लुका 10
10
येसुइ बहत्तरजेना चेलालकलाइ पर्चार कर्बा पाठाल
1यक्राक्पाछु येसुइ पर्चार कर्बा पाठाबाक्नि ओर्को बहत्तरजेना चेलायकलक् छान्लक्। तसौ उखर्ह्वा जम्माहिंलाइ दुइ-दुइजेना करिहिन् आफ्नि जाबाक् गाँओमा आउँ सहरलकै आफ्नि जाबाइसौ पैल्हा आघु-आघु पाठातिहि चेलालकलाइ यन्हिं बोल्लाहा, 2“बालि काँटिबानाइ सङ्र्हाबाक् काम थुप्रय रहेला, तर काट्बाक् काम कर्लाहारसेहे चुटेके रहट्थ्ला। उहेरङ् भेइटे बालि-धनिक्सङ्हिं ओक्राक् आफ्निक् खेतै बालि काट्लाहार ओर्को आको मानुसलक् पाठाइदे बाजिहिंन् पुकार करह।#मत्ति ९:३७-३८ 3असौ तोहोलेक जाहा। आउँ दिठाहो, मुँइ तोहोरानि चित्वालकक् ठालाइ चुटुनाइ भेंराक् चुच्यालाइ पाठालक् परौ करिहिन् मानुसलकक् माझै पाठातिहि रहमेहेंर्ला।#मत्ति १०:१६ 4तोहोलेक जाइते बेलाइ पैसा, झोला, जुत्ता किच्छुय बुन् लेगाहो। आउँ पैंदाइ थम्हिंबानाइ कुन्हुँहिंक्सङ्हिं गफ करिहिन् समइ बुन् काटाहो। 5तोहोराखर्ह्वा मानुसलकक् घरै जाहिन् सक्नेसौ पैल्हा यन्हिं बाजिहिन् उ घरलाइ आसिक् देहो, ‘यि घरमाहा सान्ति आउस्।’ 6उ घरक् मानुसलके सान्ति रुचाट्थ्ला भेइबुने उखर्ह्वाइ सान्ति पाट्थ्ला। आउँ उखर्ह्वाइ सान्ति नहिं रुचाइबुने उ आसिक् तोहोरे सङ्हिंय फर्किहिन् आहेर्ला। 7तोहोरालाइ जुन् घरै बास बस्बा देहेर्ला उहे घरै बसह। आउँ उ घरक् मानुसे जेहे खाबा देहेर्ला, उहे खाहो किसाबुने काम कर्लाहार कामदारे आफ्निक् जेला पाबाय पोर्लाहार। तर तोहोलेक घर-घरे बासो बस्ते जुन् हिंठह।#१ कोरिन्थि ९:१४; १ तिमोथि ५:१८ 8ओहोरङ् करिहिन् सहरलकुहुमा जाइटुहु ओस्कोक् मानुसलके आफ्निक्ठालाइ हाँख्राइबानाइ लेगाहिन् जेहे तोहोरानि खाबादेल उहे थोक् खाहो। 9तसौ उ सहरै रैल्ह बेरामिलकलाइ राम्रो काराहा, आउँ उखर्ह्वानि बोलोहोखान्, ‘परमेस्वरक् राज्जे तोहोराखर्ह्वाक् लज्जिकिहिमा आहिन् सक्ल रहेला।’ 10तर कुन्हुँ सहरै जाइलटाकै ओस्कोक् मानुसलके तोहोरानि आफ्निक् घरलकै पोस्बा नहिं देइगलाहार बुने पैंदालकक्पटि निस्किहिन् जाइबानाइ ओस्कोक् मानुसलकलाइ बोलोहोखान्,#प्रेरित १३:५१ 11‘हामि तोहोरा सहरक् धुरलकौ तोहोरे अट्टेरि कर्ल साँटा हाम्रा पैतलाक्भटे पोंछि देहुँक्ला। भेटौ तोहोरानि यि कहिन् जानाहुँक्ला, परमेस्वरक् राज्जे लज्जिकिहिमा आहिन् सक्ल रेहेला।’#मत्ति १०:७-१४; मर्कुस ६:८-११; लुका ९:३-५ 12मुँइ तोहोरानि बोल्मेहेर्ला, नियाँक् दिनै यि सहरक् मानुसलकक् हालटेसौ ता बरुस् पापे भोरिहिन् रैल्ह उ सदोम सहरक् मानुसलकक् हालटसेहे सहबा पार्लाहार भेट्थ्ला।
