लुका 23
23
येसु पिलातुसक् आगारि
(मत्ति २७:१-२,११-१४; मर्कुस १५:१-५; यहुन्ना १८:२८-३८)
1ओक्राक्पाछु माहासभाक् जम्मा मानुसलके येसुलाइ रोमि बारा-हाकिम पिलातुसक् ठालाइ लेगालिहिंक्। 2तसौ ओक्रालाइ दोस लागाहिन् बाज्लुहुन्, “यहिं आफ्निलाइ ‘मुँइ मुक्ति देलाहार राजा खिरिस्ट हो’ बाज्ल धरैस्, आउँ ‘रोमि सरखारलाइसेहे तिरो तिर्बा ना पोरेक्’ बाजिहिन् हाम्रा देसक् मानुसलकलाइ बिहिराबा ठाल्ल हामि भेंटाहुक्।”
3तसौ पिलातुसे येसुलाइ सोर्ल्होकुन्, “किस् तुँइ यहुदिलकक् राजाय हो ते?”
येसुइ जुबाप देलकुन्, “तुँइ आफ्निहिं ओहोरङ् बाजस्ला।”
4तसौ पिलातुसे बर्के-पुझरिलक् आउँ ओछि जम्माभेल मानुसक् भिरलकलाइ बोल्लाहा, “मुँइ यि मानुसक्ठालाइ किच्छुय दोस नाँदेखिदेमिक्।”
5तर उखर्ह्वाइ अज्झ बर्के चोटे साराहिन् यन्हिं बाज्लुहुन्, “यहिं गालिल पर्देसक्भरे सुरु करिहिन् सेब्भ्रोउ यहुदिया आउँ यच्छुहु आफ्निक् सिच्छा देहिन् बिहिराबा ठाल्ल धरेट्थ्ला।”
येसु हेरोद राजाक् आगारि
6उ कहिन् सुनिबानाइ पिलातुसे सोर्ल्हाहा, “किस् यि मानुस गालिलक् हो ते?” 7येसुलाइ हेरोद राजाहिक् पर्देसक् बाज्बाक् कहिन् थाहा पाहिन् पिलातुसे ओक्रालाइ हेरोदिहिक् ठालाइ पाठालकुन्। उ समइमा हेरोद राजा यरुसलेमिहिमा रैल्हक्। 8येसुलाइ देख्बा पाइटे हेरोद एक्दमे खुस्सि भेलक्। किसाबुने ओहिं येसुक् बिसइमा सुन्ल धर्लक्, आउँ धेरे दिन आगारिहिंसौ ओक्रालाइ दिठाबाक्नि चाहाल धर्लकुन्। ओहिं येसुइ किस्-किस् अचम्मक् काम कर्ल दिठाबा पाम्ना ना बाजिबानाइ आस करिहिन् बस्ल रैल्हक्। 9हेरोदे येसुलाइ धेरे कहिनलक् सोर्ल्होकुन्, तर येसुइ किच्छुय जुबाप नहिंदेलकुन्। 10बर्के-पुझरि आउँ धर्म-गुरुलके येसुक् बिरोधमाहा उठिबानाइ थुप्रोय दोस लागाबा ठाल्लुहुन्। 11ओक्राक्पाछु हेरोद आउँ ओक्राक् सिपाहिलके येसुलाइ गिंज्यातिहि अप्मान् कर्लिहिंक्, तसौ येसुलाइ राजाइ पेहेर्बाक् परौ लुगा पेहेराहिन् पिलातुसक् ठालाइ फर्काहिन् पाठालिहिंक्। 12उहे दिनेसौ हेरोद आउँ पिलातुसक् मिलाप भेलाहा, किसाकि उखर्ह्वाक् बिचै पैल्हा दुस्मनि रैल्लाहा।
येसुलाइ मोर्बाक् साजाइ देलिहिंक्
(मत्ति २७:१५-२६; मर्कुस १५:६-१५; यहुन्ना १८:३९-४०; १९:१६)
13ओक्राक्पाछु पिलातुसे बर्के-पुझरि, अगुवालक् आउँ मानुसलकलाइ हाँख्राइबानाइ बोल्लाहा, 14“मानुसलकलाइ बिहिरालाहार बाजिहिन् तोहोलेके यक्रालाइ मोराठालाइ आनेहेंक्। अख्नि भर्खर यक्रालाइ तोहोरेखर्ह्वाक् आगारि केर्मिक्, तर तोहोलेके ओक्रालाइ लागाल कुन्हुँय दोस मुँइ यक्राक् ठालाइ नहिंपाम्। 15उहेरङ् करिहिन् हेरोदुहु किच्छु दोस नहिं भेंटानेसौ यक्रानि हाम्रेठालाइ पाठाल धरेला। दिठाहाक्, यहिं मोर्बाक् साजाइ पाबाक् कुन्हुँ अप्रार नाँहा करइ। 16उहेसैर्हे मुँइ यक्रालाइ कोर्रा बाज्राबा देहिन् छार्मिना।” 17[असौ ओस्कोक् चलनमाहा छुट्काराक् दिनक् पाबन पारिबानाइ पिलातुसे एक्टा कैदिलाइ छार्बा पोरेक्।]#२३:१७ पैल्हाकोक् कट्कापय लेखोटलकमाहा यि पद थप्ल रहेला।
