाकै जम्माहिंसौ कामलाक्टो ढोंचाक् दोंखो बन्ल रहेला।’
18उ दोंखोक् उप्रै खस्लाहार जम्माय छेट्माछेट् भेट्थ्ला, आउँ जक्राक् उप्रै उ दोंखो खसेला ओहिं ओक्रानि धुजाम-धुज पारेला।”
तिरो तिर्बाक् बिसइक् कहिन्
(मत्ति २२:१५-२२; मर्कुस १२:१३-१७)
19धर्म-गुरु आउँ बर्के-पुझरिलके येसुइ बाज्ल कहिन् उहेखर्ह्वाक् बिरोधइ बाज्ल हो बाज्बाक् कहिन् थाहा पाइनेसौ ओक्रालाइ पक्रबाक्नि बिचार कर्लिहिंक्, तर मानुसलकक् डरे कर्ते उखर्ह्वाइ किच्छुय कर्बा नहिंपार्लुहुन्। 20उहे भेइटे उखर्ह्वाइ येसुलाइ चुप्चुपे पक्रबाक्नि दाउ खोज्बा ठाल्लुहुन्। उ मानुसलके येसुलाइ पक्रिबानाइ रोमि देसक् बारा-हाकिमक् हाथै पुर्याबा चाहाथिक्। इमान्दार बन्ल स्वाङ् पारिबानाइ “येसुक्ठालाइ कहिन् चोराइबानाइ फन्दामाहा पार्बा” बाजिबानाइ उखर्ह्वाइ कुन्हुँ मानुसलकलाइ घुस देहिन् पाठालाहा। 21तसौ उ सुराक्या मानुसलके येसुक्ठालाइ जाइबानाइ यन्हिं सोर्ल्हिहिंक्, “अ गुरु, हामि थाहा पाहिन् सक्ल रहुँक्ला, तुँइ राम्रो कहिनलक् करस्ला आउँ सिखास्ला। आउँ कुन्हुँहिलाइ पछेपात नाकरस्, तुँइ ता परमेस्वरक् पैंदा साँच्चिहिसम् देखास्ला। 22उहेरङ् भेइटे हाम्रौनि असौ जानाउ, किस् हाम्रा ब्यबस्थाक् नियम बमजिम रोमि सरखारक्लाइ तिरो बुझाबाक् ठिक रहेला ना बोइने?”
23तसौ उखर्ह्वाक् मनक् कपट थाहा पाइबानाइ येसुइ बोल्लाहा, 24“मोरानि एक्टा डब्बल पैसा देखाहो ता। हउछि कुनाहाँक् अङ्स आउँ नाउँ खोप्लो रहेक्ला?”
तसौ उखर्ह्वाइ बाज्लुहुन्, “यछिता रोमक् माहाराजाक् नाउँ आउँ अङ्स खोप्लो रहेक्ला!”
25तसौ येसुइ बोल्लाहा, “ओरङ्भेने जेहे रोमक् माहाराजाक् रहेक्ला रोमक् माहाराजाहिंक्लाइ देहो, आउँ जेहे परमेस्वरक् रहेक्ला परमेस्वरिहिक्लाइ देहो।”
26यरङ् करिबानाइ उखर्ह्वाइ मानुसलकक् आगारि ओक्रानि कुन्हुँ कहिनमाहा फान्दाइ पार्बा नहिंपार्लिहिंक्, आउँ ओहिं देल जुबाप सुनिबानाइ छक्कय पोरिबानाइ दाप्दिप्प भेलुहुन्।
मोर्लोक्भटे जिउँटबाक् कहिन्
(मत्ति २२:२३-३३; मर्कुस १२:१८-२७)
27फेरि कुन्हुँ-कुन्हुँ सदुकिलक् येसुक्ठालाइ आइलुहुन्। (सदुकि बाज्ल धर्मक् समुहक् मानुसलकेसेहे मानुस मोरिजाइनेसौ फेरि जिउँटेला बाजिबानाइ बिस्वासे नहिंकरथ्।)#प्रेरित २३:८ 28उखर्ह्वाइ येसुलाइ सोर्ल्हिहिंक्, “अ गुरु, मोसाइ हाम्रानि लेखिबानाइ देल नियमक् बमजिम कुन्हुँ मानुसक् दाजेथा सन्तान नहिं जर्मिहिने मोरिबुनेमा दाजिहिंकक् लागि सन्तान जर्मुस् बाजिबानाइ ओक्राक् भायथाइ भोजिहिंकलाइ बिहाउ कर्बा पोर्लाहार।#ब्यबस्था २५:५ 29उहेरङ् करिहिन् कुन्हुँ एक्टा समइमाहा सातजेना दाजुभाइलक् रैल्हुहुन्। जेठो दाजिहिंके बिहाउ कर्लक्। बिहाउ करेटौ सन्तान नहिंभेहिने मोर्लोक्। 30ओरोङ् भेलसैर्हे माइल्हा भायथाइ भोजिहिंकलाइ बिहाउ कर्लकुन्, भेटौ उहौ सन्ताने नहिंभेहिने मोर्लोक्। 31ओक्राक्पाछु साइल्हा भाइकुहुलाइ उहेरङे भेलकुन् आउँ उहेरङ् करिहिन् सातौजेना भायथालके पालोइसम् भोजेथालाइ बिहाउ कर्लिहिंक्, तयौनि जम्मायजेना निसन्तान भेहिने मोर्लोहुन्। 32पाछु जाइबानाइ उ अइमाइऔ आको मोर्लोक्। 33तसौ मोर्लोक्भटे जिउँटलटाकै उ अइमाइ कुनाहाँक् बोहेक भेइस् भेका? किसाबुने ओक्रानि सातौ भायथालके बिहाउ कर्ल धर्लिहिंक्।”
