लुका 9
9
येसुइ चेलालकलाइ पर्चार कर्बा पाठालाहा
(मत्ति १०:५-१५; मर्कुस ६:७-१३)
1येसुइ बार्हौजेना चेलालकलाइ हाँख्रालाहा। तसौ उखर्ह्वालाइ जम्मा थरिक् भुतलक् निस्काबाक् आउँ बेरामिलकलाइ राम्रो काराबाक् सक्ति आउँ हक् देलाहा। 2तसौ परमेस्वरक् राज्जेक् बिसइमा पर्चार कर्बा आउँ बेरामिलकलाइ राम्रो काराबा पाठालाहा। 3येसुइ उखर्ह्वालाइ बोल्लाहा, “जख्नि तोहोलेक पर्चार कर्बा जाबाक् तियार भेहोला पैंदाक् लागि किच्छुय बुन् लेगाहो। उ बेलाइ ठेङ्हा, झोला, साटबाक् लुगा, पैसा आउँ खाबाक् थोकलकौ बुन् लेगाहो। 4तोहोरालाइ जुन् घरक् मानुसलके आफ्निक् घरमा भिट्र्याहेर्ला, उ गाँओक्भटे बिदाबारि करिहिन् नहिंहिठ्बायसम्म उहे घरै बसह। 5कुन्हुँ ठाँओक् मानुसलके तोहोरालाइ बस्बा नहिंदेइगल्ह्वार बुनेमा ओछिसौ निस्कलटाकै उ मानुसलकलाइ परमेस्वरे कर्बाक् निसाफक् चेताउनिक् लागि तोहोरा टाङमा लाग्ल धुरलकौ टक्टक्याइबानाइ उहे ठाँओमा छारिदेहेखान्।”#प्रेरित १३:५१; लुका १०:४-११
6तसौ चेलालके गाउँ-गाउँ जाहिन् परमेस्वरक् राज्जेक् खुस्सिक् खभर पर्चार कर्ते आउँ बेरामिलकलाइ राम्रो काराते बुल्लुहुन्।
राजा हेरोद अलमल्ल पोर्लोक्
(मत्ति १४:१-१२; मर्कुस ६:१४-२९)
7रोमक् माहाराजाक् अधिकारमा रहिबानाइ गालिल पर्देसइ राज्जे चालालाहार हेरोदे येसुइ कर्ल कामलकक् कहिन् सुन्लक् आउँ यि सुनिहिंन् हेरोद अलमल्ल पोर्लोक्, किसाबुने कुन्हुँ-कुन्हुँ मानुसलके बाज्बाठाल्ल धर्लुहुन्, “बप्तिस्मा देलाहार यहुन्ना मोर्लोक्भटे बिउँटिबानाइ बाँच्ल रहैस्।”#मत्ति १६:१४; मर्कुस ८:२८; लुका ९:१९ 8कट्काइसेहे “एलिया देख्वार पोर्लो रहैस्” बाजथ्। ओर्कोलकेसेहे “धेरे बर्स आगारिकोक् अगमबक्ता मोर्लोक्भटे बाँचिहिन् आइल भेका” बाजथ्। 9हेरोद राजाइसेहे यन्हिं बाज्लक्, “यहुन्नाक् ता मुँहिं मुर्काट्बा आर्हाल धर्लम्। फेरि यि मानुससेहे कुन्ग्वा भेकाते जक्राक् बिसइमा मुँइ फेरि यरङ् अचम्मक् कहिनलक् सुन्बाठाल्ल रहम्ना?” तसौ ओहिं येसुलाइ भेंटाबाक्नि मन कर्लक्।
येसुइ पाँच हाजार मानुसलकलाइ खुवालाहा
