लुका 12
12
कपटक्भरे जोगिहिन् बस्बाक् चेताउनि
(मत्ति १०:२६-२७)
1येसुक्ठालाइ हाजारौ-हाजार मानुसलक् जम्मा भेहिन् ओछि यरङ् सम्मकि एक्जेनाइ ओर्कोलाइ खुँर्-खाँर् पार्बाक् भेल रैल्लुहुन्। उ बेलाइ येसुइ पैल्हा आफ्निक् चेलाहिकलकलाइ यन्हिं बोल्बा ठाल्लाहा, “तोहोलेक फरिसिलकक् पिठाइ मिसाल खमिरक्भटे जोगिहिन् बसह! बाज्बाक् अर्थसेहे, उखर्ह्वाक् कपटक्भरे जोगिहिन् बसह।#मत्ति १६:६; मर्कुस ८:१५ 2किसाबुने जुन्थोक् झाँकाल रहेला, उ थोक् एक्दिन उभाङे भेला आउँ नुकाल रैल्ह सेप्थोक् एक्दिन जम्मा थाहा भेला।#मर्कुस ४:२२; लुका ८:१७ 3तोहोलेके आँधारइ बाज्ल कहिन् एक्दिन मानुसलके दिनक् उँजतइ सुनट्थ्ला। तसौ घरभिट्रइ खास्काखुस्कि कर्ल कहिन् घरक् धुँरिक्भटे पर्चार भेहेर्ला।”
हामि कुनाहाँक्सङ्हिं डराबा
(मत्ति १०:२८-३१)
4येसुइ फेरि बोल्लाहा, “मोरा सङेहेलक्, मुँइ तोहोरालाइ बोल्मेहेर्ला, मानुसक्सङ्हिं बुन् डराहो। किसाबुने उखर्ह्वाइ ता तोहोरा देहि माटेन् नास कर्बा पारट्थ्ला, तोहोरा आत्मालाइसेहे नोक्सान कर्बा नाप्पारथ। 5तोहोलेक कुनाहाँक्सङ्हिं डराबा पोर्लाहार बाजिहिन् मुँइ तोहोरालाइ बोल्मेहेर्ला, मोरिहिन् पाछु नरकक् दन्ड देबा पार्लाहार परमेस्वरक्सङ्हिं डराबा पोर्लाहार। हो, उहे परमेस्वरक् सङ्हिंय डराहो!
6“तर दिठाहो, पाँचगोटा भङेरा चरै दुइ पैसाहिंमा बेचट्थ्ला, बोइने ते? भङेरा यट्का थोर्के पैसा पोर्लाहार भेटौसुधा परमेस्वरे एकौगोटालाइ आको ना बिस्राओइ। 7अज्झ तोहोरा ता झन् कापारक् झोंटाउसुधा कैग्वा रेहेर्ला बाजिहिन् परमेस्वरे गिन्ल धरिदेहेर्ला। उहेसैर्हे बुन् डराहो, थुप्रो भङेरा चरैलकेसौ तोहोलेक एक्दमे बर्ता मोलक् रहला।
येसुलाइ मान्बाक् आउँ नहिंमान्बाक् कहिन्
(मत्ति १०:३२-३३; १२:३२; १०:१९-२०)
8“मुँइ तोहोरालाइ बोल्मेहेर्ला, जुन् मानुसे मोरालाइ मानुसलकक् आगारि मोरा पर्भु हो बाजिहिन् मानैस्, ओक्रालाइ मुँइ मानुसक् बेटायकुहु स्वर्गोदुतलकक् आगारि मोरे आफ्निक् हो बाजिहिन् मान्मिना। 9तर जैहिं मोरालाइ मानुसलकक् आगारि नाचिन्हम् बाजैस्, ओक्रालाइ मुँहु परमेस्वरक् स्वर्गोदुतलकक् आगारि ना चिन्म्हेर बोल्मिना।
10“आउँ जुन् मानुसे मुँइ मानुसक् बेटाहिकक् बिरोधमा किच्छु बाजैस् ओक्रानि छेमा भेक्ला, तर जुन् मानुसे पबित्र आत्माक् बिरोधइ नराम्रो कहिन् बाजैस् ओक्रानि छेमा नाभेक्।#मत्ति १२:३२; मर्कुस ३:२९
