लुका 11
11
येसुइ सिखाल पाराथ्ना
(मत्ति ६:९-१३; ७:७-११)
1एक्बाजि येसु एक ठाँओइ बसिहिन् पाराथ्ना कर्तिहि रैल्हक्। पाराथ्ना करिहिन् सक्नेसौ ओक्राक् चेलायकलक्मध्ये एक्जेनाइ बोल्लोकुन्, “पर्भु, बप्तिस्मा देलाहार यहुन्नाइ आफ्निक् चेलाहिकलकलाइ पाराथ्ना कर्बा सिखालक् परौ, तुहुँ हाम्रानि पाराथ्ना कर्बा सिखाउ ना।”
2तसौ येसुइ उखर्ह्वालाइ बोल्लाहा, “तोहोलेके यन्हिं बाजिहिन् पाराथ्ना करह–
“अ परमेस्वर बाबा,
तोरा नाउँ पबित्र मानिजाउस्,
तोरा राज्जे आउस्,
3हाम्रानि चाइल्ह खाबाक् थोक् दिनुहुँक्पट् जुराइदे।
4हामि कर्ल पापलक् छेमा करिदे,
किसाबुने हाम्रालाइ नराम्रो कर्लाहारुहुलाइ हामि छेमा करुहुँक्ला।
आउँ हाम्रालाइ पापक्पाखा लेगालाहार परिछ्याक्भटे जोगाउ।”
5ओक्राक्पाछु येसुइ उ चेलाहिकलकलाइ सिखातिहि बोल्लाहा, “बोलोउ, तोहोलेक मध्य कुन्हुँक् यरङ् सङ् भेहेरा, आउँ आधाराति जाहिन् उ सङ्लाइ बोल्बेहेका, ‘अ मोरा सङ्, मोरालाइ तिनमाना साटु पैंचो देना। 6किसाबुने मोरा घरै अक्खन्पे मोरा एक्टा सङ् एक्दम टार्होक्भरे आइल रहैस्। ओक्रालाइ खुवाबाक् लागि मोराठालाइ अख्नि किच्छु खाबाक् थोके बोइने।’ 7तस्के उ सङिहिंके घर भिट्रक्भरे यन्हिं बोलेला, ‘हेय! मोरानि दुक्ख बुन्देना। दिहाँर टाँकिहिन् सक्ल धरम्ना, केराकुटिलकौ मोरेसङ्हिं ओछ्यानइ सुत्ल रहट्थ्ला। अख्नि मुँइ उठिबानाइ तोरानि किच्छु चिंज देबा नाप्पारम्’।” 8ओट्का कहिन् बाजिसक्नेसौ येसुइ उखर्ह्वालाइ यरङ् कहिन् बाजिहिन् सम्झालाहा, “मुँइ तोहोरानि बोल्मेहेर्ला, ओहिं आफ्नि सङ् सम्झिबानाइ ओक्रालाइ चाइल्ह साटु नहिंदेटौसुधा ओहिं लाजे नहिंमानिहिंन् माङ्लक्-माङ्लय कर्ल सिहिरे ओक्रालाइ उ सङिहिंके उठिबानाइ चाइल्ह जट्का सेब्भ्रौथोक् देइपाठायला। 9उहेसैर्हे मुँइ तोहोरालाइ बोल्मेहेर्ला, माङ्हना परमेस्वरक्भटे तोहोराखर्ह्वाइ पाहोला, खोजोहोना तोहोलेके भेटाहोला, ढक्ढकाहोटा परमेस्वरे तोहोरा लागि दिहाँर उद्रिदेहेर्ला। 10किसाबुने जैहिं माङइस् ओहिं पाइस्, जैहिं खोजोइस् ओहिं भेंटाइस् आउँ जैहिं ढक्ढकाइस् ओक्राक् लागि दिहाँर उँद्रिजायक्ला।