18तर जम्मा मानुसलके बर्के चोटे चिच्याइ-चिच्याइ यन्हिं बाज्लुहुन्, “यक्रानिसेहे मार्बाय पोर्लाहार, बरुस् हाम्रा लागि बारब्बालाइ छार्बा पोरि।” 19बारब्बासेहे सहरइ हुल-डङ्का कर्लाहार आउँ मानुसलकलाइ मार्लसैर्हे झेलखारै पोर्लो रैल्हक्।
20येसुलाइ छार्बाक् बिचार करिबानाइ पिलातुसे ओछि रैल्ह मानुसलकक् हुललाइ फेरि सम्झालाहा। 21तर उखर्ह्वाइ एकेहोरि चिच्याइ-चिच्याइ यन्हिं बाज्लुहुन्, “ओक्रालाइ कुरुसै टाङहँक्, कुरुसै टाङहँक्!”
22तसौ पिलातुसे यि फेरासम्म तिनबाजि उखर्ह्वालाइ बोल्लाहा, “किसा? यहिं किवा अप्रार कर्ल धरैस् ते? मुँइ ता यक्रानि मारिबानाइ साजाइ देबा पोर्लाहार किच्छु दोसे नाँदेखम्। उहेसैर्हे मुँइ यक्रानि कोर्रा बाज्राहिन् छार्मिना।”
23तर उखर्ह्वाइ झन् बर्के स्वर निस्काहिन् बाज्बा ठाल्लुहुन्, “यक्रानि कुरुसै टाङ्बाय पोरेला!” यरङ् करिहिन् मानुसलके चिच्याहिने जित्लुहुन्। 24तसौ पिलातुसे येसुलाइ उखर्ह्वाइ बाज्लहिक् परौ कर्बाक् हुकुम देलाहा। 25ओहिं हुल-डङ्का करिबानाइ झेलखारमा रैल्ह ज्यान्मारा बारब्बालाइसेहे छार्लकुन्, तर येसुलाइसेहे उहेखर्ह्वाक् इच्छा बमजिम सोंपिदेलाहा।
येसु कुरुसै टाङिजाइलक्
(मत्ति २७:३२-४४; मर्कुस १५:२१-३२; यहुन्ना १९:१७-२७)
26येसुलाइ लेहिन् जाबा ठाल्लटाकै सिपाहिलके कुरेनि बाज्ल देसक् एक्टा गाँओक्भटे सहरक्पटि आइलाहार सिमोनलाइ भेंटालिहिंक्। उखर्ह्वाइ ओक्रिहिलाइ अँठ्याइबानाइ येसुक् कुरुस बोकाइबानाइ येसुक् पाछु-पाछु हिंठ्बा लागालिहिंक्।
27मानुसलकक् बर्के धुइरो येसुक् पाछु-पाछु लाग्ल रैल्हुहुन्। ओछि अइमाइ मानुसलकौ येसुक् लागि काँरि-काँरि सोक कर्तिहि पाछ्-पाछु आइतिहि रैल्हुहुन्। 28येसुइ उखर्ह्वाक्पाखा फर्किबानाइ बोल्लाहा, “हे यरुसलेमक् बेटेकेहेलक्, मोरा लागि बुन् काँरह, बरुस् आफ्निक् लागि आउँ छाउरापुटालकक् लागि काँरह। 29किसाबुने यरङ् दिनलक् आबा ठाल्ल रहेला, जख्नि मानुसलके यन्हिं बाज्बुहुन्बे ‘छावा नहिंभेलाहार, खालि कोखलक् आउँ दुर्ह् खुवाबा नहिंपोर्लाहार अइमाइ मानुसलक् कट्का राम्रो।’ 30उटाकै मानुसलके अल्गो पाहारलकलाइ ‘हाम्रा उप्रै खस्’ आउँ डाँरालकलाइ ‘हाम्रानि झाँकाउ’ बाजिहिन् बाज्बुहुन्बे।#होसे १०:८; प्रकास ६:१६ 31किसाबुने गाछ हर्वो भेइतिहि ता इखर्ह्वाइ यरङ् काराट्थ्ला भेइबुने, झन् गाछ सुख्नेसम् ता किस् काराट्थ्ला भेका?”