11“जख्नि तोहोरालाइ बिरोधि मानुसलके मोरालाइ मान्ल सिहिरे पक्रिबानाइ सभाघरलकमा बर्बरे मानुसलकक् ठालाइ आउँ सरखारि अड्डाक् हाकिमलकक् ठालाइ अथबा नियाँ कर्लाहार नियाँधिसक् आगारि लेगाहेर्ला, उ बेलाइ किस् बाज्बा बाजिहिन् सुर्ता जुन्करह।#मत्ति १०:१९-२०; मर्कुस १३:११; लुका २१:१४-१५ 12किसाबुने उ बेलाइ तोहोलेके किस् बाज्बा पोर्लाहार उ कहिनलक् उहे बेलाइ पबित्र आत्माइ तोहोरालाइ सिखाहेर्ला।”
एक्जेना मुर्ख धनि मानुसक् खिसा
13ओछि रैल्ह थुप्रो मानुसलकक् भिरक्भरे एक्जेना मानुसे येसुलाइ यन्हिं बोल्लोकुन्, “गुरुज्यु, ‘मोरा ताचुलाइ मोरा बाबाक् सम्पतिक्भटे मुँइ पाबाक् अङ्स देहिक्’ बाजिहिन् बोलिहिक् ना।”
14तर येसुइ उ मानुसलाइ बोल्लोकुन्, “अ बाबु, तोहोरा दुइजेनाक् बिचै कुने मोरालाइ अङ्सबन्डा कर्बा अथबा नियाँ कर्बाक् लागि खटाल रहैस्?” 15तसौ येसुइ ओक्रालाइ आउँ ओछि रैल्ह जम्मा मानुसलकलाइ बोल्लाहा, “हस् करह! सेब्भ्रोउ थरिकाक् लोभ-लालचक्भटे जोगिहिन् बसह, किसाबुने मानुसक् कट्कौ धनसम्पति रैल्ह भेटौ उ मानुसलाइ धनसम्पतिय ओक्रालाइ साँच्चिहिकक् जिबनसेहे नाँदेक्।”
16ओक्राक्पाछु येसुइ यन्हिं बाजिहिन् एक्टा खिसा लेहिन् सुनालाहा, “एक्जेना धनि मानुस रैल्हक् ओक्राक् खेतबारिक्भटे एक्दमे धेरे उब्जाउ भेल रैल्हकुन्। 17तसौ ओहिं मनमने यन्हिं बाज्बा ठाल्लक्, ‘मोरा खेत बारिक्भरे थुप्रोय अन्न उब्जाउ भेल रहैस्। असौ यि अन्न धर्बाक् ठाँओउ बोइने, कच्छि धर्बा भेका? असौ मुँइ किस् कर्बा?’ 18तस्के ओहिं मनै बिचार करिहिन् यन्हिं बाज्लक्, ‘असौ मुँइ यन्हिं कर्बा पोरि, मुँइ छोट्-छोटे भाखारिलक् भट्काइबानाइ बारा-बारा बानाम्ना आउँ ओच्छिहि मोरा जम्मा अन्नलक् आउँ ओर्को सम्पतिलक् धरम्ना। 19तसौके मुँइ आफ्निक्लाइ बोलोम्ना, तुँइ कट्का भागि मानुस रहस्ला! तोरासङ्हिं थुप्रो बर्ससम्म पुग्लाहार थुप्रोय धनसम्पति थुप्रल रहेस्ला, उहेसैर्हे तुँइ खुस्सि मानिहिन् मज्जाइसौ खाहिन्, पिहिन् आउँ मज्मज्जा करिहिन् बस्।’ 20तर परमेस्वरे ओक्रालाइ बोल्लोकुन्, ‘अ मुर्ख मानुसस्, आजु रातिहि तोरा पारान जायस्ला आउँ तुँइ थुप्र्याइबानाइ धर्ल धनसम्पतिलक् कुने खाइदेस्ला’?”