11“किस् तोहोरामध्ये कुन्हुँ ओरोङ् बाप्पो रहट्थ्लाटे, जैहिं बेटाहिके माछा माङ्लटाकै माछा देबाक् साँटा साप देइस्? 12ओरोङ् करिहिन् डिमा माङ्लटाकै कुने डिमा देबाक् साँटा बिच्छ् देइस् भेका? 13ओरोङ् भेइटे तोहोलेक पापि मानुस भेटौसुधा आफ्निक् छावापुटालाइ मज्जाक् थोक् देबा पोर्लाहार बाजिहिन् थाहा रेहेर्ला बुनेमा तोहोरा स्वर्गोइ बस्लाहार परमेस्वर बापिहारे झन् ओक्राक्ठालाइ माङ्लाहारलकलाइ ओहिं कट्का बर्ता करिहिंन् पबित्र आत्मा देट्थ्ला।”
येसुक् उप्रमाहा सङ्खा
(मत्ति १२:२२-३०; मर्कुस ३:२०-२७)
14एक ठाँओइ एक्जेना मानुसलाइ भुते लाटा बानाल धर्लकुन्। तसौ येसुइ उ मानुसक्भटे भुतलाइ निस्काइदेलकुन्, आउँ उ मानुस साराबा पार्लाहार भेहिन् कहिन् कर्बा ठाल्लक्। ओक्रानि देखिबानाइ मानुसलक् छक्कय पोर्लुहुन्। 15भेटौसुधा उखर्ह्वाक् मध्यमा कट्काइसेहे यन्हिं बाज्लुहुन्, “यहिं ता भुतक् राजा बालजिबुलक्#११:१५ बालजिबुलक्: बालजिबुल बाज्ल सैतानक् ओर्को नाउँयक् हो। सक्तिक्भरे भुतलक् निस्काइस्।”#मत्ति ९:३४; १०:२५
16तसौ कट्काइसेहे येसुलाइ जाँचबाक् लागि यन्हिं बोल्लिहिंक्, “यि काम परमेस्वरक् सक्तिक्भरे कर्ल भेइबुने तुँइ हाम्रानि स्वर्गोक्भटे एक्टा चिन्हो देखाउ।”#मत्ति १२:३८; मर्कुस ८:११ 17ओछिसौ येसुइ उखर्ह्वाक् बिचार बुझिबानाइ यन्हिं बोल्लाहा, “कुन्हुँ देसइ कहिन् मिल्बा नहिंपारिबानाइ छुट्ल रहट्थ्ला भेनेमा उ देस ओन्हि नास भेहिन् जायला। ओहोरोङ् करिहिन् आफ्नि घरभिट्रइ झग्रा भेहिन् बस्ल घर आको नास भेहिन् जायला। 18यहेरङ् करिहिन् यदि सैताने आफ्निक् बिरोध आफ्नि करिबुने ओक्राक् राज्जे कहने चल्बा पारेकाबे ते? तोहोलेकसेहे मोरालाइ भुतलकक् राजा बालजिबुलक् सक्तिक्भरे भुत निस्काल बाजिहिन् बोल्तिहि रहला। 19मुँइ बालजिबुलक् सक्तिक्भरे भुतलकलाइ निस्काम्ना भेनेमा, तोहोरा चेलालकेसेहे कुनाहाँक् सक्तिक्भरे निस्काट्थ्ला भेकाते? तोहोरा चेलालकिहि तोहोलेके गलत बिचार कर्ल धरहला बाजिहिन् देखाइदेहेर्ला। 20तर मुँइ परमेस्वरक् सक्तिक्भरे भुतलक् निस्काल रहम्ना बुनेमा तोहोराठालाइ परमेस्वरक् राज्जे आहिंन् सक्ल रहेला बाजिहिंन् जानहँ।
21“हाथहथ्यार भिरिहिन् बस्ल बल्यो मानुसे घर रुङ्बा बसिबुने सेब्भ्रोउ मालसामानलक् जोगेला। 22तर ओक्राइसौ बल्यो मानुस ओछि आइबुने ता ओक्रानि जितिहालेला आउँ ओहिं भर कर्ल जम्मा हाथहथ्यारलक् ओच्छ्रिबानाइ घरक् मालसामानौ लुटिबानाइ लेगाहिन् ओक्राक् आफ्निक् सङ्लकक्सङ्हिं बाँटि हालैस्।
