Ap'u 34
34
Arm'ertu a Isrel avutakm a nl nam'elan a Ivai, sena sei avani a Taina
1Laha, a Taina, a natn tav'etan a Lia, la ilav'i asn a Sikup ha, iv'a a ti ipalar vitar avlak arna v'anu lera. 2Sarei, a Sekem, iv'i a natn a Hamur la ilak arna nl nam'elan a Ivai ha, kav'i mlin arna v'anu lera, ilei kauei kam'atr m'ei kan si stu m'ei, 3karn a Taina, iv'i a natn a Sikup, istudau, kalap'as a vitar lera kav'ana mamh m'ei. 4Laha, a Sekem ivr an a tetian, iv'i a Hamur, kavr ti a, “Palev' vitar lera ipav'i tav'etak.”
5Laha, a Sikup irn v'nen a ti atutakm sarei a natn tav'et, iv'i a Taina. V'eti a natn dui avlak asn plukan al nina. Sena si lera a Sikup iavr si kinkin dav'a ti avrama. 6Sarei, a Hamur, iv'i a tetian a Sekem, iv'a asn a Sikup a ti ipav'ana m'ei. 7Naran a natn a Sikup avrni, avandan al nina. Laha, ardu lera avrn istu ani ihuadau. Nlr irer istudau, sena ti ien sei iv'i mamihien asnr ardu a Isrel kam'atr m'ei a natn a Sikup. Si lera iaviviln a ti apani naran kinkin. 8V'eti a Hamur iv'ana m'er kavr ti a, “A natk, iv'i a Sekem, irn a natm tav'et istudau. Nmiman a kam'i ihua, patau ani ipav'i tav'etan, 9kavan m'arit m'a kam'em'. Nakd p'vua tav'et asnd. Kam'i pavtau a netm'i apavv'i tav'etam'em', kam'em' p'vtau a netm'em' apavv'i tav'etam'i. 10Ipanap'i lera, pavlak m'a kam'em'. Nadep' udlani iter uaki. Pavlak aranan kavan pariam'i, kavlev' sei aranan.”
11Sarei, a Sekem ivr an a tetian m'er a m'ann, kavr ti a, “Nrn ti pavrn ipap'as a kana. Sei pavmimani p'etau a kam'i. 12Ipavr ti pavtu uliena tav'et ipalil m'a sei p'etau a kam'i ipalil, v'eti nktu kam'i pr. V'eti patu kana vitar lera ipav'i tav'etak.”
13V'eti a natn a Sikup avvrpren v'nenar a Sekem m'ei a Hamur, iv'i a tetian, kavhap'il, sena ti itutakm sarei an a v'nr. 14Kavvr anr kavvr ti a, “Kam'em' nkavan si lera kavtau a v'nm'em' a dui iav'i p'au, sena ti si lera ipav'i mamihien asnm'em'. 15V'eti p'vm'ahu a si lera a kam'i, ipavr ti kam'i pavnep'a kam'em', a ti ardu udlani asnm'i apavan p'au anr. 16Sarei, p'vtau a netm'em' tav'et a kam'i, kavlev' a netm'i tav'et, kavlak m'a kam'i kavrama kavv'i v'anu ipamk. 17V'eti ipavr ti mkavv'rn a v'nenam'em' kavan p'au, kam'em' p'vlev'm'alet a netm'em' tav'et kavruh.”
18Laha, a Hamur m'ei a Sekem, iv'i a natn, arrn ip'as a v'nenar. 19Sarei, malakal lera irakn a ti ipani, sena ti ilap'as an a natn a Sikup. Hin ilil isiv' m'ertu udlani arna nl nam'elan a tetian.
20Laha, a Hamur m'ei a Sekem, iv'i a natn, arma asn pn liu na v'anu lilar kavv'ana m'er ardu arna v'anuar kavvr ti a, 21“Ardu lera avlak m'a nakd arna tamat. Sena si lera, ip'as a ti apavlak arna nadep' kavan pariar aranan, sena ti nadep' ilil kaviviln anr. Ip'as a ti p'vlev' a natr tav'et apavv'i tav'etad, kavtau a natd tav'et apavv'i tav'etar. 22V'eti si iamk uaki, ardu lera apavm'ahu a ti apavlak asnd kavv'i v'anu ipamk, ipavr ti p'van p'au kavnap'ar. 23Pavrni, plukar, siar udlani, m'a si slmar udlani apavv'i nkad. Ipavr ti p'vm'ahu ani uaki, apavlak m'a nakd.” 24Laha, nelnal udlani la avandan a pn liu na v'anu lilan nakl ha, avm'ahu a v'nenar a Hamur m'ei a natn, iv'i a Sekem. Dui udlani arna v'anu avan p'au anr.
25V'eti arna nitla napn, naran p'akr idarer uam, a Simiun m'ei a Livai, a m'ann a Taina, arlev' tali lilar, karv'a arna v'anu lil arna nut m'auar uaki, kartrp'n dui udlani avram'a. 26Kartrp'n a Hamur m'ei a natn, iv'i a Sekem, a tali lil, karlev'lei a Taina al nmahan a Sekem karuiruh. 27A natn a Sikup avrav'a asn p'ak m'ertu im'a kavlev'lar si p'sp'as udlani arna v'anu lil, sena ti atvutakm sarei an a v'nr. 28Avlev' sivsivar, plukar, tukiar, m'a si udlani iter arna v'anu lilar m'a sei iter al pitvet. 29Kavuala siar udlani, a natr papa udlani, tav'etar udlani, kavlev' si udlani iter al nmahar aranan ml.
30Laha, a Sikup ivr an a Simiun m'ei a Livai kavr ti a, “Kam'i krutakm a kana karani ti nelnal avlak arna v'anu laha, ardu a Kenan m'er ardu a Peris, apavlep'la kana. Kana nanelnal, dav'a hir apavpien hir kavmlen kana kavrpep'n kana. Apavutakm a kana m'a nl nam'elak udlani.”
31V'eti arvr ani karvr ti a, “?Iviviln a ti ipan si stu m'ei a v'nm'em' ipanep'a tav'et na navanel?”
Seçili Olanlar:
Ap'u 34: nmb
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2023 Presbyterian Reformed Church of Australia