21तसौ येसुइ यि खिसा यन्हिं बाजिहिन् सिधालक्, “आफ्निक् लागि धनसम्पतिलक् थुप्र्यालाहार, तर परमेस्वरक् नजरइ धनि नहिंभेलाहार मानुसक् हालट यहेरङे भेट्थ्ला।”
चिन्ता जुन्करह
(मत्ति ६:२५-३४)
22ओक्राक्पाछु येसुइ आफ्निक् चेलालकलाइ बोल्लाहा, “ओहोरङ् भेइटे मुँइ बोल्मेहेर्ला, आफ्नि बाँच्बाक् लागि किवा खाबा, देहिमा किवा पेहेर्बा बाजिहिन् चिन्ता जुन्करह। 23किसाबुने खाबाक् थोकेसौ जिबन बर्के आउँ पेहेर्बाक् लुगाफाटाइसौ देहिय बर्के हो। 24कौवालकलाइ दिठाहिन् बिचार करह! उखर्ह्वाइ ना ता खेति करट्थ्ला, ना बालि काट्थ्ला। उखर्ह्वाक् धन्सारौ नाभेथ्, भाखारिऔ नाभेथ्, भेटौसुधा परमेस्वरे उखर्ह्वालाइ खुवालय धरेट्थ्ला। तोहोराखर्हा ता परमेस्वरक् नजरमा उ चरै-चुर्गुनिलकेसौ एक्दमे धेरे मोलक् रहला। 25किस् तोहोलेक मध्यमा कुन्हुँइ चिन्ता करिहिन् आफ्निक् जिबनै एक घरिऔ बार्हाबा पारहला ते? 26तोहोलेके यट्का चुटिकन् कामौ ता कर्बा नाप्पारह भेइबुनेमा ओर्को बारा-बारा कहिनक् चिन्ता किसा करहला? 27बनै भेल फुललकलाइ दिठाहो, उखर्ह्वाइ कामौ नाकरथ, पेहेर्बाक् लागि लुगाउ नाबानाथ, भेटौ उखर्ह्वा कट्का राम्रो देख्लाहार भेट्थ्ला। तर मुँइ तोहोरालाइ बोल्मेहेर्ला, सोलोमन राजाक् ठालाइ भेल ओट्काकुर धनसम्पति भेहिनौ उ ता उ फुलक् परौऔ सिङार्ल नहिंरैल्हक्।#१ राजा १०:४-७; २ इतिहास ९:३-६ 28आजु राम्रो देख्लाहार आउँ सुखिबानाइ आगिमा दार्हाबाक् लागि घुघाबाक् बनै भेल झारलकलाइ ता परमेस्वरे यट्का मज्जाइसौ सिङारइस् बुनेमा तोहोरालाइ झन् ओहिं तोहोलेके पेहेर्बाक् लुगाफाटा नादेहार भेकाते? खैटे चुट्कौ बिस्वास तोहोराठालाइ?
29“ओहोरङ् भेइटे किवा खाबा, किवा पेहेर्बा बाजिहिन् तोहोलेके खोज्ते जुन्बुलह, आउँ चिन्ता जुन्करह। 30यरङ् ता परमेस्वरलाइ नहिंचिन्लाहार सन्सारक् ओर्को मानुसलके चिन्ता करट्थ्ला। यि सेप्थोक् तोहोराखर्हालाइ खाँचो रेहेर्ला बाजिहिन् स्वर्गोक् परमेस्वर बाबाक्लाइ थाहा रेहेक्ला। 31बरुस् पैल्हा परमेस्वरक् राज्जेक् खोजिमा लागह, तसौ यि सेप्थोकौ तोहोरानि जुराइदेहेर्ला।”
स्वर्गोमाहा थुप्र्याइजाइलाहार सम्पति
(मत्ति ६:१९-२१)
32येसुइ अज्झउ बोल्लाहा, “ए छोट्के बागालेहेलक्, बुन् डराहो! किसाबुने परमेस्वरे ओक्राक् आफ्निक् राज्जे तोहोरालाइ देबाक्नि खुस्सि भेल रहैस्। 33उहेसैर्हे तोहोलेके आफ्निक् सम्पति बेचिबानाइ पाइल पैसा गरिपलकलाइ बाँटह। आफ्निक् लागि नहिंफाट्लाहार झोला बाँनाहो आउँ कख्नुहुँ नहिंसिधालाहार सम्पति स्वर्गोइ थुप्र्याहो। किसाबुने ओछि ता कुन्हुँइ चोराबाउ नाप्पारेक्, घुनाहुँ नाँ खायक्। 34किसाबुने जछि तोहोरा सम्पति रेहेर्ला, ओच्छिहि तोहोराखर्ह्वाक् मन आको जाइल भेहेर्ला।”