(मत्ति १४:१३-२१; मर्कुस ६:३०-४४; यहुन्ना ६:१-१४)
10येसुइ पाठाल बार्हजेना चेलालक् परमेस्वरक् कहिन् पर्चार करिहिन् फर्कनेंसौ उखर्ह्वाइ आफ्नि-कर्ल कामक् जम्मा कहिन् येसुलाइ जानालिहिंक्। तसौ येसुइ उहेखर्ह्वालाइ माटेन् आफ्निक्सङ्हिं लेहिन् बेथसेदा बाज्ल सहरै जाइलक्। 11भेटौसुधा येसु ओछि जाइल कहिन् थाहा पाइबानाइ थुप्रोय मानुसलके ओक्रालाइ पछ्याटे जाहिन् ओच्छिहि पुग्लुहुन्। तसौ येसुइ उ मानुसलकलाइ खुस्सि भेहिन् भेंटालाहा, आउँ उखर्ह्वालाइ परमेस्वरक् राज्जेक् कहिन् सिखालाहा आउँ राम्रो भेबाक्नि आइलाहार बेरामिलकलाइ राम्रो कारालाहा।
12दिन डुब्बा लाग्लटाकै उ बार्होजेना चेलालक् आइबानाइ येसुलाइ बोल्लिहिंक्, “यछि हामि सुन्सान ठाँओइ रहुँक्ला। उहेसैर्हे यि जम्मा मानुसलकलाइ फर्कबा बोलिहिखान्। उखर्ह्वाइ छेउँछाओक् गाउँलकै जाहिन् आफ्नि-आफ्नि खाबाक् आउँ बस्बाक् ठाउँलक् खोजुस्।”
13येसुइ चेलालकलाइ बोल्लाहा, “उखर्ह्वालकलाइ तोहोलेकिहि खाबा देहो।” तसौ चेलालके येसुलाइ बोल्लिहिंक्, “पर्भु, हाम्राठालाइ पाँचग्वा पिठा आउँ दुइग्वा माछा माटेन् रहेला। किस् हामि यट्काकुर मानुसलकलाइ खुवाबाक् लागि खाबाक्थोक किनिहिंन् आन्बा?”
14किसाबुने ओछि पुर्खर मानुसलक् माटेन् पाँच हाजार जट्का रैल्हुहुन्।
तसौ येसुइ चेलाहिकलकलाइ बोल्लाहा, “जम्मा मानुसलकलाइ पाचास-पाचास जेना काराहिन् बासाहाखान्।”
15तसौ येसुइ बोल्लोहिंक् परौ चेलालके मानुसलकलाइ बासालाहा। 16तसौ येसुइ उ पाँचग्वा पिठा आउँ दुइग्वा माछा लेलक् आउँ स्वर्गोक्पटि दिठाहिंन् परमेस्वरक्सङ्हिं आसिक् माङ्लक्, आउँ भाँचिबानाइ जम्मा मानुसलकलाइ बाँटह बाजिहिन् चेलालकलाइ देलाहा। 17तसौ जम्माहिं आघाउन्याँ खाइलुहुन्। आउँ चेलालके उब्रल टुक्राटाक्रि सङ्र्हाटे बार्हो ढक्या भोरि भेलकुन्।
येसु मुक्ति देलाहार खिरिस्ट
(मत्ति १६:१३-१९; मर्कुस ८:२७-२९)
18एक्दिन येसु अस्करे बसिहिन् परमेस्वरक्सङ्हिं पाराथ्ना कर्बाठाल्ल बेलाइ चेलायक्लकौ येसुहिक् लज्जिकै रैल्हुहुन्। ओहिं चेलालकलाइ सोर्ल्हाहा, “मानुसलके मोरालाइ कुन्जेना बाजिहिन् बोलोट्थ्ला?”