23“ओहोरोङ् करिहिन् मोरासाथइ नहिंहिंठ्लाहार मानुस मोरा बिरोधि हो। मोरालाइ सङ्र्हाबा नहिंलाग्लाहार मानुसे सङ्र्हाल चिंजौ र्याइछ्याइ पारैस्।#मर्कुस ९:४०
हिर्दाया खालि बुन् धर्बा
(मत्ति १२:४३-४५)
24“कुन्हुँ मानुसक्भरे भुत निस्कानेसौ उ भुत सुन्सान्न ठाँओमा चारौपटि जाइबानाइ मज्जाइसौ बस्बाक् ठाउँ खोज्ते बुलैस्। ओरोङ् ठाउँ कट्टुहु नहिं पाइनेसौ ‘पैल्हा बस्ल घरिहिमा जाबा पोरि’ बाजिहिन् उ भुत फर्कैस्। 25ओछि जाइपुग्ल टाकै आघुल्कोक् बस्ल घर सप्फा आउँ सिङार कर्ल देखैस्। 26यरङ् देखिहिन् ओहिं ओर्को सातगोटा आफ्निहिंसौ अज्झ दुस्ट भुतलकलाइ हाँख्राहिन् आनैस् आउँ उखर्ह्वा जम्मायँ घरभिट्र पोसिबानाइ बस्बा ठालट्थ्ला। उ मानुसक् हालट पैंल्हाकोकेसौ पाछुल्कोक् हालटसेहे अज्झ डराउँनि भेक्ला।”
बचन सुनिहिन् मान्लाहारे आसिक् पाट्थ्ला
27येसुइ कहिन् कर्तिहि-कर्तिहि मानुसलकक् भिरक्भटे एक्जेना अइमाइ चिच्याइबानाइ यन्हिं बाज्लक्, “तोरानि जल्म देलाहार आउँ दुर्ह् खुवालाहार महँटार कट्का धेरे आसिक् पाइल रहैस्!”
28यि कहिन् सुन्नेसौ येसुइ यन्हिं बोल्लाहा, “बरुस् परमेस्वरक् बचन सुनिहिन् मान्लाहारलके ते आसिक् पाइल भेट्थ्ला!”
योनाक् चिन्हो
(मत्ति १२:३८-४२)
29ओछि मानुसलकक् धुइरो बर्ह्टे जाइलुहुन्। उहे बेलाइ येसुइ बोल्लाहा, “आजुकाल्हुकोक् मानुसलक् कट्का दुस्ट रहट्थ्ला! उखर्हा सक्तिगर चिन्हो दिठाबा चाहाट्थ्ला। भेटौसुधा परमेस्वरे अगमबक्ता योनाक् पालामाहा देखाल चिन्हो बाहेक उखर्ह्वाइ ओर्को कुन्हुँ आको चिन्हो देख्बा नापाथ।#मत्ति १६:४; मर्कुस ८:१२ 30योना निनबे सहरक् मानुसलकक् लागि चिन्हो भेलक् परौ आजुकाल्हुकोक् मानुसलकक् लागि मुँइ मानुसक् बेटायके चिन्हो हो।#योना ३:४ 31तसौ नियाँक् दिनै दखिनक् सेबा बाज्ल देसक् रानि उठिबानाइ आजुकाल्हुकोक् मानुसलकलाइ दोस लागाइस्, किसाबुने सोलोमन राजाक् बुद्धिक् कहिन् सुन्बाक्नि उ धेरे टार्होक्भटे हिंठिहिन् आइल रैल्हक्। असौ दिठाहो, सोलोमनेसौं अज्झ बर्के एक्जेना यछि रहैस्। भेटौ तोहोलेके ओक्राक् कहिन् सुन्बा नाचाहो।#१ राजा १०:१-१०; २ इतिहास ९:१-१२ 32तसौ नियाँक् दिनै निनबे सहरक् मानुसलक् उठिबानाइ अख्निकोक् मानुसलकलाइ दोस लागाट्थ्ला, किसाबुने योनाइ परमेस्वरक् बचन पर्चार कर्ते उखर्ह्वाइ आफ्नि-आफ्निक् पापलाइ पस्चाताप करिहिन् छार्लुहुन्। असौ दिठाहो, योनाइसौ अज्झ बर्के एक्जेना यछि रहैस्। भेटौ तोहोलेक आफ्निक् पापलाइ पस्चाताप कर्बा नाचाहो।#योना ३:५