चङ्खारो भेहिन् बस्बा पोर्लाहार
35तसौ येसुइ बोल्लाहा, “आफ्निक् काम कर्बाक् लागि टक्रिबानाइ बसह आउँ दिब्यालक् बालिहिन् धरह।#मत्ति २५:१-१३ 36तोहोराखर्ह्वा आफ्निक् मालिक बिहाओक् भोट्यारमा जाहिन् फर्किबानाइ आबाक् पैंदा दिठाहिन् बस्लाहार चाकरलकक् परौ भेहो। मालिक आहिन् दिहाँर ढक्ढक्याहे बिट्के उखर्ह्वाइ दिहाँर उद्रिदेट्थ्ला।#मर्कुस १३:३४-३६ 37तस्के मालिक आइल बेलाइ नहिं निराहिने चङ्खारो भेहिन् बस्ल उ चाकरलके स्याबास पाट्थ्ला आउँ उखर्ह्वा खुस्सि भेट्थ्ला। साँच्चिय मुँइ तोहोराखर्ह्वालाइ बोल्मेहेर्ला, उ मालिके लुगा साटिबानाइ पहुनालाइ खुवालक् परौ करिहिन् उ चाकरलकलाइ मज्जाइसौ बासाइबानाइ खुवाइ-पियाइ कारायट्थ्ला। 38ओहेरङ् करिहिन् उखर्ह्वाक् मालिक अबेला करिहिन् आधारातै अथबा बिहान पखै माटेन् आइटुहुँ आफ्निक् चाकरलकलाइ जाग्लय बस्ल देखिबुने उ मालिके अज्झउ बर्ता करिहिन् स्याब्बासि देट्थ्ला आउँ उखर्ह्वा अज्झउ खुस्सि भेट्थ्ला। 39उहेरङ् करिहिन् यि कहिनौ मनै धरह, यदि चोर आबाक् समइ थाहा पाइल सन्तक् ता उ घरक् मालिके चोरलाइ घर फोरिहिन् पोस्बाय नहिंदेलाहार।#मत्ति २४:४३-४४ 40ओहेरङ् करिहिन् तोहोराखर्ह्वाहु चङ्खारो भेहिन् बसह। मुँइ मानुसक् बेटायकौ तोहोराखर्ह्वाइ नहिंचिटाल समइहिमा आबम्बे।”
इमान्दारि आउँ बइमानि चाकरक् खिसा
(मत्ति २४:४५-५१)
41तसौ पत्रुसे येसुलाइ सोर्ल्होकुन्, “पर्भु, यि कहिन् तुँइ हाम्रानि माटेन् बोल्लो ना ओर्कोहुक् लागि बोल्लो रहस्ला?”
42तसौ येसुइ बाज्लक्, “बुद्धिगर आउँ भरपर्दो नाइक्यासे कनङ् खालक् मानुस भेट्थ्ला भेका? मालिके आफ्नि घरक् जम्मा कामकाजक् जिम्मा देनेसौ उ बुद्धिगर आउँ भरपर्दो नाइक्याइसेहे ओर्को चाकरलकलाइ चाइल्ह-चाइल्ह समइहिमा खाबाक् थोकलक् बाँटिदेट्थ्ला। 43तसौ मालिक फर्किबानाइ आइलटाकै उ चाकरलकक् नाइक्यालाइ उहेरङे कामलक् करिहिन् बस्ल देख्ते उ नाइक्याइ स्याब्बासि पाइस् आउँ खुस्सि भेइस्। 44साँच्चिय मुँइ तोहोरानि बोल्मेहेर्ला, उ मालिके ओक्राक् नाइक्यालाइ आफ्निक् सेब्भ्रोउ धनसम्पतिहुक् जिम्मा लागाइदेला। 45तर ओरोङ् नहिंकरिहिन् उ नाइक्याइ ‘मोरा मालिक अबेला आइस्’ बाजिहिन् ठान्हिबानाइ जेहेपाइ उहे खाइबानाइ माटिहिन् ओर्को चाकरलकलाइ हाट्पाट कर्बा थालिबुने, 46ओक्राक् मालिकसेहे ओहिं नहिंचिटाल घरिमा आयक्ला आउँ ओक्रालाइ बर्के साजाइ करेला तसौ ओक्राक् हालट परमेस्वरलाइ नहिं टेर्लाहारलकिहिंक् ठिकन् भेक्ला।