32सिपाहिलके दुइजेना अप्रार कर्लाहार मानुसलकलाइ आको येसुहिक्सङ्हिं मार्बाक्नि लेगालाहा। 33तसौ उखर्ह्वा खप्पर्या बाज्ल ठाँओमाहा आइपुग्लुहुन्। ओछि उखर्ह्वाइ येसुलाइ किलि थोकिबानाइ कुरुसै टाङ्लिहिंक्, आउँ उ दुइजेना अप्रार कर्लाहारलकलाइ आको एक्टालाइ येसुक् दैन्हँक्पाखा आउँ ओर्कोलाइ देब्रिक्पाखा कुरुसै टाङ्लाहा। 34उहेटाकै येसुइ यन्हिं बाज्लक्, “अ बाबा, इखर्ह्वानि छेमा करिहिखान्, किसाबुने इखर्ह्वाइ किस् कर्तिहि रहट्थ्ला, उ नाँजानथ्।” तसौ सिपाहिलकेसेहे येसुक् लुगा भाग लागाइबानाइ चिठ्ठा बाज्राहिन् बाँट्लुहुन्।
35मानुसलक् ठध्याइबानाइ दिठाबा ठाल्ल रैल्हुहुन्, आउँ यहुदि अगुवालकेसेहे गिंज्यातिहि यन्हिं बाज्लुहुन्, “दिठाहाक्, यहिं ओर्कोलाइ ता बाँचालाहा, साँच्चिय यि परमेस्वरे छान्ल मुक्ति देलाहार खिरिस्टय हो भेनेमा आफ्निहुँलाइ आको बाँचाउस्।”
36तसौ सिपाहिलकुहु ओक्रालाइ आँम्तो रस पिबादेहिन् खिसि करिबानाइ बोल्लिहिंक्, 37“यदि तुँइ यहुदिलकक् राजा हो भेनेमा आफ्निक्लाइ बाँचाउ।”
38कुरुसै “यि यहुदिलकक् राजा हो” बाजिहिन् लेख्ल फल्याक् येसुक् मुँरक् उप्रै चित्काल रैल्हकुन्।
39येसुक्सङ्हिं कुरुसइ झुँराल अप्रार कर्लाहार मानुसमध्य एक्जेनाइसेहे येसुलाइ गिंज्याहिन् यन्हिं बोल्लोकुन्, “किस् तुँइ मुक्ति देलाहार खिरिस्ट बोइने ते? होय भेइबुने तुँइ आफ्नुहुँलाइ बाँचाउ आउँ हाम्रानि आको बाँचाउ ना!”
40तर ओर्को अप्रार कर्लाहार मानुसे ओक्रालाइ हप्काहिन् बोल्लोकुन्, “तोरानि परमेस्वरक् डर नालागेस्? तुँइ आको ता ओक्रिहिंक् परौ साजाइ पाइतिहि रहस्ला। 41हामि ता नराम्रो काम कर्ल सिहिरे पाबाय पोर्लाहार साजाइ पाइल धरुहुँक्ला, तर ओहिं ता कुन्हुँ नराम्रो कामे नहिं कर्ल धर्लक्।” 42ओट्का बाज्नेसौ ओहिं येसुलाइ बोल्लोकुन्, “हे येसु, तुँइ राजा भेहिन् आइलटाकै मोरोउनि सम्झबइ!”