हिर्दायाक् आँख धुन्ध बुन्भेउस्
(मत्ति ५:१५; ६:२२-२३)
33“दिब्या बालिहिन् कुन्हुँइ पाथिय झाँकाहिन् नाधरथ् आउँ नुकाहिनौ नाधरथ्। बरुस्ता भिटर आइलाहार मानुसलाइ उँजत भेउस् बाजिहिन् ओल्गो ठाँओइ धरट्थ्ला।#मत्ति ५:१५; मर्कुस ४:२१; लुका ८:१६ 34तोरा देहिक् लागि दिब्यासेहे तोरा आँख हो। आँख राम्रो भेइगलास् बुनेमा तोरा पुराय देहि उँजत भेस्ला, आउँ आँख धुन्ध भेइबुने तोरा देहिय आँधार भेस्ला। 35उहेसैर्हे हस् करिहिन् बसह, तोहोरा हिर्दयाक् आँख धुन्ध बुन्भेउस्, नाटेन् ता आँधारे तोरा भिट्रइ भेल उँजतलाइ झाँकाइदेस्ला। 36तोरा देहिक् कुन्हुँ अङ्ग आँधारमा नहिंभेहिन् जम्माय उँजत रहेस्ला भेने उ जम्माय देहि चम्केस्ला, जहरङ् दिब्याक् उँजत तोरा उप्रै चम्केला।”
फरिसि आउँ धर्म-गुरुलकलाइ येसुक् चेताउनि
(मत्ति २३:१-३६; मर्कुस १२:३८-४०)
37येसुइ यि कहिन् बाजिहिन् सक्नेसौं एक्जेना फरिसि मानुसे ओक्रालाइ आफ्निक् घरै खाबाक्नि हाँख्रालकुन्। तसौ येसु ओक्राक् घरै जाहिन् खाबा बस्लक्। 38येसुइ आफ्निक् हाथ नहिंधोहिने खाबा ठाल्ल देखिहिन् ओक्रालाइ हाँख्रालाहार फरिसि छक्क पोर्लक्। 39तसौ पर्भुइ ओक्रालाइ बोल्लोकुन्, “तोहोलेक फरिसिलके ठारि आउँ टस्या धोइलक् परौ बाहारक्पटि माटेन् आफ्निलाइ चोंख्याहोला, तर भिट्रक्पटिसेहे तोहोरा लोभ आउँ दुस्ट बिचारे भोर्लो रेहेर्ला। 40ए मुर्ख मानुसेहेलक्, तोहोराखर्ह्वाइ किसा नाबुझह? किस् बाहारक् रुप बानालाहार परमेस्वरे भिट्रक् मन आको बानाल बोइने ते? 41ठारि आउँ टस्याइ भेल थोकलक् गरिपलकलाइ दान देहो, आउँ तोहोराखर्ह्वाक् लागि जम्माय थोक् सुद्ध भेहेर्ला।
42“धिक्कार तोहोलेक फरिसिहेलकलाइ! पुदिना, आरुद आउँ ओर्को जरिबुटिक् उब्जनिक्भटे परमेस्वरलाइ दसाङ्स् चार्हाहोला, तर नियाँ आउँ परमेस्वरलाइ पेरेम कर्बाक् कहिन्सेहे वास्ताय नाकरह। ओर्को कहिनक् सङसङ्हिं तोहोराखर्ह्वाइ नियाँ आउँ पेरेम कर्बाहुक् करह।#लेबि २७:३०