19ओछिसौ चेलाहिकेलके बोल्लिहिंक्, “कुन्हुँइ बाजट्थ्ला बप्तिस्मा देलाहार यहुन्ना, कुन्हुँइ एलिया बाजट्थ्ला आउँ कुन्हुँलके सेहे धेरे बर्स आगारिक् परमेस्वरक् अगमबक्ता मोर्लोलकक् मध्यमा एक्जेना बाँचिहिन् आइल बाजट्थ्ला।”#मत्ति १४:१२; मर्कुस ६:१४-१५; लुका ९:७-८
20तसौ येसुइ उखर्ह्वालाइ सोर्ल्हाहा, “आको तोहोलेकेसेहे मोरालाइ कुन्जेन् बाजिहिन् ठान्हहला?”#यहुन्ना ६:६८-६९
तसौ पत्रुसे यन्हिं बाजिहिन् जुबाप देलकुन्, “तुँइ परमेस्वरे पाठाल मुक्ति देलाहार खिरिस्ट हो!” 21ओट्का भेनेसौ येसुइ उखर्ह्वालाइ “यि कहिन् कुन्हुँहिंलाइ बुन् जानाहो” बाजिहिन् करा आग्या देलाहा।
येसुइ आफ्नि मरनक् बिसइमा बाज्लक्
(मत्ति १६:२०-२८; मर्कुस ८:३०-३८; ९:१)
22तसौ येसुइ उखर्ह्वालाइ बोल्लाहा, “मुँइ मानुसक् बेटायके बर्के सास्ना भोग्बा पोरोइस्। यहुदिलकक् अगुवालक्, बर्के-पुझरिलक् आउँ धर्म-गुरुलकक्भटे हेंपिजाम्ना आउँ मारिजाम्ना, तर तिन-दिनमाहा फेरि मोर्लोक्भटे जिउँटिहिन् उठम्ना।”
23तसौ येसुइ ओछि रैल्हाहार जम्माय मानुसलकलाइ बोल्लाहा, “दिठाहो, कुन्हुँ मानुस मोरा पाछु लागिबानाइ मोरा चेला बन्बा चाहाइस् भेने उ मानुसे आफ्निक्लाइ माया मारिहिन् त्यागुस् आउँ दिन्हुँपट मोर्बाहुक्लाइ तियार भेहिन्#९:२३ दिन्हुँपट मोर्बाहुक्लाइ तियार भेहिन्: गिरिक भासाइ यक्रानि “दिन्हुँपट कुरुस बोकिहिन्” मोरा पैंदाइ हिंठुस्।#मत्ति १०:३८; लुका १४:२७ 24किसाबुने जुन् मानुसे आफ्निक् जिबन जोगाबा चाहाइस्, उ मानुसे आफ्निक् जिबनलाइ गुमाइस्, तर जुन् मानुसे आफ्नि जिबनलाइ मोरा खातिरइ गुमाइस् उ मानुसे आफ्निक् जिबनलाइ जोगाइस्।#मत्ति १०:३९; लुका १७:३३; यहुन्ना १२:२५ 25किसाबुने मानुसे सन्सारिहिलाइ हाथो पारेटौ आफ्निक् आत्मासेहे गुमाइबुने अथबा नास पारिबुने ता ओक्रालाइ किस्ग्वा फैधा भेइटे? 26जुन् मानुस सन्सारमा मोरा नाउँ लेबा आउँ मोरा बचन मान्बाक्लाइ लाजाइस्, मुँइ मानुसक् बेटायकुहु मोरा आउँ परमेस्वर-बाबाक् तसौ पबित्र स्वर्गोदुतलकक् महिमा लेहिन् सन्सारै आइल बेलाइ ओक्रानि मोरा बाज्बाक् लाजाम्ना। 27तर साँच्चिय मुँइ तोहोरानि बोल्मेहेंर्ला, कट्काजेनासेहे यछि ठध्याहिन् बस्लाहारिहिमा परमेस्वरक् राज्जे नहिंदेख्बासम्म नामोरोथ्।”
येसुक् रुप फेर्ल
(मत्ति १७:१-८; मर्कुस ९:२-८)