34तसौ येसुइ उखर्ह्वानि यन्हिं बाजिहिन् जुबाप देलाहा, “यि सन्सारै रैल्ह मानुसलके बिहाउ करट्थ्ला आउँ बिहाउ करिदेट्थ्ला। 35तर मोर्लोक्भटे जिउँटिबानाइ स्वर्गो जाबाक्नि योग्यक् ठहर्ल मानुसलके ना बिहाउ करट्थ्ला, ना ता बिहाउ करिदेट्थ्ला। 36किसाबुने उखर्ह्वा फेरि कख्नुहुँ नामोरोथ् बरुस्ता उखर्ह्वा स्वर्गोदुतलकक् परौ भेट्थ्ला। उखर्ह्वा मोर्लोक्भटे फेरि जिउँटो भेलसैर्हे उखर्ह्वा परमेस्वरक् सन्तान भेट्थ्ला। 37मोरिहिन् जाइल मानुसलक् जिउँटथ्ला बाज्बाक् कहिनक् पर्मान मोसाइ मज्जाहिंसौ जानाल धर्लाहा। दुन्-दुनि आगि बल्ल झाङक् बयानइ ओहिं परमपर्भुलाइ ‘अब्राहामक् परमेस्वर, इसाहाकक् परमेस्वर, आउँ याकुबक् परमेस्वर’ बाजिबानाइ पुकार कर्ल धरैस्।#प्रस्थान ३:६ 38उ ता मोर्लोलोकक् परमेस्वर बोइने, तर जिउँटोलकक् परमेस्वर हो! किसाबुने परमेस्वरक् नजरइ ता जम्माय जिउँटोय रहट्थ्ला।”
39तसौ कुन्हुँ-कुन्हुँ धर्म-गुरुलके बोल्लिहिंक्, “गुरु, तुँइ सहि कहिन् बाज्ल धरस्ला।” 40ओक्राक्पाछु उ मानुसलके येसुलाइ ओर्को कुन्हुँ कहिन् सोर्भाक् आँट नहिंकर्लिहिक्।
मुक्ति देलाहार खिरिस्ट कुनाहाँक् बेटायक
(मत्ति २२:४१-४६; मर्कुस १२:३५-३७)
41येसुइ उखर्ह्वालकलाइ सोर्ल्हाहा, “मानुसलके मुक्ति देलाहार राजा खिरिस्टलाइ कहने दाउदक् बेटायक बाजिहिन् बाजट्थ्ला? 42किसाबुने दाउदे लेख्ल भजनसङ्ग्रहक् कागतमाहा ओहिं आफ्निहिं यन्हिं बाज्ल धरैस्,
“‘परमपर्भुइ मोरा पर्भुलाइ यन्हिं बोल्लोक्,
तुँइ मोरा दैन्हँ हाथक्पटि बस्,#भजनसङ्ग्रह ११०:१
43जख्निसम्म मुँइ तोरा सत्रुहिरलकलाइ तोरा टाङक् टरै ना आन्मिखान्’।”
44“दाउदे आफ्निहिं ता खिरिस्टलाइ ‘पर्भु’ बाज्ल धरैस् भेनेमा, कहनेसेहे खिरिस्टलाइ दाउदक् बेटायक बाज्बा मिलेला?”
धर्म-गुरुलकक् बिरोधइ चेताउनि
(मत्ति २३:१-३६; मर्कुस १२:३८-४०)
45जम्मा मानुसलके सुनिहिन् रैल्ह बेलाइ येसुइ आफ्निक् चेलालकलाइ यन्हिं बोल्लाहा, 46“धर्म-गुरुलकक्भटे होस्यार भेहिन् बसह। किसाबुने उखर्ह्वा ता देखाबाक् लागि लामो लुगा पेहेरिबानाइ हिंठ्वास लागेट्थ्ला, बाजारइ मानुसलके आफ्निलाइ मान करिबानाइ सालाम् करुस् बाज्बा चाहाट्थ्ला, तसौ सभाघरलकै मुख्य ठाउँ आउँ भोजै मान्भाओक् ठाउँ खोजट्थ्ला। 47उखर्ह्वाइ बिध्वालकक् घरबार लुटिदेट्थ्ला आउँ मानुसलकलाइ देखाबाक् लागि लामो-लामो पाराथ्ना करट्थ्ला। ओरोङ्लके जम्माहिं बर्के साजाइ पाट्थ्ला।”
Seçili Olanlar:
लुका 20: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