बिस्वास नहिंकर्लाहार सहरइ बस्लाहारक् दासा
(मत्ति ११:२०-२४)
13“ए खोराजिन् आउँ बेथसेदाक् मानुसेहेलक्, तोहोरालाइ धिक्कार भेउस्! तोहोराखर्ह्वाक् माझै कर्ल अचम्मक् कामलक् टुरोस आउँ सिदोन#१०:१३ टुरोस आउँ सिदोन: पैल्हेकोक् समइमा यि दुइ सहरक् मानुसलकक् पाप आउँ दुस्ट कामक् कारने परमेस्वरक् अगमबक्तालके उखर्ह्वाइ परमेस्वरक्भटे कट्का दन्ड आयला बाजिहिन् अगमबानि कर्ल रैल्हुहुन्। (यसैया २३:१-१८ आउँ इजकिएल २६:१-२८:३) सहरलकै कर्ल सन्तेक् ओस्कोक् मानुसलके धेरे आगारिय आफ्नि-आफ्नि पाप सुइकार करिहिन् छार्टुहुन्बे आउँ पाप सुइकार कर्ल देखाबाक्नि बोरालकक् लुगा पेहेराहिन् खारानि घँस्तुहुन्बे। 14नियाँक् दिनै तोहोरा हालटेसौ ता टुरोस आउँ सिदोनक् मानुसलकक् हालट बरुस् सहबा पार्लाहार भेट्थ्ला। 15ए! कफर्नहुमक् मानुसेहेलक्, किस् तोहोलेक् स्वर्गो जाहुँक्ला बाजिहिन् बाजहला? तोहोलेक ता नरकिहिमा जाहाला।”
16तसौ येसुइ चेलालकलाइ बोल्लाहा, “जैहिं तोहोराखर्ह्वाक् कहिन् सुनट्थ्ला, ओहिं मोरा कहिन् सुनट्थ्ला। जैहिं तोहोराखर्ह्वालाइ ना मानेंहार, ओहिं मोरालाइ आको नामानथ् आउँ मोरालाइ नहिंमान्लाहारे मोरालाइ पाठालाहार परमेस्वरिहिलाइ मान्ल नाभेथ्।”
बहत्तरजेना चेलालक् फर्किबानाइ आइल
17येसुइ पाठाल बहत्तरजेना चेलायकलक् एक्दमे खुस्सि भेहिन् फर्किबानाइ आइलुहुन् आउँ येसुक्ठालाइ यन्हिं बाज्लुहुन्, “पर्भु, जब हामि तोरा नाउँ लेहिन् बोलुहुँक् भुतलकुहु हाम्रा कहिन् मानुहुँन्।”
18तसौ येसुइ उखर्ह्वालाइ बोल्लाहा, “सैतानलाइ मुँइ आकासक्भरे बिजुलि मिल्कलक् परौ करिहिंन् खस्ल देख्मिक्। 19दिठाहो, मुँइ तोहोरालाइ सापलकलाइ आउँ बिच्छ्लकलाइ खुँरिहिन् हिंठ्बाक् सक्ति आउँ सत्रुक् जम्मा सक्तिलाइ जिट्बाक् अधिकार देल धर्मेहेर्ला। आउँ कुन्हुँ कहिने तोहोरालाइ नोक्सान कर्बा नाप्पारेहार। 20ओरङ् भेटौ भुतलके तोहोरा कहिन् तेर्ल बाजिहिन् बुन्रामाहो। बरुस्ता तोहोरा नाउँयहार स्वर्गोइ लेख्ल रहेर्ला बाजिहिन् रामाहो।”
येसुइ स्वर्गोइ रैल्ह बापिहिकलाइ धन्यबाट देलक्
(मत्ति ११:२५-२७; १३:१६-१७)
21उहे बेलाइ पबित्र आत्माक्भरे खुस्सि मन भेहिन् येसुइ बाज्लक्, “अ बाबा परमेस्वर, स्वर्गो आउँ धर्तिक् मालिक, मुँइ तोरानि धन्यबाट देमेंर्ला, किसाबुने तुँइ यि कहिनलक् बुद्धिगर आउँ जान्या-बुझ्न्यालकक्भरे नुकाल धरस्ला आउँ बालखलकक् परौ यि मानुसलकलाइ बुझाल धर्सिखान्ला! अ बाबा, यहेरङे कर्बाक् तोरा मन रैल्हास्!