28यि कहिन् कर्ल एक सातापाछु पत्रुस, यहुन्ना आउँ याकुबलाइ लेइबानाइ येसु डाँराक् उप्रै पाराथ्ना कर्बाक् लागि जाइलक्। 29ओछि येसुइ पाराथ्ना कर्लबक्टै येसुक् अन्ह्वारक् रुप फेरिबानाइ बेग्ले भेलकुन् आउँ ओक्राक् लुगालक् बिजुलि बल्लक् परौ एक्दमे चहकारो भेलकुन्। 30तसौके ओछि दुइजेना मानुस टुभ्लुक्क देख्वार पोर्लुहुन् आउँ येसुक्सङ्हिं आइबानाइ कहिन् कर्बा ठाल्लुहुन्। उखर्ह्वासेहे मोसा आउँ एलिया रैल्हुहुन्। 31उखर्ह्वा स्वर्गोक्भटेकोक् उँजतमाहा टल्कबा ठाल्लुहुन् आउँ यरुसलेमै येसु मोर्बा पोर्लाहार बिसइमा ओक्राक्सङ्हिं कहिन् कर्तिहि रैल्हुहुन्। 32पत्रुस आउँ ओक्राक् सङ्लक् भोरि-निंर सुत्ल रैल्हुहुन्। तसौ पाछु जाग्नेसौ उखर्ह्वाइ येसुलाइ स्वर्गोक्भटे आइल चहकारो उँजतइ टल्टल् टल्कल आउँ ओक्राक्सङ्हिं ठध्याहिन् रैल्ह उहे दुइजेना मानुसलकलाइ देख्लुहुन्। 33तसौ मोसा आउँ एलिया येसुक् ठालाइसौ छुटिहिन् जाबा ठाल्ल बेलाइ पत्रुसे येसुलाइ बोल्लोकुन्, “गुरु, हामि यच्छिहि बस्लय राम्रो भेला, उहेसैर्हे हामि यछि तिनगोटा छँप्रा बानाहुँक्, एक्टा तोरा लागि, एक्टा मोसाक् लागि आउँ एक्टा एलियाक् लागि!” तर उटाकै पत्रुसे आफ्नि किस् बाज्बाठाल्ल धरम्ना बाजिहिन् ओक्रालाइ थाहाय नहिंभेलकुन्।
34पत्रुसे यरङ् बाज्तिहि-बाज्तिहि एक्टा बादर आइबानाइ उखर्ह्वालाइ झाँकालाहा तसौ चेलालक् एक्दमे डरालुहुन्। 35उहे बेलाइ उ बादरक्भटे यन्हिं बाजिहिन् एक्टा आवाज आइलकुन्, “यि मुँइ छान्ल मोरा छाउरा हो, यहिं बोल्लो कहिन् तोहोलेके मानहँ।”#यसैया ४२:१; मत्ति ३:१७; १२:१८; मर्कुस १:११; लुका ३:२२; २ पत्रुस १:१७-१८
36तसौ उ आवाज आहिन् सिधानेसौ पाछु चेलाहिकेलके येसुलाइ माटेन् देख्लिहिंक्। उ समइमा चेलालके आफ्नि देख्ल कहिनलक् कुन्हुँहिलाइ नहिं जानालुहुन्।
भुत लाग्ल ठिठा
(मत्ति १७:१४-१८; मर्कुस ९:१४-२७)
37ओर्को दिन पोर्नेसौ येसु आउँ उ चेलालक् डाँराक्भटे झर्लुहुन्, तसौ मानुसलकक् धुइरो ओक्रालाइ भेंटाबाक्नि आइलुहुन्। 38उ मानुसलकक् धुइरोक्भटे एक्जेना मानुसे चिच्याइबानाइ यन्हिं बाज्लक्, “गुरु, मुँइ तोरानि बिम्ति करम्ना, मोरा पुर्खर छाउराक् उप्रै दाया करिदे। किसाबुने मोरा, उहे माटेन् एकेग्वा छाउरा रहैस्! 39दिठाउनाँ, एक्टा साटालाहार भुते ओक्रालाइ छुयला, आउँ उ एक्कासि चिहिर्बा थालैस्, आउँ ओक्राक्लाइ मुर्छा पारेला। ओक्राक् मुखक्भरे फेहेन् निस्केक्ला। ओक्रालाइ लाछार-पाछार पारिबानाइ माटेन् बल्बलि छारिहिन् जायला। 40आउँ उ साटालाहार भुतलाइ निस्काइदेहेक् बाजिहिन् मुँइ तोरा चेलायरलकुहुलाइ बिम्ति कर्लम्, भेटौ उखर्ह्वाइ नहिंपार्लुहुन्।”
41तसौ येसुइ बोल्लाहा, “एइ बिस्वास नहिंभेलाहार्हेलक् आउँ अट्टेरि मानुसेहेलक्! मुँइ तोहोरासङ्हिं कट्का दिनसेहे बसिहिन् रहबा? मुँइ तोहोरालाइ कख्निसम्मक् लागि सहिन् बस्बा?” ओक्राक्पाछु येसुइ उ ठिठाक् बापिहिकलाइ बोल्लोकुन्, “तोरा बेटाहिरलाइ यछि आनिहिंक्!”