43तसौ येसुइ ओक्रानि बोल्लोकुन्, “साँच्चिय मुँइ तोरानि बोल्मेर्ला, आजुहि तुँइ मोरासङ्हिं स्वर्गोइ भेस्ला।”
येसुक् मरन
(मत्ति २७:४५-५६; मर्कुस १५:३३-४१; यहुन्ना १९:२८-३०)
44मध्यदिनेसौ तिन बजेसम्मय पुराय देसभोरि आँधार भेलकुन्।#प्रस्थान २६:३१-३३ 45तसौ सुर्जहु उँजत नहिंदेलकुन्, आउँ मन्दिरक् भिट्रइ लागाल पर्दा माज्झा-माझि फाटिबानाइ दुइचिरा भेलकुन्। 46तसौ बर्के चोटे चिच्याहिन् येसुइ यन्हिं बाज्लक्, “अ बाबा, मुँइ मोरा आत्मा तोरा हाथै सोंपोम्ना।” यट्का बाजिहिन् ओहिं आफ्निक् पारान त्याग कर्लक्।#भजनसङ्ग्रह ३१:५
47यरङ् घट्ना भेल देखिहिन् रोमि सिपाहिलकक् कप्ताने परमेस्वरक् पर्सन्सा कर्तिहि यन्हिं बाज्लक्, “साँच्चिय यि मानुस धर्मि खमक्।”
48यि घट्ना भेल दिठाबा आइलाहार जम्मा मानुसलक् यि सेप्थोक् देखिबानाइ छाति पिटि-पिटि काँर्टे घरक्पाखा फर्कलुहुन्। 49तर येसुलाइ चिन्ल्हाहार आउँ गालिलक्भटे ओक्राक् पाछ्-पाछु आइलाहार अइमाइलके टार्होहिक्भटे ठध्याइबानाइ ओछि भेल जम्मा घट्नालक् दिठाबा ठाल्ल रैल्हुहुन्।#लुका ८:२-३
येसुलाइ चिहानै गार्ल
(मत्ति २७:५७-६१; मर्कुस १५:४२-४७; यहुन्ना १९:३८-४२)
50-51माहासभाक् सदस्यालकक्मध्ये यहुदिया पर्देसक् अरिमाथिया सहरक्भटे आइल एक्जेना योसेफ नाउँ भेल मानुस रैल्हक्। योसेफ राम्रो आउँ इमान्दारि मानुस रैल्हक्, आउँ ओहिं परमेस्वरक् राज्जेलाइ अस्याहिन् बस्ल रैल्हक्। माहासभाक् मानुसलके येसुलाइ मार्बाक्नि बिचार कर्लटाकै ओहिं उखर्ह्वाक् कामइ सहमत बोइने भेलक्। 52तसौ ओहिं पिलातुसक् ठालाइ जाहिन् कुरुसै टाङ्ल येसुक् मोर्लो देहि लेग्बादे बाजिबानाइ माङ्लक्। 53ओक्राक्पाछु ओहिं येसुक् मोर्लो देहि कुरुसक्भटे नाभाइबानाइ मलमलक् लुगाइसौ सेर्पिहिन्, डाँराक् सिल खोपिहिन् बानाल एक्टा चिहानै धर्लक्। उ चिहानै पैल्हा कुन्हुँय मोर्लो देहि नहिं धर्ल रैल्हकुन्। 54उ सुक्रबारक् दिन बिसारिक लागि तियार काराबाक् दिन रैल्हकुन्, आउँ बिसारिक दिन सुरु भेबाहिक् लाग्ल रैल्हकुन्।
55गालिल पर्देसक्भटे येसुलाइ पछ्याइबानाइ आइलाहार अइमाइलकौ योसेफक्सङ्हिं जाइलुहुन्, आउँ चिहानै येसुक् मोर्लो देहि कहने धर्ल बाजिहिन् दिठालुहुन्। 56ओक्राक्पाछु उखर्ह्वालक् घर फर्कनेसौ येसुक् जिओइ लागाबाक्नि साउह्वार बास्ना आइलाहार मलम आउँ अट्टर तियार कारालुहुन्।
तर ओर्को दिनैसेहे यहुदि नियम बमजिम उखर्ह्वाइ बिसारिक दिन मानिहिन् साँठालुहुन्।#प्रस्थान २०:१०; ब्यबस्था ५:१४
Seçili Olanlar:
लुका 23: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