43“धिक्कार तोहोलेक फरिसिहेलकलाइ! तोहोराखर्हा सभाघरक् मुख्य ठाँओइ बस्बाक् आउँ बाजारक्पटि ओर्कोलके नमस्कार कर्ल चाहोला। 44धिक्कार तोहोराखर्ह्वालाइ! तोहोराखर्ह्वा चिन्भाय नहिंपार्लाहार चिहानक् परौ रहला। ओरोङ् देख्बा नहिंपार्लाहार चिहानै ता मानुसलक् थाहा नहिंपाहिने उप्रक्भटे हिंठट्थ्ला।”
45तसौ येसुलाइ एक्जेना धर्म-गुरुइ बोल्लोकुन्, “गुरुज्यु, यरङ् बाजिहिन् ता तुँइ हाम्रानि आको कनङ् लाजमर्डो कारातिहि रहस्ला।”
46तसौ येसुइ जुबाप देलकुन्, “तोहोलेक धर्म-गुरुलकुहुलाइ आको धिक्कार! तोहोराखर्ह्वा ता धर्म-कर्मक् गर्ह्व-भारा मानुसलकलाइ बोकाहोला। भेटौ आफ्निसेहे भारा अल्गाबा लाग्बाता परेजाउस्, अङ्ङुरुहु आको नाछुहो। 47धिक्कार तोहोराखर्ह्वालाइ! किसाबुने तोहोराखर्हाइ आफ्निक् पैल्हेकोक् पुर्खालके मार्ल अगमबक्तालकक् लागि मज्जाक्-मज्जाक् चिहानलक् बानाहोला। 48यरङ् करिहिन् तोहोराखर्ह्वाइ तोहोराखर्ह्वाक् आफ्निक् पुर्खालके कर्ल कामलकै सहमत कर्लयरहला। उखर्ह्वाइ अगमबक्तालकलाइ मार्लाहा, तसौ तोहोराखर्हाइसेहे उखर्ह्वाक् चिहान बानाहोला। 49उहेसैर्हे जम्मा कहिन् जान्लाहार परमेस्वरे पैल्हाहिंसौ बोल्लो धर्लाहा, ‘मुँइ उखर्ह्वाक्ठालाइ अगमबक्ता आउँ दुतलक् पाठाम्ना। तसौ उखर्ह्वाइ कुन्हुँलाइ साँटायट्थ्ला आउँ कुन्हुँलाइ मारेट्थ्ला।’ 50यिहेसैर्हे सन्सारक् सुरुइसौ अख्निसम्मक् मार्ल अगमबक्तालकक् रकट बाहाल दोसक् लेखा यिहे पुस्ताक् मानुसलकेहि देबा पोरेट्थ्ला। 51होय, मुँइ बाजम्ना, हाबिललाइ मार्ल समइसौ मन्दिर आउँ बेदिक् चोंखो ठाँओक् माझै मार्ल जकरियासम्मकोक् अगमबक्तालकक् रकट बाहाल दोस जट्का जम्मा यिहे पुस्ताक् मानुसलकक् थाप्लाहिंमा पोर्बा जायट्थ्ला।#उत्पति ४:८; २ इतिहास २४:२०-२१
52“तोहोलेक धर्म-गुरुलकलाइ धिक्कार! तोहोराठालाइ ग्यान आउँ बुद्धिक् दिहाँर उँद्रबाक् साँचा रेहेर्ला। भेटौ तोहोराखर्ह्वा आफ्निऔ भिटर नाहाँ पोसोहो आउँ ओर्कोलकुहुलाइ पोस्बा नाहाँदेहो।”
53येसु उ ठाउँयसौ निस्कनेसौ धर्म-गुरु आउँ फरिसिलके ओक्रालाइ सार्होय बिरोध कर्बा ठाल्लिहिंक् आउँ ओक्राक्सङ्हिं थुप्रय कहिनलक् सोर्भा ठाल्लिहिंक्। 54किसाबुने ओहिं जुबाप देलटाकै कुन्हुँ कहिनलकै भुल भेंटाबा पारेला ना बाजिहिन् उखर्हाइ दाउ खोज्बा ठाल्लुहुन्।
Seçili Olanlar:
लुका 11: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