42तसौ ओहिं उ बेटाहिकलाइ लेहिन् आन्तिहि-आन्तिहि साटालाहार भुते ओक्रालाइ पट्किबानाइ काँक्राक्कुँक्रुक् पार्लकुन्। तर येसुइ उ साटालाहार भुतलाइ हप्काइ पाठालकुन्, आउँ उ ठिठालाइ राम्रो काराहिन् बापिहिकलाइ जिम्मा देलकुन्। 43परमेस्वरक् यरङ् बर्के सक्तिक् काम देखिहिन् ओछि रैल्ह जम्माय मानुसलक् डङ् पोर्लुहुन्।
येसुइ फेरि आफ्निक् मरनक् कहिन् निस्कालक्
(मत्ति १७:२२-२३; मर्कुस ९:३०-३२)
मानुसलक् येसुइ कर्ल काम देखिहिन् डङ् पोर्लो बेलाइ येसुइ आफ्निक् चेलालकलाइ बोल्लाहा, 44“मुँइ किस्ग्वा बोल्बा ठाल्ल धर्मेहेर्ला, उ कहिन् जुन् बिस्राहो किसाबुने मानुसक् बेटायक ता पक्रिबानाइ मानुसलकक् हाथै सोपिंजाइस्।” 45तर येसुइ बाज्ल उ कहिन् चेलाहिकेलके बुझ्बा नहिंपार्लुहुन्। यि कहिन् बुझ्बा पार्बाक् ग्यान नहिंपाइल भेइटे येसुइ किस्ग्वा बाज्ल भेका बाजिहिन् उखर्हाइ सोंच्बाय नहिंपार्लुहुन्। येसुइ किवा बाज्ल बाजिहिन् उखर्ह्वाइ सोर्भाहुक् आको आँट कर्बा नहिंपार्लुहुन्।
सेब्भुइसौ बर्के कुन्ग्वा?
(मत्ति १८:१-५; मर्कुस ९:३३-३७)
46एक्बाजि बार्होजेना चेलालकक् माझै कुन्जेनासेहे बर्के बाज्बाक् कहिन् चल्लाहा।#लुका २२:२४ 47येसुइ उखर्ह्वाक् मनक् बिचार थाहा पाहिन् एक्टा चुटुनाइ बालखलाइ आफ्निक् छेंओइ आनिहिन् ठध्यालकुन्। 48तसौ चेलाहिकलकलाइ यन्हिं बोल्लाहा, “जैहिं मोरा नाँओइ यहेरङ् चुटुनाइ बालखलाइ सुइकारट्थ्ला, ओहिं मोरालाइ सुइकार्ल भेट्थ्ला आउँ मोरानि सुइकार्लाहारे मोरालाइ पाठालाहार बाबालाइ सुइकार्ल भेट्थ्ला। तोहोरा मध्यमाहा जुन्सेहे जम्माहिंसौ चुटुनाइ रहैस्, उहेय सेब्भुइसौ बर्के भेइस्।”#मत्ति १०:४०; लुका १०:१६; यहुन्ना १३:२०
जैहिं तोहोरा बिरोध नाकरथ, उ तोहोरे पछेक् भेट्थ्ला
(मर्कुस ९:३८-४०)
49तसौ यहुन्नाइ बाज्लक्, “गुरु, हामि एक्टा मानुसे तोरा नाउँ लेहिन् भुतलक् निस्काल देखुहुँक्, तसौ हामि ओक्रानि उ काम कर्बा रोकिदेहुँक्। किसाबुने उ ता हाम्रा समुहक् मानुसे बोइने रौहोक्।”
50तर येसुइ ओक्रालाइ बोल्लोकुन्, “ओक्रानि बुन् रोकोहोक्, किसाबुने जैहिं तोहोरा बिरोध नाकरथ, उ तोहोरे पछेक् भेट्थ्ला।”
सामरिलकक्भटे बिरोध