22“मोरा बाबाइ मोरानि सेब्भ्रोउ चिंज जिम्मा देल धरैस्। स्वर्गोक् बाबाइसौ उप्रान्त, मुँइ बेटायकलाइ कुन्हुँहिं नाँचिन्हथ्। उहेरङ् करिहिन् बेटाहिके आउँ बेटाहिके चिन्हाँल मानुसलके छारिहिन् ओर्को कुन्हुँहिं स्वर्गोक् बाबाक्लाइ नाचिन्हथ्।”
23ओक्राक्पाछु येसुइ चेलालकक्पाखा फर्किबानाइ उखर्ह्वालाइ खुसुक्क बोल्लाहा, “यि सेब्भ्रोउ थोक् देख्बा पाबाक् तोहोरा लागि कट्का खुस्सिक् कहिन् हो! 24मुँइ तोहोरानि बोल्मेहेर्ला, थुप्रोय अगमबक्ता आउँ राजालके तोहोलेके देख्ल यि कहिनलक् दिठाबाक् आउँ सुन्बाक् बर्के आस करिहिन् अस्याल रैल्हुहुन्, भेटौ, दिठाबा आउँ सुन्बा आको नहिंपाइलुहुन्।”
दायालु सामरिक् काथाहा
25एक्जेना धर्म-गुरु येसुलाइ जाँच कर्बाक्नि आइलक् आउँ यि परस्न सोर्ल्होकुन्, “गुरु, अजम्मरि जिबन पाबाक्नि मुँइ किस्ग्वा कर्बा पोर्लाहार?”#मत्ति २२:३५-४०; मर्कुस १२:२८-३४
26येसुइ ओक्रानि बोल्लोकुन्, “परमेस्वरे मोसालाइ देल नियमै किस् लेख्ल रहेला? तुँइ किस्ग्वा बुझ्ल रहस्ला?”
27ओहिं बाज्लक्, “तुँइ परमपर्भु, आफ्निक् परमेस्वरलाइ पुरा हिर्दायाइसौ, आफ्निक् पुरा पारानेसौ, आफ्निक् पुरा सक्तिसौ, आउँ आफ्निक् पुरा मनेंसौ पेरेम कर्, आउँ आफ्निक् छिमेकिलाइ आफ्निहिंक्लाइ परौ पेरेम कर्।”
28येसुइ ओक्रालाइ बोल्लोकुन्, “तुँइ ठिके बाज्सिक्, तुँइ ओहोरङे कर्, आउँ तुँइ सटौघरि बाँचस्ला।”#लेबि १८:५
29तसौ ओहिं आफ्निक्लाइ राम्रो देखाबाक् इच्छा करिहिंन् येसुलाइ बोल्लोकुन्, “मोरा छिमेकिसेहे कुन्ग्वा हो ते?”