47“मालिके चाहाल कहिन् जानेटौ कर्बा पोर्लाहार काम नहिंकर्लाहार चाकरलाइसेहे मालिके बर्के साजाइ देइस्। 48तर मालिकक् बिचार थाहा नहिंभेहिन् साजाइ पाबाक् काम कर्लाहार चाकरलाइसेहे कम साजाइ देइस्। किसाबुने जक्रालाइ थुप्रोय चिंजलक् देलरहेला, ओहिं धेरेक्कुरे बुझाबा पोर्लाहार। उहेरङ् करिहिन् जक्रालाइ थुप्रोय चिंजलक् सोप्लो रहेला, ओहिं ओट्केय धेरे बुझाबा पोरेक्ला।”
येसुलाइ मान्ल कारने परिबार फुटेला
(मत्ति १०:३४-३६)
49येसुइ बाज्लक्, “मुँइ धर्तिमाहा आगि सल्गाबा आइल रहम्ना आउँ यि आगि आगारिय सल्गिसक्ल सन्तक् ता ठिके भेलाहार! 50मुँइ एक्टा सङ्कस्टक् बप्तिस्मा लेबा पोर्लाहार रहैस्। उ बप्तिस्मा नहिंलेबाइसम् मुँइ एक्दमे पिरामा रहम्ना।#मर्कुस १०:३८ 51तोहोलेके किस् सोंचोहोला, मुँइ धर्तिमा मेलमिलाप काराबा आइल बाजहला? ओरोङ् बोइने, मुँइ ता फुटाटे बुल्बा पे आइल रहम्ना। 52उहेसैर्हे असौ पाँच जेनाक् घर परिबारइ फाटो भेट्थ्ला। तिनजेनासेहे दुइजेनाक् बिरोधइ आउँ दुइजेनासेहे तिनजेनाक् बिरोधइ लागट्थ्ला। 53बाप्पोइ बेटायथाक् आउँ बेटायथाइ बाप्पोक्, माँइके बेटिहिंकक् आउँ बेटिहिके माँयथाक्, उहेरङ् करिहिन् सासेथाइ पुटेहेथाक् आउँ पुटेहेथाइ सासेथाक् बिरोध कर्लाहार बनट्थ्ला।”#मिका ७:६
यि समइमा भेबा आइलाहार घट्नाक् चिन्होलक्
(मत्ति १६:२-३)
54येसुइ धुइरो लाग्ल मानुसलकलाइ बोल्लाहा, “पच्छिमै बादर लाग्ल देखेहे बिट्के तोहोराखर्ह्वा ‘लु असौ ता पानि पोरेला’ बाजिहिन् बाजहला तसौ पानिऔ पोरेला। 55उहेरङ् करिहिन् दखिनक्भटे बातास चल्नेसम् तोहोलेके ‘असौ गरम चर्हेला’ बाजहला आउँ उहेरङे भेला। 56अ कप्टिहेलक्! धर्ति आउँ आकास दिठाहिन् पानि पोरेला ना बोइने बाजिहिन् जान्बा ता पारहला, तर यि समइमा भेबा आइलाहार घट्नाक् चिन्होलाइसेहे तोहोराखर्हाइ किसा बुझ्बा नाप्पारह?”
आफ्निक् बिरोधिक्सङ्हिं मिलाप कर्बा
(मत्ति ५:२५-२६)
57“अख्नि किस्ग्वा कर्बा पोर्लाहार बाजिहिन् किसा तोहोलेके नाजानह? 58कुन्हुँ मानुसे तोरा नाँओइ मुद्दा हालिहिन् नियाँधिसक् ठालाइ लेगाइबुने पैंदाहिंमा जाइलटाकै झैइ-झग्रा पोर्लो मानुसक्सङ्हिं मिल्बाक्नि कोसिस् कर। नाटेन् ता ओहिं तोरालाइ नियाँधिसक् आगारि ठध्याबाक् पारेस्ला आउँ नियाँधिसे सिपाहिलकक् हाथै सोपेस्ला आउँ सिपाहिलके तोरानि झेलखारइ हालेस्ला। 59मुँइ तोरानि बोल्मेर्ला, जरिबानाक् एक-एक पैसा नहिंतिर्बासम्म तुँइ ओछिसौ उम्कबा नापास्!”
Seçili Olanlar:
लुका 12: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