51येसु स्वर्गो जाबाक् बेला भेबालाग्ल सैर्हे ओक्राक् भिट्रक् मनिहिसौ यरुसलेमिहिक्पटि जाम्ना बाजिहिन् जाइलक्। 52येसुइ “पैल्हाहि सेप्थोक् तियार पार्तिहि करह” बाजिहिन् कुन्हुँ मानुसलकलाइ पाठालाहा, तसौ उखर्ह्वा जाइबानाइ सामरिलकक् एक्टा गाँओइ पोस्लुहुन्। 53तर येसु यरुसलेमक्पटि जाइस् बाज्बाक् कहिन् थाहा पाइबानाइ कुन्हुँहि ओक्रानि स्वागत नहिंकर्लिहिंक्। 54यि देखिहिन् ओक्राक् चेलायक् याकुब आउँ यहुन्नाइ येसुलाइ बोल्लिहिंक्, “पर्भु, नाँ स्वर्गोक्भटे आगि झारिहिंन् हामि यि मानुसलकलाइ भस्म पार्बा? तुँइ किवा चाहास्ला?”#२ राजा १:९-१६
55तर येसुइ फानाट्के फर्किबानाइ उखर्ह्वालाइ ओरोङ् बाज्ल सिहिरे हप्कालाहा। [आउँ यन्हिं बोल्लाहा, “तोहोराठालाइ कनौ खालक् मन भेबापोर्लाहार, उ ता तोहोराखर्ह्वाइ बुझ्लय नाहाँखम्। मुँइ मानुसक् बेटायक ता मानुसलकलाइ नास कर्बा बाजिहिन् बोइने तर उखर्ह्वानि बाँचाबाक्नि पे आइल रहम्ना।”]#९:५५ पैल्हाकोक् कुन्हुँ-कुन्हुँ कट्कापय पान्डुलिपिलकै बाराकेटइ धर्ल भाग नापायक्। 56ओक्राक्पाछु येसुइ चेलालकलाइ लेहिन् ओर्कोय गाँओइ जाइलक्।
येसुलाइ पछ्याटे चुकाबाक् मोल
(मत्ति ८:१९-२२)
57येसु आउँ ओक्राक् चेलायकलक् जाइतिहि कर्लटाकै एक्जेना मानुसे आइबानाइ येसुलाइ बोल्लोकुन्, “तुँइ जच्छि जास्ला मुँइ आको तोरे पाछु जाम्ना।”
58तसौ येसुइ ओक्रालाइ बोल्लोकुन्, “दिठाउ, खड्गिद्रालकक् बस्बाक्नि ओडार रहेट्थ्ला, चरै-चुर्गुनिलकक् अँठ्रालक् रेहेट्थ्ला, तर मुँइ मानुसक् बेटायकक्सेहे साँठाबाहुक्लाइ ठाँओउ बोइने।”
59फेरि ओर्को एक्जेना मानुसलाइ येसुइ बोल्लोकुन्, “मोरा पाछु आउ!” तर ओहिं बोल्लोकुन्, “गुरु, पैल्हे मुँइ जाइबानाइके मोरा बाबाक् लास गार्बादे।”
60तसौ ओक्रालाइ येसुइ जुबाप देलकुन्, “मोर्लोलकलाइ मोर्लाहारलकिहि गारुस्। तर तुँइसेहे जाइबानाइ परमेस्वरक् राज्जेक् खभरलक् सुनाटे बुलिहिखान्।”
61फेरि ओर्को एक्जेना मानुसेहु येसुलाइ बोल्लोकुन्, “पर्भु, मुँइ तोरा चेला बन्बा चाहाम्ना, तर मोरानि पैल्हा घरक्भटे बिदाबारि करिहिन् आबादे।”#१ राजा १९:२०
62तर येसुइ ओक्रानि बोल्लोकुन्, “होर जोट्लोटाकै पाछारिक्पटि फर्कि-फर्कि दिठाहिन् धर्लाहार मानुससेहे परमेस्वरक् राज्जेक् लागि काम नालागेक्।”
Seçili Olanlar:
लुका 9: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