30तसौ येसुइ ओक्रानि एक्टा काथाहाक्भरे बोल्लोकुन्, “एक्जेना मानुस यरुसलेम सहरक्भटे यरिहो सहरक्पटि झर्तिहि रैल्हक्। ओछि उ मानुस डाँकुलकक् फेलाइ पोर्लोक्। उखर्हाइ ओक्रानि नाङ्ते पारिहिन् पिट्लिहिंक्, आउँ अर्हमर्ह पारिबानाइ छारिहिन् जाइलिहिंक्। 31कहने-कहने उहे पैंदा भेहिन् एक्जेना परमेस्वरक् मन्दिरक् पुझरि जाइतिहि रैल्हक्, तर उ अर्हमर्ह मानुसलाइ देखिहिन्, उ ओर्कोयपटि छट्किहिन् जाइलक्। 32ओहेरङ् करिहिन् फेरि मन्दिरै मदप कर्लाहार लेबि खलकक् एक्जेना मानुस आको उहे ठाउँ भेहिन् आइलक्, ओक्रानि देखिहिन् उहौ ओर्कोयपटि छट्किहिन् जाइलक्। 33तसौ एक्जेना सामरि जातक् मानुस आफ्निक् पैंदामा जाइलटाकै, उहे मानुस भेल ठाँओइ आइपुग्लक्, आउँ ओक्रालाइ देखिहिन् ओक्राक् मन सार्होय दायाइ भोर्लोकुन्।#२ इतिहास २८:१५ 34आउँ ओक्राक्ठालाइ जाहिन् तेल आउँ अङ्गुरक् छिप्ल रस#१०:३४ तेल आउँ अङ्गुरक् छिप्ल रस: उ ताट्कोक् मानुसलके घाउलाइ अज्झ बर्के जुन् भेउस् बाजिहिन् बिरओक् रुपै लागाथ। लागाहिन् ओक्राक् घाउँलकै छेंट्रिय बाँर्हिदेलकुन्, आउँ आफ्निहिंक् गाडाहाक् उप्रै चार्हाहिन् ओक्रालाइ एक्टा भट्ठि घरै लेगाहिन् राम्रोइसम् सिहार कर्लकुन्। 35ओर्को दिन पोर्नेसौ ओहिं चाँरिक् दुइग्वा डबल पैसा#१०:३५ चाँरिक् दुइग्वा डबल पैसा: उटाकै दुइ दिनक् जेला रैल्हकुन्। भट्ठि घरक् मालिकलाइ देहिन् बोल्लोकुन्, ‘यक्रानि सिहार करिहिक्, आउँ अज्झ धेरेक्कुर पैसा लागि बुने मुँइ फर्किहिन् आइल बेलाइ तोरानि देमेर्ला’।”
36यि काथाहा बाजिसक्नेसम् येसुइ ओक्रालाइ बोल्लोकुन्, “तोरा बिचारे यि तिन जेनामाहा डाँकुलकक् हाथै पोर्लाहार मानुसक् छिमेकिसेहे कुन्जेना ठहर्लक्?”
37ओहिं बाज्लक्, “उ मानुसक् उप्रै दाया देखालाहारसेहे।” तसौ येसुइ ओक्रानि बोल्लोकुन्, “असौ जा, तुँहु आको ओहोरेङे कर्।”
मार्था आउँ मरियमक् घरै येसु जाइलक्
38येसु आउँ ओक्राक् चेलायकलक् हिंठ्टे-हिंठ्टे एक्टा गाँओइ पुग्लुहुन्। ओछि मार्था#१०:३८ मार्था: बेथानि बाज्ल यरुसलेमेसौं बाहारक् गाँओइ बस्लाहार लाजरस आउँ मरियमक् दायथा हो। (यहुन्ना ११:१,५,१८) नाउँ भेल अइमाइ मानुसे उखर्ह्वालाइ आफ्निक् घरभिट्रइ लेगाहिन् खुवाबा-पियाबाक् काम कर्लक्।#यहुन्ना ११:१ 39ओक्राक् एक्जेना मरियम नाउँ भेल बैन्हेक् आको रैल्हकुन्। ओहिं येसुक् पाओमा बसिबानाइ येसुइ बाज्ल परमेस्वरक् बचन सुनिहिन् बस्बा ठाल्लक्। 40मार्थासेहे खुवाबा आउँ पियाबाक् काम कर्बाहिमा ठिक्क भेलकुन्। मुँइ माटेन् थुप्रो काम कर्बा पोरोगे बाजिहिन् ओहिं येसुक्ठालाइ आहिन् बाज्लक्, “दिठाउनाँ, पर्भु! भेल भोर्कोक् सेब्भ्रोउ काम मुँहिं कर्बा पोर्लाहार। यि नानुँइ किच्छुय नाँकरइ। किस् तुँइ यक्रालाइ नाहाँ देख्सिक्? ओक्रुहुलाइ मोराठालाइ आहिन् काम कर्बालाग्बा बोलिहिंक्ना।”
41तसौ येसुइ ओक्रानि बोल्लोकुन्, “अ मार्था, तुँइ असाध्य थुप्रय कहिनक् चिन्ता आउँ फिक्रि करस्ला। 42तर चाइल्ह कहिन् ता एकेग्वा रहेला, उहे राम्रो कहिन् मरियमे रोज्लो धरैस्। उ कहिन् ओक्राक् ठालाइसम् कुन्हुँहि ओच्छ्रोबा नाप्पार्देथिक्।”
Seçili Olanlar:
लुका 10: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
